قصر قرطبة .
فجناح صغير واقف جسد نصو عريان قدام المراية كدور يدها على جرج كبير ملموم عبارة عن شرطة حمراء جنب السرة .. هزات بيدها شوية دالعسل من الشهدة اللي فااطبسيل دهناتها مزيان وطلقات عليها توب نضيف ابيض غطاتها وجمعات كرشها بتوب عريض خفيف دوراتو مزيان وطلقات عليها قميص خفيف حتى للارض.
سمعات الباب تحل ودخلا خادمة صليبية عندها هازة راسها قالت ليها بعربية متقطعة الامير لوسيوس كيتسناك على الغدا
تلفتات شافت فيها بابتسامتها الساحرة وحركات ليها راسها بالايجاب وخرجات معاها دايرة دفيرة للجنب واسعة وعقد خفيف فيه بولة حمراء ومشات لقاعة فيها طاولة طويلة كان على راسها الامير لوسيوس بلباسه الصبيبلي والاوسمة على كتافو ..طويل وعريض واشهب الشعر واللحية وعيونو خضرا ..وجهه باسل بحال العصيدة بلا ملحة واخا حروفو زينة .
تبسم وكان فيدو مشروب هزو جيهتها وهي كتقدم ناحيتو بجسدها النحيف وتحت عيونها ازرق واللون هارب من وجهها تقول مشات يمامة وبقا ريشها ..نضرتها لاشياء نضرات باردة ووجها اصبح انحف تقول مكتاكلش النعمة .
جلسات جنبو قالت ليه شكرا على الدعوة سمو الامير
تكلم واحد جنبو شرح ليه كلامها العربي وتبسم ليها الامير قاليها بلغته بغيتك تتعلمي لغتنا فأقرب وقت .. مجاتش معاك هاد اللهجة نهائيا ..كن كنتي مسيحية كان يكون احسن واسهل فعلاقتنا
تلفت عندها المطرجم شرح ليها وهي كتشوف فالامير بابتسامة باردة وعينيها كيتوعدون وقالت ليه
كنتسنا نرجع عافيتي امولاي باش نقدر نتحمل التعلم والمواضبة ..
كانو كيهرو والمطرجم فكل مرة كيشرح وقاليها الامير
وهوا كيقرب منها وشد يدها
شفت حتى عييتي وماعمرني شفت فالزين بحالك
تبسمات قالت ليه انا مي شيعية الاصل فارسية ..وبا مسلم وخرجت كنشبه لمي اكثر وماخديت من با غير شي حاجة بسيطة
قاليها الامير وعلاش نحفتي لهاد الدرجة..نهار دخلت لهاد القصر ولقيتك مرمية على الارض ماكنتيش بهاد الضعف..كنتي بحال الملاك ..شيديتيني ليك واخا كلنو عيونك مسدودين ..ولاكن دابا تبدلتي واش كيعاملك ب واحد معاملة قاصية؟ واش مكيعطيوكش تاكلي
تبسمات وشدات فيدو قالت ليه لا بلعكس..شكون يقدر يكسر اوامر سمو الامير..انا كنشرب عشوب قاصحة على قبل الجرح مكتخلينيش ناكل من بعدها ..هادا ماكان امولاي ..
خوا ليها الشراب فالكاس قاليها شاركيني مشروبي وخلينا نحتافلو بهاد النهار الجميل..فبحال هاد النهار بالضبط ربحت الحرب ..وشفتك فيه ودخلت لهاد القصر .. وقريب غادي نتزوج بأجمل امرى فهاد العالم وغنكون اسعد انسان ..امير ..وجنبي اجمل مرى ..اش هاد الحياة السعيدة سعدااتي
غرغرو عينيها حتى نتباه ليهم وحتى كان غيتكلم عليهم لاكن دخل راجل بلباس عربي طويل ورا قائد من القياد للقاعة كيلهت وهبط على رجلو قاليه بلغتهم الاسبانية مولاي .. عندي ليك خبار مهمة من قصر الحمراء
حلات يمامة عينيها وتهزات بلعات ريقها كتشوف فيه وقاليه لوسيوس تكلم اشمن خبار جايب
قاليه الراجل اللي واضح انه جسوس فالقصر ..الخبار في غاية السرية امولاي
تلفت الامير شاف فيمامة وضحك قاليه هضر طلقنا مكاينش من غيري وغيرك والقائد كيفهم اشنو غتقول
شار بيدو للمطرجم خرجو وقاليه الجاسوس
السلطان يور على قيد الحياة سمو الامير
شهقات يمامة وطيحات الكاس اللي حداها وتلفت عندها لوسيوس ضن ان الجرح ناض عليها وقاليها تمشي ترتاح بيدو ولغته وشدات فالطبلة كترعد غادية جهة الباب وكتسمع الامير كيغوت قاليه شنو هاد التخربيق.ك دار غليه العام وهوا ميت كيفاش على قيد الحياة
قاليه الجاسوس تاضح انه ماماتش والسلطان محمد اصيل كان خفاه على عينين البشر..وليوم الصباح استقبلوه فالقصر وعلنو عليه فالديوان ونتاشر الخبر ..
ضرب لوسيوس الطبلة بغضب قاليه اش هادشي !! هادشي مكيتقبلوش العقل ..سمع غادي ترجع للقصر وحاول تقرب منو اكثر .. خاصك تجيب ليا خبارهم وتخطيطاتهم كلها والى دعى الامر ضحي باعضائك باش تقرب منهم ..يالاه خرج
خرجات يمامة شادة كرشها من الصدمة وكتمشي مع جنب الحيط حتى صادفات خوه توأمه الامير لويس وهبطات ليه راسها وهوا كيشوف فيها بنص عين حتى داز عاد جلسات كترد النفس فواحد القنت ويدها على قلبها كتهشق وتبكي من الفرحة ..ناضت مامصدقاش شنو سمعات رجعات لجناحها وسدات عليها مشات كتجري لواحد الصندوقة تحت فراشها جبداتها كانت فيها سمطة ديال الجلد اللي كيزير فيها على كف يدو وتذكرات يوم بقات بوحدها فجناحو وهزاتها من بين اغراضه واختافضات بيها كحزام على يدها ..شداتها زيرات عليها جهة صدرها وبلعات ريقها وخرجات عيونها الكبيرة اللي بقاو كايبانو اكبر من اللي كانو بسبب ضعف وجهها
فقصر الحمراء
دخلات روح الندى لجناحها مرتاحة وجلسات طلقات رجليها وشافت فعبدية قالت ليها
يالاه ..وجدي ليا حوايجي نمشي للامة دبنت القاضي
ضربات عبدية وجهها قالت ليها اويلي على اللامة ؟
قالت ليها روح الندى ومالها اش فيها؟
قالت ليها عبدية يور فالقصر والسلطان حتى هوا ! الى سولو عليك؟
هزات روح الندى كتفها قالت ليها طلعو ليا فراسي واحد كيرميني لاخر واش انا نبقا مقابلاهم غير هما ! منشوفش راسي ؟! احم وزايدون بغيت نتعرف اكثر على القاضي..صورتو مكتمشيش من بالي كنحس بواحد الاحساس زوين ..عاجبني الحال
بقات عبدية غير كتشوف فيها قالت ليها ايوا الله يستر..حتى شاب عاد علقو ليه حجاب
هزات روح الندى حاجبها شافت بيهابالجنب ليها قالت ليها بزاف عليك نتي اللي شبتي اما انا شهوة مني مزال ندك وندردك ونزيد الاولاد !! هه ء قالك حتى شاب علد علقو ليه حجاب
..سيري بعدا عيطي ليا على ديك المسخوطة دشادية تشرف ليا شنو مخبيليا مكتوبي
تنهدات عبدية قالت ليها شادية!! عاد بانت ليك!! ماسولتي على غيابها ما سولتيعلى شنو فكرشها ؟!!
قالت ليها روح الندى ومالها علاش نسول فيها
خرجات فيها عبدية عينيها قالت ليها راه شادية ولدات الى مافراسك الخبار ومها منين ما دازت كتقول ليهم بنت السلطان
عقدات روح الندى حجبانها قالت ليها ولدات؟!! علاه دغيا ولدات بهاد الزربة!!
قالت ليها عبدية نوضي ضربي الفكد فراسك قبل مايسيق ولدك الخبار يقلب عليك الدنيا.. عنداك تكون بصح البنت بنتو ونتي لايحاها هي ومها ..
قالت ليها روح الندى سيري عيطي على شادية ومها جيبيهم ليا لهنا نشوف هاد خيتي وحريرتها ..مزيان تبارك الله بغاتني نقطع لباباها اللسان ..مادير خير مايطرد باس هي نيت كن جريت على مها نهار الاول
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
