*بعد ما زياد بص وشاف ضايع اكتشف انه هو فعلاً*
زياد:يانهار اسود ده هو!!!!...هو ازاي خرج؟؟؟
هايدي:يبقى هرب من السجن!!!
زياد:اهو ده اللي انا كنت خايف منه
السواق:في حاجه حضرتك يااستاذ؟
زياد(بتردد) :لالا مفيش حاجه..ركز في طريقك
*وبعد لما زياد وهايدي وصلوا العماره..أول حاجه عملوها عدوا على شقة أحمد..لحد ما احمد فتحلهم وكان لابس وشكله خارج برا *
زياد:احنا شوفنا خالك ضايع!!..خالك هرب!!
احمد:مانا عارف انه خرج
زياد:عارف ومقولتلناش؟؟
احمد:اهدى بس يازياد..انا محبتش اقولكم حاجه لاني مكنتش عايز أخوفكم..بس متقلقوش عمي بعت حرس على باب العماره تحت
زياد(بعصبيه) :يعني ايه؟؟..يعني حق ابويا ضاع؟؟..وانا اللي كنت بصبر نفسي بـ ان حقه راجع من الكلب ده!!
هايدي:ووصلتوا لـ ايه؟..هيسيبوه يهرب؟
احمد:لا طبعاً ده مش هيحصل..هما دلوقتي قالبين الدنيا عليه والموضوع بيكبر كل يوم عن الأول..وأول ما يلاقوه هيعجلوا بـ إعدامه لانه ممكن يعملها تاني ويهرب
زياد(بعصبيه) :لو حق ابويا مرجعش انا مش عايز اعرفكم تاني
*وسابهم ودخل شقته، وهايدي كانت مصدومه..وأحمد اول ما سمع الكلام ده بص في الأرض*
هايدي(بتردد) :احمد..متزعلش من زياد هو مش قصده والله..هو من كتر زعله طلع الكلام منه كده..لكن انت.. يعني..انت عارف كويس انه بيحبك
احمد:انا مخدتش على كلامه يا هايدي..وياريت تروحي وراه تهديه وتعرفيه ان ضايع نهايته قربت
هايدي:حاضر.. بس ممكن متزعلش منه؟
احمد:مفيش اي حاجه
*وطبطب على كتفها وابتسم ابتسامه خفيفه ونزل..وهى دخلت شقتها*
هايدي:ايه يا زياد الكلام اللي قولته لأحمد ده؟..وهو ماله باللي خالي بيعمله؟
زياد:مكنش قصدي يا هايدي..انا بس حاسس ان حق ابويا بيضيع وانا قاعد في مكاني ساكت..هايدي انتي أكيد عارفه قد ايه انا بتعذب بسبب اللي حصل ده..انا بتحرك قدامك وعايش عادي لكن من جوايا ميت ومش حاسس بالدنيا
هايدي:لا يازياد ياريت تطلع الافكار دي من دماغك..وهو لو متمسكش علشان اللي عمله في عمي..هيتمسك علشان اللي عمله في ناس كتير اوي..احمد قالي اطمنك بـ ان حقه راجع..ممكن يا زياد تهدى شويه عن كده..وتعتذر لـ احمد عن الطريقه اللي اتكلمت بيها معاه
زياد:انا هروحله
هايدي:تروحله فين؟..احمد خلاص نزل..اتصل بيه او استنى لحد مايرجع
زياد:انا هكلمه بس مش دلوقت
هايدي:ماشي يا زياد
_________تاني يوم_________
*رجعت العيله من المصيف، وكانوا شايلين هم هيقابلوا ام الديب ازاي؟..كان جلال وحامد وليالي ونعمه وعيالهم في مدخل البيت ومعاهم الشنط طالعين بيها*
نعمه:انا خايفه اوي يا ليالي.. لا أمي تشبط فينا
ليالي:خلاص ياختي مابقتش فارقه..انا عن نفسي اللي هيفكر بس يتكلم معايا نص كلمه..هوريله اللي عمره ما شافه
*وهما طالعين وصلوا عند شقة أم الديب لقوها فاتحه باب الشقه وقاعده في الصاله قصادهم*
ام الديب(بتنده) :ياجلااال...انده يالا ابوك
حمود:ابويا طلع
ام الديب:اندهولي وعلى الله حد فيكم يطلع شقته الا لما تيجوا هنا الأول
*راحت ليالي بالعند فيها..طالعه..راحت أم الديب ندهتها*
ام الديب(بزعيق) :آني قولت محدش يطلع
ليالي(بعصبيه) :شايفه يانعمه؟
نعمه:اصبري بس وخليها تعدي على خير
ام الديب(بصوت حاد) :تعالواا
*دخلت نعمه وليالي وعيالهم*
ام الديب:اطلع يالا انده ابوك وجوز عمتك
حمود(بقرف) :طيب
*و طلع حمود فوق*
ام الديب(بصوت حاد) :بقى يابت منك ليها طالعين ومش هاين عليكم تعدوا عليا تشوفوني
*محدش فيهم رد وكانوا بيبصوا لـ بعض*
ام الديب:ايهي مالك يابت انتي وهى كل وحده بتبص للتانيه ليه؟..اتفسحتوا كويس يابت؟
*وراحت قايمالهم*
نعمه:اه الحمدلله
ام الديب:حمدالله على السلامه ياختي منك ليها..امكم مرميه في السجن وانتوا رايحين تتفسحوا ولا هاممكم..ماهي لو واحده تانيه اللي امها اتسجنت كان زمانها مخلصه تراب بلدهم كله على دماغها
ليالي(بقرف) :وانا أمي الحمدلله طول عمرها في حالها لا ليها في المشاكل ولا في القرف..الدور والباقي على اللي بيحبوا المشاكل زي حباب عينيهم
نعمه:يلا يا ليالي..احنا جايين من سفر وعايزين نرتاح
ام الديب:آني اللي يجي بيتي ميشوفش فيه راحه
*وفجأه نبرة صوتها اتغيرت*
ام الديب(بصريخ) :من النهارده تنزلوا تخدموني..وتنضفولي البيت تخلوه بيبرق..واللي مش هتنزل آني هطين عيشتها..واللي هتفتح حنكها بكلمه آني هوريها أسود ايام حياتها..فاهمين ولالا؟؟؟
*طلعت تجري ليالي ونعمه وعيالهم على فوق من شدة صوتها..دخلت ليالي شقتها..كان جلال بيغسل وشه*
ليالي:ادخلوا اوضتكم يلااا
*وراحت لـ جلال*
ليالي(بزعيق) :انت تشوفلي صِرفه مع امك ياجلال..امك دي عِرقها طاقق منها..وربنا مانا نازله أخدم حد..وتشوفلنا شقه في داهيه تانيه..انا خلاص معتش ساكتالها
