اسكريبتات ل سلمى ياسر

اسكريبت 49

- صباح الخير

( رفعت عيني من على الورق وبصيت ناحية الباب ورديت ببرود )

= صباح النور
- كنت عايز أسأل حضرتِك على حاجه
= اتفضل
- هي عيونِك ازاي بتخطفني وأنتي أصلا مش بتبصيلي؟
= افندم؟!!
- من غير ما تقلبي عليا بس أنا كنت جاي أقول لـ حضرتِك على حاجه
= اتفضل
- عايز رقم والدك
= ليه؟
- هسأله عن جودة الإنتاج
= إحنا هنهزر يا أستاذ؟!
- قلب الأستاذ والله
= يا ولي الصابرين، أستاذ عبدالرحمن أنا عندي شغل فـ لو أسئلتك خلصت ممكن تتفضل
- شغل إيه بس ده أنا حبيت اسمي أوي قوليه تاني كده
= اتفضل أطلع برا
- اتفضلي أنتي جوا قلبي
= براا

( خرج وقفل الباب وأنا عيني لسه عليه، هو طول الوقت بيتحجج وييجي يسألني على أي حاجة وزمايلي في الشغل بيفضلوا يهزروا أنه مش بيبطل كلام عني بس أنا أعملُه إيه يعني! )

- احم .. أستاذة سلمى
( هبدت القلم على المكتب وبصتله من غير ما أرد )
- نسيت أخد رقم الحاج بس
= مفيش أرقام ومتفتحش الباب ده تاني وياريت تتفضل على طول عشان عندي شغل ومش فا..
- أنا بحبِك

( لقيت الكلام كله راح ومش عارفه أقول حرف وقلبي بيدق جامد مع كل خطوة يقربها من مكتبي، سند ايديه الاتنين على المكتب وقرب وشه شويه )

- أنا جبتها بهزار كتير ومنفعش فـ أنا قولت أقول الكلمتين اللي عايز أقولهم وأخلص وخير البر عاجله بقى، أنا بحبِك رغم إن مفيش كلام بينا وحتى لما بحاول أكلمك بتردي على القد ولما أهزر معاكي تزعقي، بحبِك رغم خوفك من الكلام مع أي حد، بحبِك رغم طريقة كلامك الغريبة معايا، بحب هدوءك وشطارتك في شغلك، بحب عينيكي وبحس إنها دنيا تانيه لوحدها، لو هزرتي مع صحبتك وضحكتي مبعرفش أرجع قلبي هادي تاني وبيفضل يدق وبفضل أفكر فيكي وأفتكر ضحكتك وأضحك، مش عارف بحبِك من امتى ولا إزاي بس ده اللي حصل وأنا مش عايز حاجه غير رقم والدك عشان اتجوزك وأخبيكي في حضني وبيتي، أنا هخرج دلوقتي وهاجي قبل ما أمشي أخد منك الرقم، بعد إذنك

( فتح الباب وخرج وأنا لسه مخضوضة وفرحانة، هو تصرفاته كانت غريبة بس كنت بحبها و .. بحبه! خرجت من مكتبي وروحت لـ المدير عشان أستأذنه إني أمشي بدري )

• خير يا سلمى حصل حاجه يعني؟
= لا أنا بس حسيت إني تعبانه شويه فـ هكمل شغل في البيت
• طيب اتفضلي وألف سلامه عليكي
= الله يسلمك

( خرجت من الشركة و روّحت وأنا قلبي بيرقص من الفرحة بس افتكرت شكله لما يروح مكتبي وميلاقيش حد يا ترى هيعمل إيه! )

^ سلمى
= نعم يا بابا
^ في واحد زميلك في الشغل اسمه عبدالرحمن
= ا..اه ماله؟!
^ عايز يجيب أهله وييجي عشان يطلب إيدك فـ قولت أعرف رأيك الاول بدل ما ييجي على الفاضي
= احم .. هو كويس، يعني أنا متعاملتش معاه كتير بس زمايلي بيشكروا فيه وحضرتك ممكن تقابله الأول وتشوف
^ خلاص أنا هقوله ييجي أقعد معاه وأشوف هرد أقوله إيه
= ماشي

( عدا يومين مكونتش بشوف فيهم عبدالرحمن في الشغل ولا بابا جابلي سيرته خوفت يكون رفضُه وساب الشغل، خرجت من مكتبي وروحت أجيب قهوة لقيته قصادي )

- ازيك يا أستاذة سلمى
= الحمدلله
- طب رديلي السؤال حتى
= ازيك؟
- بخير عشان شايفك ")
= طب هستأذن أنا عشان عندي شغل
- استني أنا كمان راجع المكتب
= والقهوة؟
- هشربها في بيتكوا

( لفيت ومشيت من غير ما أتكلم، دخلت مكتبي وقفلت الباب ومخرجتش لحد ما مشيت، تاني يوم كان أجازه وكنت عماله أفكر في إني إزاي مش هشوف عبدالرحمن بكره وأبدأ بيه يومي ويفضل يفتح ويقفل في باب مكتبي كل شويه و ..

= ايوه يا بابا جايه
^ عبدالرحمن جاي بكره هو وأهله عشان نقرا الفاتحة
= طيب
^ شوفي لو هتجببي حاجه انزلي مع صحبتك عشان متفضليش تروشينا بكره
= إيه المعاملة دي!
^ يلا اخلصي لو عايزه فلوس خودي من جوا وانزلي
= حبيبي يا حاج

( دخلت أوضتي وكلمت صاحبة الندامة )

= قدامك ربع ساعة وتبقي قدام بيتي عشان أجيب فستان
° عبدالرحمن جاي خلاص
= أنتي عرفتي منين؟!
° من الانشكاح اللي في صوتِك، يلا اقفلي هجهز وأجيلك تحكيلي

( قفلت وقومت جهزت ونزلت لقيتها مستنياني، شدتني من أيدي عشان نمشي )

° بالتفصيل يا لولو من الأول خالص
= ضحكت - حاضر يا ستي

..
= هجيب الفستان ده خلاص أنا قررت
° يا سلمى دي قراية فاتحة أنتي مش رايحه عزا
= ولو هجيبه
° هتسوديها في وش الواد عشان جاي يخطبك!
= مش هو بيحبني؟ يحبني بـ لوني المُفضل
° أنتي خرابه أصلا
= ششش روحي اختاري شويه اكسسورات كده على ما أخلص
° طيب يا آخره صبري

( خلصنا وروحت، دخلت أوضتي اتأكدت إني جبت كل حاجه وبعدين قعدت على السرير وفتحت صفحة قرة عيني وقعدت أتفرج على صورو لحد ما نمت .. صحيت تاني يوم جهزت وفضلت في أوضتي متوترة وخايفه وفرحانة في نفس الوقت، سمعت الباب بيخبط وصوته وهو بيسلم على بابا، بحس صوته زي المزيكا اللي بتفرح قلبي، بعد شويه ماما جت وخرجت معاها بالعصير )

- نقرا الفاتحة بقى يا عمي
^ على بركة الله يابني

( قرينا الفاتحة واتفقوا على معاد الخطوبة وسابونا نتكلم شويه )

- بيتهيألي كده من حقي كل شويه آجي أفتح باب مكتبك وأتكلم معاكي
= ضحكت - وأنت يعني قبل كده كنت بتراعي هو حقك ولا لا
- أنا من أول ما شوفتك وأنا عارف إنك حقي فـ كنت شايف أن اللي بعمله ده حُب مش رخامة وبعدين ما القمر ده الواحد يحب يشوفه كل شويه
= طيب يا سيدي شكراً كفايه
- بعد كده لما آجي اخبط عليكي هقولك بحبِك يا أستاذة سلمى
= وأرد عليك وأقولك اتفضل أطلع برا عشان أعرف أكمل شغلي بدل ما أتوه وأنسى
- بتتوهي في إيه!
= في عيونَك
- ضحك - ده قلبها مال بقى
= ومين قالك إنه مكانش مايل !
- أنتي يمكن مقولتيهاش بردو بشكل واضح بس أنا فرحت وكفايه إني شايفها دلوقتي في عينيكي و ربنا يقدرني وأبقى سند ليكي وأقدر أفرحك وأفضل شايلك طول عمري جوا قلبي وعيني
= أنا بحبَك
- الفرحة بانت على وشه وضحك - أنا بموت فيكي يا أحلى ما في حياتي ♥️

لولا وجودك ما حييت ♥️🌏
#سلمى_ياسر