ليالي(بصويت) :جوزي يانااااس..حد يلحقنا من حماتي المفتريه
*وطلعت تجري هى وهايدي وبعدوا الكلب عن جلال..والكلب خرج من الشقه وهرب بمجرد ما زقوه بعيد..قام جلال وكله غل وعصبيه*
جلال(بزعيق) :بقى بتسلطي كلبك عليا ياما؟..طب ماااشي متبقيش تعيطي
ليالي(بصويت) :حسبنا الله ونعم الوكيل فيكي ياحماتي..اللهي ربنا ينتقم منك دنيا وآخره
ام الديب(بزعيق) :اخرسي يابت الكل*..انتي كمان مش عاجبك يا وش المصايب..غوروا في ستين داهيه لما تاخدكم
*خرج جلال ومراته وابنه من الشقه، وكل واحد دخل أوضته وشويه واتصل زياد وبلغ هايدي انه جاي عندهم وبعد ساعه ونص كان قاعد معاهم وبيتكلموا عن موضوع الفرح*
زياد:انا من رأي اننا نخلي الفرح قريب بدل سنه ونص يعني
هايدي:بس احنا كده مش هنلحق نجهز أي حاجه!
زياد:لا هنلحق انا متأكد!..احنا ناخدها واحده واحده واللي فيه الخير يقدمه ربنا
ام الديب:ايهي ومالك مستعجل كده ليه ياولا؟..وبعدين هو كان حد فينا شافلك شقه ولا تكونش فاكر انك هتقعد بتي في عشة الفراخ اللي في بيتكم؟
زياد:لا طبعا هايدي مقامها عالي وانا بإذن الله هعيشها عيشة الملوك انتي متعرفيش انا بحبها قد ايه!
*لمعت عيون هايدي بعد الكلام الحلو ده، وأم الديب اتعصبت خصوصاً ان ملهاش في الرومانسيه*
ام الديب:انت كلام كلام..أما مشوفناش منك حركه واحده..انا بتي هايدي مش هتركنها جنب منك لحد ماتشوف هتنيل ايه..يااما تشوف شقه يااما الجوازه دي متلزمناش
هايدي:في ايه ياماما؟ هو كان قالك مش هيجيب شقه؟..ماهو هيجيب بس كل حاجه في وقتها!
زياد:انا مستعد أجيب الشقه من النهارده قبل بكرا..شوفوا انتوا عايزين ايه وانا هعمله!
ام الديب:تنزلوا تشوفوا الشقه دلوقتي ياإما بلاها الجوازه دي
زياد:حاضر يامرات عمي اللي تشوفيه
*وطلع الموبايل واتصل بـ أحمد أخو هايدي*
زياد:ازيك يا احمد عامل ايه؟
احمد:يااهلاً يازياد عامل ايه انت طمني عليك؟
زياد:الحمدلله انا كويس..جميله والولاد عاملين ايه؟
احمد:الحمدلله بخير..ازي عمي حسين؟
زياد:كله تمام
*وخد الموبايل وطلع في البلاكونه..وأم الديب برقت*
ام الديب(متعصبه) :ايهي هو فاكر انه بيت اللي جابوه يابت؟..يكونش بيت أبوه وآني معرفش؟.. قومي يابت وراه الا يسرق حاجه من الأوضه..اه يارجلي ياخرابي ياني
هايدي:يسرق ايه؟ زياد مش حرامي ومستحيل يعمل كده!
ام الديب(بزعيق) :وانتي ايه عرفك يالي تتشكي في جنابك؟
هايدي(بزعيق) :انا عارفه وواثقه فيه
-----برا في البلاكونه-----
زياد:اما بقولك احنا عايزين نبتدي في تجهيزات الفرح
احمد:انتوا مش لسه قدامكم سنه وشويه؟
زياد:لا مااحنا قصرنا فترة الخطوبه شويه..أصل بصراحه والخطوبه لما بتطول بتزيد المشاكل وبيكون في ملل
احمد:عندك حق..طيب ناوي على ايه في موضوع الشقه؟
زياد:مانا بكلمك علشان موضوع الشقه خصوصاً انك كنت قايل هتشوف شقه قريبه منك
احمد:ما ده أكيد.. مينفعش هايدي تبعد عني..وبعدين هو انا أطول تبقوا جيراني وكل يوم أصحى عليكم؟
زياد(بيضحك) :حبيبي ربنا يخليك..طيب شوفلنا الحوار ده خصوصاً ان مرات عمي مدايقه من موضوع الشقه يعني
احمد:لا هشوفلك الموضوع ده متقلقش
زياد:يبقى عملت فيا جِميل..سلملي على اللي عندك
احمد:يوصل.. هشوف وأكلمك
زياد:خلاص ماشي..سلام
*وبعد ماخلصوا كلام..خرج أحمد من الشقه لقى الجيران اللي جنبهم بيطلعوا حاجتهم وماشيين فا استغرب! *
احمد(بإستغراب) :غريبه يعني معقول صدفه؟
*وراح يسأل*
احمد:انتوا ماشيين ولا ايه؟
جاره:ايوه احنا متفقين مع صاحب العماره من شهر..التجديد حلو برضه
احمد:لقيتوا شقه أحسن ولا ايه؟
جاره:لا احنا هننقل على فيلا..الفيلا بتاعتنا..أصل انا اشتريت فيلا..مراتي كانت كل يوم تتحايل عليا..كان حلم كبير بالنسبالها واهو اتحقق
احمد:طيب مبروك.. على خير ان شاء الله
جاره :الله يبارك فيك
*وراح لـ صاحب العماره علشان يتفق معاه..وعند جميله كانت لسه صاحيه وشايله أسيل..فضلت تدور عليه ملقيتهوش*
جميله:شكله نزل..مانا اللي صحيت متأخر..الساعه كام؟
*وبصيت في الساعه لقيتها ٣ العصر*
جميله:ياه ده انا راحت عليا نومه..مش مهم بقى هعمل ايه مانا سهرانه طول الليل مع حضرتك يااستاذه أسيل
سيليا:مامي..انا عايزه اروح لـ نانا بسمله
جميله:حاضر ياروحي خلينا نفطر الأول وبعدين ننزل..روحي اغسلي وشك
سيليا:اوكي يا مامي
_________عند أم الديب______
*مكنتش أم الديب قدمت حاجه لـ خطيب بنتها..وماسكه طبق الترمس ونازله أكل وهى بتتفرج على التلفزيون*
هايدي(بصوت واطي) :ياماما مينفعش كده..زياد بقاله نص ساعه وانتي معبرتيهوش بـ كوباية مايه حتى
ام الديب(بصوت عالي) :ياكل في بيت ابوه يابت
هايدي(بإحراج) :شششش..هيسمعنا!!!يعني انا بتكلم بصوت واطي وانتي عايزه تسمعيه؟
زياد:في ايه ياهايدي؟
هايدي(مبتسمه) :لالا مفيش حاجه
*وقامت ولسه هتدخل المطبخ.. ندهتها أم الديب*
ام الديب(بزعيق) :رايحه فين يابت الكل*؟
هايدي(متعصبه) :يووه انتي مفيش مره تتكلمي زينا!..بتشتميني ليه طيب انا عملت ايه؟
ام الديب:رايحه تعمليله الطفح اللي يطفحه مانتي مش غرمانه حاجه من جيبك
زياد:انتوا بتتكلموا عن مين؟
*وقام من مكانه..راحت هايدي بسرعه جريت عليه وحاولت تهدي الموضوع*
هايدي(بتوتر) :ماما مربيه كلب..و..و...وبقاله يوم مكلش فانا هروح اعمله اي حاجه علشان حرام هيبقى زنبه في رقبتنا
زياد:طيب انا همشي وهشوفك بعدين متكونش حماتي موجوده
*راحت أم الديب طايره عليه ماسكه في رقبته*
ام الديب(بصوت تخين) :عايز تستفرد بالبت؟؟..ليه هى سايبه؟؟..يعني ايه هتشوفها وآني مش موجوده؟..قرطاس لب ولا كيس جوافه ولا ازازة خل؟..يالهوااااااي هتتفضحي وسط الناس ياام الديب.. فضيحتك هتبقى بجلاجل..كل جلجله فيها هتبقى قد كدهو..ياخراااباااااي..ليالي وأهلها هيشمتوا فيكي ياام الديب..يامصيبتك السوده
*نزلت نعمه على صوت الصويت وهى حاطه ايديها على ضهرها ومش قادره تمشي*
نعمه(مخضوضه) :مالك ياما.. ابويا ماله؟ جراله ايه؟
ام الديب:ابوكي ايه ياموكوسه يابت الموكوس!!..قال ايه خطيب اختك اللي طالع من بيت محترم.. عاوز يستفرد بأختك الهبله..ماهو مش عاملي احترام ولا محترم حد فينا
زياد(بزعيق) :في ايه يامرات عمي الكلام اللي بتقوليه ده؟ الكلام ده ميصحش وانا مسمحش بيه!
هايدي(بعياط) :هتسيبني صح؟انا كنت عارفه والله انك مش هتستحمل! مانا قولتلك وانت مصدقتنيش!
زياد(منفعل) :لا طبعاً ياهايدي مش هسيبك بس الكلام اللي مرات عمي بتقوله ميصحش
نعمه:لا ياما عيب عليكي..زياد محترم..هو لو وحش كنا حطينا ايدينا في ايده ولا وافقنا عليه؟
ام الديب:ومين قالك يابت إني موافقه؟
هايدي(بصويت) :يانهار اسود عليا..بعد كل ده وجايه تقولي مش موافقه؟
نعمه:استهدوا بالله ده شيطان ودخل مابينكم..تعالوا معايا فوق نتكلم كلمتين وسيبكم من أمي..أصل انتوا عارفين الحاله لما بتجيلها..بتيجي فوق دماغنا كلنا.. تعالوا بس
*وسحبتهم وطلعوا فوق وكان جوزها موجود*
ام الديب(بزعيق) :في داهيه ده انتوا زبلتوا الشقه خليتوها زريبه..ايهي ايه كل القشر دهو
*ورجعت قعدت على الأرض وكملت اكل*
________فوق عند نعمه وحامد______
حامد:يااهلاً وسهلاً.. ده احنا زارنا النبي..اقعد يا عديلي ياغالي
زياد:الله يخليك..ماتقولي انت بتتصرف ازاي مع مرات عمي؟
*وقعدوا *
حامد:بص ياباشا مفيش أحلى من تكبير الدماغ..كبر دماغك هتعيش عيشه فل..روقان وراحة بال.. انما هتمسك في كل كلمه هتحرق في دمك ويومك هيتقفل
زياد:واضح انه هيتقفل كتير اوي الفتره اللي جايه
نعمه:والنبي ماتاخد على كلام أمي.. انت لو فهمتها هتريح دماغك.. اعمل زي ليالي مرات اخويا.. وحامد جوزي..كلنا مكبرين دماغنا.. اصل كلمه من هنا على كلمه من هنا الدنيا هتقيد حريق ومش هنخلص
زياد:يعني يتغلط فيا واسكت؟ده يرضي مين طيب؟
هايدي(بحزن) :زياد انت عايز تسيبني صح.. قول الحقيقه
زياد:مش هسيبك ياهايدي!.. انا اتدايقت وده الطبيعي مانا انسان زي زيكم وبحس!
نعمه:كبر دماغك منها بس والدنيا هتبقى حلوه
زياد:مش هقول حاجه غير إن ربنا يهديها
نعمه:ياارب
_______عند أحمد_______
*كان اتفق مع صاحب الشقه ان هايدي وزياد يروحوا يتفرجوا عليها..وبالفعل اتصل بيه وقاله*
زياد:طيب تمام انا هجيب هايدي ونروح نشوفها
احمد:انا مستنيكم متتأخروش
زياد:لا مش هنتأخر.. سلام
هايدي:في ايه؟
زياد:الشقه اللي جنبهم فضيت..هاخدك ونروح نشوفها
نعمه:اصبر بس يازياد..ده انا أمي هتعملكم مناحه..احنا هنلبس ونيجي معاكم
حامد:صح خصوصاً انهم لسه مخطوبين ولمؤاخذه يعني ميصحش يروحوا لواحدهم في حته
هايدي:لا يانعمه انتي تعبانه والحركه غلط عليكي..خليها تكمل على خير
نعمه:يابت سيبيها على الله..احنا ماشين في الدنيا دي مسيرين مش مخيرين
هايدي:ونعم بالله بس بلاش علشان لو لقدر الله حصل حاجه انتي عارفه ماما هتعمل ايه وهتجيبها فينا وهتقولك اه انتوا السبب وانتوا اللي عملتوا وخليتوا هو انا اتوه عنها يعني؟
نعمه:لا ان شاءالله مش هيحصل حاجه.. انا داخله البس
*وبعد ما نعمه وجوزها جهزوا..ركبوا مواصلات واتجهوا للشقه وبعد ٣ ساعات كانوا وصلوا..وجميله كانت مستنياهم*
جميله:هيجوا امتى؟
احمد:زمانهم على وصول..يارب الشقه تعجبهم..انا هرتاح لو هايدي وزياد خدوا الشقه اللي جنبنا
جميله:أكيد هتعجبهم..ماهي زي شقتنا بالظبط وهايدي جات عندنا كتير وكانت الشقه عاجباها جداً وكفايه كمان انها جنبنا
احمد:انا اللي خايف منه انها متعجبش زياد
جميله:بجد النظام تحفه جداً.. انا واثقه انها هتعجبهم
احمد:يارب اتمنى
*وأخيراً كانوا كلهم وصلوا*
جميله(مبتسمه) :حمدالله على السلامه ياهايدي
هايدي(بتحضنها) :الله يسلمك ياجميله
احمد(بيحضنه) :عامل ايه يازياد؟
زياد(بيحضنه) :الحمدلله
جميله(بتحضنها) :عامله ايه يانعمه؟
نعمه(بتحضنها) :الحمدلله ياجميله ياحبيبتي..ازيك ياسيليا؟
سيليا(بتحضنها) :الحمدلله ياعمتو
نعمه:امال القرده الصغيره فين؟
جميله(بتضحك) :هههه..أسيل نايمه..دي غلبتني طول الليل مقولكيش عملت فيا ايه!
نعمه(بتضحك) :ربنا يخليهالك هى واختها وتفرحي بيهم
جميله:يارب ياحبيبتي..تعالوا اتفضلوا
حامد:يامسهل
*وقعدوا..وراحت جميله تجيبلهم شوية حلويات وعصاير وقعدت معاهم*
احمد:شكلكوا تعبتوا من الطريق
حامد:امال ايه ده الطريق كان طويل بشكل
احمد:ماهي المواصلات كده..عيبها انها متعبه
نعمه:والله يااحمد ياخويا..مرضيناش نسيب زياد وهايدي يجوا لواحدهم مش لأجل حاجه لا والله احنا عارفين انهم زي الفل وعشره على عشره.. بس دماغ أمك تعبانه وهتعملنا موال
احمد:انتي هتقوليلي مانا عارف..متفكرنيش باللي جرا
زياد:ايه اللي جرا؟
احمد:وانا في أولى جامعه كنت متخانق معاها خناقه كبيره..والوقت ده كانت ماما مشاكلها معانا أضعاف مشاكل دلوقتي ده يمكن دلوقتي ربنا هداها شويه
<<فلاش باك>>
*خرج أحمد من الجامعه مع صحابه لقى أم الديب واقفه ولابسه هدوم مقطعه وبتعيط وماسكه ورقه مكتوب عليها (انا أم أحمد حنفي الديب..رماني في الشارع واتبرى مني)
..ووقتها اتصدم لما شافها وكان بيقول اتشقي ياارض وابلعيني*
احمد:يانهااار اسواااد..اعمل ايه دلوقت!!.. اعمل ايه!..ياديني على الفضايح!
صاحبه:ايه ياعم مالك؟
*راح أحمد لافه الناحيه التانيه علشان ميشوفش أم الديب وخده ومشى ولكن ام الديب مستسلمتش ومشيت وراه وهى بتعيط*
ام الديب(بتمثيل) :بتتبرى من أمك ياولا؟..بعد ماكبرتك وربيتك؟
احمد:انتي مين ياست انتي؟
صاحبه(بيقرأ) :انا أم أحمد حنفي الديب؟..دي أمك؟
احمد:لا معرفهاش..مين اللي كاتب اسمي على الورقه دي؟
ام الديب:جلال أخوك
احمد:تمام لما أرجعله بس!
ام الديب(بصويت) :الحقووني ياناااس ابني بيتبرى مني! بعد ماربيناه وكبرناه ودخلناه الكوليه..صبروني ياعالم..بموت ياخلق الحقوني ياهوو
احمد(بزعيق) :انا معرفكيش!!.. قولت معرفكيش!
*وسابها ومشى..ومره تانيه كان في المدرج لقى أم الديب داخله المدرج والدكتور بيشرح..وهى لابسه هدوم مقطعه ولازق عليها حاجات مش نضيفه!..مكان البهايم اللي بتربيهم..وفي ايديها دكر بط..أول ماشافها تنح واتصدم*
ام الديب(بصويت) :يشهد عليا ربنا ياداكتور..الواد اللي هناك دهوو.. ده اللي هناك اللي لابس أزرق
الدكتور:ده؟
ام الديب(بزعيق) :اللي جنبه..هى النضاره بتاعتك فيها مصيبة ايه؟.. كبرناااه وربيناااه وفي الآخر مش عاوز يزغط دكر البط معايا..ماهما مش فالحين غير في الأكل وبس
الدكتور(بزعيق) :انتي دخلتي هنا ازاي؟؟.. ازاي تدخلوا الأشكال الزباله دي جوا الكليه؟.. قوم اقف قووم
*قام احمد وهو باصص في الأرض وبيموت من الاحراج وكل زمايله باصين عليه وميتين من الضحك*
ام الديب:اما قولي ياداكتور بتاكل بط ولا وز؟
الدكتور(بزعيق) :اللي بيحصل ده مهزله.. انا مش هسكت..اسمك ايه.. تعالى هنا.. خلص!!
*جه احمد وهو باصص في الأرض وكل زمايله بيضحكوا وأثناء ماهو بيطلع الكارنيه بتاعه للدكتور كانت أم الديب سرحت جوا وسط الطلبه*
ام الديب:دكر البط بـ 120 جنيه..بس انما ايه مليان لحمه..مين عاوز يشتري؟
الدكتور(بزعيق) :ده انا هوديكم في ستين داهيه..بقى دكتور عادل يتعمل فيه كده على آخر الزمن!
احمد:والله يادكتور انا مليش ذنب..انا معملتش حاجه!
الدكتور(بزعيق) :ولا كلمه.. انا هعرفكم شغلكم كويس
<<End>>
*وبعد ماخلص الحكايه..كانوا كلهم ميتين من الضحك على الموقف*
زياد(بيضحك) :والله ماقادر..انا متخيلتش انها توصل للدرجه دي
احمد(بيضحك) :ماما طول عمرها وهى كده وتوقع منها أي حاجه!
*لسه بيكمل كلامه لقى جرس الباب بيرن فقام يفتح وكانت المفاجأة! *
