خلات حتى ضلام الحال مابقا حتى واحد يسول عليها وخرجات هي ووحدة من وصيفاتها خلات فالبيت عبدية تسلك الامور ومشات لابسة ملحفة كحلة كتجري فوق العود حتى لدار القاضي ورسلات وصيفتها دقت بابو والطريق بين الرياضات خاوية فالمدينة ..حل ليها الخادم الباب وقالت ليه بغيت لاللة عيشة
مشا عيط ليها لعيشة جات كتجري عندها وقالت ليها لاللة روح الندى جات
خرجات عيشة لبرا طلات وجات روخ الندى بالزربة مخبية فالملحفة دخلات بالزربة وسدو الباب وحيدات لثامها قالت ليها عيشة فرحانة
مرحبا بيك الاللة مرحبا والف مرحبا
قالت ليها روح الندى فين السي يحيى؟
قالت ليها عيشة دخلي ترتاحي مرحبا مرحبا
دخلاتها لواحد البيت كبير بالسدادر ومشات كتجري طلعات عند القاضي لقاتو جالس شاعل القنادل فالنوافد وكيقرى فواحد الكتاب غليض جنب واحد الشرفة صغيرة كدخل الهوا
بلا ميشوف فعيشة قاليها مافيا اللي يتعشى اعيشة غير سيري تنعسي
ضحكات قالت ليه راه عندك واحد الضيف السي يحيى
تلفت عندها مستغرب قاليها ضيف؟ شكون هاد الضيف ورا العشا اعيشة؟
قالت ليه لاللة روح الندى السي يحيى
تصدم وحط الكتاب بشوية وناض وقف قاليها شهاد المزاح اعيشة ؟!
قالت ليه واش انا مولفة نتمازح السي يحيى
قاليها واش بصح اعيشة !!
قالت ليه ايوا الى مصدقتيش هبط تأكد بنفسك
مشا جهة الباب حتى كان غيخرج ورجع دخل شاف فلباس نومه الشفاف اللي كيبن صدرو من لداخل ومحلول من العنق بزاف ومشا لبس عليه دراعية شرقية طويلة كحلة عاد نزل يتأكد..دخل للبيت والشك فراسو لقاها جالسة عاد صدق عينيه وماعرف مايدير ديك الساعة .. ناضت وقفات شارت لوصيفتها بعينها خرجات وقالت ليه مس الخير السي يحيى
خرج نفس طويلة قاليها مس الخيرات الاللة روح الندى..مرحبا والف مرحبا ..كنتي تعلميني نستقبلك بمقام يليق بيك
قالت ليه انا مابغيتش هاد المقام ..ماجيتش باش تستقبلني..جيت غير نقوليك شي كلام ونمشي
شار ليها بيدو قاليها جلسي بعدا رتاحي
جلس جنبها وقال لعيشة تضايقها وحطات ليها اشهى انواع الفايكة وصينية واتاي ومشات
بقات روح الندى شادة فلتامها كيبانو غير عيونها وقالت ليه
بخجل كتشتت النضر ماعرفت اش غادي نقول ليك السي يحيى..مليي جات عندي عيشة قالت ليا راه مريض بسيبك جيت نعرف السبب وعلاش
تبسم شاف الارض ويدو على ركبتو قاليها انا طالب راغب فيك للزواج الاللة روح الندى
حلات عينيها مضدومة بقات كتشوف فيه وقالت ليه ولاكن انا ماشي بيدي ..وخاصك تعرف باللي عندي ولد كبير تبارك الله وحفايد ..وهادشي ماشي ساهل فيه قطعان الريوس
قاليها السي يحيى اللي مات عاشق مات شهيد الاللة روح الندى .. ياما عشاق مشاو ضحية الغرام..بلحق يكون الغرام صادق ماشي خسارة فيه
تصدمات من كلامو وارتاحت لنبرة صوتو وبقات كتشوف فجنابها مبسة وهوا كيشوف فيها باعجاب وحب قال ليها اشنو قلتي الاللة اروح الندى؟ تقبلي
طولات قالسكات وقالت ليه بخجل عطيني شي شويوش ديال الوقت نفكر..ونمهد لولدي
حل عينيه بسعادة فرح وكان واضح من جوابو قبولها وقاليها غادي نتسناك الاللة روح الندى حتى لآخر نهار فعمري
وقفات متوثرة كتحمار وتصفار قالت ليه خليت ليك الراحة السي يحيى
دازت قدامها ورافقها حتى للباب وقبل متخرج قاليها بتردد الى سمحتي نشوف …
ماكملش كلامو بقا ساكت وزادت خلاتو واقف حتى تحل الباب وتلفتات عندو هبطات اللثام على وجهها مبسمة وقلبات وجهها ردات لثامها وخرجات مشات خلاتو واقف سد عينيه ومسح على لحيته تنهد ورجع لبيتو في حين رجعات للقصر حسي مسي ودخلات لجناحها كضحك لقات عبدية واقفة كتسناها قالت ليها كان غيسكت ليا القلب… على سلامتك
مشات روح الندى طاحت على الناموسية قالت ليها انا اللي غيسكت ليا القلب اعبدية.. كنت ضالمة راسي ..الحياة زوينة فيها بزاف مايتشاف
قالت ليها عبدية شنو وقع اش طرا
تكات روح الندى على ضهرها سدات عينيها قالت ليها قاضي القضا بغا يتزوج بيا ..كن تشوفي اعبدية كيفاش كيهضر .. شنو كيخرج على فمو وكيفاش كيعاملني..راه انا ضلمت راسي الصراحة.. طحت فهاد القاضي اعبدية ..اما هوا خلاص عينيه معلقين فيا خايف نطير
قالت ليها عيدية راه طيري حتى تعياي وتجي فالارض فين خليتي يور والاصيل والله لا خلاوك حتى تحلمي ..داك السيد مسكين الله يرحمو من دابا والله الاصيل لا خلاه ليك فوق الارض وراكي كتعرفياش كيسوت
تقلبات روح الندى على كرشها شافت فيها قالت ليها الاصيل يمشي ينبك .. خلاها السي يحيى الموت على العشق شهادة ..كيتي انا دابا اللي حية وميتة ما حياة ما والو ..عايشة والبهيمة احسن مني وزايدون الاصيل صافي طاح ..يتقبلها ولا يجلس المهم بالنسبة ليا غلبو القاضي ..ايييه اعبدية القاضي سالا مع الاصيل والى دار ليه شي حاجة راه ضعف منه هوا ماشي من القاضي..وزايدون ماعندو مايدير يمشي يعاود لمخو
قالت ليها عبدية ايوا وولدك ؟ عند بالك غيديك ليه عروسة
قالت ليها روح الندى بحالو بحال باه سلعة وحدة ..مايصلاح ليهم غير فعايل بنات الحرام هما اللي كيجيو مع بحالهم
داز اسبوع على لقاء روح الندى والقاضي وروح الندى يوم على يوم كتحاول تقرب من يور اللي غاضب عليها مكيدوزشمن حداها من نهار المشكل ديال شادية وهوا هاز من جيهتها ..ماعرفات كي دير دوز ليه وكتشوفو رايم جيه باه غير غادي جاي هوا وياه ماعارفاهم لاياش كيخططو.. عيات تسنا الفرصة ولا بغات تجي وهي كل نهار كتشوط وتحرق قلبها طايب وعقلها مرفوع . تسنات حتى شبعات فالاخير وقفات وشافت فعبدية رافعة راسها قالت ليها عبدية.. وجدي ليا حوايجي غنخرج عند القاضي
قالت ليها عبدية يا هاد الملعوقة ردي بالك لشنو كديري …راه هادشي مامسلكش
قالت ليها روح الندى صافي قررت اعبدية ومغنرجعش فقراري
عيات فيها عبدية دير ليها عقلها لاكن شافتها محروقة على الزواج من القاضي وخلاتها على خاطرها
لبسات حوايجها وتزينات زينة الاميرات وخرجات عاين باين هي ووصيفاتهاوعبدية معاها بحجة النزاهة بحال العادة ومشات فعربة ما خلات حتى واحد يشك فيها حيت خرجات كما موالفة قدام عينين الكل.
بعدات حتى بعدات وتسلات فملحف قهوي بلا ماتبان وخلات وصيفاتها وعبدية معاهم ومشات على العود نيشان لدار القاضي استقبلاتها عيشة بالحليب والتمر ودخلات ها ضايفاتها فالرياض ..تلفتات روح الندى يمين يسار قالت ليها كاين السي يحيى ؟
قالت ليها عيشة هاهوا جاي الاللة ..مشا للمسجد يصلي صلاة الجمعة وغيجي..
تبسمات روح الندى وخدات راحتها حيدات الملحف على راسها بشوية وقادات حوالقها وخيط اللويز اللي على راسها والجوهر فعنقها وتكات سدات عينيها قالت
الله على راحة فهاد الرياض ..
سرحات رجليها ببلغتها وسط ديك الساحة المعرية والخضورية ضايرة بيها على واحد السداري مزوق وحطات يدها جنب راسها كتشم الهوا وتسنط لعضامها فهدوء والسقاية قدامها وشاردة حتى سمعات تحنحين راجل وحلات عينيها لقات القاضي واقف قدامها وهي ساقها معرية حتى للركبة ..كيشوف فيها ويغض البصر شوية وناضت بزربة جلسات حشمانة ودارت عليها الملحفة ودوزاتها على نيفها كتمتم قالت ليه السي يحيى ..الله يقبل
حط السجادة وهز جلابتو البيج والبلغة كتشعل فرجليه تقول العيد الصغير ..متول وريحة الحروشية والرجولة كتفوح منو ..قاليها بابتسامة كيشوف قدامو مرحبا بيك الاللة نهار كبير هادا
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
