حرم العقيد (الجزء الاول)

🍃3

(3)

#رواية_حرم_العقيد
(قرأه ممتعه اتمنى ان تنال اعجابكم🌱)

بقلم سيف الله...🚬
يوسف ببرود: زواج مش متزوج تبي تاخذ وحده خوذها انت تزوجها انا لا طلعني من راسك
حارث بعصبيه: احترم نفسك والعروس انا تكلمت مع باتها وموافق ولو ترفض يا يوسف اقسم بالله امك واختك ماعاد اتشوفهن لو تمووت
يوسف بعصبيه: تي كيييف هكي الزززح حياتي انا هيا كيف تقرر فيهااا انت وتخطبلي النننم مانبش امه الزواج الززح
الحارث صبى وخبط بالعكوز بقوه
الحارث بعصبيه: انتهى الكلام بكرا تمشي امك واختك يشوفن العروس ويحددوا موعد الخطبه
مشى الجد ويوسف صبى وقعد يعيط ويخبط في الكراسي والطاوله وبعدها خش للحوش طاح في الصاله على الكنبه ورقد
.......................................................................
ثاني يوم مر الوقت عادي ويوسف مش عاجبه شي وطايرتله
يوسف بعصبيه: ورحمة باتي انهججها الي تبوا تخطبوها ليا
سيرين وامها يضحكن على كلام يوسف وفصلته
.......................................................................
عند غزل....
اسماء بعصبيه: تي نوضي درهتي كبدي يابنت نوضي ساد نوم شنو الخميره هذي
غزل بصوت ناعس: ماما بنرقد خليني
اسماء بعصبيه: صبي قلت جايين عرب وانتي منخمده
غزل قعمزت ومتعصبه
غزل بعصبيه: من العرب الي جايين في الصبح شنو البراده هذي في شي اسمه ناس راقده ناس منخمده
اسماء بضحكه : جايينك خطاب نوضي
غزل بصدمه : خكاب شنو النبي اتنوضي فيا عشان خطاب نبي نرقد خليني
وبعد ساعه من النقاش بين غزل وامها صبت غزل للحمام دوشت ولبست ودارت الي لازم اديره اي بنت في يوم بيجوها عرب يشوفوها
غزل بتوتر : ماما من العريس من العرب
اسماء بهدوء: ناس نعرفوهم بعد ايجو توا تعرفي
.......................................................................
الساعه 5 العصر

جميله بهدوء: يوسف يهديك ربي صبي البس وقت هيا
يوسف بعصبيه: منبش نمشي معاك الززح امشي قوليلها بنخطبوك وتمت خلاااص عليش ماشي معاكم انا
سيرين بضحكه: تي امشي عشان تشوفها
يوسف ابتسم بخبث : قصدك بنشوفها
جميله: اها جدك قال ديروا نظره شرعيه بالمره
يوسف بخبث: اممم استنوني نلبس بسرعه وجايكم
ركب يوسف لداره لبس وتعطر ورتب روحه ونزل
يوسف بهدوء : هيا ولا نمشي وانسيبكم
جميله: تبارك الؤحمن على اوليدي غزال
سيرين بضحكه: مستعجل هذا غير متبش معناها كان تبي راهو بايت عندهم من امس
يوسف بحده: اسكتي واطلعي كان تبي وجهك يقعد سليم زي ماهوا
ركبوا في السياره
يوسف بحت في امه وولع السياره
يوسف بحده: من اي كوكب جايبين امها وين تسكن ولا عطوني رقم حد من تريس عيلتهم يوصفلي المكان
جميله ضحكت : مشعارف عليش طالع بينا بالسياره حوشها خطوه اهو
يوسف بحت في الحوش ولكن ماجش في باله ان هوا نفسه حوش غزل
يوسف بحده: باهي هي انزلوا
نزلوا وخشوا وخش يوسف للمربوعه وقعمز مع باتها ويهدرز معاه
نزلت غزل وبعد شافت سيرسن وامها انصدمت
غزل بصدمه: سيريييين شنو جيبكم انتو متقولش انتو الي جايين تخطبوا
سيرين تضحك: اها اها نحن
غزل بصدمه: وبتخطبوني لمن ان شاءالله مش خوك المعقد المريض النفسي
جميله قلبت وجها معجبهش الكلام
جميله بحده: كنه يوسف مليون بنت اتمناه عقيد وبحوشه وسيارته وشغله
غزل بصدمه: قلتيها بروحك مليون بنت وانا مش من المليون بنت
امها تفنص فيها ولكن غزل ولا على بالها
جميله بحتت في اسماء
جميله بحده: تكلمي يا اسماء الكلام هذا مايصيرش
غزل قعمزت جنب جميله
غزل بهدوء : ياعميمه يا عمتي الغاليه توا بالعقل ولدك هذا ب اسلوبه وكلامه يزوجوه عليش تظلموا في بنت الناس معاكم خلوها تعنس في حوش هلها اشرفلها من العيشه مع الغجري ولدك
جميله تبحت فيها بالجنب وساكته وسيرين ميته من الضحك
غزل بهدوء : بنمشي انظيف ولدك القهوه وان شاءالله ماينفصل عليا لان وربي ماني ساكتتله
صبت غزل ومعاها سيرين للمطبخ وضيفوا الصبايا
وجا وقت تطلع غزل ل يوسف في المربوعه
خذت سفرت القهون في يدها ومشت للمربوعه خشت وباتها طلع حطت سفرت القهوه
يوسف رفع راسه وبحت فيها
يوسف بعصبيه: ان شاءالله انتي العروس
غزل قلبت عيونها: اها انا شنو مش عاجبتك يا حضرت العقيد
يوسف بعصبيه : اهاا مش عاجبتني انتي ولسانك الطويل الملوي على رقبتك سبع مرات
غزل قربت منه وحطت سفرت القهوه على الطاوله
غزل ببرود: اشرب اشرب القهوه وروح قوللهم ماعجبتنش اصلا انا هكي هكي بنرفض مناخذش واحد مقعد زيك اوكي
يوسف بعصبيه : من المعقد يا ام لسانين
قربت منه غزل ولصقت فيه حركت يدها على لحيته
غزل بهدوء ودلع: انت المعقد ياحلو
يوسف ساكت ويبحت فيها قرن حواجبه ويشرب في القهوه
غزل ضحكت وقعمزت في مكانها وتشرب في القهوه وتبحت فيه
يوسف بهدوء: اسمعيني هنا انا منبش نزوج
غزل ببرود: حتى انا مش ميته عليك
يوسف بحده: معناها ارفضي وانا نرفض
غزل ببرود: هيا كمل القهوه كان قالولي ان انت الي جاي تخطب راهو ماتعبتش روحي ودرت قهوه لان المواعين عليا ومشعارف شنو بيغسلهن توا يعني عشان وجهك هذا بنغسل مواعين واجد وبيتكسرن ظوافري
يوسف بحده: مكثر دوتك قولي ل امي هيا
غزل بضحكه: واختك ولا تبي اتخليها لنا
يوسف بعصبيه: صبرك يااارب صبي كلمي هلي هيا
صبت غزل وتضحك كلمت سيرين وامها وطلعوا روحوا
اسماء : شنو رايك يا غزل من رايي توافقي مستحيل تلقي زيه راجل ولد راجل ونعرفوهم وجيرانا وناس كويسين
غزل ببرود: عارفتهم ناس كويسين والكلام هذا ولكن ولدهم هذا مستحيل ناخذه انا نبي ناخذ واحد يدلعني ويفسحني مش واحد يخنقني ويحبسني
اسماء تنهدت : فكري كويس يا غزل فكري سلم بنتي
غزل بهدوء: طفي الضي بنرقد لا نفكر لا شي
.......................................................................
عند يوسف مقعمز في داره يخدم على الابتوب خشتله امه
جميله بهدوء: اوسيفه شنو صار معاك موافق ولالا
يوسف بهدوء : امي البنت هذي مستحيل ناخذها
جميله : عليش ياوليدي والله سمحه وشاطره في قرايتها وفي المطبخ
يوسف برفعة حاجب: لا اسلوب لا منطق ولسان اطول منها
جميله : اللسان تقدر تحكم فيه انت بعد تاخذها وتمشيها زي ماتبي
يوسف سكت وايفكر خشت سيرين وقعمزت معاهم على السرير
سيرين بضحكه: انا من رايي توافق لان البنت سمحه وعيالكم بيطلعوا طرووف هذا غير ان دمها خفيف وتهبل
جميله بهدوء: فكر كويس اوليدي جدك مصكر راسه بيزوجك وكان مش غزل بيزوجك بنت ثانيه
طلعت جميله ويوسف ساكت وبحت في سيرين
يوسف بهدوء: عندك رقمها انتي المطرشقه هذكي
سيرين بفرحه: عندي عندي اها
يوسف بهدوء: عطيه ليا بنحكي معاها كلمتين
مشت تجري سيرين جابت التلفون وعطت يوسف الرقم وطلعت لدارها ورقدت
يوسف كتب رقم غزل وقعد يبحت فيه رن عليها وساكت ردت عليه
يوسف بحده : انتي يا بنت
ردت عليه بصوتها الناعس وراقده
غزل : اممم نعم
يوسف سكت شويه
يوسف بعصبيه: ترفضي فاهمه ولالا قولي منبش يوسف ارفضي
غزل بصوت مرخي: والله ما واخذتك يامعقد ياغجري
وصكرت الخط في وجه يوسف قعد يبحت في التلفون وتعصب
يوسف بعصبيه: اقسم بالله انوريك ام العذاب كيف تي نتزوجك وانوريك الدنيا كيف ماشيه
طفى الابتوب ورقد
.......................................................................
ثاني يوم الساعه 9
نزل يوسف من داره باس راسه امه
يوسف بهدوء: صباح الخير غاليتي
جميله ب ابتسامه: صباح الورد
يوسف ايدير في قهوته
يوسف بهدوء: وين سيرين
جميله : راقده مزال
يوسف حط القهوه على النار
وقعمز جنب امه ويبحت فيها
جميله بهدوء: موافق على البنت ولالا
يوسف رفع شعره وتنفس بقوه
يوسف بهدوء: موافق
جميله تزغرت وتبكي يوسف ابتسم وساكت
يوسف بهدوء: نركب انوعي الفرخه سيرين وانجيك
هزت جميله راسها ب ايجاب وركب يوسف ل اخته فتح الباب واتكى ع الباب
يوسف بهدوء: سيرين نوضي يابنت انتي يافرخه نوضي
سيرين: .......
قرب منها يوسف وقعمز جنبها و ايحرك في يده على شعرها
يوسف بحب: بنيتي نوضي هيا
سيرين بصوت ناعس: بنرقد يوسف خليني
يوسف شالها وطلع بيها من الدار
يوسف بضحكه: تي ترقدي في عينك
جميله بعصبيه: يوووسف القهوه فاجت ع الغااز
نزل يوسف وهوا شايل سيرين وقعمزها على الكرسي
جميله بحده: معش ادلعها قعدت معش ادير في شي البايره هذي
يوسف بحب :دلوعتي هذي
سيرين خشت في حضن يوسف وبحتت في امها وحركتلها حواجبها
شرب يوسف قهوته وركب دوش ولبس دبشه وطلع
يوسف مصبي جنب سيارته
حارث بصوت عالي: يوسف تعال نبيك
يوسف بهمس: عليك هم ع الصبح
تلفت يوسف ومشى ب اتجاه جده
يوسف بحده: صباح الخير ياحاج
الحارث بحده: شنو صار في موضوعك
يوسف وزع نظره على المزرعه وبحت في جده
يوسف بحده: تم نظموا اموركم العرس بعد اسبوعين
الحارث برفعة حاحب: وعليش مستعجل مش كنت ماتبش تزوج
يوسف : عندي سفره ضروريه
الحارث هز راسه ب ايجاب
الحارث: اليوم نحكي مع باتها
يوسف : تم
مشى يوسف لسيارته وركب فيها ومشى للمعسكر
عند غزل ناضت الصبح بحتت في تلفونها
غزل بهدوء: انا كنت نحلم ولا امس كلمني الغجري
فتحت تلفونها وتبحت في المكالمات ومنصدمه
غزل بصدمه: ورديت عليه اخرى حي عليا شنو قلتله
خشت اسماء للدار
اسماء بهدوء: غزل باتك كلم جد يوسف وقاله موافقين
غزل بصدمه: شنووو من يوسف وامتى وافقتوا وعليش ماخذيتوا رايي
اسماء : يوسف ولد جميله
غزل بصدمه اكبر: قصدك العجري وافقتوا عليه
اسماء بضحكه: عيب معش تقولي غجري كان يسمعك باتك حي عليك
غزل بدموع: ياماما شنوو هذا منبش اناا كبير عليا وصعب طبعه وعصبي ويهزب كيف بنتحمله
اسماء قربت منها وحضنتها
اسماء بهدوء: بنيتي والله ماتلقي خير منه معروف وسيرته طيبه بين الناس صح عصبي وواعر لكن تقدري تغيريه انتي
غزل سكتت وامها طلعت وحكت ل احمد كل شي قالاته بنتها
احمد بهدوء: ماتلقش كيف يوسف انا وافقت وبعد اسبوعين العرس واليوم في العشيه بيجي عشان يتفقوا
هزت اسماء راسها ب ايجاب وطلع احمد لشغله وبدا التنظيم والترتيب عشان يوسف واهله جايين في العشيه مر الوقت بسرعه والساعه 4 ويوسف مزال ماروح
سيرين: ياماما رني عليه وقت بنمشوا للعرب
جميله رنت عليه
يوسف : ايووه يمي
جميله بحده: وينك هيا وقت بنمشوا للعرب
يوسف بهدوء: اين عرب يمي
جميله بصوت عالي: خطيبتك ولا نسييت
يوسف : باهي يمي شويه وجاي
صكرت جميله وقعمزت تهدرز مع سيرين
شويه وخش يوسف للحوش
يوسف بعصبيه: هيا كان بتمشوا
غزل خشت وصبت في نص المربوعه
غزل : خير تفضل شنو تبي جاي لحوشنه رفع يوسف راسه وفنص فيها
غزل بحده: فقصه في العيون الي تفنص بيهن ليل نهار
يوسف بحده: امتى بتحترمي نفسك وتبطلي طولت اللسان متاعك
غزل برفعة حاحب: في الساعه السعيده
صبى يوسف وقرب منها توترت غزل
غزل بتوتر: اءء اء شنو تبي جاي
يوسف بهدوء: جاي انتعارك معاك
غزل بصدمه: صح والله اليوم متعاركنش غريبه
يوسف قعد قريب منها بينهم شبر بس
يوسف بحده: اسمعيني هنا انا واخذك مش حباً فيك واخذك لان جدي جبرني نزوجك يعني الحركات الي اديري فيهن كلهن بطليهن شهر تقعدي معايا نشبع منك نعزقك عند هلك وفي نفس الاسبوع ورقة طلاقك توصلك لذلك احترمي نفسك والزمي حدودك وخلي الشهر يكمل على خير
غزل منصدمه منه ومن كلامه الي قاله وتبحت فيه
دفها يوسف بالشويه وفتح المربوعه وطلع
غزل خشت والكل لاحظ ان جوها مش تمام وانها مضايقه ويسألوا فيها واتقول شي شي
فات اليوم عادي جدا وتوالت الايام ويوسف غارق في حوسة الفرح والحوش متاعه حنب حوش جميله
وغزل نفس الشي لاهيه في حوسة الفرح ومعش حكت مع يوسف من يوم الفاتحه وكلام يوسف 24 ساعه اتفكر فيه
يوم الفرح في الصبح مشت غزل للكوفيره ومعاها صاحبتها ريم
ويوسف مع اصحابه في الاستراحه يوتوا فيه
مهيب : عريسنا الغالي بنقيموها بيك لننم
ابتسم يوسف وهز راسه ب ايجاب
جواد : كلمت الجماعه كلهم في الزفه يقلبولك الدنيا وايقيموا القدر بيك يامعلم
يوسف يلبس في الساعه وساكت
.......................................................................
عند غزل .....
الكوفيره : تبارك الرحمن عليك تهبلي
غزل ابتسمت وفي غصه في قلبها من كلام يوسف
ريم : ياقلبي تجنني والله
غزل بهدوء: انتي اجمل ريمو
ريم غمزتلها: وين عريسنا ماكلمكش
غزل ابتسمت بكسره: لا مشغول شويه اكيد
ابتسمت ريم وعم الصمت المكان
مر الوقت عادي جدا من غير اي احداث وخشت العروس للصاله وبعدها بشويه انقلبت الدنيا رصاص وتبييب
زاد توتر غزل وخافت
طلعت جميله وانقلبت الصاله زغاريت وشويه وخش يوسف بهيبه والبدله الرسميه غزل ساكته وقلبها بيطلع من مكانه ركب يوسف على المسرح وقرب منها رفعلها الطرحه وباس راسها ابتسمت غزل ويوسف قارن حواجبه
جتهم المصوراتيه وصورتهم
يوسف همس للمصوره: فكينا من اللقطات السخيفه الي اتقولي فيهن
المصوره: معلش حط ايديك على خصرها وانتي حطي ايديك على اكتوفه وانت نزل راسك على راسها
يوسف بعصبيه وهمس: قتلك فكينا من النم
غزل بحده: قلنالك لا خلاص
جتهم سيرين وجميله
سيرين : كنكم بسم الله الناس يبحتوا فيكم
يوسف بعصبيه وهمس: امي بنروح هيا
جميله : اصبر شويه مزال بدري
يوسف بحده: الزواج الزفت هذا من البدايه منبش دين*** انا
جميله فنصت فيه ومشت غزل تبحت فيه وساكته
سيرين مسكت يد خوها
سيرين بهدوء: اهدى ارجوك قدام الناس متشمتش فينا حد
مشت سيرين يوسف بحت في غزل
يوسف بحده: وانتي كنك تبحتي اقلبي وجهك
غزل بهدوء: دير الي تبيه وقول الي تبيه لكن مش قدام الناس افرد قرنت حواجبك لعند انروحوا اقل شي
بحتت قدامها وساكته ويوسف بحت قدامه وساكت
شويه وطلعوا بيروحوا ويركب فيها يوسف في سيارته
يوسف بعصبيه: تي شنو الخيمه الي لابستها الزززح
غزل بحده: هااا انجيك بالتوته امتاعي ولا شنوو
يوسف بعصبيه: غمي فمك في الشارع قاعدين خلق الله كلهم يسمعوا فيك
غزل سكتت وصكر يوسف السياره وركب ايسوق والدنيا مقلوبه رصاصه وتبييب واغاني
غزل بقلبت عيون: ريت ها الشخص المهم الي دايرين هذا كله عشانه
يوسف بحده: اسكتي خير مانقصلك لسانك
سكتت غزل وعم الصمت لعند وصلوا للحوش داروله اصحابه جو قدام الحوش وبعدها ردوا للصاله
.......................................................................
في الصاله .....
سيرين لابسه عبايه وحاطه وشاح على راسها وتنادي في ولد عمها عمره 7 سنين
سيرين بصوت واطي: اوس اوس انت يافرخ وينك اوس
في درجه قدامها ماشافتهش وطاحت فيها وقبل ما اطيح مسكها جواد
جواد بهدوء: بالشويه يا اختي
رفعت راسها بحتت فيه وسرح جواد في جمالها
جواد بهيام: هذا زين ولا رضى والدين
سيرين بصدمه: شنوو
جواد:....🤤
سيرين:....😳
(يتبع...🍁)

(بقلم سيف الله....🚬)

(رايكم....✨)