أجنحة بلا ريش ... طارق اللبيب

الحلقة الثانية عشرة

غايتو المفروض اصلو الزول مايخلي في تلفونو حاجة سرية ورسايل وحاجات زي دي .. لانو الظروف ما معروفة . ممكن حاجاتك دي تقع في ايد زول .. يضيعك .
المهم .. انا بقلب في الرسايل لقيت رسايل من واحدة اسمها سومة . كاتب عليها (سومة العسل) .. ماعارف سومة دي اسمها الحقيقي .. اسماء ولا سمية ولاسامية المهم كاتبها سومة ..
ودي بينو وبينها في رسايل .. منحطة جدا . وقذرة .. ماقدرت اكملها .. قفلتها . وبقيت افتش لي رقم نادية في تلفون صالح .. لانو جواي في وساوس كتيرة ..
لقيت في رسايل ليها تقريبا شهرين ونص او تلاتة شهور الا شوية
ورسايل بسيطة .. بالتحديد.. كدا :.
صالح .. كتب ليها .. كلمة واحدة ..
"نادية؟"
ردت قالت ليهو .. عليكم السلام ..
قاليها انتي اطلقتي من شمس الدين بالجد؟
كاتبة ليهو: .. وانت البخصك في الموضوع ده شنو؟
وليه بترسل لي ؟ انا شكيتك لي ربنا .. لانك كنت سبب في خراب بيتي .. وتاني لو رسلت لي اي رسالة بوريها ابوي واخواني ..
انت عارف ابوي عمر(تبلدي) ممكن يعمل شنو؟
.بس على كدا تاني مارسل ليها اي رسالة ..
ياسلام يانادية ياسلام .. نعم الادب والتربية. .. انا احترمتك يا نادية.. ان رجعتي لي ولا ما رجعتي لي .. انا احترمك طول العمر ..
كدا خلاص وضحت لي الامور بي مجاميعها .. بس نفسي اعرف التفاصيل والحصل شنو ..؟
اها باكر من الصباح . .. صحينا مشينا على المستشفى .. عشان نسأل من الزول ده اصبح كيف ,,
غايتو سبحان الله .. انا جواي مافي الم وشفقة عليهو .. كان مات موهامني . بالرغم من انو اخوي ود امي وابوي ..
اها انا و امي خلينا الطيب مع اخواتو في البيت .. قلنا ليهم بعدين لمن نجي .. بنخليكم تمشو ليهو .. اها يازول مشينا انا في الطريق تلفون صالح رن في جيبي . فتحت ..واحد قال لي صالح؟؟
. قلت ليهو صالح ده في المستشفى
حالتو سيئة .. قال وانت منو ؟ .. قلت ليهو انا اخوهو الاصغر .. قال لي اسمع لو دي واحدة من حركاتو ومواسيرو .
قول ليهو بابكر راسين .. من جبرة .. الزول ده انا بعد كدي بعوقو والله .. قبل مايقفل التلفون .. قلت ليهو اسمعني انت .. مستشفى بحري بعيدة؟ قال لي لا . قلت ليهو تعال هسي شوفو لو ما مقتنع .. وقفلت منو الخط ..
المهم يازول وصلنا لاقينا ابوي .. وسألناهو من حالة صالح .. قال مافي جديد .. والزول ده في غيبوبة .. والدكاترة ما طمنوني والله ..
حتي كمان قال للوالده شدي حيلك يامريم .. وخليك مراة مؤمنة .. اوعك تنهاري وتضيعي اخرتك .. قالو ما بخلو اي زول يدخل ليهو . انا بحاول استاذن ليك انتي بس لي بعدين . ومشينا قعدنا والوقت ماوقت زيارة .. دخلنا بالسلفقة والحناسة . وبقينا نتبادل مع ابوي في كرت المرافقة ... امي دخلوها .. انا اصلا ماقدرت ادخل .. ولا كنت حريص على الدخول .. ضرب لي الزول القبيل . الاسمو بابكر اب راسين .قال لي انت وين؟؟
؟قلت ليهو انا في المستشفى . قال لي انا ذاتي في المستشفى . وصف لي . وصفت ليهو انا قاعد وين .. وجاني .. زول أعوذ بالله .. الشر مارق من عيونو .. وظاهر عليهو زول حقير وسجم ورماد ..
سلم علي ومنزعج ..
قال لي بالجد الزول ده الحصل ليهو شنو؟..
قلت ليهو والله وقع من راس البيت .. قال لي كيف القصة دي؟؟ مافاهم .. قلت ليهو والله بس كانت حالتو النفسية مامستقرة . وهو بتناول مخدرات . نط من راس البيت .. وضرب راسو وجاتو غيبوبة وهسي في العناية ..
قال لي يالطيف والله دي مشكلة دي .. ايوة انا عارفو بتاع هلوسة .. بس ما بتصل للدرجة دي .. قلت ليهو بتصل .. واكتر من كدي .. اها انت خبرك شنو ؟ عندك معاهو شنو؟
قال لي داير لي منو قروش .. قلت ليهو انت من جماعتو البمشي ليهم في جبره؟؟
. قال لي ايوة انا صاحبهم . وجار الناس البمشي ليهم اخوك ديل .. واخوك صاحبي انا اكتر زول فيهم .. وكت يسطل بحكي لي اسرارو كلها .. لكن الايام الاخيرة دي غدر بي .. وقال لي قروشك مابديك ليهن .. طق السماء بي راسك ..
وهسي انا حالي دا جاي اعمل معاهو مشكلة ..

اها طبعا انا عملت فيها صاحب الموقف . قلت ليهو صالح اخوي شال منك كم ؟ يعني انت عايز منو كم ؟
قال لي ما كتيرة والله كلها 700جنية . لكن بس الحقارة حارة ..
لكن مامشكلة .. مادام الزول في مصيبة زي دي .. انا مابجيب سيرة ليهو . اها اب راسين اتونس معاي كتير . واتكلم لي عن صالح .. شكلو صاحبو شديد .. في اثناء الونسة قال لي انت شمس الدين راجل نادية ؟
قلت ليهو ايوة ..انت نادية بتعرفها من وين؟؟ ..
قال لي من صالح .. وكت يكون مولع بهضرب بيها .. وبتكلم لي عنها ساعتين . يوم كان طبيعي سألتو منها .. قال دي مرة اخوي شمس الدين .. قلت ليهو يا خايب تعاين لي مرة اخوك ؟؟ .. قال لي والله مابيدي .. ماعارف البحصل علي شنو وكت اشوفها ..
قام يوم حكى لي انها اتطلقت بي سببو .. بس كيف ماعارف .. ان شاء الله تكون رجعتها . انا ماشي الزول ده كان قام وبقى كويس ماتخليهو يقرب من بيتك .. اها ياشمس الدين انا بمشي .. ودعتك الله وودعتو وفات

.. طبعا" شكله اب راسين داير ينتقم من صالح .. باي طريقة عشان كدا حكا لي الحكاية دي ..
بس الحمد لله .. كدا بكون اداني راس الخيت مية المية .. وانا بقيت متأكد بما لايدع مجال للشك . انو نادية بريئة . الرزل الاسمو صالح . اتحرش بيها .. بس نفسي اعرف التفاصيل .. يعني صالح عمل شنو مع نادية .. والحصل شنو بالتفصيل ..
اها انا مع الوالدة في المستشفى . انا قاعد برة . اتصل على الطيب . قال لي . انت عارف الجاء في البيت منو؟
قلت ليهو اها منو ؟
قال لي جات نادية وامها . دايرين يكفرو لي امي .. وهسي نادية قاعدة جوة مع ناس سارة .. والحلة كلها سمعت انو صالح وقع من راس الصالون وهسي في العناية .
واحتمال الحلة كلها تنكسر فوقكم في المستشفى.. غايتو ناس الحلة ديل اسرع حاجة بعملوها نقل الاخبار .. هسي ديل عرفو كيف؟
انا طبعا ماعرفت اتفاجأ ولا افرح .. من جية نادية في بيتنا ..
قلت لي الطيب قول ليهم امي قالت ليكم بجي العصر . .. طبعا" انا عايزهم يجو العصر عشان اشوف نادية .. وعايز اتكلم معاها باي طريقة ..
الطيب رجع لي .. قال لي قالو خلاص بجونا العصر ...
انا من هسي جاري انادي الوالدة .. عشان نمشي سريع ننتظرهم في البيت .. قلبي داير يطير من مكانو ..
المهم دخلت بالجلالة لقيت امي واقفة مع ابوي . قلت ليها نحن لازم نرجع البيت بي سرعة .. لانو ناس الحلة سمعو بي الحصل .. وحيجونا هنا .. احسن نمشي نثبتهم هنالك .. ابوي قال ليها ده احسن تصرف ..
يعني ماخليت امي قعدت في المستشفى اكتر من ساعتين .. وطوالي رجعنا البيت .. وبقيت قاعد منتظر جية نادية في بيتنا .. عندي معاها كلام كتير .. وبقيت متحضر وبجهز في الكلام .. وقلبي ده يضرب زي الهبابة .. واعصابي متوترة ..
وكل مرة بتخيل الباب يدق ..
الى اللقاء