ဗီလိန်ဥက္ကဋ္ဌရဲ့ ချစ်သူလေးအဖြစ်ကူးပြောင်းလာခြင်း [မြန်မာဘာသာပြန်]

{55}

"စကြစို့" ဒါရိုက်တာကပြောလာသည်။

လျန်ကျင်းရှင်က ကြားကြားချင်း မတ်တပ်ထရပ်လာပြီး သူ့ထိုင်ခုံကနေ ကျိချင်းကျိုးဆီလျှောက်လာသည်။သူ့သရုပ်ဆောင်စကေးက အရမ်းကောင်းမွန်သည်။ခြေလှမ်းနည်းနည်းလေးလှမ်းလိုက်ရုံနဲ့ ကျိချင်းကျိုးရဲ့ စီနီယာအစ်ကိုကြီး လျန်ကျင်းရှင်ကနေ လင်းလော့ယန်ရဲ့ အစ်ကို လင်းလော့ဖုန်း တန်းဖြစ်သွားသည်။

"ကိုကိုပြန်လာပြီနော်…ဒီနေ့အပြင်မှာအေးလိုက်တာကွာ…ယန်ယန်ရော ဟင်းချက်လိုက်ပြီလား။မချက်ရသေးရင် ကိုကိုတို့ ဟော့ပေါ့စားကြမယ်လေ"

သူကပြောရင်းဆိုရင်း အင်္ကျီချွတ်လိုက်ကာ အင်္ကျီချိတ်စင်ပေါ်မှာ ချိတ်လိုက်ပြီး ကျိချင်းကျိုးအနားကို လျှောက်လာ၏။

ကျိချင်းကျိုးကမူ သူ့ရှေ့က ဆေးထားသည့်ပန်းကန်လေးတွေနှင့်အိုးအလွတ်ကိုလက်ညှိုးထိုးပြလိုက်၏။သူက လျန်ကျင်းရှင်ကိုပြုံးပြလိုက်သည်။သူ့အသွင်အပြင်နှင့်စိတ်နေစိတ်ထား‌ကြောင့်  ပြုံးလိုက်ရင် တအားလှသည်။အရမ်းဖြူစင်သည့်ပုံမျိုးလေးဖြစ်၍ ကျောင်းတက်နေဆဲ ကျောင်းသားလေးတစ်ယောက်နဲ့လည်း တကယ်တူ၏။

"ယန်ယန်တို့ကတော့လေ အရွက်တွေပဲဆေးထားပြီး လှီးတောင်မလှီးပေးထားဘူး။ဟော့ပေါ့တွက် အဆင်သင့်ဖြစ်အောင်ပေါ့လေ"

လျန်ကျင်းရှင်က ပြောလာသည်။

ကျိချင်းကျိုးကမစားချင်ပေ။သူ့ကိုကိုနှင့်အတူ ဟော့ပေါ့ကို သုံးရက်လုံးလုံးစားထားရသည့်အတွက် ဟော့ပေါ့ပဲမစားချင်တော့။သူက လက်ယမ်းပြလိုက်ပြီး ဘယ်ဘက်လက်ဖြင့် အစားအစာကိုင်ထားသည့်ပုံမျိုးလုပ်ကာ ညာဘက်လက်ကတော့ ဓားလေးကို သုံးပြီး အသီးအရွက်လေးတွေ လှီးတဲ့ပုံစံလေးစပြီးလုပ်ပြလိုက်သည်။လျန်ကျင်းရှင်က သူအသီးအရွက်လှီးသည့်ပုံလုပ်ပြတော့ မြန်မြန်ပဲ မီးဖိုခန်းထဲက ဓားကိုဆွဲယူလိုက်သည်။ကျိချင်းကျိုးက ရှောင်ရင်း သူ့ကိုထိခိုက်မိသွားမှာ စိုးရိမ်သဖြင့် နောက်ဆုံး စိတ်မပါတပါနဲ့ဓားကိုဘေးချလိုက်ကာ သူ့ကိုကိုအား မကျေမနပ်ဖြစ်သလိုမျိုး မျက်မှောင်ကြုတ်ပြီးကြည့်လာသည်။