بقايا شغف

تصعيد

ما كملت الكلمة بعدني مددت بالكاع ونازل بيه ضرب شكد ما حسيت بذل بوقتها ما كدرت امنع نفسي ما اشيل ايدي وادافع عن نفسي نزلني مثل المخبل جابني للمطبخ غصب يم الجدورة وكلبهن بالكاع ويعيط بهستيريا ويضرب بيه واني اتناوش شيجي بايدي واشمره عليه جام الكاونتر الملحق  تكوم بالكاع كله واني امشي فوكاه حجاب ماكو دشداشتي من يم كتفي مشكوكه ومجلبة بيها بايدي وادافع بايد ثانية ... اخوه لكفني من ايده مخبل حطني وراه امه تعيط وتلطم وخواته بيناتنا حتى هنه هم اذاهن حطيت راسي على كتف اخوه من ختلني وراه وبجيت بضعف كامل اخوه هواي احسن منه ودائما من يجينا كلمته طيبة هو وزوجته احبهم ما يقبلون على حجي عمتي ابد ....

جرني بغرفة امه خلاني وراحوا هذاك ما بطل عياط وعنترة عليه ....فات ابوهم وابنه واجا ابنهم الثاني والظاهر نسابتهم منسحبين اول ما بدت المشكلة اني لفيت نفسي بحجاب امه مالت الصلاة

ابوهم كعد ويحاجيني بكل هدوء واني مستحية منهم ومستغربة وساكتة مصدومة حيل ومريضة بافكاري وصحتي ....بالاخير كامل تقرب يمي من شافوني ما اجاوب وبس ابجي
-خويه التأمرين بي شنو اطيح الج حظه هسه والله امسحيها بوجهي والله ما اعرف ليش هيج سوه متخبل... انت هم يا خويه تعبان جاي من شغلة شفتين يشتغل حتى يسويلكم شي اليسوى تتلكيه هيج ندري بمشاكل دتصير بس لازم الصبر بهيج امور

-عفيه اريد اتصل بزياد
-لا ما مقبول هالحجي اني اخوج  ليش هو منو عارف الله يرحمه مو هذا جان اخو روحي  ... وزياد اخويه الصغير حاله حال ضرغام ...ارتاحي هنا وهو معترف غلطان وتره لامي هم تعارك وياها
-ما اكدر اضل بعد وياه عفيه الله يخليك انداريت لابوهم وتوسلت بي ...الله يخليك عمو بداعة الجيرة والزاد بينك وبين اهلي تودوني لاهلي لو تكولون لزياد يجي

اخوهم الثاني حجاله كلمتين سكتوه موقفه ضدي بجيت بقلة حيلة حاسه بروحي متورطة بعد ...ردت اروح اجيب موبايلي ما قبلوا كعدوني وراح كامل صاح لاخته تجيب عباية الي كيفت من وكف بجانبي ويكول لابوه خل اوصلها لبيت اهلها عمي ما رضاها وحمايه طلع منزعج ...طلعت مجلبة بعباتي احس روحي غريبة صرت عن هالبيت ...نزل هو من فوك الظاهر اخوه الثاني ناقل اله الكلام صار مقابيلنا يسد طريقنا
-وين رايحة ان شاء الله
مدت راسها امه تدعي عليه الله لا يوفقج ولا ينطيج وهذا يسمعها ما يحاجيها كامل يرد عليها وعليه كوه طلعني من بيتهم ضرغام اخر شي من وصلت للحديقة تغيرت نبرته
-ارجعي زهراء بروح اهلج ارجعي
اني كلمه ما بيه انطق احس خلص الحجي لهنا فتحت باب السيارة وكعدت بيها وهو جفتني وكامل انطاه مجال يحاجيني راح بعيد من شاف اخوه هادئ

-ترتاحين وترجعين موو؟؟زهراء احجي وياج ارفعي راسج وجاوبيني
رفعت عيوني صورته مغشيها الدمع
-الله يخليك تعبانة خليني اروح
-اجي لبيتكم بالليل اجي ...زهراء اجي مثل قبل يومية اجيكم
سكتت ما جاوبته ايديه ترجف ويكمش بيه يريد يجرني لحضنه واني ادفعه
-اني راح اوصلج صاح بصوت ... كامل اني اوصلها
خفت منه بوقتها وخفت على نفسي هالبشر مو طبيعي
-لا هو يوصلني
-ترجعين ؟؟
-اي ارجع
-ارتاحي هناك يوميه اجي اني
-اي تعال
-لا عبالج زياد ما يقبل تعوفيني تره يرجعج
-الله كريم
كمت احجي وياه بلا منطق ولا اي معنى بس اريده يهدني اروح