بدات الترتيبات فالقصر كما امرات الملكة يطبق .. وبداو خادمات العمبر بالتدريبات و التعلم هما اللولين وفنفس الوقت بداو الخدمة بانتضام تام وستفو جميع حريم القصر قدام عينيهم وحطو جمال الصورة هي الاولى عاد يدوزو للبقية ..تستفو كاع البنات فصالة الخصة اللي كيلعبو فيها وكل وحدة كتنمى تكون من المختارات العمبر واخا مسدود عليهم حاليا ومامسموحش ليهم يدخلو ليه او يشوفوه .
نزلات شادية حينها وعويشة لاسقة عليها ووقفو حتى هما مافهمو والو ودخلو فالصف كيوشوشو
عويشة : علاش جابونا لهنا ؟
شادية ماعرفتش علاش؟ ؟
تلفتات شادية هضرات مع وحدة من البنات حداه وشرحات ليها البنت المغزى بسعادة .بلعات شادية ريقها لاكن عويشة عجبها الحال و فرحات ..لاكن صدماتها البنت الاخرى وقالت
قالك منوع على الخواتات يدخلو الحريم ..وقالك غيعزلو البنات اللي يدخلو العمبر واللي ماتعزلوش غيخرجو من للقصر
تصدمات شادية وعويشة وشافو بعضياتهم وحسو بساعة الفراق وصلات وغتبقا يا هي يا عويشة فالقصر..ولاكن المشكل لكبير هوا الى هزو عويشة ودخلوها للحريم. ..وشادية سبق ليها وجلسات مع الامير ..واخا ماشي شي جلسة لاكن سبق ليه وعرض يكون معاها وباح ليها بالحب وهي ماقبلاتش وتراجعات ودار بيناتهم حديث طويل اللي بدات تسترجع
داز الحوار الاخير قدام عيون شادية وسدات عينيها كتنهج حتى فيقها عابد وقال
شادية..دوزي لهاد الجيه ..
حلات عينيها لقات راسها مختارة العنمبر وتلفتات شافت فعويشة اللي كان غيسكت ليها القلب وقالت كترعد
غتخرجوني..وانا فين غنمشي ؟؟؟
قاليها عابد غتخرجي طردي رزقك ..ممنوع على الخواتات يدخلو العمبر
جرات وحدة من الخادمات شادية لقدام وهي كتشوف فعويشة كتبكي وماقدراتش تفرط فختها وداست على قلبها بدون تفكير وقالت
لا لا ..انا .. انا مانليقش بمقام مولاي .. خليو عويشة تمشي بلاصتي..حتى هي عندها حقها من الزين
ذرفات دمعتها وعابد كيشوف فيها وشار بعينو لبصيرة جراتها قنتاتها وشافت فيها قائلة
شنو السبب؟ عطيني سبب مقنع ؟
بقات شادية ساكتة والدموع كتجري من عينيها ونالقات حتى سبب تعطيه وماعرفات باش تجاوب ..قالت ليها بصيرة ..واش عاشرتي شي عبد من العبيد؟
ربقات شادية ساكتة وقالت مع راسها الى كان هاد السبب غيخلي عويشة تبقا فاللهم التهمة قد الخلا ولا تخرج ختها تباع وتشرا برا . انا هي عارفة راسها مضمونة والملكة متقدرش تفرط فيها وكتوقف عليها بلا عنمبر بلا حريم.
هزات بصيرة راسها بغيض وزيرات على كتفها بدفارها وقالت
اااش درتي..واش عارفة شنو درتي الحمقة؟؟ دوي شكون هاد العبد اللي عاشرتي..نطقي ..مستحيل تبقاو بجوج فالقصر
دارت شادية يدها على فمها كتبكي ماقداتش تهضر لاكن موصيبة بحال هادي مايتسكتش عليها ..
حركات بصيرة راسها ومشات رجعات عند البنات وقلت بصوت عالي
عويشة.. دوزي لهاد الجيه..نتي اللي غدخلي العمبر
هات عويشة عينيها المدمعين مصدومة وضحكات بالفرحة وتلفتات جهة شادية اللي كانت كتشوف فيها وكتبكي ودورات وجهها خباتو بيدها ورجعات بصيرة عندها جراتها من يدها قالت ليها زيدي قدامي
داتها لجناح الملكة ووقفاتها قدامها وهي كتحل حوالقها بشوية باش تكا ترتاح
بصيرة : لاللة مولاتي..موصيبة وقعات
تلفتات روح الندى شافت فيهم وشافت شادية كتبكي فالدم قدامها وراسها هابط وقالت
شادية؟ مالك اش درتي
دفعاتها بصيرة وقالت ليها تكلمي قولي اش درتي.. يالاه نطقي
طاحت شادية كتبكي فالارض وروخ الندى هادة راسها وكدور فعينيها وتفكر وتحلل فشنو ممكن تكون عملت شادية .. تكلمات بصيرة بغيض كتشوف فشلدية وقالت
.مارسات الرذيلة مع عبد من العبيد
حلات روح الندى عينيها وتخلعات وقالت
شنووو؟ كيفاش؟
زاد بكا روح الندى وتحنات قالت ليها شنو درتي؟؟؟ اشنو
هزات يدها عطاتها واحد الطرشة حتى تلاحت للجنب وناضت وقفات قالت ليهم جيبو ليا هاد العبد هادا لهنا
بصيرة : مابغاتش تقول شكون العبد الاللة
زفرات روح الندى من مناخرها وقالت
شكون هاد العبد اللي عاشرك؟ هضريي
ردت شادية وفمها كيترعد وخدها حمر وقالت : ماشي هنا الاللة .. فقلعة تاروادانت
زيرات روح الندى على يديها بغضب وقالت
عرفتي كن ماكنت عارفة ببرودة الضس اللي فالحبس وسوط الحلاد كن هبطتك ليه يجلدك .
بلعات روخ الندى ريقها ونسات روحها ملكة ورجمعات راسها بالزربة خافت يعيقو بماضيها اللي شحال من مرة كيطيح فلسانها وكتقرب تفضح راسها براسها بلا متنتابه
بصيرة : ختارينا ختها عويشة .. وهي غنجريو عليها من القصر
دورات روح الندى عينيها من جديد كتقلب على سبب مقنع باش مايبانش انها كتمارس طقوس وخصها تبقا مثالية قدام الجميع فالقصر وقالت
خليها .. منعو عليها الماكلة يوماين حتى تتربى على فعلتها ..ولاكن ماتجريوش عليها من القصر .. انا اللي جبتها من القلعة وماتعطينيش خاطري نخرجها فبلاد مكتعرف فيها حتى واحد
ابتسمت بصيرة وقالت حادرة راسها : ديما كتبهرينا بطيبة قلبك الاللة ..اللع يخليك لينا تاج فوق راسنا والدرع الحامي لينا
جرات بصيرة شادية خرجاتها كتشهق وداتها لاحتها فالبيت اللي كتبات فيه هي وختها وسدات عليها تما وخلاتها كتبكي فواحد الركنة بوحدها
تحبسات شادية لا ماكلة لاشراب ..اما بصيرة رجعات للعزلة وعويشة غطير بالفرحة وختارت الوجوه الزينة والباقي داهم عابد وخلا ليها الشهدة على ختها ..ستفاتهم وحدة وحدة فواحد البهو والخادمات فجنابها بلباس موحد وتسريحة وحدة ..هزات راسها وقالت
حيدو ليهم حوايجهم
شدات عويشة حوايجها عندها كتمتم ووحدة من الخدم كتفسخ ليها الخيوط وشافت كلشي تعرا كما تخلقو وسكتات سمحات ليهم عراوها وبداو كيشوفو المفاتن واش صافية ونضيفة ..واللي لقاو فيها شي عيب او او حروق او طبعك او ناقصك فمافتنها كيبعدوها حتى نقاوهم وانتهت المرحلة الاولى ودازو للمرحلة الثانية .. كان عدد الحريم كيفوق الربعين لاكن فاش عرضوهم على الحكيمة صبح عددهم عشرين بنت بكر فقط ، وبدا الفصل الاخير من التجهيز فاليوم الثالت اللي كانت فيه شادية سخفانة فجناحها وعاد عفا عليها الله وفتحو عليها الباب ولنتهت عقوبها وحطو ليها تاكل واخا ماقادراش تهد يدها ..كانو اثنائها فهاد الوقت البنات فالحمام بشكل منضم ..غسلو وتعطرو ولبسو لباس واحد موحد خفيف بحال النوم فالابيض ودازو لتنشيف الشعر وقص الاطراف وتقليم الادافر ومراقبة النضافة حتى صبحو جاهزين مية فالمية ويليقو بمقام الامير عاد خداوهم فصفوف منتضمة فصمت و الخادمات فالجوانب بانتضام حتى لباب العمبر الكبير ..وهنا تحلو ابواب الجنة ليهم فهاد القصر وضرباتهم ريحة العنبر ولعطور الناعمة ودخلو هازين عيونهم كيشوفو فروعة المكان ..عياو يتخيلو لاكن بحال اللي شافوه عمرو طاح ليهم فراسهم .. السقف العالي المنقوش والستائر نازلة منو والنعومة حسو بيها قبل مايلمسو الاسرة والفراش.
وقفو الخادمات بانتضام قادو كل وحدة لمكانها الخاص بيها وخلاو بين كل جوج سرير فارغ نضرا لكثرة الاسرة وكبر العمبر.. وقفات بصيرة هازة راسها وكتشوف فيهم وقالت بصرامة
وقفو بانتضام يالاه
وقفو كل وحدة حدا سريرها خافيين الضحكة والسعادة وحادرين الراس ، دورات بصيرة عينيها شافت فيهم وقالت
العمبر عندو خاص ..واللي خالفات النضام غتخرج وعمرها تحلم ترجع ليه .. الحوايج اللي كتشوفو قدامكم مطويين هادا هوا الزي ديالكم الصباحي اللي غتلبسو باش تمشيو لواحة الادب ..غتتعلمو الرقة واللباقة والكلام بالطريقة اللي تليق بالقصر . وحدا الفراش فوق الارض غتلقاو النعال اللي تلبسو وسط العمبر ..وممنوع على شي وحدة تخرج بداك النعال خارج العمبر .. غتنعسو فوقت واحد ..وغير تسمعو بحال هاد الصوت
شارت بيدها لوحدة من الخادمات اللي هادة جرس فيدها نحاسي وحركاتو وكملات بصيرة كلامها وقالت
تسمعو هاد الصوت تفيقو وتنوضو وطويو فراشكم بالطريقة والحركات اللي غنوريكم دابا . ومن بعد منها مباشرة تلبسو النعال ..واللي فهاد الصف غادي يعاون اللي فهاد الصف يلبس ..من بعدها اللي فهاد الصف اللي لبس غيعاون الصف اللي عاونو يلبس .. وبانتضام وفحركة وحدة وفصمت ..من بعد غتمشي فصف واحد مور واحد لهاد الطبلة الطويلة اللي فراس العمبر وتجلسو تفطرو .. عندكم المخاد فالارض وممنوع شي وحدة تجلس منها للارض فوق الزربية .. وكل جوج يجلسو مقابلين ..ممنوع يبقا المكان المقابل فارغ . من بعد فاش تساليو غديرو الصف هنا حدا الباب حيت غتلقاونا واجدين باش تمشيو تضفو فمكم وحالتكم وتمشيو لحصة الادب مباشرة . يالاه كلشي ينتابه لطريقة طي الفراش ويحفظ الحركات .
علماتهم بصيرة كيفاش يطويو الفراش ووقفات سارت بيدها وقالت ..يالاه كل وحدة على فراشها
دخلو ففراشهم فرحانين كيفركلو وبداو الخادمات كيدورو على العنبر بانتضام ويطفيو الشموع وخرجو مثنى مثنى وتسدات ابواب العمبر
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
