#ليته يعلم(أحببته منذ الصغر)

تكمله البارت ٩٠

تكمله البارت ٩٠
ليته يعلم ( أحببته منذ الصغر)
صادق:ليش ما الله يهداج وتبقين يمي
رنا:.......
صادق:ماكو احد هس الباب اقفله.....
رنا:لا ماريد....ارجع انام نعسانه
صادق:ليش
رنا:مالي خلك لأي شي ....بعدين موعلى مزاجك اني
صادق:لا تفهمين غلط...بس اني فعلا مشتاكلج..
رنا:مافهمتك غلط....فهمتك صح
صادق:ليش تكابرين وتعاندين بيه
رنا:........مولحالي
صادق:يضيمي والله احبج
رنا:مدامك تحبني ليش ما تغير اسلوبك شوي وياي
صادق:ليش شمسويلج
رنا: شنو شمسويلي...شوف نفسك شون دتحجي وياي ...عادي تعيط وتغلط بعدين تكلي تعاي يمي
صادق:.......
رنا:ماريد ابقى يمك ولاشي
صادق:ماشي..روحي نامي
كال هيج بس جان ضايج كلش مني وراح بصفحه
رنا:اي اروح أنام...شوف شون انكلب وجهك بس لان رفضت....
بعد ماكملت كلامي...صيح عليه
صادق:طبببيج مررررض لاتجيين رووووحي ناااامي
كبل طلعت وعفته.... رجعت لفراشي
بزايد ضجت..هو اني جنت مقهوره نوب هيج صار
احسه مايعرف يعتذر ...لو مايريد...أو يثولها
نمت بعد تفكير هواي
كعدت الصبح على صوت الهوسه ... اجت سرى عليه
سرى:رنا كومي يلا تانتريك ونروح للصالون
رنا:هس كايمه
كمت غسلت ورجعت غيرت لقصي
جانو ملتمين بالصالة يتريكون
رحت تريكت وياهم....بعدين لمينا الفراش وعزلنا عالسريع
وتحضرنا ورحنا اني وصابرين وسرى واختها وسراب ..نور مااجت ويانا كالت اني اتحضر بالبيت
رحنا ويه علاوي
جان اكو ازدحام شوي
قصي وياي بحضني...كل شوي سراب تاخذه وترجعه
لمن نعس ونام خليته قريب عليه
اجه دور صابرين...خلصت مكياج وتسريحه
بعدين سرى خلت غزلان يم اختها
بلشت بيها مكياج وهم تسريحه  للشعر
اني جنت موكلش متونسه...احس كلبي يوجعني ومخنوكه
ماجنت مقرره شنو مكياج أو شعر اسوي..
سرى حيل حلو ميكاجها..نازك ومرتب
بس شعر صابرين احلى...
لمن اجه سرايا كتلها
رنا:شوفي تسريحه ماريد..بس سرحي وسوي بوف من كدام
ومكياج على ذوقج ....قبل لاتبدي بيا كالت:تلبسين عدسات لولا ..
رنا: لا.....اصلا ماعندي
اخت سرى:شايله وياي عدسات صفر حيل حلوات
رنا:شو خل اشوفهم
طلعتهم ...عجبني لونهن...حاولت البسهم ماكدرت...لبستني اياهم اخت سرى
سون تغيير جبير بشكلي...حتى اني ماعرفت نفسي
بلشت تشتغل بيه
سوتلي مثل ماكتلها ..كلش عجبني المكياج مع التسريحه.يمكن هاي اكثر مره حبيت اللوك كله مع بعض ويه العدسات
بعدين بلشت بسراب ...سراب رادت مكياج حيل خفيف بناتي.. وتسريحه بسيطه مال بنات
احنه هنا صارت الساعه ١ كلش جعنا
سرى خابرت علاوي
سرى:اكلك جيبلنا شي ناكله ......اي والله جوعانين.....جيب للكل.....ماشي
بعد شوي خابر على سرى كاللها تعاي اخذيهن اني يم الباب
اجت سرى شايله علاكه بيها اكل سفري..
كعدنا ناكل...وام الصالون تشتغل بسراب
صابرين:اكلن على كيفجن تامايخرب المكياج
سرى:الحمره خربانه خربانه
رنا:عادي نرجع نجددها
سرى: طبعاً
خلصنا اكل.. وخابرت على مها
رنا:ها شونج الأمور
مها:هلا رنا...والله اني هستو وصلت بيت اهلي.. طلعت من الصالون
رنا: يعني خلصتي
مها:اي..بس البس الفستان واكمل باقي الأمور
رنا: ماشي...احنه بعدنا باالصالون..بقت سراب واخت..واخت سرى(ساره)بس مكياج
مها:خوش ....يلا اني اروح اكمل هس
رنا:ماشي
صابرين:ها اخبار العروس
مها:كملت..بالبيت هس
صابرين:خوش...بلكي هاي تخف ايدها حتى هم نكمل احنه
سرى:بعد وكت..هس بسرعه تخلص...وساره بس مكياج
كملت سراب.. وطلعت كيوت كلش..
بعد شوي خلصت ساره
ورجعنا للبيت..قصي جان نايم بحضني....وصلنا سياره مزروقه تخبل يمكن سياره صديق فراس وسياره عمي إبراهيم موجوده.طبينا جوة هم لكينا نور وفاطمه متحضرات وجده وعمى منى
منى:اللهم صلي عالنبي طالعات لعصابات
فاطمه: رنا لابسه عدسات مو
رنا:اي مالات ساره
فاطمه:شكد راهماتلج
سراب:نور ليش مالبستي هذاك اللي اخذتي
نور:ضيك
سراب:موضيك زين
نور:صهيب شافه يكول ضيك مايقبل
سراب:اها وين شافه
نور:شعليج
صابرين:وين فراس
جده:بالحمام يسبح... قبل شوي رجع من الحلاق
ولد عمي إبراهيم بالاستقبال ويه صادق
طلع فراس من الحمام وراح لغرفته
اني جنت بغرفه جده ..وقصي نايم بحضني
شفت علاوي وعدنان وسراج طبو لغرفه فراس وياه حتى يحضرونه
طلع فراس من الغرفه.. صابرين وجده وعمى منى كامن يهلهلن
بهذا الوكت الساعه صارت ٣
اجت صابرين
صابرين:اكلج فراس يكول بعد شوي نطلع للقاعه لان المعازيم عالساعه ٤ يجون...كومي البسي فستانج يلا ...عفت قصي بغرفه جدة
وطلعت الفستان والحذاء..ففلت الباب وبدلت ملابسي
طلعت من الغرفه
سرى:الله الله شوفن اللبس شون طلع الجمال كله
رحت وكفت مقابيل المرايا مال المغاسل حتى اشوف شون طالعه.لان غرفه جده مابيها مرايا
باوعت.. فعلاً طالعه گمر هههه
بعد ماخلصنا تحضيرات كامل...
علاوي :يلا راح نمشي
صابرين:نروح ناخذ مها اول شي مو؟
علاوي:لا فراس يكول روحو للقاعه...هو عود يأخذها وييلحكنا
اجت سراب عليه
سراب:اكلج بابا يكول يلا تعالن
رنا:هس بس اجيب قصي
لفيت الشال على راسي..ورحت شلت قصي
جده:انطيني اياه اني اشيله
جده كلش تحب قصي ودايما تخلي يمها
طلعنا اني وسراب وجده
صادق جان واكف يم السياره هو وعدنان وحسن
صعدت جدة من كدام وقصي بحضنها..واني صعدت من وره وسراب ونور وحسن وياي
سراب:اكلج رنا بس شوفي مكياجي عدل
رنا:اي عدل
صابرين وسرى واختها صعدن ويه علاوي
وعيله عمى فاطمه وعمي ابراهيم هم كلهم جانو ملتمين
باوعت على صادق  يحجي ويه عدنان..جان لابس بنطلون اسود وقميص نيلي..
بعد شوي اجه صعد بالسياره ..
مشت السياره ...وبطريق باوعلي بالمرايا ..صفن عليه شوي ورفع حاجبه ...
سويت نفسي مامهتمه اله..بس بداخلي مهتمه
المهم كل الطريق يباوع بالمرايا..لحد ما وصلنا
نزلنا بالقاعه....جانت الأجواء كلش حلوة
طبعاً بس نسوان وجهال موجودين
شغلو الديجي...بعد شوي اجه فراس ومها وياه
اكو فقره حلوة للعرسان يطبون لوحدهم مع اغنيه رومانسيه
طبو سويه...ومها ماشاءالله طالعه تخبل وفستانها حيل حلو .. وفراس مبين فرحان
هم خواتها وامها اجو وراهم...وباقي المعازيم هواي ناس من جيران ومعارف واهل صهيب هم اجو
بعدين كعدو عالكوشه....بلشت الاغاني والأجواء الجميله كلش
وصابرين چتلت روحها بالركص...حتى مها تباوع عليها مبتسمه وهي وفراس يشاورون
نور مكضيته يم خوات خطيبها ماختلطت كلش ويانا
صار وكت العشه...تعشينا...وهم وراها رجعنا نركص
قصي يم جده كل شوي اروح علي وأرجع
بعدين صارت فقرة انو اخوت العريس واصدقائه يفوتون
طب علاوي وولد عمي إبراهيم
احنه وكفنا بصفحه وخليت الشال على راسي
علكوها بالدبج والركص...ضلو نص ساعه بالقاعه تاطلعو
بعد ماشوي تاخر الوكت...بدو ياخذون صور عائليه مع العرسان .. وراها طلع فراس ويه الزلم
رحت يم مها
رنا:ها وضعج
مها:زينه
رنا:واخيرا اليوم راح تباتين يمنا
مها:اي اي
رنا:ههه شبيج
مها:مابيه شي
اجت امها واختها يحجن وياها..
وره شوي خفت المعازيم...فراس جان بره ويه الزلم
بعدين طب هو وصادق وعلاوي ...صادق وكف يم جده وعمى منى
اني جنت كاعده عالطاوله وصابرين وياي
صابرين:شوفي اجه رجلج
رنا:اي شفته
صابرين:صدك ماتصالحتو
رنا: مابينا شي..
صابرين:ها معناها ترجعين وياه للبيت اليوم
رنا:لامارجع
صابرين:لعد ليش ماتقبلين ترجعين إذا مابينكم شي
رنا:........
صابرين:ههه شوفي احسه ديدور الج بنظراته  ...
عود رفعت ايدها صابرين تاتشوفه انو احنه هنا
رنا:شبيج ترا مبينين يعني خما بغير وادي
صابرين:لاخطيه ماشافنا
نور راحت وكفت يمه
باوعت اله جان يباوعلي
بعد شوي اجه حسن يصيحني على قصي لان يبجي بس اني ماسمعه من صوت الديجي
رحت على جده اخذته منها...اني جنت مرضعته قبل شوي يعني مو جوعان
شلته سكت شوي بعدين رجع يبجي...
جده:خما جوعان
رنا:لا...بس يجوز ضاج من صوت الديجي
صادق:جيبي
اخذه مني وطلع بره .. بقيت على طاوله جده كاعده
بعد ربع ساعة اجه..جان واكف يم باب القاعه
من شافني اشرلي يعمي تعاي
رحت يمه
صادق:خل نكعد هنا
اكو طاوله قريبه عالباب كعدنا عليها ..صاح سراب اجت اخذت قصي منه...كعدنا بس اني وياه ..جان يوزع ابتسامات بالبدايه
صادق:ايي يابزونه اخبارج
رنا: تمام اخباري
صادق:خوش خوش  ترا ترجعين اليوم وياي للبيت
رنا:......
صادق:اي من هس اكلج
ماعارضته بالكلام سكتت ... احس جنت منتظره يعتذر أو يحجي كلام حلو
صح نظراته مليانه كلام بس اني ردت اسمع
رنا:اي وبعد
صادق :سلامتج
باوع للساعه اللي بأيده
صادق:ماكافي...شوكت تخلص الحفله....
رنا:مابقى هواي
صادق:ليش ننتظر...خلي نرجع للبيت..
رنا:......انت ليش هيج ؟
صادق: شقصدج
رنا:يعني حتى ماحاولت تراضيني بطريقه حلوة ..
صادق: شون يعني
رنا:هيج داحس كبريائك فول وشايف روحك هم ...تستنكف تراضيني مثل مااني اريد
انزعج من كلت هيج
صادق:شو كمتي تلوصين
رنا:لامالوص هذا الصحيح
صادق:اهاا
إني من حجيت هيج ماجان ابد بقصدي شي غير انو فعلا حابه يعتذر مني
رنا:يعني حتى ماحاولت تراضيني أو تصالحني مثل البشر
صادق:شنو شايفتني حيوان لو البشر احسن مني
رنا:لا شبيك موهيج قصدي
صادق:انتي اصلا ماتردين حتى اراضيج عاجبج تكونين بوحدج ودتتحججين بأي شي حتى ماترجعين...بس تدرين شغله ضلي ولاترجعين
كال هيج وكام طلع
كلت هذا شبي ياربي شو صاير فد مره اعصاب ومايتحمل اي شي
انقهرت هواي هواي...لان فعلا جنت حابه نتصالح بس ردت اسمع منه كلام حلو لااكثر ولااقل
بقيت بمكاني...صاحتني سرى..بس ماكمت احس خلاص من صدك خرب واهسي بكلشي ..
بعد مافضت تانرجع...فراس ومها تايطلعون ...جده اخذت قصي وطلعت ...اجه حسن عليه
حسن:يلا رنا تانرجع
رنا:هس
طلع فراس ومها واني وصابرين وسرى وعلاوي
هستو وكفت مقابيل السياره ...حسن صعد
صادق مخوزر كلشش وجده صاعده وقصي بحضنها..
والبنات من وره
شو السياره شخطت وراحت.... اني بقيت واكفه و مصدومه ..لان هو يعرف اني ماصعدت. بس صعد حسن كبل شغل السياره وطلع ولااهتم اللي
الشعور اللي صابني بوكتها ماعرف شون اوصفه
من باوعت الهم راحو....كلت فعلاً اني هاي مكانتي الحقيقة ابقى بوحدي💔..هو اهم شي عنده عيلته وأهله..لوقصي يمي جان انتظرني...بس قصي يم امه.. ولهذا راح ولاعبرني
احس هيج كمت اغلي بداخلي وابلع بريكي من القهر
لان اني ماكتله شي..حجيي جان عادي ومن حقي انتظر منه اعتذار وكلام حلو...لان هو ضربني ومن اجه يرجعني..جان أسلوبه ابد ماحلو ولامنطقي...من بعدها لاحاول يحجي وياي بهدوء ولاشي... فكلامي اله جان من باب عتاب وهو فسره بكيفه
فبهذا الموقف من شغل السياره وراح اثبتلي هو بس يهمه عيلته وأهله حتى لو يخطأون...نور سوت المحد سوته بس ماصد عنها اوشي ومستحيل يسوي هيج موقف ويه بناته
بقيت واكفه...اجت سرى
سرى:ها شو مارحتي وياهم
رنا: مادري شو راح
سرى:......بيكم شي انتو ؟
سكتت بس غوركت عيوني
علاوي:هس خابرني صادق كال خلي رنا ترجع وياكم
رنا:....... يكفي المكان
علاوي:اي يكفي.. يلا امشي ..
فراس :انتو روحو عود نلحگكم
صعدت صابرين وجهالها وسارة من وره
وسرى وغزلان بحضنها من كدام
صابرين:يلا رنا تعاي صعدي
صعدت بالكوة لان المكان ضيك
كل الطريق محموسه واكل بروحي ...وصل أخت سرى لأهلها بالبدايه
بعدين وصلنا البيت جانت سيارته موجوده يم الباب وهم فراس واصل قبلنا ...
نزلنا...طبيت جوة.. جانو كاعدين بالصاله ..ماباوعت عليهم
اني كبل رحت ويه سرى لغرفتها
رنا:اكلج بس انطيني العلبه اريد انزع العدسات
طلعت العلبه...نزعت العدسات...ارتاحيت من نزعتهم
كعدت عالتخت
سرى :فراس بعد ماوصل يمكن
رنا:......
سرى:اكلج شبيج انتي وصادق... وليش راح ومااخذج .
غوركت عيوني
سرى:شبيج شاكو ....اني كلت اليوم راح تصالحون وترجعين وياه للبيت ..لان شفتكم كاعدين سويه بالعرس
رنا: اوف ياسرى كلبي يوجعني
سرى:سلامتج
رنا:والله ماكتله شيي...كبل تعصب عليه وانزعج وطلع...تخيلي اجيت تاصعد بالسيارة شغلها ومشى
سرى :.......ليش سوى هيج
رنا:واني اعرف ليش يعني اووف.
طب علاوي للغرفة ...باوع علينا عرف اكو شي.
علاوي:شبيج رنا
رنا:......
سرى: مقهورة من صادق
علاوي:ليش شبي بعد وياها
سرى: مادري...
سرى حجتله بصوت ناصي مثل مااني كتلها
علاوي: ترا صادق زين زين بس يجوز جان..
رنا: لاعفيه لاتدافع...ليش قليله لمن صعد حسن شغل السياره وراح خلاني بوحدي واكفه
علاوي:........لا والله ماراهمه من عنده......اني احجي وياه
رنا:لالاتحجي شي وياه...هو طبعه صاير صعب حيل أكثر من قبل.... بس ابد مالي دخل بي بعد سوايته هاي
طلع ونست العرس من خشمي بهاي عملته
ضاج علاوي من سمع الصار
طلع من الغرفه
اجت سراب شايله قصي ..اخذته منها غيرت ملابسه ونومته
بعد شوي اجه فراس ومها
وكفت يم باب غرفه علاوي
صابرين وجده كامن يهلهلن...راحو لغرفتهم
صادق اخذ عيلته وراحو
اني رحت لغرفه جده...خليت قصي بفراشه ...وفرشت اللي ونمت....الصبح كعدت بس سالفه البارحه مثل شي مدحوس ابكلبي وابطني كلما اذكر اطك قهر...كعدو فراس ومها
سويت الهم ريوك..واخذته لغرفتهم ..فراس جان بالاستقبال يم جماعه يسلمون عليه ..ومها كاعد تخلي مكياج وتتحضر
رنا: صباحو ياعروستنا
مها:صباحو
رنا:شونج شون وضعج
مها:زينه زينه
رنا:هاا شونها ليلتكم...ولو مفروض ماسئلج بس لان صديقتي
مها:ههه الحمد لله عدت على خير
رنا:اي زين الحمد لله ....تريكي
مها:خل يجي فراس
رنا:هس اخلي مصطفى يصيحه ..رحت كلت لمصطفى يصيح فراس
بعدين رحت عزلت البيت وكنسته..وسرى بالمطبخ
بعد شوي اجت صابرين...وبعدين خطار هم يجون يسلمون
عبر الوكت طبيعي...العصر اجه صادق والبنات
اني جنت بالمطبخ احضر عصير للنسوان الجوه وصابرين وياي
طبت سراب
صابرين:هااجيتتو
سراب:ايي ردت من الصبح بس بابا ماقبل كال العصر
صابرين:اي خوش
اخذت الصينيه ورحت وديت للخطار ...مها هم جانت كاعده
نور طبت كعدت يم جده
عبر الوكت وسوينا العشه.. جان اكو زلم...صبينا الهم بوحد والنا بوحد
وره العشه جت ام مها وخواته يياركن الها
كلش فرحت مها من شافتهن
صفنت عليها وهي تسلم عليهن بحراره وحضنت امها
دايما اشعر بنقص تجاه هيج شي لاني فاقدته... شعور الأمومة اني كلش احتاجه.. مرات اكول لوبس عندي ام...خلي ماعندي اب او اخوة بس كون ام حنونه يكفيني هالشي 💔..هم رحت حضرت بقلاوة ومكسرات وعصاير الهن
صادق لي هس ماشفته..ولااريد اشوفه لان مجروحه كلش كلش منه....بس اجت سراب اخذت قصي اله خلاه يمه
بعد ما تاخر الوكت وراحت الناس.. فراس ومها جانو بغرفتهم
اني عزلت غرفه جده ونضفتها كامل وفرشت اللي ولقصي
جنت اطبطب علي حتى ينام
شو طب صادق للغرفة وسد الباب وعيونه بگصته
صادق: ليش شاكيه مني لعلاوي
صفنت بالبدايه
رنا:ماشكيت
صادق:لاتجذبييييين ..كلشيي حاجيتله عن البارحه
رنا:......مارحت شكيت اله....اني جنت بغرفتهم احجي ويه سرى وهو اجه وشافني وسألني
صادق:يعنيي جنتي تشكين لسرى مووووو
رنا:....... موهيج
اني جنت احجي وياه بهدوء  رغم الغضب اللي بداخلي ... احتمال بأي لحظه انفجر 💔
صادق:ليشششش تحجيييين هاااااا..موووعيييب ...شنوو اني جاهل يجي يكليي ليشش هييج تسوووي وياه رنا ..
رنا:ترا هو ماقصده غير شي....راد يحجي وياك...
صادق:ووولج انتيي بيييج شييي...يعنييي من ايي قندددره مشكله تصير تروحييين تسووولفين مووووعيييب ياغشييمه
رنا:لاتصيح كعدت الولد
صادق:اصييييح وانعل......راااح تخبلييينيي...موووكل مشكككله واحد يرووح يحجييي
رنا: يعني انت بالنسبة الك اللي سويته وياي البارحه شوي...شي عادي مشكله عادي مو
صادق:وشنوو سويت هاااا شنووو
رنا:وتسألني شنو سويت ؟؟عفتني ورحت...اخذت امك وعيلتك وعفتني...عادي عندك هالشي مو!؟
صادق:اييي من وره سوالفج...ماتعرفين تسولفين
رنا:ليش شكتلك ها شنو كتلك
صادق:تلوصين بحجيج ماتخلين موقف يعبر سلامات اله تجفصين بالحجي
رنا:ومن وره هاي تروح وتعووفني ..تكول لعلاوي خلي رنا ترجع وياكم والله عيب
من كتله هيج رد عليه بطريقه قاسيه 💔
صادق: اييييي المررره اللي تضل تعاااند بيه اعووفها وماباوع عليهاا
اني هنا ماكدرت اسيطر على نفسي... حاولت  كلش بس بعد ماسمعت كلامه فقدت ....حتى كمت ارجف
رنا: مدام هيج روح يلااا روووح ماريد اشوفك
صادق: شنووو روووح ووولج سووولفي بأدب يااارناااا تراااا كفرتييني عاااد
رنا: عووفنيي لعد...انت موتكول المره اللي تعاند بيه اعوفه
صادق:اذا تبقين بهذا اسلوبج ويااااي يارنا قسماً بالله...
رنا:شسوووي هااا.....تعوف مو.......يلااا روح هس وأخذ عيلتك وروح...ولو انت رحت وعفتني لان اني مومن ضمن هاي العايله الكريمه.....
طبت علاوي
علاوي:ترا صوتكم طالع..
صادق:ماكو شي روح علاوي
رنا:بلي اكوو كلشي اكووو... تسووي كلشي موزين ويايي وفوكاها انت راعي المال نيه
علاوي:يااباا شبلاكم هس والله عيب
صادق:مامرررربيييه وكحححححه ماتحترمييييين ..بنت ال......*
رنا:لاتسب اهلييييي.....الميت والطيب مايخلص من لسانكم
علاوي: رناا كافي
علاوي اخذ صادق وطلعو
اني بقيت اكل بروحي ودمي فاير
كمت ابجي لان كلامه مثل سجاجين بصدري
اجه علاوي عليه
علاوي:موهيج تنحل
رنا:لاتنحل لاتنحل ماريد تنحل مااريد...اصلا اخوك ماااريده ماااريده بعددد مااااريده... البارحه يعووفني وحدي مثل الچلب...وهس يكلي التعاند اعوفها وماباوع عليهااا..ولااني اباوع عليي بعدددد لو اموووت
سمعني وطب للغرفة
صادق:علاوي روح وصل البنات للبيت
علاوي:حتى تتعاركون براحتكم
صادق:ماكو شي روح وصلهن
طلع علاوي وسد الباب
صادق: اول شي اني ماعفتج... انتي خوزكتيني كلش ورحت متعصب منج..خابرت علاوي كتله خل رنا ترجع وياكم
رنا:لاتبررلي اي شي
صادق:موابرر هذا الصار من صدك .... تعرفين زين شكد احبج وردتج ترجعين وياي للبيت
رنا:لا ماتحبني ابد كله سوالف...وكت المواقف يبين كلشي
صادق:ايييه ايييه والله أنتي لاحظ ولابخت
رنا:انتووو موووانييي
فتح الباب مصطفى ...
مصطفي:عمووو يصيحك بابا
صادق:هسس جاااي..... كافي يرنا ترا والله أعصابي تلفت شنوو نضل هيج
رنا:كول لروحك كله من وراك
صادق:ماشي....شوي وارجع
طلع من البيت...وطبت جده وصابرين
صابرين:شبيكم بعد صوتكم جان طالع.....وليش تبجين
جده: الله يساعد كلبك صادق... مگضيتها بس تتمزعل وهو يرفد الج حتى ترضين
رنا:جده ليش تحجين بكيفج...ياتوسل ...ليش ابنج يعرف يعتذر نوب يتوسل
جده:استحي على نفسج وارجعي لبيتج ..تدورين اعتذار ومدري شنو
رنا:اصلا عليش احجي وياج...لوانج صحيح ماجان البارحه رحتوو وعفتوني... جان ماقبلتييي...بس كلكم نفسس الشييي...
جده:الله يعلم شون غثيتي حتى جبرتي يخليج...بس اذا ماخلي يكسر خشمج ويأخذ ثانيه علييج صبريلي
رنا:اخذذذيله ثانييه وثالثه....اصلا مني تتتحملكم ...عود منو مثلي تتحمل خباثت وحقارت بنت ابنججج..بس رنا المكروده مجبووووره تتحمل لان ماعدها اهل
صابرين: يوووم شهالحجي هذا هسس...
جده:هو هذا دواهااا.. شايفه روحه علي...صارلج شكثر هنانا وماباوعتي اله شنوو يضل يتوسل بيج...قابل ماكو بدنيا غيرج
رنا: محد شايف روحه غييركممم.....لاتخافين ابنججج مايتوسل بيه ابد اطمنييي
رجع للغرفة
صادق:يووم كافي وعوفي السوالف التعبانه
كمت من مكاني وشلت قصي
صابرين:وين تروحين
رنا:مانام هنا بعد .. اخذت قصي وصعدت فوك ..فرشت اللي ولقصي وسديت الباب وكعدت بمكاني
انفتح الباب
صادق:يلا كومي وياي...ماتنامين هنا.....امشي اخذج وياي للبيت
رنا:ماروح عوفني هنا
صادق:لا والله ماعوفج
اجه كعد يمي
صادق:ماهديتي شوي
رنا: هاديه
صادق:خوش... شوكت تحنين علي
رنا: اني دايما حنينه... انت اللي حنيتك راحت
صادق:شون راحت
رنا: ماعرف... البارحه بس عاتبتك شون رديت علي
صادق:اي صح لان ماجنت مستعد نتناقش اصلا ردت غير رد منج
رنا:اني ردت غير كلام منك
صادق:حقج.... يلا حياتي امشي وياي للبيت
رنا:ماريد....لي هس مقهوره من سوايتك
صادق:ياسوايا
رنا:اي هنا كثار..تريد اعددلك
صادق:خل افرشلي هنا الشغله مطوله .....زاد مايحتاج فراش..انام يمج
رنا:........
صادق:والله كلش مشتاكلج ومشتاك لسوالفج... احجي كولي شنو تردين احجي
رنا:.........
صادق:لوكايلج اسكتي جان انفتحتي عليه... سبحان الله
رنا:اخر فتره كل تصرفاتك وياي موزينه
صادق:اي
رنا:واكثر شي يزعحني لمن تغلط وياي وماترجع تصلح غلطك
صادق:وبعد
كمت احجيله وافضفض شكو شي بكلبي..هو بس يسمعني
شوي شوي كام يمسد بشعري
صادق:والله كل كلامج صحيح
اندك الباب
صادق:منو
سرى:اني
كام فتح الباب
سرى:بس هاي اللهايه مال قصي بقت بغرفتتا
اخذها منها
صادق: علاوي اجه
سرى:اي اجه
نزل صادق..واجت سرى كعدت وياي
سرى:ها شونكم..مافضت
رنا:.....
سرى:شوفي رنا اريد انصحج...اني بالعاده مايعجبني ادخل...بس هالمره اريد افيدج
رنا: كولي
سرى:رتبي امورج ويه صادق احسن الج... انتو عانيتو هواي لبين ماتمت شغلتكم...ليش حتى هس تصير مشاكل من وره نور وغيرها... كوني اكبر من هالشي ..ليش حتى نور تشتفي بيج..وعمتي بكل مشكله تصف وياهم عليج...ترا انتي ماالج غيره وهو يحبج وزين عليج..حاولي تسايرين الوضع حتى لو مرات يخطا بحقج اذا عرفتي تصرفين صدكي هو يتندم ويرجع يصلح خطأ ترا ماكو رجال ملاك...دايما فكري بأبنج خلي بين عيونج..فكري لاسامح الله يكبر وبينكم هيج مشاكل  اني ماكاعد اكلج تحملي ضيم وقهر ورضي لاا.بس اكو امور تنحل بالمسايسه مو كلشي زعل....جديات والله اكسبي كل المواقف لصالحج واعرفي تصرفي
كلش تاثرت بحجي سرى لان فعلا كلامها صحيح .
رنا: صحيح حجيج..اني اعرف صادق يريدني كلش..بس تدرين مرات ماسيطر على نفسي ماتحمل اذا يغلط وياي اتخبل
سرى:هاي تصير من الضغوطات...بس حاولي شكد متكدرين تتخطين هاي
رنا: أن شاء الله....طلعت سرى وبعد شوي هو اجه
صادق: ها يروحي مانرجع هس
رنا: خليها بنهار..شوف قصي نايم واني هم كلش تعبانه
صادق: ماشي..طفه الضوه
واجه تمدد يمي ...رجعنا نحجي
رنا:سمعت جده شتكول....اله اخلي ياخذ ثانيه عليج
صادق:شعليج بأمي تخذرف...هو انتي شالعه كلب كلبي نوب ثانيه صدك جذب... بعدين اني ماخذ عليج ابد لو شمايصير شعندي غيرج
واحنه نحجي دك موبايله
صادق:الو
جنت اسمع صوت نور مثل كأنما تبجي
نور:عفيه بابا تعال
صادق:شاكو شبيج
نور......
صادق:سولفي شبيييج
نور:بابا هس خابرني صهيب يريد يخرب الخطبه.....يتببببع