جمعات شادية النفس وقالت رافعة راسها وعيني عينك فلاللة روح الندى
شرطي نتزوج بالامير
حلات روح الندى عينيها مصدومة وقالت : شنوووو؟؟؟ لا نتي تسطيتي نيشان .. تزوجي ؟؟ وبالامييير !
ردت شادية باصرار وقالت : تقدري ديري اي حاجة وهادي اسهل حاجة عندك ..
ضربات روح الندى بيدها على الطبلة وقالت : انااا مستحيل نزوج ولدي الوحيد ليك نتي..يا السحارة
تصدمات شادية فاش عرفاتو ولدها لاكن بقات كتسائل واش كتعني ولدها ولدها يعني والداه من كرشها ولا ولدها حيت رباتو ! ركزات فالاهم وخلات عليها التحليلات الخاوية وقالت
ماشي مشكل الاللة .. ولاكن ودعي ولدك فهاد الحرب
هبطات شادية راسها باحترام ورجعات اللور بغات تمشي لاكن تلفتات روخ الندى وراها وهي فحالك ماكتسمحش ليها تعاند معاها وقالت
وقفي.. وقفي .. انا قابلة هاد الشرط
وقفات شادية وقالت : تزوجيني قبل نانشوف ليك.. وقبل ما تفكي هاد العصيدة
ردت روح الندى بغضب وقالت : انا قلت ليك غنزوجك .. ونتي كتشوفي الخالة دابا و اجراس الحرب كتطرق ..انا ماشي فالزواج وحتى الامير مكاينش
ردت شادية وقالت: زوجيني الامير غيابيا ونتي توكليه .. هاكا تزوجات مي فاش مشا با للقافلة وتعطل حولين كاملين . حتى نتي تقدري تزوجيني الامير وهوا غايب .
زيرات روح الندى على سنانها وجرات عليها من البيت وبقات بوحدها غتفرقع وتهضر .. عيطات على ذو الفقار دخل كيجري عندها ووقفات قالت ليه سير دابا تسارا فالمدينة .. شوف ليا شي شوافة وجيبها ليا فالحين .. ولابد يكون شي واحد من غير هاد بنت الحرام .. غير بلاتي . ولا عليك اشادية غير حتى نتوالاك ونوريك .. غير بلاتي عليك
خرج دو الفقار خلاها كتاكل جنابها ومشا كيجمع ليها فالشوافات ديال المدينة كلها ..داما شادية خرجات نيشان مشات لجناحها وجمعات كموستها وكاع اللي كتكسابو وتعلامو من ثواب الحرير والبروكار والذهب والفضة وكاع اللي جادت بيه لاللة روح الندى عليها .. واستعدت لأي هجوم او طرد او شي حاجة تقدر تصيبها .. حطاتها فالقنت مخبية ومشات نزلات للمطبخ كتقلب على ختها حتى لقاتها وخرجاتها من تما كتعتر فقفطانها الكحل وقنتاتها فواحد القنت وقالت
سمعي مزيان ايامنة .. غتمشي داابا للبيت ديالك وتجمعي شطايطك .. راه مي رسلات ليا مرسول باش نهربو من ااقصر ونمشيو لحقو عليها فواحد المدينة زوينة
حلات يامنة عينيها وقالت : بصااح !! مي باقا حية !! وناااري وا بي سبع رواح هاد مسعودة
شادية: داباا واش غتمشي معايا ولا غنريد ونخليك كضربي فتمارة فهاد القصر
دورات يامنة عينيها بحنابها وقالت : وعلاش ماتجيش مي تسكن معانا هانايا ؟ علاش نخرجو من هاد العز وهاد الخير ؟؟
تعصبات شادية وجراتها من كتقعا قالت ليها
زيدي تحركي جمعي رزمتك ولا غادي نجيب ليك مسعودة لهنا تشتف على يامك يالاه تحركي دفعاتها مشات يامنة كتنهق تجمع حوايجها ورجعات شادية للعمبر دخلات عليهم بحال الرعد وهما متكين كل وحدة فوق سريرها كضحك وجالسين كيدفرو لبعضياتهم . شافت هاكا وهاكا وبانت ليها عويشة جالسة فسريرها وغير شافتها ناضت وقفات مصدومة . قصداتها شادية هازة راسها وجراتها من يدها خرجاتها ولاحتها مع الحيط .. هزات عويشة صبعها مخرجة عينيها لاكن قبل متنطق ضرباتوليها شادية وقالت هادة صبعها
سمعي اديك الشيخة .. هادشي اللي نتي فيه قرب يسالي وغادي يتقلب ويتشقلب هاد القصر وغتمشي تتباعي للكفار بحال اي جارية .. ديري فبالك باللي حنا داخلين فحرب وخارجين منها خاسرين .. سمعتي .. سمعي شكنقول من فمي.. خارجين منها خاسرين .. والملكة روح الندى مغتبقاش حاكمة .. ايوا دابا نتي تعرفي اشنو ديري الى بغيتي تعتقي راسك ..اللهم اني قد بلغت. بسلامة عليك الخاوة دالقش
جمعات شادية الرزمة وتحزمات بيامنة ختها وباتت ماصبحات .. تلتمات وتسلتات بين الشجر جارة الهبيلة ديامنة وراها وكل وحدة حاملة رزمتها فنصاص الليل حتى خرجات من القصر وبعدات على المدينة وقصدات الواد الكبير اللي كيفصلبين روح الندى والاصيل وقطعاتو فالفلوكة ..لا عين شافت لا قلب وجع ..
ايوا وصبح الصباح وصبحو كاع الشوافات مصافات فصف واحد قدام روح الندى .. دارو النوبة كل مرة يقرب واحد ولا وحدة يشوف ليها لاكن حتى واحد ماطلع كلامو بحال كلام روح الندى .. كلهم غير الكدوب والبهتان .. ونيت لقاو روح الندى مغلغلة وحتى واحد ماجا ليها فالحرب اللي تعلنات عليها وبالفقصة بخات غضبعا عليهم كاملين وحبساتهم تحت القصر وجلسات شدات راسها كتبكي حتى عيات واستسلمات وهزات راسها شافت فعبدية وقالت باستسلام
جيبي ليا شادية
هبطات عبدية راسها مشات كتجري تجيبها لاكن صادفات عابد جاي كيقلب عليها ورقفها وقال لاللة عبدية .. يامنة المهبولة باتت ماصبحات .. هربات لينا من القصر
حلات عبدية عينيها تفكرات شادية ومشات كتجري حلات البيت لقاتو خاوي ومشات كتقلب بين الحوايج لقات غير الخزنة خاوية وخرجات كتجري عند روح الندى وتنهج سخفانة وقالت
لاللة لاللة … المتعوسة هربات من القصر هي وختها الهبيلة
وقفات روح الندى كتشوف فيها وقالت
كيفاش؟؟ شكون اللي هرب؟
بلعات عبدية ريقها خافت تقجها وقالت
شادية هربات من القصر
تصدمات روح الندى ودازت فيها وخرجات كتجري مشات لبيتها دخلات عليه كتقلب عليها وتقلب بين حوايجها وتلوح هما ولهيه ودور بلاصتها وشدات فراسها بغات طرطق وخرجات لبرا كتغوت تجمعو عليها كاع المشرفين دالقصر حادرين الراس .. ساطت فالاخضر واليابس كتغوت وتسرفق
روح الندى: اشنو هي خدمتكم ؟؟؟ شنو هي ؟؟ شنووووو الدور ديالكم فهاد القصر دالويل.. جوج بنات هربو وحتى واحد ماشاق ليهم الخبار .. شي هارب شي داخل وشي خارج ونتوما ناعسين .. ناعسين الكلاااب
بقات كتغوت ومابردات حتى سمعات صوت النفار كينفر من بعيد وهزات راسها كتسمع ..ج ا حارس كجري هبط راسو قاليها
لاللة مولاتي.. الملك محمد اصيل فالقصر لزيارة سيادتكم
خرجات عينيها قالت ليه
هاااا؟؟ حم مم محمو محمد المالييييك؟؟ اش جابو اش بغا هادا
رجعات كتجري وتعتر فالقفطان المدلي بلا حزام والشعر محلول تابعها وهربات لجناحها هازة يديها والوصيفات تابعينها من اللور
انا مكايناش.. اااانااا مكايناش ضايفوه فصالة الضيافة حتى يمشي بحالو.. انا خرجت مع الامير يور للنزاهة اصلا ماعلمنيش بالمجية ديالو .. صافي انا مكايناش
دخلات جناحها سدات عليها هي والوصيفات ورجعو الخدم والعبيد كيجريو يوجدو لاستقباله
خل الاصيل بخطوات بطيئة لصالة الضيافة كيسرح عينيه وبلا وفد بلا حرس.. غير حكيم اللي معاه وبقا واقف برا طالق عينيه وكيشوف احوال القصر والجو كي داير تقدم كيتمشى والعبيد تابعينو حانيين الراس ويرحبو بيه قاليه عابد اسمر اللون
مولاي.. سمح لينا على هاد الاستقبال.. لاللة مولاتي خرجات للزناهة مع سمو الامير
حرك الملك راسو وقال كيتأمل فزخرفة السقف
واخا قوليها انا غنتسناك هنا حتى ترجعي من النزاهة
حدر عاقد راسو وقال
هي اللولة امولاي
مشا عابد كيجري ودور الاصيل عينو ورا ضهر ضحك بسخرية ومشا جهة واحد الخزانة ديال الكتب وبدا كيقرا العناوين ولفت انتباه كتاب مكتوب على عنوانه كن حاكما فقيرا
هزو وجلس كيقرا بعض الاسطر في حين دخل عابد كيجري عند لاللة روح الندى بقاها قدام المراية لابسة تكشيطة من الثليحة حمرا وكتلبس الحوالق فودنيها ومصاوبة مشطة لشعرها وكتزرب باش تلبس حلتها الملكية
عابد: لاللة مولاتي.. قلت ليه مشيتي للنزاهة مع سمو الامير .. وقالي غادي نتسناها حتى ترجع تلفتات شافت فيه كتنفخ قالت ليه اويلي واش هادا مسالي ماعندو شغل ؟ سير عيط ليا على ذو الفقار يحضر عندي فالحين
نزل عابد كيجري حضرو ليها قدامها وقالت ليه شير جيب ليا شادية فين ما كانت ..كانت فالسما هبطها ..كانت فالارض طلعها
خرج ينفد الاوامر ويالاه خرج دخلات عبدية عندها هازة ورقة فيدها وقالت
لاللة مولاتي .. هاد الورقة لقيتها فبيت شادية.. واقيلا خلاتها ليك
طارت روك الندى على الورقة شافتها لقات فيها رسالة عبارة عن رسم لان شادية مكتعرفش تكتب .. بقات روح الندى كتحقق فالرسم وشنو كيعني .. بان ليها بحال شكل قبر وعليه سهم وحداه اشاب على راسو تاج كيعني انه الامير يور .. وفوقو القمرة والشمس .. وكبها الخوف من الرسم وقدات كترعد ووقفات مصدومة والورقة فيدها ولسانها تقيل .. ماقدراتش تفرز المقصود من ديك الرسمة ويالاه هزات راسها بغات تهضر دخل على جناحها الملك محمد اصيل وجات عينو فعينها خلاها مصمرة كتشوف فيه ولسانها مربوط وقال
كي دازت النزاهة الاللة روخ الندى
رمشات وعاودات كتستوعب وشارت بيدها للجميع يغادرو الجناح من قعد ما كملو ليها اللباس وقالت كتشوف فيه مصدومة
شكون سمح ليك دخل عليا هاكا لجناحي بلا اذن ؟
دور عينو فروعة الجناح وفخامته وقال
مانزلتيش للصالة قلت نطلع عندك نشوفك
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
