اليوم يطلع علي كلنه متحضرين و يمكن متحضرين الامي اكثر من علي خايفين تتخربط اتصل انور ردت علي في وصاها هالله هالله لزمو نفسكم الولد منهار
نص ساعه واندك الباب انور وخالد شايلين علي وابو انور وياهم
دخلو للبيت اتعجبت على امي هاي الي صارلها اسبوع منهاره وتبجي وكل شويه تتخربط علينه
اتحولت جبل قويه اتلكت علي وحضنته وهو ظل يبجي
علي * ابوي وين يما عافني وراح ليش خلاني وحدي
كلنه ظلينه نبجي حتي ابو انور ويكول راح رفيج العمر
انور * صلو على محمد وذكرو الله هاي الدنيا كلنه على هالطريق وانت علي اتوقعتك اقوى من هيج كوم على حيلك واسند امك و خواتك وكلنه اخوتك
علي * ما افيدهن انا بعد
انور* بداعتي لا تكمل زلمه وحوك وهنه بلاك يضيعن يلا ذكرو الله وجيبوله شي ياكله حته يشرب دوه
كام وكف وصاح على امي من رخصتج خاله
طلع وامي تبعته رحت وراها وكفت يمها
ام علي * يما مشكور اذيناك ما قصرت علي لو عنده اخ ما يسوي مثلك
وظلت تبجي بسكته قهرتني
انور * خاله شتحجين شنو لو عنده اخ لعد انا مو اخو
اتقرب باس راسها احسبيني ابنج يما وما اقصر بس اريد وحده من البنات اعلمها على الدوه
امي اشرتلي تعالي ودخلت خلتني مرتبكه
انور * شلونج يبنت وشصاير بحالج ليش عيونج ذبلانه هالشكل
* الراح مني مو شويه انت شلونك وما قصرت مشكور
انور * اششش لتكملين روحي جيبي علاگه الدوه وتعالي
رحت جبت العلاكه واجيت يمه علمني على الدوه وكال العصر امر اضربه ابره
راحو طلعو وظلينه يم علي انحاول انغير جو
ام علي * ولجن مصكوعات طلعت وره الولد ولا وحده ذكرتني وكالتلي انتي بالعده
* نسينه والله والمصيبه انور باسها براسها
في * يلا مثل ابنها انور
ظلينه نسولف عن امي وشلون نست روحها علي ابد مو ويانا عبالك انسان آلي اتغده شرب دوه ونام للعصر اندكت الباب اجه انور كعده من النوم اخذه للحمام
غيرله وضربه ابره وظل يمه كاعد
اجت ناس اتعزي علي كله انور كايم بالواجب صار عبالك واحد من اهل البيت
امي كالت بعد كافي الاحد داومن مدارس صدك كمنه حضرنه وسوينه اتصالاتنه اتصلت بدلال اخذ منها التحاضير
