*دخل الطور المحل والمره دي كان متعصب..وأول ماام الديب شافته اتقلبت وقامت من مكانها وبتصوت..وجلال وهايدي وزياد طلعوا يجروا دخلوا جوا لـ ليالي وقفلوا الباب وسابوا أم الديب برا لواحدها*
ام الديب(بصويت) :يالهوتاااااااي دكاااااني..هو الطور دهو موراهوش حاجه غير دكاني ياعااالم..بقولك ايه ابعد عن سكتي وإلا هكسرلك قرونك دهي فاهم ولالا؟؟
*راح الطور داخل على أم الديب بكل قوته..قرنه دخل في بطنها..راح مغم عليها ومكفاهوش..راح مكسر المحل بكل اللي فيه لتاني مره..وجوا كانت ليالي وهايدي والستات بيصوتوا*
جلال(متوتر) :اسكتي يابت منك ليها..عاوزين نتصرف..الطور ده جه منين؟
ليالي(بتلطم) :يالهوي يالهوي
زياد:والعمل ايه طيب؟؟
جلال(بزعيق) :اهو اتقلب السحر على الساحر.. كان يوم اسود يوم ماروحتي لجارتنا يا ليالي..عاجبك المصيبه السوده اللي اتحطينا فيها؟
ليالي(بصويت) :وانا ايه دراني إن كل ده هيحصل؟؟ذنبي إن كنت عايزه ارجع حقي وحقك؟
هايدي(بصويت) :هو انتي اللي عملتي كده المره اللي فاتت؟
ليالي(بصويت) :أمك هى اللي اضطرتني لكل ده ياهايدي
جلال(بزعيق) :اصطبروا بقى خلينا نتصرف في سنتنا الزرقا دي
*ولما لقى صوت التكسير وصوت الطور اختفوا..فتح الباب ببطئ وحذر لقى الطور بيشم في أم الديب وهى مرميه على الأرض*
جلال(مستغرب) :هى حُبكت تشم فيها دلوقت؟..انت ياجدع يالي برا آني عاوز اخرج إلا وربنا هكسرلك عضمك
*راح الطور راجع ب ضهره واتطلق عليهم وفي ساعتها كان جلال قفل الباب من الخضه*
جلال(بزعيق) :مش حتة طور اللي يعمل فيا كده ياليالي
ليالي(بصويت) :انت بتقول ايه ياجلال؟..ده طور مش واحد من الناس اللي تعرفهم..ياخراب بيتك ياليالي..سيبتي بيتك وعيالك وجيتي لـ قضاكي هنا..لو كنت اعرف ان كل ده هيحصل والله ماكنت جيت
جلال(بزعيق) :ماتتكتمي يابت انتي هتروشيني ليه؟ آني مش عارف افكر من صويتك اهدي شويه
زياد:انا هنط من الشباك..ياريتني كنت جيت بالليل ايه اللي جابني دلوقت بس
جلال:من نحنحتك ياض..نحنحتك هى اللي عملت كل ده
ليالي(بعياط) :إنجدووونا يالي برا..انجدوونا أحب على أيديكم.. عايزه ارجع لـ عيالي سليمه..يارب سلم يااارب
هايدي(بخوف) :ارفعيني وهنط ورا زياد
ليالي(بعياط) :هتنطي ازاي بس؟
هايدي:ارفعيني بس وملكيش دعوه
*راحت ليالي رافعه هايدي ناحية الشباك لحد مانطت ورا خطيبها..ولفوا من ورا المحل..وأول حاجه عملوها..طلعوا يجروا راحوا للمعلم حنفي حكوله اللي حصل*
المعلم حنفي:تحسي يابت ان ربنا مش عاوز المشروع ده..متسدده من كل ناحيه..مانا قولتهالكم كلمه..كار المشاريع ده مش كارها..المهم..امك ماتت ولا حيه؟
هايدي(بخوف) :وانا ايه عرفني بس يابابا؟..الدنيا متدمره هناك وخرجنا بالعافيه..شوفلنا حل.. عايزين نخرج جلال وليالي والستات اللي كانوا معاها
المعلم حنفي(بيقوم) :آني هعمل كده علشان اخوكي ومراته والنسوان الغلابه..لكن أمك تولع..والله ماتفرق معايا بـ ربع جنيه أصل دي وليه مقرفه وبتاعت مشاكل
زياد:طب الحقهم ياعمي وأجل الكلام ده لبعدين
المعلم حنفي:آني هعمل كده علشانك انت والبت هايدي..قدامي اما نشوف..استرها علينا يارب
*وخد هايدي وزياد وكان رايح اتجاه المحل بخوف وحذر لحد ما لقى ناس كتير واقفين قدام المحل ومطلعين الطور وهو متربط..و جارة ام الديب بتجري عليه بخوف*
جارتهم(بصويت) :ايه اللي جابك عندهم بس؟..ده انا قلبت عليك الدنيا كلها
_هو الطور ده بتاعك ياحجه؟
جارتهم:ايوه بتاعي وهرب..يارب..ده كان يوم اسود يوم ما ليالي طلبت مني يتطلق على دكان حماتها
ليالي(بزعيق) :جرا ايه ياست انتي هتسيحيلي وسط الخلق ولا ايه؟..مااحنا دافنينه سوا ولا نسيتي؟
جارتهم(بزعيق) :لو مكنتيش جيتيلي وطلبتي مني اللي طلبتيه عمري ماكنت عملت كده ولا كان كل ده حصل
ليالي(بزعيق) :ماتسكتي ياللي ربنا يفضحك زي ما فضحتيني
جارتها(بزعيق) :ملكيش دعوه بيا تاني ياليالي ورجلك متعتبش عتبة بيتي وإلا هقولهم على باقي مصايبك.. هو انا هلاحقها منك ولا من حماتك الفتوه
*وسابتهم ومشيت..وكانت ليالي بتزعق وجلال طلع المطوى واتحول على الوش التاني*
جلال(بزعيق) :ايييه في ايييه؟؟ مش مالي عينك ولا ايه يابت؟؟..لما جلال يحضر كله يتخرس..امال ايه؟؟..شايفني قرطاس ولا ازازة خل؟؟..ولو فيكم راجل بحق وحقيقي يطلعلي ويشوف هعمل فيه ايه!!
ليالي(بخوف) :خلاص ياجلال..كانت مشكله وراحت لـ حالها
جلال(بزعيق) :بلا خلاص بلا مخلصش مش انتي اللي هتقوليلي اتكلم امتى واسكت امتى
ليالي:في ايه ياجلال مالك؟
جلال(بزعيق) :إركني انتي دلوقتي على جنب
ليالي:يوه!
*وضربت ايديها على صدرها مش عاجبها الكلام*
جلال(بزعيق) :يلا كل واحد يشوف أشغاله..والدكر فيكم اللي يستنى هنا..وربنا..وربنا..ادفنه صاحي..يلااا مستنين ايه؟؟
*وكل الناس خافت ومشيت..وخدوا أم الديب ودوها المستشفى..ولما احمد وجميله وأم قمر الدين عرفوا راحولها..وأثناء ما كانوا راكبين العربيه كان احمد بيكلم هايدي في الموبايل*
احمد:مانا قولتلكم بلاش مشاريع..محدش سمع الكلام..اهو انتوا دايماً كده تمشوا بـ دماغكم وفي الآخر تتصلوا تعالى الحقنا
هايدي:احنا اصلاً مكنش حد فينا موافق!..كلنا عارضناها..وهى كانت مصممه
احمد:خلاص ياهايدي..الكلام مش هيرجع اللي فات..ماما عامله ايه دلوقت؟
هايدي:الطور.. قرنه دخل في بطنها.. فتحلها جرح 5 سم
احمد:ياه للدرجادي!.. وايه اللي جابه اصلاً!
هايدي:ليالي هى اللي بعتته.. كان في حوار بينهم وحبيت تفش غلها من ماما
جميله:ركز في الطريق بلاش كلام دلوقتي
احمد:ماشي.. طيب ياهايدي انا جاي في الطريق اهو
هايدي:ماشي توصلوا بالسلامه
*وعند ليالي كانت قاعده برا في صالة الانتظار هى وباقي عيال أم الديب..ونعمه أول ماعرفت جات هى وجوزها*
نعمه(بصويت) :ياماااا ياغاليه..بختك اسود من يومك...مبتلحقيش تتهني بحاجه ابداً...يامااااا ياحبيبتي
ليالي:اهدي يانعمه متعمليش في نفسك كده..غلط على اللي في بطنك
حامد(متعصب) :قوليلها يا ليالي..اهي طول الطريق على نفس المناحه دي..هو يعني صويتك هيرجع اللي راح؟
نعمه(بصويت) :اسكت انت خاااالص ياخويا..ياعيني عليكي ياماااا ياغاليه ياقلبي ياكبدي..ياحياتي..ياعيوني ياما
المعلم حنفي:انتي مكبره الموضوع اوي يانعمه..اللي يشوفك بتصوتي يفكر في مصيبه حصلت!
نعمه(بصويت) :ماهو اللي حصل ده أكبر مصيبه يابا!.. انا أمي بين الحياه والموت..طلعلي المناديل من الشنطه ياحمو
حامد:حاضر يانعمه.. اهدي بس وان شاء الله خير
نعمه(بصويت) :ياماااا ياغاليه..ماتقول حاجه ياجلال ساكت ليه؟
جلال:هقول ايه يابت؟..آني نفوخي هينفجر من صويتك..هلاقيها من ليالي ولا منك؟
ليالي(متعصبه) :وانا كنت عملت ايه يعني؟
جلال(متعصب) :لا ياختي ولا أي حاجه..مانا اصلي بحور
ليالي(بزعيق) :اه بتحور ياجلال.. كل اللي بيحصلنا ده بسبب أمك..ماهو ربنا مش مبارك في المشروع ده شكله كده بفلوس حرام..تلاقي امك سارقاهم من ست بسمله وعامله علينا الفيلم ده كله وفي الآخر هبل وبنتلسع على قفانا
جلال(بزعيق) :هطلعلك المطوى يا ليالي ومش هيهمني حد.. اتكلمي على نفسك يابت..جلال ميتلسعش على قفاه مهما حصل!
*ولسه بيكمل كلامه لقى كف جامد نزل على قفاه..سمع كل الموجودين..بيبص وراه لقاه خاله ضايع*
جلال(بإحراج) :ايه ده خالي؟..انت..انت جيت ازاي؟
*راح ضايع ساحبه وواخده بالحضن*
ضايع:جرا ايه ياض مش تقولي حمدالله على السلامه الأول
جلال:حمدالله على السلامه ياخالي
ضايع:ازيك يابت اختي؟..ربنا يجعلها أول الأحزان
جلال:آخر الأحزان ياخالي!
ضايع:معلش ياض لسه لافف صوباع حشيش ومش مفوق..امال حنفي فين؟
*بيبص لقاه جنبه*
ضايع:مجيتش ليه ياجوز اختي؟
المعلم حنفي(مستغرب) :مجيتش فين لمؤاخذه؟
ضايع:هنا هاهاعهاهاع..دمي عسل..يلا سلامووو عليكووو
جلال:وانت لحقت تقعد ياخالي؟..ولا جاي في المشهد ده ضيف شرف؟
ضايع(بصوت عالي) :أشوفك بالليل في الكباريه..متتأخرش
*وسابهم ومشى..راحت ليالي مصوته وماسكه في رقبة جلال*
ليالي(بصويت) :يانهار اسود عليا..انت لسه بتروح كباريهات؟؟..اعمل فيك ايه؟؟..انت مفيش فايده فيك وفي مشيك الشمال!.. قولتلك خالك ضايع ده هينزلك سابع أرض مسمعتش كلامي!
جلال(بزعيق) :اوعي ايدك يابت
*وزق ايديها بعيد وكمل كلامه*
جلال(بزعيق) :انتي هتألفي حوارات من نفوخك؟ ماجرا ايه ياليالي ماتعدي اليوم..وربنا..هتخلوني اتجنن واناملكم ملط هنا وهجرصكم في البلد
ليالي(بصويت) :وانا كنت جيبت كلام من دماغي؟..مش ده كلام خالك؟
جلال(بزعيق) :ماتشوف حل معاها يابا.. انا دماغي تعبت منها والنسوان حواراتهم كتير مابتخلصش
نعمه(بعياط) :وحشتيني اوي ياما..هنعمل ايه من بعدك
المعلم حنفي:مانتي عارفه ياليالي انه عامل دماغ عنب ومش دريان بيقول ايه ..سيبك منه انتي عارفه جلال جوزك ميطلعش منه العيبه مهما حصل
ليالي(بخوف) :اه ياخوفي منكم!
*وشويه وطلع الدكتور والممرضه بأم الديب وكانت متبنجه ومش حاسه بنفسها ونازله شتيمه في ليالي وأول ماخرجت قاموا كلهم ماعدا المعلم حنفي*
نعمه(بتجري) :أمي عامله ايه ياداكتور.. طمني عليها؟
الدكتور:الحمدلله خيطنا الجرح وهتبقى كويسه متقلقوش
نعمه(بخوف) :يااارب يااارب
جلال:يعني كله تمام يامعلم؟
الدكتور:معلم؟.. ايه يااستاذ فاكرنا واقفين في الموقف ولا ايه؟
حامد:جلال ميقصدش بس دي طريقة كلامه
جلال:انت بتقوله ايه ياض؟..أنا كده وهفضل كده واللي مش عاجبه يخبط دماغه في الحيط
الدكتور:مينفعش اللي انت بتقوله ده! التزم حدودك!
*ولما المعلم حنفي حس ان في مشكله هتبدأ قام من مكانه وسحب جلال بعيد..وشويه ودخلوا كلهم الأوضه*
ام الديب:ليااالي دي
ليالي:مالها؟
ام الديب(بتخرف) :أبوها سلامه دباح الحمير.. ربنا يجحمه مطرح ماهو قاعد.. ياكش يتشل ومايلاقوله علاج
ليالي(بعصبيه) :انشالله انتي واللي يتشددلك
نعمه(بعصبيه) :الله في ايه ماتهدوا على نفسكم!.. انتي كويسه ياما؟
ام الديب(بتخرف) :اخوكم حنفي مات
هايدي(بتضحك) :بابا فجأه كده بقى اخونا سبحان الله!
زياد(بيضحك) :فظيعه اوي مرات عمي دي
هايدي(بتضحك) :اووي
ام الديب(بتخرف) :وصيتي ليكم..تشيلوا الكوبايات اللي في الدكان وتحطوا بدالها ازايز.. خبي الازايز الصفرا يانعمه
نعمه(مستغربه) :وصية ايه وكوبايات وازايز صفرا ايه ياما؟
ليالي(بتريقه) :تأثير البنج متاخديش في بالك.. ده لولا انها متبنجه كان حسابها معايا هيبقى عسير على اللي قالته على أبويا
نعمه:والنبي ياليالي مانتي عارفه اللي فيها.. البنج بيعمل عمايله برضه
ليالي:مانا بقولك اهو علشان كده مخدتش على كلامها
نعمه:اصيله يا ليالي
*وبعد ساعه كان احمد وجميله وأم قمر الدين وصلوا..ودخلوا لأم الديب *
أحمد:ايه طمنوني ماما عامله ايه دلوقت؟
نعمه:الحمدلله أحسن
ام قمر الدين:هاي ازيكم؟
كلهم:كويسين
*وقامت هايدي تسلم على أم قمر الدين وجميله*
هايدي:عامله ايه ياجميله؟
جميله:الحمدلله ياحبيبتي بخير
هايدي:ازي حضرتك ياطنط؟
ام قمر الدين:الحمدلله.. مامي عامله ايه دلوقتي؟
نعمه:الحمدلله ياست بسمله..اتفضلي اقعدي
ام قمر الدين:ميرسي
*وبعد ماقعدوا يرتاحوا*
ام قمر الدين:حاجه غريبه اوي اللي حصلت لأم الديب دي!
نعمه:عندك حق ياست بسمله..بس اهو قدر ومكتوب.. هقول ايه بس قليل البخت يعضه الكلب في المولد
ام قمر الدين(مستغربه) :اوه ماي جاد بجد مش قادر استوعب اللي حصل ده..ايه اللي جاب الكائن ده اصلا عندكم؟
هايدي:الخير والبركه كلها ترجع لـ ليالي
ليالي(بزعيق) :مالك ومالي ياهايدي..قارشه ملحتي ليه؟؟
هايدي(بزعيق) :مش ده اللي حصل برضه ولا انا بألف؟
جلال(بزعيق) :انتوا مابتحرموش؟
احمد:لا بقولكم ايه استنوا لما امشي واعملوا اللي انتوا عايزينه انا جاي مش ناقص مشاكلكم
جلال(بزعيق) :ماهو العيب عليا مش عارف اسكت اتنين نسوان بس آني هعرف اسكتهم كويس
زياد:لو سمحت ياجلال ملكش دعوه بـ هايدي!
جلال(بيقوم) :وانت مالك ياض ايه حشرك مابينا؟.. طب احنا اخوات وبنتكلم انت مالك؟؟
*قام زياد من مكانه وبصلهم وسكت وخرج برا وهايدي خرجت وراه هى وأحمد*
هايدي:استنى بس يازياد متمشيش!!.. استنى طيب!.. مانت عارف ان جلال حلوف ومبيختارش كلامه!
احمد:استنى يا زياد طيب..متاخدش على كلامه!
*وجوا كانت ليالي قاعده بكل غرور وتناكه قصاد جميله*
ام الديب(بتعب) :مجيبتوش الصبيان معاكوا ليه؟
نعمه:صبيان ايه ياما سلامتك..مانتي عارفه انهم بتين سيليا وأسيل
ام قمر الدين:لا احنا سيبناهم في الفيلا مع نالا ومنى وقمر الدين..المهم انتي بقيتي أحسن؟
ام الديب(بتخرف) :انتوا مين؟
جلال:الوو مين معايا؟
_تعالالنا احنا الصحه وواقفين قدام المحل
جلال:طيب جاي في السكه
ليالي:ايه ياجلال في ايه؟
جلال:بتوع الصحه جايين الدكان..هروح اشوف في ايه
*ولما راح وفتحلهم المحل ودخلوا يكشفوا على المنتجات اتضحلهم ان العصاير محطوط عليها كارثه*
جلال:ايه ياباشا مالك متنح كده ليه؟
_العصاير دي معموله من بول الحمير
جلال(مصدوم) :ياخبر اسود!
