Faithfully Kept (FK Series #4)

Kabanata 6

Bata pa lang ako ay pinangarap ko na ang makatira sa magandang bahay, kaya sa tuwing nakakadalaw ako sa mga kaklase kong malaki at maganda ang bahay ay iniisip ko na balang araw magkakaroon din kami ng ganoon, pero maagang binawian ng buhay si Papa kaya hindi man lang niya naranasan iyon. Pinangako ko pa naman na balang araw makakaranas kaming makatira sa ganoong klaseng bahay. Madalas dati kung kani-kanino na lang kami nakikituloy sa kamag-anak namin. Nag-re-renta lang kasi kami tapos kapag hindi kaya titira kami sa bahay ng Tita o Tita namin. Ngayon tumagal kami manirahan sa apartment ni Tita.

Napatingin ako kay Benny na mahimbing ang tulog. Nagluto naman ako ng sinigang na bangus. Sabay kaming kumain ni Benny. Naghatid pa ako ng pagkain kila Tita sa taas.

Mabilis na lumipas ang araw. Ngayon nga ay Sabado at makakapagpahinga ako. Kaya nilaan ko ang oras ko sa paglinis ng bahay at pagtulog sa hapon. Madalas akong tine-text ni Yael, pero hindi ko naman nag-re-reply. Nag-send pa nga ito ng pang-load ko pero ayoko talaga siya munang kausapin.

Sa mga nangyari sa nakalipas na araw, napag-isipan ko na lang ibalik kay Chezka ang pera. Hindi ko pa naman iyon napapa-en cash. Iniisip ko kasi baka magamit ko kapag emergency. Nakatago pa rin siya hanggang ngayon.

Pagkapasok ko sa room ay wala pa si Clea. Himala, ako pala ang nauna. Maya maya ay dumating na rin siya kaya nginitian ko siya. Natapos na namin nakaraan pa iyong project namin. Hindi mapaglagyan ang tuwa ni Clea nang makitang may sagot sa surveys si Lander. Sabi niya pa ay mas na-inspire raw siya mag-sipag.

Mamaya nga sa trabaho ko ay naisipan niya rin akong dalawin.

"Papayagan ka ba no'n?" Tanong ko nang kumakain kami ng lunch.

"I can find ways," sagot niya. Naikuwento niya kasing sobrang strikta ng mga magulang niya kaya hindi siya madalas na nakakalabas.

"Papasama na lang ako kay Storm," aniya.

Lumawak ang ngiti ko. "Mukhang nagkakamabutihan na kayo, ah."

"What? No! That won't happen."

Hindi ko na lang binanggit iyong sinabi sa akin ni Storm na mahal niya raw si Clea. Buhay naman nila iyan, at wala akong karapatang mangialam.

"Pakilala mo ako ro'n kay Yael. Iyong crush mo na lagi mong kinukuwento."

"Huh? Anong crush? Hindi, 'no! Hindi ko siya crush!" Pagtatanggi ko pa. Hindi naman, eh! Sa totoo lang, medyo crush lang naman.

"I know you like him, Bea."

"Hindi nga kasi. Kulit mo." Nagpatuloy akong kumain.

Nakakainis. Mas lalo ko tuloy inisip si Yael.

Nang nasa trabaho na ay abala ako sa pag-se-serve ng drinks. Dahil ilang araw na ako rito naging pamilyar na rin ako sa anong klase iyong inumin nila.

Namataan ko naman si Clea na kumakaway pa. Kasama niya nga si Storm sa tabi niya. Lumapit naman ako sa kanila.

"Uy!" Bati ko.

Napataas ang kilay ni Clea sa paldang suot ko. "Ba't ang iksi niyan?"

"Ganyan talaga rito," sagot ko.

"Hindi naman ganyan sa iba," kumento niya habang nakatingin sa ibang waitress.

"Kailangan ko raw gawin, eh."

"Who's your manager? I'll talk to them."

"Naku, Clea huwag na! Baliw ka diyan. Ayos lang. Sanay na ako sa ganitong suot. Ilang linggo na rin ako nag-ta-trabaho rito."

"Sigurado ka ba?"

Tumango ako. "Oo. Kaya enjoy kayo diyan, ha."

"Okay. Saan si Yael?"