جلال(بزعيق) :هقتلهولك ياما...ااااه...ابعدوه من سكتي...هتجنن عليكم..اوعى ياابن الكلب.. اوعى!!
*وبيزق الكلب..ولكن الكلب ماسك فيه ومش عايز يسيبه..وبعيد كانت أم الديب بتشرب العصير وولا هاممها*
ام الديب(ببرود) :ملكش دعوه بـ سلامه..سلامه يعمل اللي هو عايزوا
جلال(بزعيق) :ابعديه عن وشي...هقتله...هموتهولك ياما
ام الديب:ده يبقى كويس لو طلعت من تحت ايده سليم
جلال(بزعيق) :خليكي فاكراها ياما...علشان مصيره يجي اليوم اللي اردلك فيه كل اللي عملتيه معايا...ااااه اوعى بقولك
*وبعد ٥ دقايق..من هجوم الكلب على جلال..قام من تحته وهدومه مقطعه..وماشي بيعرج لحد ما رجع البيت..لقى مراته قاعده على الكنبه وأول ماشافته صوتت *
ليالي(بصويت) :ياخبر اسود..هدومك مقطعه ليه؟؟..اتعاركت مع الناس تاني ياجلال؟ هو مفيش فايده فيك؟
جلال(بزعيق) :متخانقتش مع حد يابت...الكلب بتاع أمي هجم عليا زي مايكون شاف عضمه قدامه..فضلت اديله بالشلاليت ولا حوق فيه
ليالي(بصويت) :وايه اللي خلاه هجم عليك؟.. اوعى يكون عضك!..بقولك ايه انا هلبس ونروح المستشفى تاخدلك المصل قبل ماتتسعر
جلال(بزعيق) :هو ايه لكلوك.. لكلوك..مبتفصليش..أمي هى اللي حرضته عليا..بس وربنا مانا ساكتلها... اااه
ليالي:وريني ياخويا عضك فين؟
جلال:اسكتي يا ليالي ده عضني من حته حساسه اوي..نااار..مش عارف هقعد ازاي.. شكلي هقضي طول حياتي كلها وانا واقف
ليالي(بصويت) :يامصيبتي السوده.. يابختك المايل في حماتك ياليالي..طب بتكرهني وقولت ماشي بتحصل ماهو مفيش حما بتحب مرات ابنها.. انما تعمل كل ده مع ابنها ذات نفسه طب ازاي؟..انت متأكد ياخويا انك ابنها؟
جلال:لا ياختي ابنها..اااه مش قادر..ماشي ياماا مااشي..هفوقلك واروقك بس اصبري عليا بس
ليالي:خليك عندك..هلبس ونجري على المستشفى حوسه لا تتسعر وتطلق علينا زي الكلب المسعور بعد كده
جلال(بتعب):استني يابت..آني ممعايش فلوس علشان أكشف واجيب ادويه
ليالي(مستغربه) :ازاي هى مش امك اديتك فلوس؟
جلال:امي تعمل اي حاجه في الدنيا إلا انها تديني فلوس..أمي يا ليالي.. داخلها النهارده ١٠٠٠ جنيه..ولما جه وقت الحساب كلت عليا حقي..ولما كلامي معجبهاش.. طلقت عليا الكلب السعران بتاعها
ليالي(بصويت) :يالهوااااي اتضحك علينا ياجلال؟..مش قولتلك امك ضلاليه وتاكل مال النبي؟ مصدقتنيش واهو كلامي طلع صح!
جلال(بتعب) :اصبري بس يابت هفوقلها وهقلب الدنيا عاليها واطيها
ليالي(مدايقه) :طيب هدخل البس..خليك هنا..يارب كان مستخبيلنا كل ده فين؟
*ودخلت الأوضه تجهز..وجلال فضل واقف يتألم*
___________تاني يوم_________
*كانت أم الديب واقفه في المحل لواحدها..بتبيع العصاير للناس*
_بكام عصير التفاح بالموز ياحجه؟
ام الديب:الازازه بـ ٥٠ جنيه ياست
_مالها غاليه اوي كده ليه؟
ام الديب:الغالي تمنه فيه..دي اتسحبت سحب من ساعة مانزلت من كتر حلاوتها
_لا خلينا في حاجه ارخص شويه..عندك حلويات ايه ياام الديب؟
ام الديب :عندي عيش بالسكر..وكنافه بالجرجير
_كنافه بالجرجير؟.. غريبه دي!.. انا بسمع عندك حاجات عمري في حياتي ماسمعتها..انتي بتجيبي الوصفات الغريبه دي منين؟
ام الديب(بزعيق) :وانتي مالك ياوليه..هتوجعي نفوخي ليه؟..يااما تشتري يااما تحطي فرده بُلغه في بؤك وتنقطينا بـ سكاتك!
_تصدقي بالله آني غلطانه إني جيت اشتري من ست عكاكه زيك
ام الديب(بزعيق) :يلا يابت الكل* من هنا على الله أشوف وشك هنا تاني
*وقلعت الشبشب وحدفتها بيه..وبدل مايجي فيها جه في ليالي مرات ابنها*
ليالي(بصويت) :اااه..مش تاخدي بالك؟؟
ام الديب(بزعيق) :وطي صوتك يابت.. انتي هنا ميطلعلكيش صوت.. فاهمه ولالا؟
ليالي(بزعيق) :ليه ماسكه علينا ذله ولا ماسكه علينا ذله؟
ام الديب(بصوت عالي) :يا سلاااامه..ياسلاااامه
*راح الكلب جاي في ساعتها..وليالي برقت واتعصبت جداً لانها مسميه الكلب على اسم ابوها*
ام الديب(مبسوطه) :شاطر ياولا..اما انت كلب مؤدب صحيح
ليالي(بزعيق) :بقولك ايه ياحماتي..الشويتين بتوعك دول لو دخلوا على جلال فا مش هيدخلوا عليا انا..مااحنا مش شوية عيال تضحكي عليهم..انا عايزه حقي وحق جوزي وإلا هخلي ليلتكم سواد
ام الديب(بزعيق) :آني اللي هخلي ليلتك سواد يابت دباح الحمير..نط عليها يا سلامه
*راح الكلب ناطط على ليالي..قلبها على الأرض وكان بيهوهو عليها وهى بتصوت وكل مايجي يعضها تغير الاتجاه بسرعه لحد ما فلتت منه وهربت وفضل الكلب يجري وراها وهى تصوت*
ليالي(بصويت) :ااااه الحقوني....يااارب
*لحد مااختفت من قدام الكلب ووقفت ترتاح وتاخد نفسها*
ليالي(بتنهج) :والله مانا ساكتالك ياحماتي..وحياة أبويا وأمي مانا ساكتالك...ماااشي
ام الديب:جدع ياسلامه..شاطر انك طفشت اللي جابوها..هو احنا ناقصين ليالي المخفيه..طب خليها تعتب عتبة الدكان مره تانيه وتشوف هعمل فيها ايه
*ودخلت جوا علشان تجهز صنف جديد*
ام الديب:المره دي هنعملهم عصير طماطم..ياسلام عليكي ياام الديب طب والله بتفهمي..احنا مبنعملش أي حاجه..اهم حاجه رضا الزبون امال ايه؟
*وعند ليالي قررت انها تنتقم من ام الديب وتجيب حقها وحق جوزها..لحد ما راحت لـ واحده جارتهم كانت متخانقه هى وأم الديب قبل كده وقالت تستغل الفرصه*
جارتهم:ليالي؟.. عاوزه ايه؟
ليالي:جايه احط ايدي في ايدك ونرجع حقنا اللي ضاع من حماتي العقربه..انا سمعت انك يعني عندك طور في الزريبه
جارتهم:وانتي عايزه ايه من الطور اللي حيلتي؟
ليالي:عايزه اربي حماتي واعرفها إن الله حق..عايزه آخد حقي وحقك وحق كل واحد هى جات عليه..قولتي ايه؟
جارتهم:وايه ضمني انك مش هتخطفي الطور مني؟
ليالي(بتريقه) :ليه ياحبيبتشي حد قالك انه دكر بط.. ده طور..يعني يدمر شارعنا كله من أوله لآخره ومحدش يقدر عليه قال اخطفه قال
جارتهم:انا كان نفسي في اليوم ده من زمان يا ليالي
ليالي:طب ومستنيه ايه ياختي.. اهي فرصه وجاتلك هتقوليلها لا؟
جارتهم:وانا مش عبيطه أضيع فرصه زي دي..جايه معاكي
ليالي(مبتسمه) : على بركة الله
*وعند أم الديب كانت حاطه الازايز كلها فوق الترابيزه من غير الغطا علشان تحط العصير..وكانت بتشرب شويه وترجع تكمل وبعدين ترجع تشرب بتسلي نفسها يعني.. وجنبها الكلب..وفجأه الكلب طلع يجري من المحل هرب*
ام الديب(بزعيق) :انت يامخفي.. رايح فين.. ماهى دي غلطتي ان مربطكش..مش ام الديب اللي كلبها يهرب منها..يا سلاااامه
*وبقيت تصفرله على أمل انه يرجع..دخل عليها الطور دمرلها صف الازايز كله لحد ماوقعت غرقت الدنيا..وأم الديب صوتت لما شافته ودخلت الأوضه اللي جوا قفلت على نفسها..وبرا كانت سامعه صوته وهو بيدمرلها المحل بتاعها*
ام الديب(بتلطم) :ياخراباااااي.. شقايا وتعبي ياولاد الكل*...ياخراب بيتك ياام الديب يالهوتااااااااي...يالهوي يالهوي يالهوي... انجدوني ياعااالم... انجدوني ياناااس..الطور دمرلي دكاني يالهوتاااااااي
*ولما الجيران سمعوا صوت تكسير.. اتلموا وخدوا الطور.. ولما أم الديب خرجت وشافت المنظر وقعت من طولها..نقلوها على المستشفى*
نعمه(بحزن) :أمي مالها ياداكتور؟
الدكتور:للاسف...
المعلم حنفي(مبسوط) :للأسف ايه ياداكتور ماتكمل؟
الدكتور:للاسف محصلهاش حاجه..جالها هبوط مش أكتر.. عن اذنكم
المعلم حنفي(متعصب) :يا ليلتك الزرقا ياحنفي كل ماتتعشم وتفرح..تطلع الوليه صاج سليم..انتي ايه ياوليه مفيش حاجه بتحوق في أمك ليه؟
ام الديب(بصويت) :دكانااااااي..شقايااا وتعبااااي...يانعمه الحقيني...الدكان اتدمر يابت...ااه ياخرابي ياني..تعبك وشقاكي ياام الديب يالهوي يالهوي
المعلم حنفي:كمان واحده يالهوي ياوليه
ام الديب(بتلطم) :يالهوي
نعمه:اهدي ياما الا يجرالك حاجه
المعلم حنفي :ده ياااااريت.. بس عمرها مابتحصل..اللي زي أمك دي هتاخد عزانا كلنا واحد واحد
نعمه:حرام عليك يابا متقولش كده
حامد:هو ايه اللي حصل يا حماتي؟
ام الديب(بصويت) :قاعدالك في الدكان ياخويا
حامد:اه
ام الديب:بَرص الازايز.. الاقيلك سلامه فص ملح وداب
حامد:ايه اللي جاب عم سلامه عندك؟
ام الديب(بصويت) :الكاااالب...مش المعتق التاني دهو
حامد:اه
ام الديب:انده عليه مبيردش..خد ديله في سنانه واختفى..وبعدين الاقيلك الطور داخل عليا ولا كأننا عِشرة ٣٠ سنه مع بعض...دكااانك ياام الديب يالهوتاااااااي
نعمه(بخوف) :امانه عليكي تهدي ياما لا يطقلك عرق وتروحي فيها
المعلم حنفي:ياااريت
ام الديب(بزعيق) :ياابن الـ@#&#@
*وحدفته بالشبشب بتاعها جه في وشه..لحد ماطلع من الأوضه يجري*
نعمه(بخوف) :طب بقولك ياما ولا تزعلي نفسك انا هنزل الدكان اظبطهولك ونشوف ايه مكسور ونجيب غيره
ام الديب(بصويت) :متعمليش حاجه يابت انتي حبله لا يجرالك حاجه..روحي للمخفيه خليها هى اللي تصلح وتنضف بدل ماهى قاعده زي قلتها وسطينا
هايدي:انا هروح اجيب ليالي ونشوف ايه اللي حصل ونصلحه..بلاش نعمه..الدكتور قالها ترتاح لحد ماتكمل ٧ شهور
حامد:اه انا عاوز ابني يجي سليم الله يستركم.. يلا يانعومي قدامي على البيت وزي ماالداكتور قالك متتحركيش
نعمه:يوه وده ينفع ياحمو يعني امي تبقى تعبانه وانا بعيد عنها؟
ام الديب(بتعب) :ارجعي البيت يانعمه..العقربه الحربايه مرات اخوكي هى اللي هتعمل.. لكن انتي يابت متمديش ايدك في حاجه
*ولسه بتفكر.. فاكتشفت حاجه! *
ام الديب(بـ غل) :آني افتكرت حاجه!
*واسترجعت الذاكره وافتكرت ان قبل ما كل ده يحصل..كانت هى وليالي متخانقين مع بعض! *
ام الديب(متعصبه) :هى بت الحمار هى اللي ورا الحوار دهو.. اسنديني يابت منك ليها.. اسندوني
نعمه(بخوف) :حاضر ياما
هايدي(بخوف) :فهميني هتعملي ايه طيب؟
ام الديب(بزعيق) :محدش فيكم له دعوه.. آني راجعه معاكم على البيت
نعمه(بتنهيده) :زي ماتشوفي ياما.. هو حد يقدر يقولك لا؟
*رجعت أم الديب..البيت..وبدأت تخطط ازاي هتجيب حقها*
_________فوق عند ليالي________
*كانت بتضحك وشمتانه في اللي حصل لأم الديب*
جلال(بيضحك) :يخيبك يابت بقى عملتي كل ده في أمي؟
ليالي(بخوف) :يانهار اسود ياجلال..احنا نسينا نروح المستشفى تاخد الجرعه التانيه بتاعت سعار الكلب!.. يالهوووي.. قوم
جلال:يالهوي آني ازاي نسيت حاجه زي دي
ليالي:قوم بسرعه آنا اتلهيت في حوار أمك ده ونسيت اللي المفروض نعمله
*ولسه بتقوم ليالي وجلال لقوا هايدي بتخبط..راحت ليالي تفتح وهى رافعه حواجبها*
هايدي:تعالي معايا يا ليالي عايزين ننضف المحل مكان اللي حصل
ليالي(بـ خبث) :دكان ايه؟.. وايه اللي حصل؟ انا مش فاهمه حاجه
هايدي:أصل في طور دخل المحل وماما شغاله..وكسر الدنيا.. وماما لما عرفت اللي حصل وقعت من طولها مستحملتش!
ليالي(بتمثيل) :ياعيني عليكي ياحماتي ياغاليه..قلبي عندك.. طب صعبتي عليا.. ده انا الدمعه هتفر من عيني.. الحقني بالمناديل ياجلال مش قادره
هايدي(مستغربه) :ايه الاوفر ده؟..يلا انا مستنياكي هناك متتأخريش ولا هتيجي معايا في السكه؟
ليالي:لا اسبقيني انتي وانا هروح المستشفى مع جلال ياخد المصل
هايدي:طيب متتأخريش
ليالي:مااشي ياحبيبتي.. يلا ياجلال
*وخدت جلال ونزلوا راحوا المستشفى ياخد مصل السعار*
________عند أم الديب ______
ام الديب:ماشي ياليالي آني هعرفك ازاي تعملي معايا كده يابت.. ماهو مفيش غيرك اللي يعمل الحركة ال سوده دهي بس ماشي صبرك عليا
هايدي:انا هروح المحل استنى ليالي
ام الديب(بتعب) :ماشي يابت.. اما صحيح اختك نعمه طلعت شقتها ولا راحت فين؟
هايدي:مش عارفه
ام الديب:طيب روحي انتي..ماشي يا ليالي صبرك عليا
*وبعد ما ليالي وجلال رجعوا من المستشفى*
جلال:ايه يابت مش هتروحي الدكان لـ هايدي؟
ليالي(متغاظه) :وانا ماالي اعملها ليه؟.. هى مش ضربت الفلوس في كرشها ومحدش فينا طال مليم؟..تبقى تخلي عمايلها السوده دي تشفعلها
جلال:انتي وكيفك بقى
*وأول ماوصلوا شقتهم لقوا الكلب واقفلهم على باب الشقه وبيهوهو.. وعيالهم جوا بيصوتوا*
تقى(بصويت) :الحقيناااا ياماماااااا
