بقا غير كيشوف فيها وقال ليها والدنيا هانيا عندك يتزوج ختو واخا ماشي بنتك ؟
هزات كتفها عطاتو بالضهر قالت ليه ونتا علاش ما درتيش الحد لهادشي علاش ماقلتيش ليه مخطوبة ولا شفت ليه شي تسييقة من ذكائك المبهر ولا كتخدمو غير فاش كترشق ليك
مشا جهة الباب بغا يخرج وقاليها
شوفي ليك شي حل لحريرتك انا مبري منك
خرج وخلاها جالسة كدور تالفة على بلاصتها كتمشي وتجي وتخمم ..كانت فهاد الاثناء بصيرة وعبدية بنفسها جنب سبأ اللي رجعات من الموت لاكن ماشي طبيعية ومزالة مصدومة جالسة فوق سريرها الصغير ف بيتها الصغير وجنبها عبدية وبصيرة كيداويو ليها يدها المحروقة وعنقها المجروح من بعد ما حيدو عليها الكفن اللي بقا تأثره على نفسيتها كبير ولبسوها قفطان خفيف لون سماوي مايل للخضر "فاختي"
مسحات عبدية على يدها اللي عليها حرقة وقالت كطيب جروحها
ها الحمامة ديالنا رجعات .. وربي بغاها وزادها فالعمر .. ايووا وغادي .. الحمد لله يا بنتي على سلامتك .. رجعتي منورة تبارك الله بحال العروسة وكتاب ليك الله حياة جديدة .. غادي تبراي وترجعي حساااان كاع من اللول.
ضحكات بصيرة وهي كدفر ليها شعرها قالت ليها باش تعرفي راسك عزيزة وغالية.. هانتي حضرتي لكنازتك كاع وشفتي شحال ديال الناس بكاو عليك..وفرحو فاش رجعتي بالسلامة.. وصحاباتك كاملات كيسولو عليك وباغين غير فوقاش يشوفوك .
طاحت واحد الدمعة من عينها مسحاتها بيدها وقالت ليهم
الله ياخد فيهم الحق
ردات عليها عبدية قاليها لااا وعلااش ابنتي ..كلهم حزنو عليك وبقينتي فيهم ومابغاوش ليك هادشي… نتي بنية مزيانة وداخلة سوق راسك وقارية وفاهمة .. ومشيتي بغيتي تقتلي راسك..بغيتي تمشي حهنم نيشان
طلات عليها بصيرة شادة فدفرتها وقالت ليها وعلااش ؟؟ كنتي غتمشي لا دنيا لا اخرة بسبب الخلق وتخسري توابك مع الله ..
قالت ليهم قاطعة البكية فيها عمرني نسمح ليهم .. كن قتلوني مع عائلتي احسن ليا
قالت ليها عبدية ايوا حمدي الله اللي ماقتلوش ودخلتي للاسلام ديالنا .. وغادي تمشي للجنة .. كن قتلوك فالحرب كن مشيتي جهنم .. ربي دار ليك السبب ابنتي
ردات عليها بصيرة قالت ليها والحرب لا مفر منها.. يا قاتل يا مقتول وحنا عائلتك الثانية وحضناك
وراتها سبأ يدها قالت ليه حضنتوني
تنهدو عليها كيشوفو فيها وقالت ليهم الاسلام كيقول ليكم هادشي؟؟ نتوما مسلمين؟
شدات ليها عبدية يدها كتمسح عليها قالت ليها ربي خلق وفرق.. والاسلام كينهي على هاد المنكر ..ولاكن بني ادم عندو ثلاتة دالنفوس.. مرة تلقايه كيعصى الله ..مرى كيبكي وندمان ..مرى راضي وفرحان .. ايوا هادا اختبار وصافي الله يهدي ماخلق.. دعي الله يصلح احوالك ويفك رقبتك
هزات يدها بحرقة قالت ياربي كما فكيتي سيدنا يونس من بطن الحوت فكني من هاد القيود ومن هاد العيشة وخرجني للضو وطيب خاطري يا ربي
حنات راسها على ركابيها كتبكي وهما غير كيشوفو فيها .. دخلو ليها الخدم تاكل وحتى هما جاهم فضول يشوفوها وخطو الماكلة وعينيهم كيدورو وخرجو .. تبعاتهم بصيرة خلات معاها عبدية ورجعات للعمبر تشوف اش واقع فيه ودخلات لقاتهم حاميينهت للهضرة وغير شافوها ناضو وقفو كلهم تجمعو عليها واول وخدة سولات هي متعة .. قالت ليها واش بصح داكشي اللي سمعنا على سبأ واش بصح مزالة حية ماماتتش؟
ضحكات بصيرة قالت ليهم كتاب ليها عمر جديد.. وبحال والو ترجع عندكم للعمبر نقزات سمر قالت ليها بصح؟؟ واش بصح ماماتش ؟؟ بصح باقا حية
فرحو البنات كلهم وتصدمو من هاد المعجزة واخا حتى بحر ماصافي بلار وكان فالعمبر الزوين والخايب ..الحنين والرحيم والحاقد والخبيث ..تشفاو شوية وفرقات ليهم بصيرة المجمع سيفطات نصهم للموسيقا ونصهم للمنسج. والنص لاخر للجردة .
اما السطان ولد السلطان مللي ودع باه اللي مزال ماعرفوش مشا صلى ليه العصر وجلس فالشرفة لابس واحد الفوقية الكول ديالها مدور على العنق بالسيفة وفقه جوج عقدات فالجنب ومربع رجليه بقا كيحفض شوية حتى اذن المغرب ودخل ذو الفقار سولو فين يبغي يتعشا وهز راسو س المصحف وتلفت ليه والشمس كتغيب قدامو فمنضر رائع وقاليه جيب ليا سبأ وقت العشا لهنا
حذر ذو الفقار راسو وخرج وناض السلطان حط المصحف ومشا يصلي المغرب
وجد العشا ووجد جناح السلطان للعشية ..دخل ليه لقاه مزين ومزوق لاكن ممل..كلس فالشرفة بوحدو كيشوف فالعشا مغطي ومتول لاكن فين سبأ؟
دخلات عليه فديك اللحضة عبدية ووراها سبأ مهبطة راسها شوية ومدررها تقول جارينها بزز.. بالدفرة ديالها وداك القفطان وما رضات لا تلبس لا تزوق .. تلفت شاف فيهم وشار بيدو ليها تجي عندو .. ضارت عندها عبدية قالت ليها بهمس ديري عقلك بلا عناد ماتعرفي ليوم يتحلو ليك بيبان الرزق
خرجات خلاتها ومشات جلسات قدامو كتشوف فيديها فصمت .. بقا ساكت كيتمعن فيها وقاليها بأسى تسدو كاع البيبان فوجهك وفضلتي جهنم على كلشي
دورات وجهها للجنب كتسوط من نيفها فهدوء وقالت ليه يمكن جهنم ارحم من هاد الارض
مسل راسو كيشوف فيها بتسائل وقال ليها. وعلاش؟ً على قبل عقاب مارضيتيش بيه
بقات ساكتة مطولا وجبدات من طيات توبها ورقة مداتها ليه قالت ليه هادي غادي تصفي الخواطر
شد الرسالة ولمح بقعة حريق على يدها وشد ليها يدها قاليها مالكي فيدك؟
جمعات يدها بالزربة قالت ليه والو ..
قاليها وكيفاش حتى تحرقتي
بقات ساكتة مطولا وقالت ليه حرقني الكانون
شد ليها يدها دوز صبعو على الحرقة وشاف فيها قاليها خسارة هاد اليدين تاكلهم النار
بقات ساكتةكتشوف فيه بنص عين وجرات يدها عندها .. فتح الرسالة لقا فيها تعابير اعتذار على شتمها وقالت ليه بين السطور
الم يأن للغضبان ان يتعطفا
لقد زاد ظلما في القطيعة والجفا
بعاد ولا قرب ، سخط ولا رضى
وهجر ولا وصل،وعذر ولا وفا.
تبسم وطوا الرسالة شاف فيها قاليها كيأمل فحسنها عن بعد
اذا ما جائت اليمامة بذنب … تسابقه الرقة والحسن بشافعين
تبسمات وقالت ليه خير العفو عقو معجل..وشر العقاب ما يجاز به القدر
تنهد وعرا على داك العشا قاليها مللي تصفات الخواطر نتشاوكو الطعام ..بسم الله
مدات يدها هزات حبة ديال العنب كلاتها وخوات ليه كاس ديال اتاي مداتو ليه وقال ليها
شنو امنيتك فالدنيا ايامامة ؟
تلفتات شافت فيه قالت ليه يمامة؟
حط الكاس وقاليها سمتك من اليوم يمامة
اتغربات من هاد التشبيه وحلات عينيها كتشوف وتستوعبه وابسمت ليه قالت ليه بصح .. سبأ مشات مع النعش للقبر .. وليوم ولادة يمامة
ضحك وقال ليها وعلا قالتي سبأ؟
ردت عليه وقالت حيت مكانتش كتليق بمقامك امولاي .. وبمقام هاد القصر العضيم
قاليها كانت كتليق علاش شكون قاليك مكتلقيتش ؟
قالت ليه ببساطة مكتليقش بيا انا .. سبأ بوحدها ويمامة بوحدها ..ميمكنش يتجمعو فواحد امولاي..
استغرب قاليها علاش؟ وجاه كلامها غريب كيحاول يفهمه
بسطات ليه الامور وقالت ليه حيت سبأ كان صعيب عليها تعيش مع ذكريات كحلة دازت عليها .. داكشي علاش شنقات راسها وماتت ..لاكن يمامة قادرة تعيش ..تماما بحال اليمامة ..لا ذكرة تقل على جناحها ولا جروح يقطعو فيها النفس ..باش تبقا الحمامة محلقة فالسما خاصها تكون خاليا من جميع السليبات .. باش ماطيحش شي نهار امولاي
حرك راسو بالايجاب قاليها وشنو كطلبي ايامامة ؟ بابي محلول فوجهك ليوم
بقات ساكتة مطولا كتفكر وقالت ليه
سألت اليمامة عن الامنية
فلم تطلب ذهبا ولا عطورا زكية
يا نعمة الحياة بالحرية
لذة طاهرة نقية
تبعت للقلب الحَمية
يمامة طليقة وحرية ابدية
تحلق في الافق العلية
بعيدا عن البشر الوحشية
شاعرة ادبية
بحس الحياة الحية
العز .. وكل العز للحرية .
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
