بدات سبأ تحرك يديها ومن موراه حركات راسها وحلات عينيها بزز كتشوف قدامها .هزات راسها وفمها فيه التبن وبدات دفل وتنفض حالتها وجلسات كتبهد عليها القش وتعيف وتنقش شعرها .. شوية هزات عينيها لقات راسها فدار مقزبة وتلفتات شافت شادية ويامنة واقفين كيشوفو فيها وهازين البالات وتخلعات رجعات اللور كتهرب برجليها وقالت
بببب .. بب. ممم مامم فففين انا
خرجات فيها يامنة عينيها والعصا على كتفها وقالت
قلتي مع راسك الدار ساكنين فيها جوج بنات اجي نمشي نكشطهم هااا؟؟
نخزاتها شادية سكتاتها وقالت ليها شكون نتيي؟؟ وشنو كدير فوق الكروسة ديالنا
بلعات سبأ ريقها كتشوف فيهم وقالت
أمنو عليا ونقول ليكم
هبطات شادية البالك فالارض وقالت
عليك الامام .. يالاه هضري
هزات يامنة نيفها وقالت نزلي بعدا من فوق الحمار مسكين سخفتيه.. حكلو وصل بزز
ناضت سبأ وقفات بالزربة كتمتيل بلاصتها مخلوعة والقش لاسق فيها والدجاج كيدور وينقب من حوايجها وقالت
انا غير بنت بحالي بحالكم .. ماعندي لا والي لا تالي ومكنعرف حتى واحد
خرجات يامنة عينيها وقالت بشوية. ياكما باعوك لشي واحد وهربتي ليه ؟؟
حركات سبأ راسها ماعرفات اش تقول ليهم باش تأمن عندهم وقالت
كيشبه لداكشي
هزات شادية حاجبها وقالت: وفين كنتي عايشة قبل؟. وعندمن؟ دوي تكلمي
بلعات سبأ ريقها وقالت
ببب. ب با طلق مي ..ومي شنقات راسها وبقيت بوحدي تايهة ..
تنهدات يامنة وقالت : مسكيييينة طرا ليك بحالنا .. غا حنا بانا مي للي سيفطاتو للقبور بي الفقصة وبقات ماهي من الناعسين ما هي من الفايقين ومحناتنا معاها
تنهدات شادية وقالت : ودابا شنو ؟ شنو غنديرو ليك حنا؟
دورات سبأ عينيها فالدار وقالت في حيرة
خليوني معاكم هنا .. انا والله منآديكم .. نحلف ليكم باش ما بغيتو
ردت شادية وقالت : كيفاش نخليوك معانا وحنا مكنعرفو عليك والو وماعرفناك واش كتهضري بصح ولا كتكبدي
شدات فيها يامنة وقالت عا خليها باينة في كمارتها مكتكدبش ..خليها تشقا علينا وتسخر علينا وطيب لينا وتخرج تجمع التبن على كلبها ونتسنطو شوية لعضامنا
بقات شبأ كتشوف فيهم مخلوعة من كلامهم وهمت كيتناكرو قدامها فاللخر حطات شادية البالة وتكات عليها وقالت
شنو كتعرفي ديري الاللة ؟؟ عندك شي صنعة شي حرفة؟؟ حنا ماعندناش باش نعيشوك تعيشي راسك براسك وتعاوني على الزمان
رمشات سبأ وقالت ليها
كنعرف نضم الكلام وكتب الشعر ..
قاطعاتها يامنة وهزات صبعها شيرات بيه فالارض وقالت
ونيييت فينا الجوع يالاه اختي حطي لينا شي حفنة نك ْليوها نشوفوك واش بصح كتهضري ولا غا كتكدبي
ردت شادية وقالت وهاد الشعر ديالك وتنضيم الكلام باش غينفعنا؟؟ هادشي الاللة اللي عندك كينفع فالقصور ماشي فالخيام والديور .. اما الغنى والشعر وداكشي مغيوكلكش .. اري الى كتعرفي طيبي ولا تخبزي ولا تصاوبي شي حاجة ولا عندك شي حرفة .. اما الى ماعندكش راه مكاينش اللي يعتقك حتى بجغمة دالماء .. اجي ياكما هاربة من شي قصر؟؟ شوفي اختي ماخصنا صدع ولا تابع .. من هنا كنقولها ليك
ردت سبأ وقالت : لالالااالااا انا قلت ليكم منين جايا يعني علاش غنكدب عليكم !!
هزات شادية نيفها وقالت
ايوا اللي نطولوه نقصروه.. مللي ماعندك صنعة غتخرجي تشقاي على برا فوق الحمارة مع يامنة
نقزات يامنة بلاصتها كتنهق وقالت
وعلاش يااامنة علاااش علاااش يامنة تشقا بوحدها هي ولحمارة
ودت سبأ وقالت : لالا ..اناا منعرفش للشقا برا غير خليني لداخل واللي بغيتيها نديرها .. نتي غير قولي ليا شنو ندير وانا ندير
طلعات فيها شادية وهبطات وقالت
المهم يصبح ويفتح دابا مكاين منقول … ماتعطينيش خاطري نخرج ولية والليل طاح . راه دار الوضوء فداك القنت سيري ليه قضي حاجتك ونقي حالتك وزيدي نوريك بلاصتك فين تركدي
ردات سبأ بالايجاب ومشات طرفات حالتها وغسلات وجهها وجمعات شعرها ومشات لقاتهم جالسين مضويين اللمبة وحاطين الميدة كياكلو عليها وجلسات معاهم كتشوف فشنو حطو للعشا لقات خبزة دالشعير وزيتون كحل وقهوة ..سكتات وبقات كتبلع ريقها كتسنا شي حاجة اخرى تحط لاكن ماحطو والو وخواو ليها كاش دالقهوى كحلة قدامها وعطاوها الخبز وخلاوها منها ليه كتشوف فيه وقالت
هادشي اللي غناكل؟ !!
هزات فيها شادية عينها وقالت
ايوا ياختي حمدي الله لقيتي ماتاكلي بعدا ؟!! وكتشررطي؟
حلات يامنة فمها عامر ماكلة وقالت
الى مابغيتيهش اريه ليا ونوضي تركدي
تنهدات سبأ في حيرة وبقات كتشوف فالنعمة والجوع كيغيط فمسارنا .. قاست الخبز لقاتو يابس وبدات تقطع بزز وتاكل من شدة الجوع وتبلع حتى سالات وشافت شادية فيامنة قالت ليها تكعدي جمعي الميدة كتسناي فيها تجمع راسها
ضارت يامنة عندسبأ قالت ليها وا تكعدي واش مكتسمعيش الهضرة
ناضت سبأ جمعاتها وكدور فبلاصتها كتقلب على الكوزينة ومشات حطاتهم تما وقالت ليها يامنة من بعيد
غسليهم راه البديزة حداك
هزات سبأ الماء شللاتهم وحطاتهم كتنهد وخلات المياهات غارقة ومشات جلسات مكمشة ..دخلات موراها شادية لقات الارض فازكة وغوتات على يامنة ناضت كطير وقفات عليها وراسها سابقها
شادية : شهاد المياهات الارض. مطيسة غتبات هاكا حتى للصباح
شارت يامنة بيدها وقالت
هاديك الموصيبة اللي دارت هاد الروينة هادي هانا نعيط ليها
غوتات شادية وقالت
جمعي عليا هادشي ولا عنغطس ليك راسك فيه
رجعات يامنة كتكمش فحوايجها وتمسح يديها وراسها كيشطخ قالت ليها واخا وتحنات عاودات لغسيل للماعن كلهم وشطبات الدنيا وخرجات جلسات حدا سبأ وقالت ليها
دوك اللواني تقولي غسلتيهم بالدفال .. تي مالكي معيفينة شو كي حالتك ويامك
عيطات شادية من بلاصتها مغطية بكاشة قالت ليهم تكعدو تركدووو
ناضت يامنة ونوضات سبأ قالت ليها تكعدي تركدي
تبعاتها سبأ بداك البيت اللي كان طويل مفرش بحصيرة من الراس حتى للراس وفيه سريجم صغيور مسدود بالخشب ومفرشين غير النص ديالو .. طاحت يامنة تنعس حدا شادية وقربات منها سبأ بغات تنعس.. طلات عليها يامنة من فوق الكاشة وقالت كوحزي عليا لهيه
كحزات سبأ نغرة ورجعات قربات حطات راسها على المخدة وبدات تتقلب وتتقلب وصوت البومة كيغرغر فالسطح ..عيات تقلب وتشقلب وجنابها ضارينها حتى بغات تبكي من الحالة اللي هي فيها .. ناضت ليها يامنة نفضات الكاشة وجلسات ربعات قالت ليها
ليمن ليسر ليسر ليمن تقلبي بحال الموجعة ماتشدي تا جيهة ماتخلينا نشدو معاك طريق الموت .. غا كدوري في بلاصتك تقول فيك حر الولادة
ناضت ليهم شادية طلات عليهم وقالت
والله وماخليتوني نتخمد غا لمابيتكم برا حدا الحمارة والدجاج راني ماسميتيش شادية
سكتات يامنة طلعات عليها الكاشة وبدات سبأ كتقلب فبلاصتها فاللخر ناضت كدور عينيها فداك البيت المضلم لعل وعشى تلقا شي حاجة رطبة تنعس عليها لاكن والو .. سكتات وبقات هاكاك كتقلب من ليمن ليسر حتى صبح الحال وصبحو عضامها مهرسين تقول بايتة كتاكل فالعصى .. غير كتشد فجنابها ودراعها والعيا باين فوجهها وكملات ليها شادية صبحات خارجة وخلاتهم يوجدو الفطور .. جلسات جنب يامنة كتشوف فيها ساكتة وقدامها الكانون فوقو الماء كيطيب قفزاتها يامنة قالت ليها هزي الماء تقادا
وطارت سبأ هزاتو ورجعات طلقاتو لاكن تخوا على رجلها وغوتات ربي اللي خلقها ويامنة مخرجة عينيها قالت ليها
غززا فيك الله .. كتشوفي في الماء نشف قدامم عينيك ومخلياه كيغلغل فوق العافية ..وادابا كمديها
YOU ARE READING
ذو التيجان 👑مكتملة👑
Romantikk💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
