ဒီတစ်ခါလည်းဇာတ်လမ်းသွေဖည်သွားပြန်ပြီလား?(MyanmarTranslation)

အပိုင်း(၃၂.၂)

မူယန်ကဆို​၏။ " ဒါဆို ကျွန်တော်တို့ကို လိုက်ပြပေးလို့ ရမလား။ "

သူတို့နှစ်ဦးမှာ လယ်သမားအိမ်​၏ နောက်ဖေးသို့ ရောက်လာကြပြီး သွေးအလိမ်းလိမ်းဖြစ်နေသော ကြမ်းပြင်ပေါ်ရှိနွားသေတစ်ကောင်ကိုတွေ့လိုက်ရသည်။ လှီးဖြတ်ခံထားရကာ သွေးထွက်လွန်ပြီးသေဆုံးသွားခဲ့ပုံရသည်။ဖောက်ထုတ်ခံလိုက်ရသောနွားမျက်လုံးကလွဲ၍ ကျန်အင်္ဂါများရှိနေသေးသည်။

မူယန်က မျက်မှောင်ကြုတ်လိုက်ပြီး လက်ထိပ်နှစ်ဖက်ကို ပူးကပ်လိုက်သည်။ ငွေရောင် အလင်းတန်းတစ်ခုက သူ​၏ သူငယ်အိမ်ထဲတွင်ဖြတ်ပြေးသွားခဲ့ပြီး အချိန်အတော်ကြာပြီးနောက် သူကခေါင်းခါလိုက်သည်။ " မိစ္ဆာအငွေ့အသက်ကို ရှာမတွေ့ဘူး။ "

လင်းကျစ်ရန်က အံ့ဩသွားခဲ့ပြီး နွားသေကိုသေချာကြည့်လိုက်သည်။ ဒီအဆင့်က သာမန်လူတစ်ယောက်တောင် ဒီလိုမျိုးလုပ်နိုင်သေးတာ။ ဘယ်လိုလုပ် မကောင်းဆိုးဝါးရဲ့လက်ချက်မှန်း သက်သေပြပေးနိုင်မှာလဲ။ ဒါပေမယ့် မိစ္ဆာတွေမလုပ်ရင် ဘယ်သူလုပ်မှာလဲ။

မူယန်က ခဏလောက်တွေးနေပြီးမှပြောလာခဲ့သည်။ " တကယ်လို့ ဒီလိုဖြစ်ရပ်မျိုး ထပ်ပြီးကြုံတွေ့လာခဲ့ရင် ရွာသူကြီးအိမ်ကိုလာခဲ့ပါ။ "

လယ်သမားက သူတို့ကိုအားကိုးတကြီးဖြင့်ကျေးဇူးတင်စကားဆိုပြီး  လိုက်ပို့ပေးလေသည်။ မူယန်နှင့်လင်းကျစ်ရန်မှာ ရွာသူကြီးအိမ်သို့သာ လှည့်ပြန်ခဲ့လိုက်ကြသည်။ တစ်ခြားတပည့်များလည်း အသီးသီးပြန်ရောက်နေကြပြီဖြစ်သည်။

မြို့ငယ်လေးတွင် ကလေးငယ် ဆယ့်သုံးယောက်နှင့် ခြံမွေးတိရိစ္ဆာန်အတော်များများ သေဆုံးခဲ့သော်လည်း ဘယ်သူမှမိစ္ဆာအငွေ့အသက်ကို အာရုံမခံမိကြ။ မိစ္ဆာကျင့်ကြံသူတွေလုပ်သွားတာနဲ့တောင်မတူပေ။ လင်းကျစ်ရန်က မျက်မှောင်ကြုတ်ပြီးတွေးလိုက်သည်။ ဒီဇာတ်ကွက်က မိစ္ဆာတပ်မှူးရုတ်တရက်ပေါ်လာပြီး စင်ကြယ်သောနန်းတော်ကတပည့်တွေ ထိတ်လန့်ကြောက်ရွံ့သွားဖို့အတွက်ရည်ရွယ်ပြီးထည့်ထားခြင်းသာ။ကျန်တဲ့ အကြောင်းအရာတွေအားလုံးက ဖြစ်သလိုမသဲမကွဲသာဖြစ်တာမို့ မိစ္ဆာတပ်မှူးပေါ်လာတဲ့အချိန်အထိ စောင့်နေရမည်။ စောင့်နေဖို့သာ သူတတ်နိုင်သည်။သူမနေ့ညကကြောက်လန့်နေခဲ့သောကြောင့် မူယန်ဟာ ဒီညသူ့အခန်းမှာလာအိပ်ဖို့ပြောလာသည်။ လင်းကျစ်ရန်က ဒါကိုသင့်တော်တယ်လို့မထင်။