بقايا شغف

حب ولكن

-انتبهي لتصرفاتج يبنية اني مو كل شويه انبهج كبرتي تره
-وانت شعليك تنبه احتفظ بنصائحك لنفسك
-باوعلي بنظرة عدم رضا وكمل ...من الاخير لا اتعبج ولا تتعبيني دعاء كلمتي ماشية عليج ترضين ما ترضين تريدين بالحسنى تريدين بالغصب
-شنو غصب مو بكيفك تره كل شي وحطيت بي غصب عنج ما اقبل هيج تحاجيني وما راح اسمع كملة منك بعد

تدخلوا البنات وجروني وهو ضل يهدد ويحجي واني مدري شجاني اترادد وياه بعد كل السواه وشفت تعبه وياي بس اسلوبه مو حلو ابد

ما شفت الباب بعد ما الي واهس اطلع رجعت لنقطة الصفر احس نفسي ضعيفة وزاد فوكها شعور ذنب لان بابا مديون الهم ما قبل ياخذ الفلوس ويريد يرجع قسم من المبلغ باع سيارته وباع قطعة كاع كان متأمل يبنيها النا بيت حديث وراح اخذ الهم الفلوس ومن رجع يسولف لامي ما قابلين تصرفه بس هو ما قابل يبقيهن وهم ما سدت كل المبلغ اللي دافعيه اصلا جزء ما سوت ...حلت على اهلي الصدقة بسبب موقف كان الافرض بيه ما اعرضهم اله صح مو ذنبي واني ضحية طمع وابتزاز وعصابات جنت  بس شلت اكبر الذنب كدام نفسي

قاطعت العالم الخارجي ورجعت لعهدي كاضية نهاري  بالسطح يم اقرب باب لغرفتي اطلع اكعد بالشرفة ..تصميم بيتنا من نطلع للسطح اكو مثل الطارمة الجوة فوك مخلين بيها كراسي وكعدة اني مستغلتها لنفسي من ايام دراستي ولهسه وهي سبب مراقبتي لذاك الرجال ....واذا ضجت اروح يم مسرة اللي بينا وبينهم حديقة صغيرة نستغلها للعب لو سهراتنا بنات العم ...

مشت ايامي هيج لا هدف ولا عمل اخاف اصلا اطلع بعد صار عندي ردة فعل قوية ابويه وامي هم صار حرصهم وخوفهم علينا مضاعف بس اشوف والدي يوم بعد يوم يذبل ويكبر بالشهر الواحد عشر سنوات ...اخواني اطفال وهو حاير يركض لعيشتنا ما متأمل منا المساعدة ..كومه ايام مرت ما شايفته بيها ولا حتى بيته ما يجيه الظلام ببيته مثل الظلام داخل روحي مدا اشوف امل ول اعندي شغف لاي شي ....

بوقتها اخذت مسؤولية اخواني تدريس وقراءة واحاسبهم اريد شي التهي بي ولكيتهم خوش لهو ...شايله مسطرتي وطايرة وره ضياء اصغر اخواني اريده يحل رياضيات حتى ارجع لبهاء اللي عنده املاء ضياء نار وكح وما ينتبه ومتعبنا كلنا اركض بكل سرعتي وراه عبر سياج الياس عالطرمة مالت بيت عمي ابصغير واني سويت الياس شبخه وكمشته وتكربسنا سويه عللكاع اثبته اريد بس ارجعه لحديقة بيتنا وكفت شايلته من ياخته واهز بي
-انت ز......مال واعيدها جنه صوت ابو الطباخات الي يفوت بحينا ...واخضه وارجع اكرر الغلط واكفخه على علابيته انهت من الركض....كملت فاصل الماراثون والمصارعة الحره ... وارفع راسي انصدم بي واكف يم الباب بالضلمة اخويه وكع كبل من ايدي وبهتت هدوم بيت وبدون حجاب يباوع الي ويضحك ويرجع يدير وجهه لغير جهة واني نفس مكاني صافنة ... والله من الجفلة وراها مدري شلون كمزت من الطارمة فوك الياس اريد اخلص نفسي منه اشو هذا تشابك وياي توني مو طفرته گبر يا دعاء....