أجنحة بلا ريش ... طارق اللبيب

الحلقة السابع عشر

اها في اليوم ده ذاتو في زول اتصل علي في تلفوني .. قال لي انت شمس الدين اخو صالح قلت ليهو نعم .. سلم علي سلام معرفة . قال لي انا زول جاي بي وصية من السعودية .. بتخص صالح اخوك .. ولقيت تلفونو مقفول . وصف لي انت وين . وصفت ليهو محلي وقلت ليهو ده التلفون معاك .. وحفظت تلفونو اسمو تقريبا محي الدين .
وبقيت افكر في الوصية المن السعودية دي شنو؟ ياربي احتمال تكون دي حقوق صالح اخوي ؟ لكن صالح حقوقو ضاعت بدري امكن دي السنة التالتة دخلت وهو حقوقو ضايعة ترجع هسي؟؟ غريبة .. بس احتمال ده يكون زول من اصحابو الفي السعودية .. مرسل ليهو حاجة هدية ولا حاجة .. المهم بقيت منتظر تلفون الزول داك يضرب لي ..
تاني يوم .. اتصل علي بس الصوت مختلف . قال لي السلام عليكم قلت ليهو عليكم السلام .. قال لي انت منو يازول؟؟ ..
قلت ليهو انا شمس الدين اخو صالح يا محي الدين؟؟ انت اتصلت علي البارح ..
قال لي انا ما محي الدين .. نحن ناس الشرطة ..
صاحب التلفون ده عثرو عليهو اليوم الصباح مقتول في الديوم الشرقية .. وفتشنا الارقام الواردة والصادرة في تلفونو .. اخر عشرة ارقام .. انت واحد من الارقام .. حدد موقعك .. محتاجين ليك في التحقيقات الاولية ..
وريتهم انا وين .. وقفلت الدكان وانتظرتهم خالف كراعي ..
والله انا في الساعة ديك قلبي انقلع من محلو .. معقول الزول الاتصل علي البارح ده اتقتل؟ .. فعلا والله انا ذاتي شكيت في الصوت حق الليلة ده ماياهو بتاع امس .. ياخوانا دي حالة شنو هسي؟ ده وكتو ؟ انا ذاتي الفيني مكفيني ..
قاعد منتظرهم جاتني عربية الطارة .. ورفعوني وجيراني كلهم يتفرجو ياربي ده سوا شنو ده ..
مشيت مركز الشرطة ولقيت هناك في صف بتاع متهمين .. وانا قاعد منشر من الساعة اتنين لغاية الساعة 8 مساء .. واتصلت على ابوي . والطيب .. وقلت ليهو ماتحكو لي امي وللبنات . وجوني الاتنين في المركز لمن سمعو انا متهم في قضية قتل الاتنين طيرو عيونهم .. وكت حكيت لي ابوي عن موضوع المكالمة ابوي راسو اتملا . وقال لي ياربي الحاصل شنو بالضبط ؟.. والزول داير بي صالح شنو؟
المهم لمن جاء دوري في التحقيق .. سالوني سؤال نكير .. البارح الساعه كنت وين؟ .. وعلاقتك بالزول؟ .. ومعاملاتك المالية؟ . وووو..
المهم انا مصر على اجابتي ودي الحقيقة .. الزول مابعرفو واتصل علي وقال لي كيت كيت ..
والمحقق مركز على انا اكتر تركيز .. كانه شايفني بكذب .. بس غايتو ربك رب الخير ..
المحقق اخر سؤال سألني ليهو.. قال لي الاستدعاء للتحقيق جاك من وين ؟
قلت ليهو اتصلو علي ناس الشرطة.. وقالو لي حدد موقعك .. نادو العسكري الاتصل علي ..
حكى الاتصال وقال الزول ده اول من رد علي قال لي .. انا شمس الدين اخو صالح يا محي الدين .. معناها الزول ده ماكان عارف محي الدين مقتول .. قايلو حي ..
المحقق قال ليهو واحتمال تكون وهمة ..
المهم الكحقق قال لي يا زول انت امشي البيت .. وماتتحرك برة الولادية .. ولاتسافر للخارج الا باذن من الشرطة لغاية مانحتاج ليك بنناديك ..
اتخارجت مشيت والله اليوم داك حيلي مهود .. وصلنا البيت .. المفروض اليوم ده امشي لي ابو نادية.. لكن انا دخلت بيتنا الساعة 12 وشوية بالليل ..
اول ما وصلنا كدا جاتنا سارة قالت والله ياجماعة الليلة في بشارة ماتتخيلوها ..قبيل النهار صالح اتكلم ليهو كلمة نحن كلنا حيلنا مات .. قال (موية) .. وكانت كلمة واضحة شديد ..
والله فرحنا فرحة .. وانا طبعا فرحتي مخلوطة بي خوف .. وخايف انو اخوي يكون متعلق بي نادية لسع لاني ما مطمئن كلو كلو .. ماعارف ليه..
كلنا جرينا على صالح جوه التلاتة انا والطيب وابوي .. لقيناهو يعاين للسقف طبعا هو مابقدر يتحرك ..
قلت ليهو ياصالح في زول اسمو محي الدين اتصل علي .. وقال لي انت اخو صالح وعندي ليهو امانة .. وووو حكيت ليهو القصة كلها
والزول ده يسمع في القصة نفسو قام ..وقلبو قعد يضرب ولاول مرة يدو اليمين تتحرك وترجف ..
ولمن عرف انو محي الدين اتقتل قعد يبكي .. لازم يكون في سر في الموضوع .. ياربي محي الدين ده منو؟
انا لازم امشي اتحقق من المواضيع دي ..
ابوي استغرب في ردة فعل صالح لمن سمع القصة وكان عندو نفس راي .. قال لي انت ياشمس الدين لازم تسأل من الزول ده منو ؟ واعرف اهلو .. امشي ليهم وكلمهم بالاتصال امكن تلقى راس خيت . لانو ناس الشرطة ماقدرنا نسألهم اي سؤال ..
ونادية طبعا تلفونها بالليل ماوقف .. وانا ماعارف ارد ليها اقول ليها شنو.. لاني خلفت الميعاد وما اتصلت عليها اقول ليها انا في الحتة الفلانية .. كنت قايل نفسي بطلع منهم بدري .. ماعارف الجرجرة الحصلت ..
رديت عليها وحكيت ليها الحصل .. نص ساعة بفهم فيها .. قالت لي المشكلة انو انا كلمت ابوي .. قلت ليهو شمس الدين جاييك .. وهو انتظرك .. وانت ماجيت .. وابوي قال لي شمس الدين ماعايزك انت متلصقة فيهو ساي ..
انا قلت ليها يانااااااااادية باكر انا بجيهو ان شاء الله.. ومايحصل الا الخير .. باكر بعيدة ؟؟؟
الى اللقاء ..