ضارو الخدم بشادية دورةالزمان مللي كيتقلب ..قلبوها سفاها على علاها ..حمموها ورطبوها وبالزينة زينوها والحرير لبسوها ولمولاي السلطان مع العشا قدموها .
دخلات عبدية هي اللولة لجناحو لقاتو منغم وبالشمع مضوي ومن يمامة جالس كيتعشى .. تلفتات شافت فيها هي فالخضر جوهرة جالسة وشعرها المتموج جنبها ومزينة ومريحة وشقة صدرها معرية..
تبسمات بزز منها وقالت ليه مولاي..جاتك هدية
استغربش شافيها وكان بحال لعريس فديك الليلة فلباس بلدي شفاف كحل ووجه مبشور واضح عليه الراحة والانس مع يمامة .شد الورقة فيدو فتحها لقا فيها تنازل على وصيفتها بالاسم والوصف وتقديمها ليه هدية ..تصدم بقا شاد الوقة كيشوف قدامو وهز راسو شاف فيمامة اللي جالسة قدامو بحال الحمامة ورجع تلفت شاف فعبدية شار ليها بيدو دخلها ومشات خرجات شارت بيدها لشادية اللي واقفة برا تقدمات برجلها اليمنية لابسة بلغة فالاحمر وخلخال فالرجل والقفطان احمر موبرة بالفتحة لوسط حتى للركبة وطالع بسفيفة وزواق المعلم عتى لفتحة الصدر وكمامو واسعة مخزنية ، الشعر ازعر مدرج حتى للخصر والفرقة لسوط مزينة بحجر فالاحمر ..لحجان عراض ولعينين كبار مجبدة مكحلة بالكحل والشفار طالع كتتغزل بالحاجب..لخدود موردة والحيا والحشمة عليها منتصر . دخلات حاذرة راسها وجهها احمر كيقطر ويمامة قدامها كتشوف فيها وتتمنضر!! اش هاد الصدفة اللي جمعات مولات الدار بالهاربة من القصر؟!..
اما السلطان بقا فمكانو هاز فيها عينو ماتعرفو مستغرب ولا منباهر .
تنهد تنهيدة اعمق من البير وقاليها
اجي اشادية..جلسي
هزات عينيها وصدرها من الحشمة كينفاجر ..وزادت كملات الباهية وتلاقات الصدمة مع الحشمة فاش شافت يمامة جالسة بحال عروسة البحر حدا الطبلة والزين منها منتاشر. مافهمات شادية شنو كيوقع وتقدمات كتشوف فيمامة والاخرى حتى هي بغيض غيرة قلبات وجها مابغات تشوف فيها لاكن عينيها غلبوها وبقاو متبعينها حتى جلسات جنبهم على مخدة مهبطة عينها وكتشوف فجنابها ماحيلتها للسلطان غطق منو بالحيا ولا ليمامة اللي جاتها منها الغيرة وكتحس براسها غير مرحب بيها فحضرة يمامة .تلفت السلطان شاف فشادية قاليها شنو كتعرفي ديري من غيري قراية الكف
تلفات شادية هزات راسها شافت فيه قالت ليه انا ماقريت كتوب ما كتبت فلواح..
تنهدات يمامة وتلفتات هازة خنافرهت مبسمة وقالت ليه مبسمة
نخوي ليك شي كاس دتاي منعنع ينعنع ليك الجو امولاي
تلفت شاف فيها وضحك قاليها خوي ليا..وخوي حتى لشادية حتى هي
رجع وجه يمامة احمر وتحجرو خدودها ..خوات ليه كاس وحطات البراد ماخواتش لشادية اللي كانت كتشوفيها وعجبها الحال فاش شافت عروق عنقها بانو وقالت ليها حتى انا خوي ليا اسبأ
فالبلاصة هزات فيها سبأ عينها مبسمة وحاجيها مبرفوع وقالت ليها يمامة ..ماشي سبأ.. سماني مولاي يمامة
تلفت ليها قاليها كملي فين خلينا الحكاية ايمامة ..
كحزات جنبو نغزة قاليت ليه خليناها فاش سلمات روحية على راجلها اللي رجع من السفر ..
تكا على ضهرو لاح يدو على لوسايد وهما فجلسة فالشرفة فالهواء الطلق وقال
وجاب ليها معاه خادم بالسم كتقطر
قالت ليه بالسم كتقطر وفجلايلها كتعتر..عطاوها ليه بطاطة برطل ماجابت لمولاها حتى ثمن السطل ..
قاليها لولا الرهان اللي كان بين التجار مكانش ياخدها التاجر ويعطي مكانها حمار
ضحكات يمامة وقالت ليه التاجر اللول مولاها .. مشاف منها لا فرح لا قرح لا نزاهة ..قال اجي نتفك منهاد الخطية ندير بيها رهان بين الصحاب ..وك ولاكن من سخاء التاجر العطار ..خداها وجاد عليه بداك الحمار .. ولاكن امولاي.. صحبة القش طلع حتى هوا غدار ..هدا الخادم كتقطر السم بالقنطار ..وعطاه مكانها حمار عما ركابيه خاويين مايهز خضرة مايرصل سخرة للدار .
ضحك قاليها مرتو اللي عطاتو رزقها باش يجيب السلعة جاب ليها بلاصتها خادم مسوسة مايكر فيها لا خير لا عشرة طيبة
قالت ليه شادية مستغربةعلاش كيهضرو ..
الغدر كيجي حتى من الخوت بقات غير فالصحاب ولا راجل مع مولات الدار
كملات يمامة بتعاويدها ولسانها الحلو ورقتها فالكلام وصوتها الغذب وقالت
مولات الدار تستاهل..وحتى التاجر العطار اللي كان كيبان ولد الناس..طمع امولاي والطمع طيحو فديك الخويدم اللي صفاتها ليهم بجوج فاللخر
هز عينو كيضحك قاليها كاع اللي سعاو ورا ديك الثروة خلاوها وتوسدو الحجر فالقبر..
تنهدات يمامة قالت ليه هادي كمالت الحكاية امولاي.. خود منها اللي ينفعك فحياتك اليومية وخلي بالباقي ليا نطوي بين الاوراق المنسية
تنهد بعمق قاليها بداي لينا شي وحدة تنسينا فهم التاجر اللي هزينا
تبسمات وقالت ليه غنقول ليك واحد الشعر نضمتو ليك بالخصوص ..مناقص حرف ما من الشدة والضمة مخصوص ..
هداني ليك الاصيل السلطان .. ودرتي فهديتك اجمل مكان ..
ماهداني بحالك هدية انسان
وماختاريت من بين الرجال غير وجهك الفتان ..
يوم كانت فالسوق عليا الاعيان ..
كنتي من دونهم اطيب انسان ..قريب لي وسندي فهاد الزمان ..
ماحبيت غيرك انسان
تشوفك العين ترجف الابدان
ما حبيتك غيرك انسان
هزات كتفها فرحانة كتشوف فيه وتبسم شد ليها فيدها زير عليها وتلفت شاف فشادية اللي كانت غتموت فبلاصتها بالغيرة ولاح يدو ورا ضهرها قاليها شادية يا شادية ..ياللي بنورك الشموع ضاوية ..مالكي ساكتة وراسك حانية
بقات شادية ساكتة قالت ليه انا غير بنت القبيلة مانعرف نضم كلام ولا بيدي حيلة
قاليها وكتعرفي تقراي لكفوف..واقولي ليا شنو شفتي فكف السلطانة روح الندى
سلات يمامة من يدو يدها وقالت ليه نمشي خوي هاد الكاس برد امولاي
هزات كاسها داتاي دخلات بيه لحمامو وسرات عليها باب الخشب وتزيرات تما حتى بغات تموت وبدات كترعد وتبكي وشادة الكاس فيدها ..بكات حتى نشفو عينيها ورجعو حومر وشوطات بحال الراس دالعي د الكبير في حين كان جالس السلطان مع شادية كيشوف فيها وقاليها كي دايرة حياتك فالقصر مزيانة؟
حركات ليه راسو قالت ليه الحمد لله
مسح على ضهرها قاليها وخواتاك مزيانين
حركات ليه راسها قالت ليه الحمد لله هاد الساعة ماناقصنا خير امولاي..غير ترضا علينا وصافي
تبسم وقاليها من غدا بداي تعلمي تكتبي وتقراي وتحفضي القرآن ..
خرجات اثنائها يمامة من الحمام شادة الكاس ولاكن وجهها باين عليه كانت كتبكي واخا عيات تخفي وتقدمات بابتسامة جلسات حنبو سمعاتو كيهضر على تعليم شادية وهبطات راسها خوات ليها الماء شربات ويدها كترعد وعينها عليهم .. بقات كتشرب وهزات حبة دالعنب كتشوف فيهم وبلعاتها بلا متشعر حتى دارت ليها مع قصبة الهوا ووقفات ليها وخرجو عينيها وحلات فمها مخنوقة .. تلفت شافها مهبطة راسها مخنوقة وكتحاول تنفس وهز ليها راسها لقا عينيها حومر ووجهها احمر وناض يفكها وشادية مخلوعة كتشوف فيها وتقول دابا والروح خرجاتها..ضرب ليها السلطان ضهرهاومابغاتش الحبة تخرج وطاحت فوق الزربية كأنها كتموت وعينيها كيدمعو ..تخلع شافها قريبة تودع ونوضها وقف وراها ضمها بقوة لصدو من صدرها وبرك عليها ثلاتة دالمرات عصرها حتى طارت الحبة جات قدامو وسخفات ليه فيدو هزها نيشان كيجر شعرها مع الارض حطها على سريرو وقال لشادية تعيط على العبيد والخدم ..مشات كتفتف مخلوعة حلات الباب عند العبيد اللي واقفين تما دخلو كيجريو وعيطو لعبيدة جات كطير لقاوها سخفانة وشمو ليها مسحوق قوي باش ترجع تفيق ..حلات عينيها المقلوبين شافت فيهم لقات كولشي ضاير بيها وعتقوها بالماء حتى رجعات الوعي ديالها وناض السلطان من حداها قاليهم ديوها لسريرها ترتاح ..وخليو معاها شي واحد يرد ليها البال
نوضوها وقفوها شادين فيديها بغاو يخرجوها وتلفتات شافت شادية وراها مزالة واقفة وقالت ليهم بصوت متعب
انا مزيانة ..صافي غير خليوني
قالت ليها عبدية ماشي لخاطرك الحبيبة ..خصك تمشي تنعسي
نترات يديها قالت ليهم لا مولاي باغي يسمع حكاية جديدة
تلفت ليها فاش سمع شنو قالت وتقدم وقف قدامها مسح على وجها الدموع اللي نازلة وقاليها سيري ترتاحي حتى لغدا ..مزال ايام الله طويلة
بقات كتشوف فيه وترمش ووجهها كيتزير وخرجوها كتشوف وراها وسدو الباب
YOU ARE READING
ذو التيجان 👑مكتملة👑
Romance💎مكتملة💎 🤎🤎 الجزء الثاني من قصة عروس الملك السابعة 🤎🤎 ما ذا التقاطعُ في الإسلامِ بينكمُ وأنتمُ يا عبادَ الله إخوانُ ألا نفوسٌ أبيَّاتٌ لها هممٌ أما على الخيرِ أنصارٌ وأعوانُ يا مَنْ لذلةِ قومٍ بعدَ عزَّتِهِم أحالَ حالهُمُ كفرٌ وطُغيانُ بالأمسِ...
