وكعت البنيه ومعرفنه شنو انسوي بس ام سمير واكفه شفت حتى امها ما تحركت
بسرعه صحت الامي دخلت مو فاهمه شي لطمت على وجها من شافت وضع البنيه وهاي عود ام سمير لفتها
شغلت السياره وصحت برافد جيبها ظال مفهي وجها اصفر
رحت يمه اعت بي من تشيرت مالته لك شبيك جيب البنيه
باوعلي ورجع باوعلها شالها وصعدها بالسياره وامي تمشي وتصيح شبيكم
* يما لبسي عباتج وتعالي بسرعه ويانا بعدين افهمج
ركضت يم البنيه وام سمير هم صعدت ورافد كعد يمي ما ينطق حرف
امها صعدت تكسي اتوقعتها تجي ورانه بس شفتها راحت بغير اتجاه
بالطريق عطت بيهم شوفي تربيتج شوفي سوالف الي اطمطمين عنه حجيتلها كلشي ساعه تلطم ساعه تلوم برافد
وصلنه للمستشفى دخلوها طوارئ بسرعه
البنيه نازفه والدكتوره رادت اتبلغ من شافت ملابسها والكدمات امي ادخلت كالتلها عروس وما قبلت وتعرفين احنه عشاير و و و و
دومها امي اتغطي علي لحد ما وصلتنه لهنا شمسوي بالبنيه ومنو هاي ومنين عرفها
طلعت ام سمير من الغرفه تبجي اجت يم امي
ام سمير * عيني ام سيف البنيه راح يبيتونها هنا الليله اهواي فاقده دم ولازم خياط والدكتوره كالت هسه ما اكدر وضعها صعب انطتها ابر ومدري شخربطت علاجات توكف النزيف مؤقت للصبح
* جاي تسمع شفت روحك شمسوي هاي اذا ماتت شيخلصك من الفضيحه ومن ذنبها منو هاي رافد وليش سويت بيها هالشكل
لك احجي ليش ساكت دفعته لزكته بالحايط امي صارت بيني وبينه
نجوى * شنو يما شبيك اذكر الله خلي نفتهم
فركت وجهي
* هم كالت نفتهم شتفتهمين بعد ابنج مدمر البنيه امها اجت شمرتها اخوها يريد يذبحهاا شتريدين تفهمين
نجوى* ابني ما يسوي هيج خلي تصحى وتحجي الصدك لا اتورط ابني
ضربت على الحايط حسيت ايدي انكسرت
طلعونه الامن ميصير لان هاي طوارئ رحنه للبيت انا و رافد وامي ظلت ام سمير الصبح امي اتروح
دخلنه للبيت ابوي منتظرنه بالحديقه بس نزل رافد اتولا رزاله وغلط
نجوى * شوف حجي مال رافد يتزوج هاي البنيه انسو ننطيهم فلوس انسويلها عمليه اي شي الجان بس ابني ما يتزوج وحده ما معروف اصلها من فصلها
حجي سلمان * لو وحده من بناتج قبلتي بهاي الي تكولين علي
نجوى* بناتي متربيات بنات بيوت اكيد ما اقبل
