ليالي:ازيك ياحماتي منوره الدنيا كلها..كنتي فين كل ده..ده انا خوفت عليكي..اسكتي بقى ده انا النهارده هجهزلك أكلك انتي وحمايا وانزلهولك لحد عندك..امال ايه هو انا عندي أغلى منك؟
ام الديب:ايهي انتي بتقولي ايه يامخفيه؟
ليالي:بقول اللي سمعتيه..طب تعرفي ده انا زعلانه من نفسي اوي وبقول حماتي مكنتش تستاهل مننا كل ده..ده انتي تستاهلي كل خير يا غاليه
*وقربت من أم الديب تحضنها،ومن ورا ضهرها كانت قرفانه منها*
ليالي:حمدالله على السلامه ياغاليه ياأم الغالي..تعالي ارتاحي عندنا..اما قوليلي الكنافه عجبتك؟
ام الديب:انتي مين يابت؟..ومين اللي مسلطك عليا؟؟
ليالي:يوه انتي لحقتي تنسيني ولا ايه؟..انا مرات ابنك حبيبتك..طب تصدقي احنا ملناش غير بعض وانتي من النهارده تؤمري واحنا ننفذ
ام الديب(بـ شك) :مش مرتحالك يابت وحاسه ان وراكي مصيبه كبيره مستخبيه
ليالي(بتمثيل) :ودي تيجي برضه ياحبيبتي؟..هو احنا حد فينا يقدر على زعلك؟..طب عارفه..جلال طول اليوم ضميره يأنبه..بيقولي حاسس ان انا جيت على أمي كتير اوي..أمي دي طيبه وقلبها أبيض..قولتله اه والله عندك حق احنا لازم نصالحها..انتي بس شوفي عايزه ايه واحنا نجيبهولك لحد عندك
ام الديب(بإستغراب) :انتي مالك متبدله كده ليه؟؟..شوفي بقالك كام سنه في بيتنا..وعمرك ماعملتي اللي بتعمليه ده..ناويه على ايه يا ليالي؟؟
ليالي:كل خير والله ياحماتي..انا نفسي اننا نصلح علاقتنا ببعض وننسى اللي فات كله بالوحش اللي فيه..ونفتح صفحه جديده مع بعض..عايزين نلم شملنا من تاني ياحماتي
ام الديب:وايه اللي خلى جلال ضميره يأنبه يابت؟..ماهو طول عمره واطي ويبيع أبوه عشان الفلوس..هيهيهي جه دلوقتي وضميره أنبه؟
ليالي:ساعات ياحماتي..الواحد بيكون غافل عن الناس الحلوه اللي حواليه ومش شايفهم اه والله مش شايفهم..وفجأه ضميره يصحى ويقوله لا فوق لنفسك..مش دول اللي ينفع تيجي عليهم وتظلمهم اللي زي دول يتشالوا على الراس
ام الديب:ده آني وجلال مفيش حسنه واحده مابينا..ذكرياتنا كلها مهببه مع بعض يابت..ايه ياترى اللي هو افتكرهولي خلاه رجع عن تفكيره؟
ليالي:ده كفايه بس ياحماتي ياغاليه انك شيلتيه في بطنك 9 شهور..وجيبتيه للدنيا..وأكلتيه وشربتيه ولبستيه..لحد ماكبر وبقى راجل ملو هدومه
ام الديب:ده آني ياما طفحته واهو مطمرش فيه الطفح لا هو ولا أبوه.. ده كان بيتعوج على الأكل يابت..ده آني كتفي اتخلع من كتر ماكنت بشيله..هو أبوه كان يرضى يشيله؟..ده كان رامي طوبته..طب عارفه يابت ياليالي..حماكي الواطي اللي تحت ده..لما عرف إني حبله في جلال..وقفلي وقالي نزلي الواد ده آني مش عاوز أخلف منك
__________فلاش باك__________
*جات أم الديب من ٣٠ سنه للمعلم حنفي..كان قاعد على الأرض ممدد*
المعلم حنفي:ايه الدخله السواد دي..مالك يابسمه؟
ام الديب:آني حبله في الواد ياحنفي
*قام المعلم حنفي وهو مصدوم*
المعلم حنفي(بزعيق) :أنتي بتقولي آيه يا وليه؟؟..انا مش عاوز عيال منك..مش كفايه اتدبست فيكي..وكمان عاوزه يبقى بينا عيال؟..العيل ده لازم ينزل
ام الديب:لاااا كله إلا ابني..انا ابني الجاي هسميه جلال..هيكبر ويبقى سندي..هيرجعلي حقي منك ياحنفي
المعلم حنفي(بزعيق) :جاكي كسر حقك..ده انا اللي ليا حقوق كتير عندك انتي واخوكي ضايع اللي دبسني فيكي..مش كفايه حرمتوني من الفرحه اللي عيشت سنين مستنيها؟؟
ام الديب(بزعيق) :اسمع ياحنفي..ابني هيفضل جوايا لحد مايجي الدنيا ويشرف..ويكبر ويبقى راجل ملو هدومه..يقف ورا امه ويساعدها..وإن كان ليك كلام تاني فااشرب من الترعه
*وسابته ومشيت،لحد مالمعلم حنفي اتعصب زياده*
المعلم حنفي(بزعيق) :هضربك بالنبوت في بطنك يابسمه، ولا اقولك هأجرلك عربيه تدوسك وارتاح من همك..مش كفايه ظلمتوني؟..كمان هتجيبي عيل وتظلميه هو التاني؟
_______________________________
ليالي:ياه ياحماتي، ده حمايا طلع ظالم ومفتري..حد يعرف ان مراته حامل ويطلب منها طلب زي ده؟..طب والنبي لو كان جلال مجاش الدنيا كنت انا هحب مين واتجوز مين؟
ام الديب(بصوت حاد) :امال انتوا فاكرين ايه؟؟..الراجل دهو ياما ظلمني وجه عليا وجه اليوم اللي اطلع علي جتته القديم والجديد كله..ده راجل ناقص ربايه
*وفجأه الدم غلى في عروقها ونزلت علشان تتخانق معاه، وليالي جريت وراها تهديها*
ليالي:اصطبري بس ياحماتي،هو انا بتكلم معاكي عشان تنزلي تتخانقي معاه تاني، اهدي عشان اعصابك ده احنا عاوزينك
ام الديب(بزعيق) :بسمه متسيبش حقها ولو على جثتها..بقى آني استحملك كل السنين دي على الفاضي؟؟
ليالي:علشان خاطر اغلى حاجه عندك، متعمليش في نفسك كده..ده انتي صحتك عندنا بالدنيا
*دخلت أم الديب الشقه..ملقتش المعلم حنفي*
ام الديب(بزعيق) :انت روحت فين ياعرة الرجاله؟؟..اظهر وبان..متفكرش انك كده هربت مني..لااا ياخويا ده انا اجيبك من تحت سابع أرض
ليالي:خلاص ياحماتي بقى، ماهو طلع مش موجود اهو
ام الديب:آني عارفه هو راح فين
