الحياة كلشي بيها الحلو والمر والصعب والسهل ولكل شي ضد وعكس
وابطال قصتنه راح يروون لنا احداث من حياتهم
اتمنا لكم قرائه ممتعه ......
البصره
الساعه 6:30 صباحا راح ندخل احد البيوت العراقيه المتواضعه المملؤه بالحب وحنان الام وخوف الاب وغيرت الاخ ودلع وشقاوه البنات
سهام * علي يمة كوم فدوه ابوك ينتضرك خطيه لتخلي يطلع وحده تدري مابي حيل
علي* صار يما كايم بس كعدي بناتج حته اوصلهن بطريقي
سهام * كاعدات وجاي يبدلن
دخلت امي علينه للغرفه وعاطت
* اخرتن اخوجن يلا مصيبه مو بنات
سري* يماا شعلينه باخونه خلي يروح والله نستحي نصعد بالستوته تره كبرنه
اساور * يماا فدووه كليله يرووح والله المدرسه قريبه منحتاج فشلل
**لج شنو الفشل اخوج وجاي يوصلج للمدرسه هسه من يسمع مو ينقهر
اساور * اهو حجت المتحدث الرسمي كومي سرى منو يفكنه منها بعد ست في
راحن طلعن وانه هم كمت طلعت اساعد امي
سرى و اساور توم صف رابع اعدادي وعلي دائما يوصلهم بالستتوته مالته وهنه يستحن من البنات بينما هو خطيه يوكف بعيد عن المدرسه حتى لا يحرجهن
انما انه فهالسنه مقدمه اوراقي الكليات وجاي انتضر يطلع قبولي
ابونه عنده بسطه مال جاي بالسوك وامي خياطه
وهيج مطلعين مصرف بيتنه ومستورين والحمد لله
انه بما انو عطله ومعندي شي اغلب الاوقات اساعد امي بالخياط البسيط ودائما اتوصينه اتعلمو هالمنه تره الدنيا غداره ومالها صاحب وجان كلامها صح
للظهر
دخل علي بستوته الي شايل بيها ابونه وسري و اساور وكل وحده منهن لاويه الحلك
رحت ركضت على ابويه بست راسه
** الله يساعدك يبا
ابو علي * الله يساعدج بويه بس ماي وملح رجليني تعبانات
**من عيوني يبا بس تعال اكعد امي محضرتلك كلشي
تعديت يم علي وهم سلمت علي
وصاني على ماي بارد
رحت جبتله وبطريقي اخذت الماي والملح خليت رجلين ابوي بيهن
يمسح على راسي باوعت بوجها المتعوب المتروس حنيه دمعت عيونه وبتسم بوجهي
ابو علي * يعز عليه يا بويه تكعدين هالكعده انتي مكان هنا و ياشر على راسه
خنكتني العبره جريت ايده بستها
** يبا انه بنتك وهالكعده اتحسسني بروحي فوك الكل
