انا يمامة مشات مع بصيرة جهزاتها ورتباتها ولبساتها من الاتواب اللي وصلات جديدة
ورسلوها لجناح السلطان .
دخلات لابسة الثليجة فالبيج بسفيفة مخزانية محلولة من جنابها وتحتية من لحرير باج محلولة حتى للركبة وخيط الريح ودفيرة فالجنب ودخلات عندو حادرة راسهاحتى شار ليها بيدو وهوا واقف مشات عندو غضبانة منو مكضحك مكتبسم ..شد ليها فيدها داها معاه للشرفة وجلسها وجلس مقابل معاها متكي على يدو وقال
جبت ليك واحد الضيف عزيز على قلبك
شافت فيه بعيونها المكحلة الفاتنة وقالت ليه ضيف ليا انا امولاي؟
هز يدو سفق وفالبلاصة تحل الباب ودخلات المعلمة حادرة راسها ..ضارت يمامة تشوف شكون وتصدمات بقات كتشوف فيها وترمش ودورتت وجهها هبطات راسها رجعات حمرا ..شار السلطان بيدو للمعلم وهوا كيشوف فسبأ بنصف عين جلسها معاهم وقاليها
انا معجب بأدب يمامة القصر.. وفصاحة لسانها وتنضيم كلامها ..فاش شكراتك ليا وقالت لي مدى حبها ليك امرت باش يجيبوك وتشاركيها تنضيم الكلام فشي حكاية تكون معتبرة هاد الليلة
بقات يمامة قارمة والمعلمة مصدومة ..دورات راسها شافت فيها بنص عين وبدات كدور فراسها وقالت بهمس
من امتى وليتي تحماقي عليا ونتي شيبتيني قبل منولد
سمعها السلطان واخا همسات وحول عينيو شاف جنب وضحك .. تلفتات ليه المعلمة بادب حتدرة راسها قالت ليه شنو بغيتي تسمع امولاي
قاليها ختاري لي من جعبتك ..شي حكاية كتشبه ليمامة القصر
دورات عينيها المعلمة شافت فيها وقالت ليها بابتسامة ..نحكيو قصة بنت السلطان سليطة اللسان وخفيفة الرجل صمكة الودان ؟دار السلطان يدو على فكو قاليها هاديك نيت باينة من عنوانها
تبسمات المعلمة وقالت ليه غنحكيوها ليك امولاي بحال الى حضرتي ليها بأم عينك
بسم الاسم الاحد الواحد الرحمان ..نبدا كلامي ونقسم القسام فزمان قريب من هادالزمان ..زمان مثل زمانا قريب القرب من هاد المكان ..ماشي بعيد وفقصر المولى السلطان .. سلطان همة وشان ..سيف دو حدين عندو ربع صبيان ..وبنية بحال الشمس فضو النهار ..وبحال القمرة فعز الليل.. اللي شافها يختارها من بين جميع الحريم .. ولاكن امولاي حتى زين ماخطاتر لولا..وقد ماكثر الزين كترات البلوى ..كانت هاد الزينة المسرارة ماتحشم ماتستحيى .. نقمة تقول ماشي نعمة
شافت فينامة وخيبات سيفتها وكملات ليه وقالت
قليلة الترابي وكلامها كيقبط القليب ويجيب الغمة ..الاطيف الله يحضر السلامة ..ماتخلي مياه الله دور ماتخلي قطرة تنزل من السما.. نهار ومطال وهي تنكر وعندها الخدم بحال البهيمة
عقد حجبانو قاليها يالاطيف ياستار ..اش قضات بداك الزين المسرار وهي لسانها قصيف مشرار
تنهدات يمامة ربعات يدها كتشوف فالجنب والمعلمة كتكمل
ماقضات بيه والو ..غير من مصيبة لمصيبة ولا بغات تزوج ولا بغات تكون منها الفايدة..خطبوها شلا رجال مال وجاه وقلدك كيفهم كيف الجبال ..لاكن هي كان ولابد تخرج فيهم العيب وتشتم خلقة ربي ..ماخلات ماقلت فالطويل وماقصراتش مع القصير..اما الرقيق ولغليض ماخلات للخياط اش يقول.هادا راسو رقيق هادا فمو كبير ..هادا عينيو حولة هادا نيفو طويل
ضحك وشاف فيمامة قال
انفه أنفت منه الانوف..هوا في بيته يصلي وانفه في مكة يطوف
دخلات فهاد الاثناء بصيرة على العمبر على غفلة حصلات البنات ضايرين بسرير شادية ..مشات نيشان عندهم قصداتهم وضوات القنديل الوسطاني الكبير كتفقد الامر وقالت ليهم
اشنو وتقع هنا ياك لاباس
ناضو بعض البنات من النوم كيحلو عينيهم بزز ومنهم شادية اللي هزات راسها لقات العقدة دالعكسة اللي على راسها محلولة وقالت كتحك عينها
شنو واقع
خباو البنات السكين بالزربة وراهم لاكن من الخلعة طاح فالارض وتحنات بصيرة هزاتو مصدومة كتشوف فيه وقالت ليهم شنو كيدير عندكم هادا ؟؟
وقفات شادية كتشوف مخلوعة ويدات تقلب جنابها وراسها لقات العكسة اللي دايرة محلولة وطلقات شعرها مخلوعة قلباتو لقات صحة سلام وفكاتها العكسة اللي بزيف حياتي واللي مولفة ديرها مللي كانت فقبيلتها ..رجعات جمعات العكسة فرمشت عين ربطاتها فوق راسها وقالت ليهم بغيتو تقطعو ليا شعري ابنات الحرام
طلات عليهم سمر من تحت الفراش كتفرج ورجعات نعسات كانها ماشي هي اللي عطاتهم الفكرة وخلاتهم يعومو بحرهم ..تعصبات بصيرة وجمعاتهم خرجاتهم كتحلف فيهم وخلات شادية مخلوعك وطفات الضوء غوتات على كلشي طيحاتو ينعس وحلفات الى لقات شي وخدة مطرطقك عينها تفعها ليها
تنصص الليل فجناح الاصيل وبقات غير يمامة جالسة ساهية فالسما والنجوم كتكمل ليه الحكاية من بعد ما سمح للمعلمة تمشي تنعس..بقا متكي على رجل يمامة اللي جالسة متكية على وسايد فالشرف براسها وكتشوف فالنجوم وكتحك ليه فراسو وتلعب ليه فشعرو وقالت
المسكينة بقات الله كريم .. لاحنين لارحيم ..تعلمات من الدنيا ما يكفيها لباقي السنين ..
تهندات بعمق وقالت ختمات حكايتها يمامة ..وحلقات فالسما من حمامة لحمامة
تفوهات وهزات راسها التقيل طلات عليه بات ليه رخا رجلو الواقفة مع واحد المخدة فالجنب وطوا لخرى تحت لخرى وسد عينيه.. رمشات بتتاقل تبسمات كدوز صبعانها على وجهه وتمررها على لحيتو بشوية حتى وصلاتها لفمو ورجعات مرراتها على حواجبه وعيونو الكحلة كتمتع عينيها بداك الزين العربي على راحتها ودوزات يدها على شعرو وخلات ليه راسو كما هوا على حجرها وتكات براسها على الوسايد الكبار اللي حاطة بينها وبين الجدار نعسات رخات يدها اللي لقات راحتها على هضاب صدرو
بجمال عينيكِ وبلونهم العسلي الرائع، أرى أنوار السماء فاعذريني إن أطلتا لنظر إليهما، فأنا من هنا أُعلن استسلامي وأطلب المكوث على بابك، حتى أغفو على سحرهما .
فتحت عيونها وبرق زجاجهما العسلي المحيط بدائرة سوداء ونقطة كلون الشامة السوداء في وسطهما ..رموش تفتح كالازهار في صبيحة اليوم التالي على اشعة الشمس الصباحية..جو بارد هادئ ونسمة الصباح تدغدغ انفها الصغير حتى عطست .. ورفعت راسها لقات نفسها بين وسايد كبيرة وعليها غطائه اللي كان ملقى فوق السرير..صححات بصرها واسترجعت ذاكرتها وتلفتات يمين وشمال كتقلب على السلطان اللي بات راسو على حجرها ليلة امس.. لاكن واضح انها وحدها فجناحه الهادئ ولا من يزنرن ودانها ويطير صباحها ..ما احلاها نومة احسن من نوماتها السابقة .. وما احلاه مكان بنسمة عطره الفايحة ..ناضت هزات الغطا رجعاتو بلاصتو سرحاتو وهزات يديها على شعرها قاداتو وخرجات من جناحه خلاتو.
رجعات للعمبر لقاتو خاوي من البنات وتفكرات ان اليوم عندهم درس فالتربية والاخلاق وكيبداه مع بداية شروق الشمس.
هادا صباح اللي مابحالو صباح فجناح السلطان ..ولاكن نفس الصباح كان بلون مكره فجناح روح الندى.. صبحات جالسة كتشوف فالمرايا والوصيفة كتسرح ليها شعرها.. وهي شاردة كتخمم وتقول
وا ها الثلت الايام كملات .. والمهلة القصيرة تقاضات ..
وشنو الحل وشنوالمعمول
والاصيل عليها معول ليوم ..
وصلها مرسولو قراتو
كاتب ليها موعد فالرياض لقاتو
لوات الرسالة ولعبدية عطاتو
وفرياض الهم قابلاتو
واقف كيتسناها لقاتو
وبصوت ضعيف جاوباتو
المهلة اللي عطيتيني كتسالي مع المغرب ..هاكا تكون الثلت ايام كملات
ربع يديه قاليها وراسه مرفوع شافيها
المهلة بدات من الساعة فاش تلاقينا .. وهادي نفس الساعة الاللة روح الندى
دابا اللي نطولوه نقصروه وهاد لعب الدراري نحدوه ..الولد كبر رجل وفلحيتو النسا كتعتر ..قريب يرجع اب وباه حداه مكيعرفش.. دابا وصلنا للنهاية اروح الندى .. يعرف مني ولا منك ..ختاري بنفسك اللي يسلكك
CITEȘTI
ذو التيجان 👑مكتملة👑
Dragoste💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
