"جابك الله في زحام العمر صدفة "

64

~~~ في مجلس بيت ابوسامي ~~~
عبدالرحمن : افا يابوالهيل شايل بخاطري علي انا
هايل : ماهو بس خاطري حتى وجهك مابي اشوفه
عبدالرحمن : ليه ليه
هايل : شكلك ناسي اخلاقك المخيسه مثلك وفوقها لا اعذروني ولا سامحوني على خطاي جاي ويسال ليش ماخذ بخاطري عليه
عبدالرحمن : انا ادري ان نفسيتي ماتهمك وعصبيتي قبل ماهي الي مزعلتك بس والله ياهايل اني كنت ناوي اعلمك لا وبعد اخذ سياره محمد واجيك تحضر معي الخطبه بس ابوي
هايل : عمي ليش منعك
عبدالرحمن : والله حتى انا مستغرب وضاق صدري يوم كلم عمي ابوفهد وقال له هالكلام الي يوجع بس ذا الي قاله لي ان جبت طاري لعمك ابوفهد ولا لعياله والله ماتمسك يدها ادري بتقول عشان بنت تبيعني بس انا داري لو اني جاي وقايلك ياهايل ابوي قايل كذا لي بتقول اسحب علي ورح اخطبها بدوني
هايل : وليش ابوك يعيي ترا بنته عندنا
عبدالرحمن : ها عن الغلط ذي اختي وذا ابوي وانا اتوقع ان ابوي مايبي يعلم عمي عشان البنت كانت صديقه بنت صقر وخاف يزعل
هايل : ووشدخل ذا بذا
عبدالرحمن : انا بكبري مادري ليش ابوي سوا كذا بس انا علمتك وماجيت واثق واضحك معكم الا اني عارف انك اذا سمعت عذري بتسامح صح ولالا
هايل : خلاص خطبتها ؟
عبدالرحمن : اي خطبتها ياهايل والموافقه بعد اسبوع بيردون لنا
هايل : وش له بعد اسبوع وانتم تعرفون بعض
عبدالرحمن : والله مدري ياولد العم قال ابوي لابوها موضوع اني اسكن عندهم ماهو عاجبه والله ياهايل ان هذاك اليوم ضاق صدري وصدر ابوالبنت يوم ابوي قال كذا حسيتها حزت بخاطره تنهت وقال لا ماعليك هالموضوع عندي ومايصير الا كل خير وراح للبنت واكيد قال لها وبعدين رجع وقال بنرد لكم بعد اسبوع
هايل : شجاه ابوك صار مثل ابوي
عبدالرحمن : والله علمي علمك بس خايف ياهايل ترفض
عزام : طيب ارسل لها واسال
هايل : تستهبل انت خلاص مايكلمها ان صارت نصيبه وان ماصارت الين يعرسون
عبدالرحمن : بس والله فيني فضول
هايل : ها اجل ارسل
عبدالرحمن : يله يمه متصله
عزام : حمار انت الي مرسل لها طيب
عبدالرحمن : لا بس اول مره تصير متصله بهالسرعه
هايل : تكتب تكتب
عزام : يصير نشوف ولا اشياء بينكم
عبدالرحمن : ماتوصل
عزام : تكتب تكتب
عبدالرحمن : احس خلونا نشغل انفسنا بشي
هايل : وردها
عبدالرحمن : مدري ارسلت افتح
عزام : تستهبل ؟
عبدالرحمن : بفتح بفتح خلاص بسم الله
(رد فاتن) وعليكم السلام بخير الحمدلله يسلم عليك انت كيفك وكيف اهلك؟ والله يابن الناس انا صليت استخاره ولا ارتحت وقلت لابوي وابوي قال لي كلام ابوك واظن هذا السبب الثاني اني ماارتاح بس فالنهايه الكلمه لابوي واعذرني مااعتقد يصلح يكون بيننا تواصل
عبدالرحمن : لا لا ياعيال
عزام : ليتك ماارسلت
هايل : هي قالت الكلمه كلمه ابوها
عزام : بس هي ماارتاحت وواضح الرفض
عبدالرحمن : الله يلعن ابوهالحاله الى متى يعني
هايل : ولد اهدا يمكن تبي تخرشك بس
عبدالرحمن : يارجال اذلف وش تستهبل ذا موضوع زواج ماهو لعب بزران
عزام : والله غلطكم هالحب لو متزوجين مثل اخوانكم ابرك لكم
هايل : اسكت انت اسكت نبي تكحلها تقوم تعميها
ابوسامي : جايب الشاهي والمكسرات اقعد ياولدي
عبدالرحمن : اكرمك الله ياعم متضايق بطلع اشم هواء
هايل : خله خله وهات الطوفريه عنك ياجعل هاليدين ماتمسهم النار قل امين
ابوسامي : امين وشبلاه خويكم
عزام : رجعت له الحاله
ابوسامي : توه الصبح جاين يبوسنا ويقول باركو لي
عزام : ادع له انت بس
ابوسامي : وخر انت انا اصب
هايل : لا افا ماتصب وانا موجود عنك ياعمي
~~~ عند المحطه ~~~
هايل : تصيح يالخكري
عبدالرحمن : الي صار لي ماهو هين ياهايل تكفى لاتزيد الطين بله
هايل : بزر انت بزر لازم كل شى تبيه بيجيك لازم تتنازل ماهي حاله هذي ياخوي
عبدالرحمن : اتنازل عن الي احبها
هايل : اي ماهي اخر بنت ماهو هذا كلامك لي يوم تزوجت المستوره لازم تتنازل
عبدالرحمن : ماعرف
هايل : تعلم شفني انا تنازلت وبلعت سم بحلقي وسكتت صح فالبدايه سويت مثلك وليش وليش بعدين فكرت ان لو هي نصيبي والله مايمسك يدها احد غيري خلك مني انا شف عزام مايحب ولا درا عن اختي بس فجاه ابوه وامه رسموها براسه ونشبو بعقله وخطب ورفضنا ليش؟ ماهو قصير فيه لو علي والله لاعطيه اختي بس اختي صلت استخاره وماارتاحت وش تبيه يسوي يدخل البيت وياخذها غصب وبعدين يادحيم البدايه الي ماترضي ربي نهايتك مارح ترضيك يابني ادم
عبدالرحمن : يشهد الله ياهايل اني حبيتها حب طاهر وحبنا مافيه حركات رسايل ويمين ويسار وهي كانت تكره تشوفني حتى او تسمع صوتي
هايل : طيب يمكن للحين ماتبيك
عبدالرحمن : انا خليت اختي تسالها وقالت كل شى بالحلال افضل معناها تبيني اخطب
هايل : ميخالف انت خلك رجال راكد ان وافقت وان ماوافقت فيه غيرها مليون
عبدالرحمن : مابي غيرها
هايل : انت الحين اهدا ومارح يصير الا كل خير انتظر اسبوع ودقو واسالوا
عبدالرحمن : يصيح خير
عزام : قايلن لكم الحب مايوكل عيش
هايل : عاد مدحناه واشغلنا
عزام : اي اي سمعتك وبعد الي صار لكم قررت مااعرس بر الوالدين اهم
هايل : زين اجل وفرت علي عنوه اقناع اختي
عزام : كلزق عاد هايل وقم بالواجب
هايل : اي اي لاتقول كلام اكبر منك وبعدين وراك لحقتني وتركت ابوسامي
عزام : قام يقول قصه يوم كان صغير وسويت انسحاب سريع
هايل : مانت وجهه احد يسولف عليك قم انت نروح له
عبدالرحمن : اسبقوني
عزام : تلقاه للحين يسولف يحسبني قاعد
هايل : حسبي الله عليك ومخليه
عزام : شسوي يخوي طفشت تعرفني ذي السوالف ماهي جوي
~~~ في بيت ابوفهد ~~~
ابوفهد : الو
ابوسطام : الو من معي
ابوفهد : اخوك ابوفهد
ابوسطام : اها ابوفهد هلابك وش بغيت داق ماعرفت رقمك
ابوفهد : شلونك شخبارك
ابوسطام : بخير الحمدلله شلونك انت
ابوفهد : بخير بخير مانت ناوي تجي للقريه
ابوسطام : ماعاد لي شغل فيها عسى ماشر فيك شى ؟
ابوفهد : والله مستحي منك بعد الي سواه اخوي وانا سويته راجع لك واطلب منك هالطلب وانت تعرفني ماعمري سويتها
ابوسطام : لاتستحي يابوفهد الي بيننا صار وراح وانا للحين معتبرك مثل اخوي سم وش بغيت
ابوفهد : والله صارت مشاكل مع نسيبي ابوخالد واختي طالبت بالورث حق البيت الي انا ساكنن فيه والمزرعه انسحبت مني بعد لاني بعتها على ابوخالد وايجارها ماهو قوي وانت عارف والله داق ابي تسلفني
ابوسطام : ايه ايه ابد ابشر فلوسي هي فلوسك يابوفهد كم تبي
ابوفهد : سلفني خمسين الف
ابوسطام : ابد تم بس قبلها يابوفهد انا عازمك على بيتي ومارح تتصافى قلوبنا الا الين تجي وتجيب اهلك للشرقيه عندنا وهناك تتصافى القلوب وابد اسلفك
ابوفهد : والله صعبه
ابوسطام : ماهي صعبه عندك اربع ذيبان
ابوفهد : خلاص اجل اليوم بعد المغرب نمشي
ابوسطام : الله يحييك يابوفهد ولا يضيق صدرك وانا اخوك مايخلى بيت ولا عايله من مشاكل
ابوفهد : بس ماهقيتها منهم والله
ابوسطام : معليه يابوفهد تجي عندي ونتكلم بكل شى بس قل لاهلك اني انا الي دقي عليك وطلبت مسامحتك
ابوفهد : ماتقصر يابوسطام جعلك ذخر وانت قل لاهلك العكس
ابوسطام : على هالخشم تم
ابوفهد : والله اني مستحي منه مره بس شسوي الحاجه
سياف : يبه العشاء جهز تعال
ابوفهد : جاي
~~~ عالسفره ~~~
ابوفهد : ابقولكم شى
زامل : والله اني داري ان ودك تقول شى
ابوفهد : بنسافر
ندى : سمعتو الي سمعته ؟
فرح : اي
ام فهد : احنا نسافر
ابوفهد : ماهي سفره سفره مخطط لها بس جاني اتصال وبنسافر عشانه
سياف : نترك الشغل هنا عشان اتصال يايبه ؟
ابوفهد : ماودكم تعرفون من الي دق علي
فرح : الا اكيد منهو ذا المحظوظ الي ابوي بيسفرنا عشانه
ابوفهد : ابوسطام
ام فهد : وشنهو وش الطاري ؟
ابوفهد : ابد والله دق علي الرجال وسلم وطلب المعذره والسموحه وقال انه عازمني في بيته
زامل : متاكد يبه
ابوفهد : عاد تراكم ماتنعطون وجهه عطيتكم العلم خذوه وانتم ساكتين بنمشي بعد شوي
سياف : كذا يبه بدون تخطيط بدون نوم بتمسكنا الخط
ندى : اكيد بتاخذوني صح ؟
ابوفهد : ايه ايه كلنا هو طلبني مااخلي احد
ندى : يسلم راسه
ام فهد : وش السياره الي بتكفينا ؟
ابوفهد : يجي الحمار فهد ابدق عليه اغسل شراعه
ام فهد : خله يجيب هايل تكفى يابوفهد تكفى
ابوفهد : توه قبل يومين ماشي من عندنا وش هالحب خليه بشغله لانقعد نلهيه
ام فهد : اثنينا ندري ان هناك مافيه شغل تكفى خله يجي معنا يتونس
ندى : ويونسنا بعد
ابوفهد : خلاص خلاص بحاول بابوسامي يخليه يجي
ندى : يس بروح ابشر شهد
سياف : هههههههههه وش بتسوي بعيالك انت
زامل : وش بسوي باخذهم معنا بعد
سياف : والله انك خربت حياتك بيدك هذا اخوك عايش ومرتاح وكان يبيها من الله يطلق بنت عمتي
زامل : انا مانيب مرتاح ويرجال افتكيت من زوج امها ذا الغثيث
سياف : تحسب مسؤولية العيال سهله بعد كم شهر تلقى امهم متزوجه وانت اقعد
زامل : الله يوفقها عيالي يجون زياره عاد ذا حق هي امهم والباقي كل واحد وبكيفه وبعدين وراك تنكد خلنا مبسوطين بهالسفره
سياف : للحين مانيب مصدق ان عمي ابوسطام هو الي داق
زامل : شقصدك ان ابوي هو الي داق
فرح : ان دق ابوي وان دق ابوسطام الاعتذار من شيم الكبار والخطا كان من الصغار هم مالهم دخل
سياف : والله على كلمته على ابوي شايل بقلبي عليه
زامل : يرجال عدها هي واقفه على ذي سمعنا وشفنا وانقال لنا اكثر من كذا
~~~ فالمجلس ~~~
ابوفهد : والله يابوسامي ان المقصد نستانس مع بعض ولا ماهي بذاك الاهميه وجوده معنا
ابوسامي : والله يابوفهد ماني جالس اشوف مكسب من وراهم وجودهم هنا يا اضبطوهم ياخذوهم عندكم وبيعو علي حلالكم وانا اوظف لي ناس تشتغل
ابوفهد : والله هم على ضمانتي بس اكيد مافيه زباين
ابوسامي : يابن الحلال خلها على الله ولد عمهم ذا اشغلنا اكثر واحد يجيونه زباين ومغير مختفي ياولدك ياولد اخوك الثاني الي يشتغلون عنه والله ان ابوه لسانه نار ان دقيت عاد علي نفس الكلام وكانه شاريني ماهو شاري ارضي
ابوفهد : من تقصد
ابوسامي : ابومحمد والله يابوفهد ان ولده مايشتغل ومع ذلك انا صاغط على عزام وهايل لعل وعسى هو يرحمهم ويقوم عنهم بس مامن احساس وان كلمته قام يتأفف وكل شوي زعلان بموضوع زواجه ولا انا ولا عيالكم متحملينه
ابوفهد : امسحها بوجهي يابوسامي توه بزر وبيتعلم على يدك وبيبض وجيهنا ووجهك وهو ماكان كذا فاعذره نفسيته ماهي كويسه عشان عرسه وانت لاتضيق صدرك احنا قبل يوم كنا بعمرهم كنا مثلهم
ابوسامي : والله اشقانا هالولد بس عشانك ابعذره المره الاخيرة يجي ابوه ياخذ محطته ويفكني
ابوفهد : مايصير خاطرك الا طيب انا بمر عليكم قبل اطب الشرقيه
ابوسامي : حياك الله باي وقت وش تبي ياهالغثيث
هايل : من تكلم ياعم المكالمه تقل طولت
ابوسامي : دافع لي الرصيد انت
هايل : لا افا كله خيرك الله يطول بعمرك من تكلم
ابوسامي : ابوك
هايل : ابوي انا
ابوسامي : لا ابوي الي فالقبر
هايل : عطني بكلمه
ابوسامي : دقيقه وحده بس عالرصيد
هايل : وقفت علي يعني الو هلا يبه هلا بطويل العمر هلا بسيد الرجال كلهم هلا بامير القريه هلا شلونك يبه شلون امي والاهل كلهم
ابوفهد : ههههههه خلني اتكلم وارد ماتعرف تسكت
هايل : يضيع تعبيري لاسمعت صوتك يابوفهد
ابوفهد : اقول اهجد وتكلم زين وش فيكم على ابوسامي
هايل : اييي الحين عرفت المكالمه ليش طولت يايبه والله اني مظلوم وقايم بكل الشغل
عزام : اجحد يالملعون قدامي بعد
هايل : ليش دق يبه فيكم شى ليش مادقيت علي
ابوفهد : كنت ابيك تخاوينا الشرقيه لابوسطام بس مشغولين
هايل : من قال مشغولين يايبه مروني وخذوني
عزام : خذ واحد تحصل عالثاني مجانا ياعم
ابوفهد : خلاص خلاص اشوف اشوف قفل يله
هايل : تهقى يسحبون علينا
عزام : بسحب خشمك وراك تتسذب على ابوك
هايل : انا قايل الصدق
عزام : واما الي شوي بطرش من كثر مااحسب الارقام
هايل : ومن يساعدك فيها
عزام : اخس يالستلوح تعرف تتسذب والله
هايل : يهب ماقوي نعلتك
عزام : شاريها من الرياض اصليه
هايل : وين دحيم يادحيم وينك
عبدالرحمن : ها هنا
عزام : وانت الى متى بتقبلها دراما ياخوي ارجع مثل ماكنت
عبدالرحمن : شاكي لك الحال انا
عزام : تدري ياخوي اقعد هنا بحزنك وهمك وبالطقاق ماتستاهل النصيحه
عبدالرحمن : اي احسن وفرها
هايل : انت لاتنصح الله يعافيك رح خل عمي يسولف عليك
عزام : اروح ارتب بقالتي افضل
هايل : اي سوو الي تبي بس رح
عزام : تراك برجع عليك
هايل : ورع انت وبعدين ها يادحيم وبعدين
عبدالرحمن : انا وانت وش ودانا ذاك اليوم للمركز ليش رحنا وحبيناهم واخر شى ماهم نصيبنا
هايل : ياعبدالرحمن يابوي ياحبيبي انت مو كل شى تبيه بيجيك ماهي بطاطس هي تشتريه وتدفع فلوسه وخلاص صار لك لا لازم تتعب ولازم تشقى بس ماتطيح كذا طيب تخيل لو فعلا رفضو ؟
عبدالرحمن : مانيب معرس بعدها
هايل : تحسب قرارنا ذا صح لا والله ماهو صح ولا يرضي لا الله ولا رسوله بني ادم يكمل نص دينه بالزواج ومهما كانت بنت الناس اهم شى تحبك وتحب اهلك
عبدالرحمن : واذا انا ماحبها اقوم اظلمها ؟
هايل : وليش حشرت الموضوع بين ماحبها يعني اظلمها ليش تظلمها تقدر تحبها بعد ياعبدالرحمن لاتعيش كذا واسالني انا قبلك جربت هالشي واكثر واحد فاهمك وانت داري وجيت انت بنفسك وقلت لي هالكلام تذكر ؟ يوم كنت ببيت المزرعه ارقد لحالي ومااكل
عبدالرحمن : طيب طيب بحاول
هايل : اي تكفى يابوي وتخاوينا للشرقيه وننسبط هناك
عبدالرحمن : ان شاء الله خليت ابوي يكلم ابوها ونشوف اخر رد
هايل : خلك قوي ويله قم اعتذر من عزام كلما جاك كرشته
عبدالرحمن : حسيت اني مزودها عليه شوي
هايل : شوي وبس ؟ الا واجد
~~~ فالبقاله ~~~
عزام : كل شوي رح كل شوي رح مسوين اعز الاخوياء يخوي انا لولا الحاجه ماقعدت عند وجيهكم كنت معزز مكرم بشقتي فالرياض اهخ حسبي الله من كان سبب في فصلي
هايل : لاتتحيسب على احد كاني اشوفك مغير راقد ومتاخر عالدوام ذلحين فصلوك وافتكوا
عزام : لاتزودها علي انت لاشوتك وانت خل ذا ولا جب فلوسك مافيه شى ببلاش
عبدالرحمن : عاد لاتذلنا بتنتهي حلوياتك وانت تقول مافيه شى ببلاش
عزام : اي مثلك مثل الغريب
عبدالرحمن : افا افا يالجامعي يالي رافع راس القبيله كلها ياخونا الكبير تدري لو تبي ادفع حق البقاله كله بدفعه لك شتبي اكثر
عزام : اي شعندك
عبدالرحمن : سلامتك ومسامحتك
غزام : خله البطاطس شايفك
هايل : انا وصله خير بينكم استاهل البطاطس
عزام : رتبو معي الاغراض رتبو بدال هالوقفه
عبدالرحمن : عطنا قصيده ياهايل
هايل : يقول يادحيم
ماينوخذ طيرٍ ... وراعيه صقار
ولا تنوخذ مهره .... وخيالها فارس
عزام : رتب رتب بس

انتهى البارت