بعد مرور شهرين**
م باقي على العرس الا اسبوع و لسة الجميع واقف في نفس المشكلة
ريفان(بي زعل): انا وضحت ال حاجة دي قبل كدة لي سهم و كلمتو يوري اهلو هسي حاليا جايي يمشيني بي حاجة انا م دايراها لي !!
ياسمين(بي همس): ريفان وطي صوتك الناس برا
ريفان: ي امي انتي كيف م زهجانة انا م دايرة زفاف
ياسمين: انا من بدري قلت ليك د اختيارك انتي .. و انتي حرة بس اتناقشي انتي و راجلك في الموضوع
ريفان: انا كلمتو و قلت ليهو م دايرة و قال تمام
ياسمين: ماف حاجة اسمها انا قلت ليهو في حاجة اسمها نقاش ي ريفو لازم تتناقشو مع بعض و تصلو لي حل يرضيك و يرضيهو هو كمان عندو احلامو و حاجاتو لي زفاف او حياة زوجية او غيرو و عندو اهل برضو بستشيرهم و دايرين ليهو الزفاف و هكذا عشان كدة لازم تتكلمو و تشوفو رايكم شنو الاتنين في الموضوع و اصلو لي حل يرضيك و يرضيهو و اعرفي متين تتنازلي شوية و متين تشدي على الموضوع و م تخليهو يمر
ريفان: انا م دايرة اي نقاش ولا تنازل ولا غيرو
الباب فجاة فتح و دخل نايف
نايف: في شنو صوتكم طالع برا عديل
و عاين لي ريفان بي استغراب
نايف: مالك ي ريفو!!
ريفان: م دايرة زفاف انا ي بابا انت عارف الحاجة دي صاح!!
نايف: اي من الاول قلتي م دايرة زفاف
ريفان: فجاة قبيل سهم قال لي مفروض نمشي نحجز فستان الزفاف
نايف: شنو!!
ياسمين: نايف دقيقة هي م اتكلمت معاهو ولا اتناقشت في الموضوع
نايف: م هي ورتو ..هي دايرة شنو من البداية .. حاجة غصبا عنها م بتسويها .. في بيت ابوها م عملت حاجة غصبا عنها يجي هو يخليها تعمل حاجة غصب عنها!
ريفان: ماما واقفة معاهو ي بابا
ياسمين: انا م واقفة مع زول انا بقول انو ...
حسام فتح باب الغرفة و دخل برضو
حسام: في شنو يخوانا الفورة !! الناس برا تغني و تضحك! و انتو هنا !!
ياسمين: بفهمك بعدين عاين سوق ابوك د و انا بلحقكم بعد شوية و خليك واقف مع الناس برا عندي كلمتين مع ريفان
حسام: ارح ي ابوي
نايف: انا م ح اسكت على الكلام د
ياسمين: نايف!! خلينا نتفاهم اول
حسام ج عليهو مسكو من كتفو و طلعو و قفلو الباب وراهم ..ريفان كانت قاعدة في الطرف السرير و بتهز في رجلها بي غضب و توتر
