#ليته يعلم(أحببته منذ الصغر)

البارت٣٣ الجزء الثاني

البارت ٣٣
ليته يعلم ( أحببته منذ الصغر)
للكاتبه #شفاء الموسوي
فجأة حسيت بي مسك ايدي من جوه الغطى
كمت ارجف من قوة الشعور
همس بصوت ناصي .بس ماجان يباوع عليه.يباوع عليهم حتى مايحسون
صادق: ليش ترجفين
مارديت لان صابرين جانت تحجي ويانا
صابرين: بربج رنا اني شلوني ويه الجهال انتي جيتي يمي وطولتي شفتيني ضربت أحد منهم لمن يسوون وكاحه
صابرين تحجي وياي واني بالي ابد مويمها
رنا:هاا اي
كامن يضحكن البنات
صابرين:يووولي شنو ايي شوكت شفتيني ضربتهممم
رنا:لالا ماضربتي أحد
جان ماسك أيدي ..حسيت بلهفه قويه تجاهوو
رجعت مكست ايدو بكل قوووة
جان شعور يجنن
البنات يحجن وملتهيات واني اباوع عليهن ومبتسمه بس بالي ابد مومعاهن
بقيت ماسكه اديه بقوة . بعدين اجه حسن باتجاه ابوه تاياخذ الموبايل منو..عاد وخرت عنو
حسن متمدد مخلي رجلينه على صابرين ومرتجي على ابوه
صابرين جانت تريد تغير من نفسيتها لان هي ماتكدر تضل حزينه
صابرين:شوو وخرر رجليينك عاااد شايف نفسك وجه ابوك
صادق:عود انتي مخلفه بحلاتو موو
صابرين: شبيهم خلفتي هم حلوين
صابرين:ادري شجاج ماجبتي واحد يشبه خالو
صابرين: هما
نور:هههههههه
سراب:ههههه
صابرين:لاتتمكشرن من حلاتجن عااد.وحده وجه خالتها ووحده وجه علاوي من زينجن عاد
نور:لابله احلى من خلفتج كلهم وجه ابوهم
انفعلت صابرين
صابرين:ادرري شسووي قابل اغمض عيوني من انام وياه حتى مااتطلع خلفتي عليييي
صادق:لاتسدين عيونج ولاشي بس كرمينا سكوتج ولاتجفصين
سراب:هههههه
كمنا نضحك عليهم
جنت اباوع علي واحس نفسي مغرمه بي بشكل ماينوصف .يعني حركه بسيطه منو تخليني اهيييم💔
تاخر الوكت بقو يحجون ويسولفون اني حسيت نفسي نعست حييل.شميت ايدي قوي عطره الاحبو موجود بيهااا
نمت مادري بنفسي ..واني وغافيه اسمع
صابرين:هاي نامت اشو
صادق: يلا كافي خلي اروح وانتو هم نامو ... صابرين غطيها ترى مومغطيه زين
حسيت صابرين غطتني. طفى الضو ونمت نومه عميقه .....
كعدت الصبح رحت اغسل وجهي.تذكرت البارحه لمن مسك ايدي . فرحت كلشش.. رحت للمطبخ خليت القوري ع النار
كعدت جده وصابرين والبنات..سوينا ريوك وكعدنا نتريك
جده فطوم :خما ترجعين اليوم
صابرين:لا والله مارجع اذا مايجي بنفسو مارجع ...وانتي عليش شايله هم
جده:موشايله هم شبيج..بس جهالج يبقون هناك وياه وحدهم
صابرين: شكو عليهم موصغار هما..مويسوي نفسو الأب الحنون هاي هيه خلي يهتم بيهم
جده:بكيفج
صابرين:سرى ماموجوده موو
رنا:يم اهلها
صابرين:لعد انتن كمل شغل البيت واني اسوي الغده
خلصنا ريوك ..ورحت اني وسراب شلنا الفراش وعزلنا البيت
اجه حسن كال: بابا كعد يكول خلي  تسويلي ريوك
سراب:هس اسويله
راحت سراب
ردت اروح اشوفه بعدين كلت لا ماروح خلي هو يجي
راحت سراب
واني خلصت شغل البيت
جنت بالغرفه ماسكه الموبايل واكلب بالكروب ويه البنات نحجي ع مود الدوام سمعت صوته بالصالة
صادق :نور اغسلي هدومي باجر الصبح اريدهم
كلت بكلبي ياترى راح يفكر يصيحني أو يجي يشوفني
واني أفكر بهالشي فات الغرفه
صادق:ها حلو
رنا:هلا
صادق:شكاعد تسوين
رنا:ماسوي شي اراسل البنات بالكروب
صادق:اي زين
سد الباب وطلع ايده من جيبه وكال
صادق:شوفي ايدي
رنا:شبيها
صادق:انتي تدرين بنفسج شون البارحه عصرتي ايدي لو ماتدرين
رنا:هاا
قرب ايدو يمي..باوعت اثار غرس اضافري بيها شوي وصايرات حمر .مع العلم اني ماعندي اضافر طوال
صادق: يولي شرسه طلعتي
انحرجت حيل
رنا:لا اني مسكتها عادي ترا
جان يحجي بطريقه  مبتسم واحسه متعمد يريد يشوف رده فعلي
صادق:مبين عليج .لو ماحسن اجه جان حتى طلعتي دمي
شدعوة هالگد مشاعرج قويه لي يمي
معد اعرف ارد جان اثول السالفة وكلت
رنا:اي اني مسكتها قوي لان انحسمت عليك البارحه رزلتني كدام البنات
صادق:شوكت رزلتج
رنا: البارحه وكت اجه الرجال
صادق: اصلا كلشي ماكتلج وتحمدي ربج بس كلت هيج ..لعد الرجال يفوت وانتي لابسه هيج وتريدني ماكلج كلمه
شوفي ترى اني اتخبل من هالشي مره الخ احرمج تفوتين الاستقبال بهيج لبس
عود عساس تاثولها.نوب گلب عليه
رنا:لا بله
صادق:اي والله..ادري بيج غيرتي السالفة بس يلا ترهم
اجت صابرين
صابرين:هاا بشنو تحجون
صادق:انتي شعليج بكلشي مدخله
صابرين: ياستار بشنو تدخلت هو سؤال ...صدك اكلك اخبار فراس شوكت يطلع
صادق:بعد نكول ان شاء الله قريب ...
صابرين: ان شاء الله ...
طلع واني رحت للمطبخ جانت صابرين مسويه كبه تمن
جعت حيل اريد بس تصير
صار الغده وصبينا وكعدنا كلنا ناكل.. علاوي جان بالشغل ماموجود بس احنا وصادق
صادق:شعجب جهالج مو وياج
صابرين:هاا ماقبلو يجون
صادق:شعجب
صابرين:مادري عرفتهم يلعبون وابوهم بالبيت ماعليهم شي.....
خلصنا غده ورحت سويت جاي وغسلت المواعين
جنت اباوع من السنك..صادق مساك موبايل يخابر
طول شوي بالمخابره
واني هم تأخرت علما خلصت المواعين لان كثار وشطفت المطبخ هم
وره ماكملت رحت الغرفه تاانام باوعت صابرين ضايجه
رنا:شبيج
صابرين:مابيه شي بس بالي يم الجهال
رنا:الصبح جنتي مودايره بال
صابرين:سوالف بس.. يلا نامي نامي
تمدتت ونمت كعدت العصر شميت ريحه كيك حيل طيبه
رحت لگيت سرى راجعه وصابرين يسون كيك وايس كريم.وجهال صابرين موجودين
رنا:هلااا شو كيك اليوم.جهالج اجو لحالهم لوانتي دزيتي عليهم
صابرين: هما اجوو مايكدرون بدوني
رنا:اي خوش...احس صابرين تغيرت نفسيتها من اجو جهالها.هي عدها اثنين بنت وولد بالابتدائيه
باوعت للكيك بالفرن شكله يشهي كلش
رنا:شوكت يصير
سرى:بعد يعوزه..عود بالليل ع التعليله نجيب عصاير وناكل
رنا:اي خوش
جنت انتظر الليل يجي حتى نگعد نتعلل وهو يكون موجود ويانا
اجه الليل والبنات جابن عصير وحب شمس
كعدنا بالصالة وخلينا چرچف حتى نتكرز وناكل علي
حضرنا كلشي وگعدنا وجده ويانا.صادق ماجان موجود
وره ساعه من التعليله تايالله اجه
صادق:ها شونكم
جده:هلا وليدي تعال اكعد ويانا مسويات خوش كيك
صادق:لا ماريد اكلو انتو
كال هيج وراح .
ضجت بداخلي لان ردته يكعد ويانا صرت بكل لحظه اتمناه موجود.بس اعرفه مشغول بدوامه وملتهي بقضيه اخوه
خلصنا تعليله وشلنا الهوسه كامل وكلمن راح بمكانه والبنات بالغرفه
رحت علي للاستقبال
رنا:ها شونك
صادق:بخير وانتي
رنا: الحمد لله ...عجب ماكعدت ويانا
صادق:والله شوي راسي يوجعني وهم جنت بتعليله وجابو بقلاوه مامشتهي شي
رنا:تمام
صادق:اكلج المحفظه مالتي بقت بالستره جيبيلي إياها
رحت جبت المحفظه ونطيته اله..طلع اوراق من جيبو وخلاهم بصفحه
رنا: شنو هاي
صادق: مستمسكات محتاجهن باجر
رنا:لشنو
صادق:اروح اطلك بالمحكه
رنا:اها...انت طلكتها مو
صادق:طلكتها شرعاً.بس بالمحكمة هم اطلك رسمي
رنا:اي زين..هي راح تحضر بالمحكمه لولا
صادق:ماعرف.تحضر اولا اني اطلك غيابي  وهاي هيه
كيفت من راح يطلك بالمحكمة هم...
رجعت للغرفة واني فرحانه.هو بالاصل مطلگها بس مع هيج هم متونسه
رحت تمددت بفراشي وجده وصابرين والبنات ومصطفى وحسن كلهم ويانا بالغرفه ..دوب مكفيتنا الغرفه محد يقبل ينام بغير مكان تعودنا انام كلنا سويه
جنه بالفراش بس بعدنا مونايمين..
طلعت سراب من الغرفه وره شوي رجعت
سراب:اكلج نورر
نور:هااا
سراب:غسلتي هدوم بابا الكالج عليهن اليوم
نور:يمااااا نسيت
سراب:ولج يريدهن هسس
نور:يويلي شون نسوه هاي
صابرين:ادري شجاج ماتغسلسينهن بساعتها
نور:والله تاغسلهن وماعرف بشنو التنين
سراب:هس شنو اكله..سألني عليهن
جده فطوم:كومي اغسليهن هس كومي.. بس لاتلفلفين ترى يدقق
كامت نور ع السريع تغسلهن
وره شوي جان يجي
صادق:وين نورر... باوع على سراب شو انتي رحتي وماجبتي الهدوم
سراب:كاعد تغسل بيهن نور
اجت نور واديها كلهن مي
صادق:هس كاعد تغسلينهن مووو.موكتلج من الصبح اغسليهن وكويهن هااا
نور:والله نسيت
صادق:عندددددي طلعه من ووكت موكتلج اريدهن باجرررر..... ماتسووون البوجهاا ابد
جده فطوم:هس هس يبسسن للصبح يابسات
صادق:شيييبسسسهن هسس .من وكت اطلع انيي.
صابرين:ليش وين باقي ملابسك
صادق:موجايب كلهننن
رنا:هس بالكاويه وعالصوبه يبسسن بسرعه
صادق: استغفر الله استغفر الله .
طلع مزعوج
جده:بنتي نور روحي كملي غسيل ونشفيهن بالغسااله زين وكويهن واذا مايبسن خليهن شوي ع الصوبه
راحت نور ..
صابرين جانت يمي حجيت وياها
رنا:الصبح يروح للمحكمه يطلك
صابرين:صدك...يوووم باجر ابنج يروح للمحكمه يطلككك
جده:اي خلي يطلك رسمي احسن
صابرين:اي والله تسوى حياتها من صادق يطلكها بهيج طريقه وسوالفها بينت شگد قرچيه
رنا:ايي...
وره شوي غفيت
جان تجي تدق بيه نور
نور:رنا رنا
رنا:هااا
نور:اكلج انتي تعرفين تكوين. ترى اني ماعرف والله..شلون هس
رنا:هس اني اكويهن
نور:اي عفيه ترى يقشمرني الصبح اذا لگاهن مومكويات
كمت حضرت الكاويه وكويتهن كامل باوعت الساعه صارت ٢ ونص بس بعدهم شوي بيهن رطوبه
شغلت الصوبه وخليتهن عليها اله مايبسن
كملتهن تاافوت للغرفة جان يجي
رنا:كويتهن ويبستهن اخذهن
اخذهن وكام يباوع عليهن تايتأكد من الكوي والنضافه
صادق: صارت براسج مو
رنا:عادي
صادق: عندج دوام الصبح
رنا:اي
مسك حنجي خفيف
صادق:روحي نامي
رنا:رايحه
رحت الغرفه وكبل نمت لان تاخر الوكت ونعست
دگ المنبه وبالگوة گمت من فراشي
الدنيا ضلمه وضوة بنفس الوكت وبارده اكثر شي بهيج وكت
طلعت غسلت وصليت اول شي وبدلت هدومي وشغلت الصوبه ميل واحد وحضرتلي ريوك
انفتح باب الاستقبال.عرفته گعد
باوعت جان لابس هدومه ومتحضر
شافني واجه كعد مقابيلي
صادق:همزين كاعده انطيني جاي اريد اصحصح
صبيتله جاي
باوع عليه وصفن بيه...طول شوي بصفنته بيه
رنا:شبيك
هز راسو وكال:ترهم ترهم بس تفض وفراس يطلع يصير خير .. حسيت فهمت ومافهمت كلامه
رنا:ان شاء الله يطلع
صادق:اني ابنوو كاسر كلبي..اريده يطلع وان شاء الله الباقي سهل
صح احنه صرنا نعرف مشاعرنا تجاه بعضنا البعض.بس لي هس موحاجين كلشي.. بعد اكو حدود بينااا
حسيت نفسي تأخرت مابقى بس ٥دقايق ويجي ابو الخط
كمت ع السريع لبست الشال واخذت الجنطه تااطلع وصاحني
صادق:خذي هاي الفلوس خاف تحتاجين شي
رنا:لا عندي ماحتاج
صادق: ميخالف اخذيهن
رنا:عندي عندي مايحتاج
طلعت ع السريع..عود سويت نفسي عندي وماحتاج واني مفلسه اصلا..
رحت للدوام وبالي يمه ويم المحكمه اريد تفض حتى ارتاح أكثر
خلصنا اول محاضرتين وطلعنا ريست
خابرت علي..بس رمش ماعندي رصيد
تدينت من الشركه شوي
رجعت دكيت علي مغلق...عرفته بعده بالمحكممه
صارت الساعه ١٢ ونص.ردت ادك نوب كلت لا ماراح اخابره حتى مايحس انو اني حيييل مهتمه وطايره وراه
مع العلم اني بس اريد ارجع للبيت حتى اشوف شصار ماصار
خلصنا دوام ورجعت للبيت.. وصلت مع صلاة العصر تأخرنا شوي اليوم.علاوي جان يم الباب..طبيت جوة باوعت للاستقبال شفته يصلي
رحت ع السريع للغرفه جانت جده وصابرين نايمات بدلت هدومي جان صابرين تكعد
صابرين:ها رجعتي
رنا:ايي...اكلج شصار اليوم
صابرين: يكول ها هيه طلكت
رنا:صدك
صابرين:ايي
فرحت كلشش رحت للاستقبال وكفت يم الباب
باوع عليه
صادق:هاا شو واكفه فوتي جوة
فتت جوة كعدت يموو
باوع عليه وابتسم
صادق: الحمد لله فضت على خير
رنا:اي عفيه....هي اجت للمحكمه لولا
صادق:تصدكين ماتوقعت تجي..بس اجت
رنا:والله
صادق:ايي .من شفتها والقرآن بمدددي افلشها تفليشش
رنا: شكد وكحه
صادق:موبس وكاحه ...خليني ساكت ...يلا روحي نامي انتي جايه من دوامج وباليل نمتي قليل روحي ارتاحي
رنا:ماشي
طلعت من الاستقبال واني كلشش متونسسه
رحت تمدتت بفراش جده لان هي كامت ونمت بمكانها
نمت وكعدت  على صوت سرى
سرى :رنا رنا اكعدي تعشي
رنا:هيان كعدت
تعدلت على حيلي حسيت نفسي كلشش مشتاكتله ماعرف ليشش بس شوك قوي وبنفس الوكت فرحانه هواي بالطلاك
كمت غلست ورحت تعشيت وياهم
واحنه نتعشه دك الموبايل على صادق وكام من العشه
كلمنا عشه وهو مارجع بقى يخابر بالحديقه
خلصنا وشلنا المواعين وسويت جاي وهو ماكو
طلعت للحديقه
صادق:خوووش خووش ان شاء الله........سد الموبايل
رنا:شو كمت من العشه ومارجعت
صادق:ان شاء الله الخميس فراس يطلع
رنا:صدددددك
صادق:اي ان شاء الله.مانريد من هس نكول راح يطلع  كدام الناس بس بيناتنا
رنا:اي عفيه
فات جوةوكال لجده ولعلاوي
جده:صددددك كول والله
صادق:اي اي ان شاء الله
جده:تعال ابوسسسك
باست صادق وكامت تصفك من الفرحه
صابرين:شكووووويولووو
علاوي:الخميس يطلع فراس
صابرين:كلللووويشش
صادق: حالياً لاتحجون يم احد خلوها بيناتنا من يطلع الله كريم
كلنا فرحنا جنا متونسين حييل ونفسيتنا كلشش تغيرت بهالخبررر
يعني اليوم خبرين حلوات.. صادق طلك ولاء وفراس يطلع الخميسس ان شاء الله
جان هاليوم مصادف الاحد بعد ٤ ايام للخميس
اجه الأربعاء واحنه كلشش متحمسين نضفنا البيت كامل وصابرين جانت بعدها يمنا تكول ماروح اله يرجعني بنفسه وجهالها يروحون عالمدرسه من يمنا
المهم خلصنا شغل وتنضيفات وتحضيرات وصادق وعلاوي جابو مسواك كامل
تاخر الوكت واحنه نحضر ومرتب
صادق جان مكضيها يخابر وملتهي
جده:لاتضلن كاعدات روحن نامن يلا باجر هم يصير البيت هوسه وخطار
اني رحت نمت لان تعبت حييل
كعدت ثاني يوم الخميس مارحت للدوام .كلت لصديقاتي ياخذلي اجازة
كعدنا من وكت سوينا ريوك وتريكنا
جده:روحن لمن الفراش وعزلن البيت
رحت اني وسرى وسراب نعزل
رحت للاستقبال صادق ماموجود
بعد شوي اجه صادق وعمو ابراهيم وولد عمى منى ومنتهى
يمكن صادق كايللهم لان الشغله اكيده
راحت جده للاستقبال وياهم
إني سويت جاي الهم وسرى صبت
اجه علاوي تاياخذ الجاي
سرى:هااا شوكت يطلع
علاوي:بعد بس اليوم اكيد صادق يكول
بعد شوي شفت صادق بالطارمه اشرلتو بيدي يعني تعال
اجه يمي
رنا:هلا شوكت بضبظ يطلع
صادق: شغلته كامله العصر نجيبه
رنا:ايي زيين ..وشونك انت شون نفسيتك
صادق:ززين زيين
كال هيج وراح
حسيته متوتر يمكن اله يشوف فراس بعينه تايرتاح
بقينا ننتظر على نارا.
اجت عيله عمى منى ومنتهى كلهم
اذن عصر وراح صادق وعمو ابراهيم وعلاوي تايجييونه
جنه كاعدين كلنا بالحديقة .جده حاضنه مصطفى وتبجي
وعمى منى هم تبجي وياها مقهورات ع الصار وياه
تاخرو شوي..صارت الساعه ٥ تاوصلو
سراب:اجووو اجوووو
جده:ياالله ياكريم
طلعنا كلنا وننتظر بس نشوفه وبنفس الوكت كلوبنا محروكه علي
فاتو الولد بالبدايه بعدين
طب هو وصادق
من شفنا كلنا تكطعت كلوبنا وبجينا
جده حضنتوو وكامت تبجيي
وصابرين هم  جان موقف حيل صعب اكول الله يعينه..سلمنا علي كلنا بس جان موطبيعي احس عيونه هيج تباوع عالبيت باستغراب
فات جوة بالاستقبال وكلنا فتنا وياه وعمو ابراهيم وولد عماتي والبنات كلنا يعني.كام يباوع علينا كلنا وكال
فراس:وين مصطفى
صادق:تعال مصطفى
راح مصطفى على ابوه
شال ابنه وخلاه مقابيله وخله راسو على راس ابنو
وغمض عيونه ونزلت دموعه وباسو
نكزنا بجي عالموقف
صادق مندار بصفحه ولايكدر يجابس هيج موقف
صادق:جيبوو مي
راحت نور جابت مي اله
عمو ابراهيم:توكل بالله فراسس تعببررر ان شاء الله انت سببع
صادق جان يسولف وياه بصوت ناصي وهو يهز براسه يعني اي
بقينا شوي وياهم
جده: امشن سون عشه لاتلتهن
سرى:اي عمه مخلين اللحم عالنار والدجاج بالفرن هس اطبك تمن
جده:اي لاتتاخرن ناس يمنا
رحنا لشغلنا وجنه فرحانين من جيهه وحزنانين من جيهه
تانصب العشه بس صادق كال انتظرو ..اجه عليه وكالي
صادق:اكلج انتي انطيتيني مفتاح غرفه فراس
رنا:لا يمكن بقى يم صابرين
صادق:روحي جيبي بسرعه
رحت جبت المفتاح من صابرين ونطيته باوعت صادق اخذ فراس للحمام وسد الباب ..
بعدين طب لغرفته وطلعله هدوم وأخذهم اله للحمام
انتظرناه يخلص..
رحت على صادق وكتله
رنا:هاا شلونه اشو احسه موتمام
صادق: بعد بعد..شوي شوي يتأقلم ويرجع طبيعي
رنا:ان شاء الله..
طلع من الحمام وراح صادق وياه اخذه لغرفه جده شويه بعدين طلعو وراحو للاستقبال
صادق:صبن العشه
رحنا صبينا العشه الهم بوحد واحنه وعماتي بوحد
خلصنا عشه ورحنه كلنا نغسل المواعين
بدت النسوان والزلم يجون يسسلمون
واحنه نركض هين وهين ..اني جنت فرحانه اكثر شي لصادق لان هو حيل جان شايل هم فراس
تاخر الوكت وصارت الساعه ١٢ تايالله راحو الناس وبقينا بس احنه
حسيت نفسي صرت خيط ورحت تمددت كبل نمت
ثاني يوم هم نفس الشي هوسه وخطار وشغل
ماشفت صادق ولاشفت الولد..عود حيل اشتاكيلته واريد احجي وياه بس اعرف ماكو مجال رغم الشوك زايييد كلشش
صارت الدنيا ليل تقريباً ساعه ١١جنت اني والبنات بالمطبخ
اجه صادق
صادق:تعالي
رحت وياه
رنا:وين
صادق:فراس يريد يحجي وياج
حسيت نفسي توترت شوي
رنا:وينه هو
صادق: بالحديقة
جان اكو زلم جوة بس الضاهر فراس يريد يحجي وياي وطلع بره
رحت علي وصادق وياي
فراس:شونج رنا
رنا: الحمد لله
فراس:اريد تحجيلي كلشي
باوعت على صادق
رنا:بشنو
صادق:نفس السالفة
فهمت شيقصد
فراس: اريد اعرف بضبظ شوكت انتي اول مره سمعتيها تحجي وياه
رنا:اني اول مره شفتها وياه ماسمعتها..لمن صادق عزم اهل ولاء هنا أثناء الخطوبه
فراس:اي وبعد
رنا: بعدين شفتهم بالبيتونه وولاء هم جانت موجوده
ومره بعرس صادق يم الباب شفتهم
ومره لمن عزمتنا صابرين هم شفته موجود لمن رجعت للبيت..عاد مره فوك السطح سمعتها تخابره ومواجهتها كتلها اذا ماتتركين الموضوع راح افضحج.كالت هاي هيه وكامت ترجف وكالت توبه بعد احجي وياه..بعدين رجعت من الدوام وسمعتها تحجي وياه.عادي ماتحملت وكلت لصادق ...
بس هز راسووو جان ساكت
صادق:هاي هيه روحي رنا
رجعت جوة بس كلبي يدك عالسريع
تكلتني صابرين ونور وجده وعماتي:هااا شبي فراس وصادق
رنا:جانو يسألوني بشغله
جده:تخص رحاب مو
رنا:اي
عمى منى:حسبي الله عليهاااا
فتت جوة وهم تعب وشغل لحد مالهكت ونمت..
ثالث يوم جان بنهار ماكو خطار هواي قليل يعني
بس بالليل اجو ناس
خابرتني مها
مها:شونج رنا
رنا:هلا مها انتي شونج
مها:اكلج شويه وجي تسلم واتعلل يمكم
رنا:اي تعالي هلا بيج
رحت عالسريع سبحت ولبست فستان بيتي ومشطت شعري وتعطرت
اجن كم حرمه هم يسلمن.اما الاستقبال يبقى خطار
اجت مها ورحت وياها لغرفه جده
جنه كاعدين اني وهي ونور وسراب نسولف ونضحك متونسين
بعدين رحت للمطبخ سويت جاي وحضرت استكانات
صبيت جاي النه وكعدنا نسولف
مها:يلا المهم طلع الف الحمدالله
نور:اي والله
ردت بس تروح باقي النسوان حتى اخذ راحتي ويه مها
رحت للمطبخ وراحن النسوان
صارت الساعه ١١
جنت واكفه ع السنك باوعت صادق ويه عموو ابراهيم وعلاوي بس حسيتهم شوي متوترين أو اكو شي ماعرف بالضبط بس هيج حسييييت
جنت اباوع علي من الشباك.عاد اندار وشافني جان يغمزلي بطارف عينه.هاي الغمزة اللي تخليني اتييه ماندل دربيي
طلع ويه عمو ابراهيم... فات علاوي جوة
صار البيت هدوء.
رنا:واخيرا فرغ البيت اريد اخذ راحتي بالحجي
مها:اي عادي اني اليوم كلت اتاخر اصلا حتى نتعلل زين.لان انتي كل مره تكوليلي ماتجين
رنا:اي صحيح والله لو هالمره موجايه صدكيني بعد ماجي عليج
مها:ههه لالا شون ماجي
اخذتنا السوالف وشوي تأخر الوكت جنه نحجي ومندمجين وكلشي ماكووو
شو فجأة صار صوت رمي و طلقات قويه عالبيت
نور وسراب كامن يصيحن
خطيه مها معد تكدر
اجت صابرين تركض
صابرين:شاكوو ياستااار
الصوت صار حييل قووووي عبالك بأذنا
علاوي فوت سرى للغرفه
علاوي:لحددددد تطلللللع ابدددد وخرررن عن الشبابيييك
كال هيج وراح
متنا من الخوف
جده:وووول بس كووول شاكوووو
صابرين:يووول علااووووي بالقرااااان هجمووووعالبيت اكيد مايعوووفون فراااس طالع وهو جاتل ابنهممم
مها ختلت بحضني من الخوف وتصيح
خف الصوت..
جده:ووين صادق وفراااسسس
رنا: صادق طللع ويه عمو ابراهيم
سرى:شفت بس فراس بالاستقبال
رجعت الطلقات وصارت اقرب بعد عالشبابيك بذات
علاوي بس يصيييح
علاوي:لااااتطلعنننننن نززززلن راسجن
نوور: ماشفتننن  مصطفى وحسسسسن
سراب:ماددرييي ماددددري
سمعنا صوتهم يبجوون. حسسسن يبجيي ويصيح:باااااباااا
الصوت صار اقرب وقوووي حيل يخووف
تاتكوم نور تجيب الجهال
صابرين:وووولجن بالطاررمه ترااا ديضربووون وييين تكوومييييين
سراب انتهت من الخوف وتعيط
سراب:باباااا وينوووووو
الصوت صار مرعب ضرب بدون توقف  سمعنا صوت الشابييك تتكسسرر حتى الكهرباء طفت.......يتتتتتبع