*طلع جلال فوق وهو متعصب وأول ما دخل الشقه مسك الراجل ونزل فيه ضرب، وليالي كانت بتصوت! *
جلال(بزعيق) :بتعمل ايه هنا ياابن الكل*؟؟؟..ده انا هـ.....
*ولسه بيكمل الجمله لقاه أخو ليالي!..قام وهو مصدوم وليالي فضلت تصرخ وجريت على أخوها تلحقه*
ليالي(بصويت) :حرام عليك ياجلال..ايه اللي انت عملته ده؟؟؟..حسبنا الله ونعم الوكيل فيك ياأخي
جلال(بتردد) :امممم..هو انت..هو انت يا صابر؟؟
صابر(بزعيق) :جرا ايه ياعم اللي عملته ده..بقى بتضربني ياجلال؟؟
جلال:هو انت رجعت من السفر امتى؟
*راحت ليالي مقومه أخوها وكانت بتبص لـ جلال بـ غل*
صابر(بزعيق) :وانت مالك؟؟..بقى بتضربني ياجلال؟..هو انا جاي أتهان في بيتك يا ليالي ياختي؟؟
ليالي:والنعمه ابداً
*وراحت مزعقه لـ جلال*
ليالي(بزعيق) :ايه اللي انت هببته ده ياجلال؟
جلال:طب اقعد ياض..حقك على راسي.. اصل انا راجل دمي حامي ولمؤاخذه فكرتك بتاع الانابيب
ليالي(بزعيق) :وبتاع الانابيب هيجي هنا يهبب ايه؟؟
صابر(بزعيق) :لمي هدومك ومعايا على بيت ابويا يا ليالي..اخوكي اتهان من جوزك
ليالي(بصويت) :طب والنعمه مانا قعدالك فيها ياجلال..كله الا صابر أخويا.. أخويا خط احمر..اااه يامراري منك
*دخلت ليالي تلم هدومها..كل ده وجلال مصدوم من اللي حصل ومش عارف ينطق بنص كلمه من اللي حصل*
صابر(بزعيق) :ماشي ياجلال..وانا اللي فاكرك هتاخدني بالحضن ده انا بقالي شهور مسافر ويوم ماارجع يحصل فيا كده؟؟
*وبعد شويه كانت ليالي لميت هدومها ومشيت مع اخوها*
صابر:يلا يا ليالي ياختي
ليالي:يلا بينا ياخويا
*وخدت الشنطه ونزلت وكانت أم الديب سامعه زعيق فوق..وواقفه قدام باب الشقه تتابع اللي بيحصل..وفجأةً لقيت ليالي نازله مع اخوها بـ شنطة هدومها وباين على وشهم الغضب! *
ام الديب(بشماته) :ليه كده بس ده انا كان قصدي خير..يلا ربنا يجعلها أول الاحزان يوه قصدي آخر الأحزان..ده انا بحبكم اوي..ربنا العالم
*وبصقت مكان ما عدوا ودخلت الشقه ورزعت الباب*______تحت في الشارع____
ليالي:وحشتني اوي ياخويا
صابر:وانتي كمان يا ليالي ياختي..وحشتيني اوي انتي وهبه وابويا وأمي..بس انا زعلان من اللي حصل
ليالي:بيني وبينك انا استغليتها فرصه عشان اهرب من شغل البيت..ده احنا من ساعة ما رجعنا من المصيف مرتاحتش ولا دوقت طعم الراحه..تقولش ياخويا مستعبديني؟
صابر:خلاص اقعدي معانا شهر..وتبقي خدتيلك اجازه من شغل البيت
ليالي:يا خوفي بس لا أمي تستغلني هى التانيه..بس لاا انا جايه ارتاح عندكم يومين يبقى محدش يطلب مني حاجه
صابر:ده انتي هتنوري الدنيا كلها
ليالي:ده بنورك انت ياحبيبي يا غالي
__________عند جلال__________
*كان لسه نازل..لقى بنته صحيت من النوم*
تقى:ماما فين؟
جلال:وانا ايه دراني..خشي جوا يابت.. يلا خشي
*دخلت تقى أوضتها..وجلال نزل شايط عند أمه..وكان عمال يرزع على الباب بـ غل..لقى ام الديب فتحتله وهى بتاكل*
جلال(بزعيق) :ماهو ده اللي انتي فالحه فيه ياما..الحش والنوم..قوليلي انتي ايه فايدتك في الدنيا؟؟..بتفيدينا بـ ايه؟؟..بقى ياما تقوليلي بتاع الانابيب فوق وأطلع الاقيه صابر؟
ام الديب(ببرود) :بقولك ايه ياجلال..ابقى ابعت بتاع الدش يصلحلنا التلافزيون..أصله كان مسليني اوي
جلال(بزعيق) :شوفي انا بتكلم في ايه وانتي بتتكلمي في ايه؟؟.. ياما متجننينيش ده انا مخي ضارب مني!!!...عاوزه مني ايه ياما؟؟..وبتولعي الدنيا حريق ليه بيني انا ومراتي؟؟
ام الديب(ببرود) :يابختكم اتفسحتوا وغيرتوا جو..لكن آني مشوفتش البحر..ده آني دلوقتي هعمل مزاج عنب.. وسع ياولا من قدامي..ماتوسع ياخويا انت عاجبك طولك ولا ايه؟؟
![](https://img.wattpad.com/cover/348851506-288-k496313.jpg)