مجموعه قصصيه (هل فات الأوان؟ )

عقاب مؤجل

_ يابت قومي اطلعي قابلي خطيب أختك متبقيش قليلة الذوق!
_قولتلك ميت مرة البني آدم ده مش برتاحله بيبصلي بنظرات مش كويسة وانا ساكتة بس عشان اختي، لكن تطلبي مني اقابله واطلع اسلم عليه مش هيحصل..وبعدين هو جاي لخطيبته أنا مالي!..

_يابنتي سأل عليكِ، بعدين أنا شيفاكِ ظالمة الراجل هو تعامله معاكِ عادي وعيب بقى الكلام الي بتقوليه ده..

خبطت قدمها في الأرض بقوة قبل أن تقول بغيظ :

_  انا الي عيب!، أصلاً عارفة انكوا مش هتصدقوني.. حاضر يا ماما هطلع وهسلم على ال.... على خطيب أختي.

رددت الأخيرة باقتضاب وابتسامة ساخرة قبل أن تنهض محاولة كظم غيظها وارتدت خفها المنزلي متجهة للخارج.

كان يجلس مع شقيقتها يتبادلان الحديث حين خرجت هي بخطى بطيئة متكاسلة تدل على عدم رغبتها في الخروج اساسًا ولكنها بالأخير فعلت!.

رفع رأسه لتقع عيناه عليها.. ها هي خرجت بعد اقناع والدتها كالمعتاد.. مرر بصره عليها وهو يرى ثيابها السوداء.. انها تتعمد ارتدائها أمامه كي تخفي جسدها! وكأنه لا يعرف تفاصيله!!.

_ مساء الخير.

رددتها من بين اسنانها بغيظ ليقف مادًا كفه لها وهو يقول :

_ مساء النور.. ازيك يا ريري.

_ ريهام.. مش ريري.

رددتها بابتسامة ماقته له قبل ان تضع كفها في كفه لوجود شقيقتها ولم يتعدى الأمر اقل من ثانية وكانت تسحب كفها بمقت شديد له.

جلست بصمت تتابع الأحاديث الدائرة بعدم اهتمام حتى نهضت شقيقتها لترتدي ثيابها فهي على موعد معه للخروج وقامت والدتها لتصنع له كوبًا من الشاي كما طلب بتهذيب لا يليق بهِ..

تأكد من خلو المكان حولهما ليقترب في جلسته منها وهو يردد بابتسامة :

_ هتفضلي مش طيقاني كتير!، الي يشوفك دلوقتي ميشوفكيش زمان لما كنتِ بتتلهفي شوفتي.

توحشت نظراتها وهي تقترب برأسها منه :

- ورحمة ابويا مهخليك تنفذ الي في بالك...إلا على جثتي.

ابتسم ببرود وهو يقول :

_ وهو ايه الي انا عاوز اعمله؟ اني اتجوز اختك؟ هي دي بقت جريمة؟

اجابته بأعين مشتعله :

_ مش هسيبها تقع مع واحد *** زيك.

اراح ظهره باسترخاء وهو يقول:

_ متنسيش ان ال *** ده كنتِ بتدوبي فيه دوب ومستعده تعملي اي حاجه عشان بس يبقى راضي عنك!..

#حكاية_جديدة
#عقاب_مؤجل