အမျိုးသားခုနစ်ယောက်ကို ချစ်ခွင့်ပန်ရမယ်တဲ့..! ဘယ်လိုလုပ်ရမလဲ..? [ 2 ]

269

ခြူးမုယွင်သည် သူ၏အသံကို မကြားရပါသော်လည်း ပါးစပ်လှုပ်ရှားပုံကို ရှင်းရှင်းလင်းလင်း မြင်လိုက်ရသည်။

“အားယွင်.. ကိုယ် မင်းကို အရမ်းလွမ်းနေတာ..”

ခြူးမုယွင်က ပြုံးလျက် ပြန်လည်တုံ့ပြန်လိုက်သည်။ : “ငါရောပဲ..”

စကားဖလှယ်ပြီးနောက် ခြူးမုယွင်သည် Zero လေး၏ ခန္ဓာကိုယ်ကို မြှုပ်နှံထားသော ဥမင်လိုဏ်ခေါင်းထဲသို့ ခုန်ဆင်းသွားတော့သည်။

မြေအောက်တွင် ပထမဆုံးမြင်လိုက်ရစဉ်က ဧရာမသားရဲကြီး၏ သနားချင့်စဖွယ်ပုံစံကို ပြန်မြင်ယောင်မိရင်း ခြူးမုယွင်မှာ စိတ်မကောင်းဖြစ်သွားရသည်။

ဒီကလေး တကယ့်ကို ခက်ခဲခဲ့တာပဲ..!

ခြူးမုယွင်သည် လက်တစ်ချက်မြှောက်ကာ အစီအရင်ကို ဖျက်ဆီးပစ်လိုက်ပြီး မေ့မျောနေသော လင်းစုယွင်၏ ခန္ဓာကိုယ်ကို ခပ်ဝေးဝေးသို့ ဖယ်ထုတ်ပစ်လိုက်သည်။ ပြီးနောက် ဧရာမသားရဲကြီးကို မြေပြင်ပေါ်သို့ အောင်အောင်မြင်မြင် ဆွဲထုတ်နိုင်ခဲ့လေသည်။

နှစ်သန်းပေါင်းများစွာ ကုန်လွန်ခဲ့ပြီးဖြစ်၍ ယုတ္တိရှိရှိဆိုရလျှင် Zero လေး၏ ခန္ဓာကိုယ်က အရွယ်ရောက်သင့်နေချေပြီ။ သို့သော် ၎င်း၏ဝိဉာဉ်ကို ဆုံးရှုံးလိုက်ရသဖြင့် ခန္ဓာကိုယ်က အခွံလွတ်တစ်ခုပမာ ဖြစ်နေပြီး တစ်ချိန်လုံး အေးခဲခံထားရသောကြောင့် ဆယ်ကျော်သက်အသွင်က ပြောင်းလဲမှုမရှိ။

သို့သော် အံ့ဖွယ်သားရဲ၏ ဆယ်ကျော်သက်ပုံစံကလည်း တကယ့်ကို ကြီးမားလွန်းရာ မြင့်မြတ်ထည်ဝါသော တောင်ကြီးတစ်လုံးသဖွယ် ဖြစ်နေတော့သည်။

ခြူးမုယွင်သည် မန္တန်ရွတ်ပြီး ကောင်းကင်ပေါ်သို့ ပျံတက်လိုက်သည်။ ပြီးနောက် ဧရာမမျက်လုံးကြီးများကို ကြည့်ကာ..

“Zero.. မင်းရဲ့ခန္ဓာကိုယ်ထဲ ပြန်သွားတော့..”

နှစ်ထောင်ပေါင်းများစွာ ခန္ဓာကိုယ်တစ်ခုတည်း မျှဝေသုံးစွဲခဲ့ရပြီး ယခုလို ရုတ်ချည်း ထွက်ခွာသွားသောအခါ ခြူးမုယွင်၏ရင်ထဲ လစ်ဟာသွားသလို ခံစားလိုက်ရသည်။ သို့သော် တဖျတ်ဖျတ်တောက်ပကာ သက်ဝင်လှုပ်ရှားလာသော ဧရာမမျက်ဝန်းဝိုင်းကြီးများကို ကြည့်ပြီး ခြူးမုယွင် မှင်သက်သွားရပြန်သည်။