اسكريبتات ل سلمى ياسر

اسكريبت 45

- فاكرة لما كُنتي بتقولي إن عُمرك ما هتحبي حد قدك وتتجوزيه؟

( ابتسمت وأنا بلبس جزمتي وروحت وقفت قصاده )

= أنت لسه فاكر الكلام ده! ده قديم أوي
- عمري ما أنسى حاجه قولتيها
= و جاي تعايرني بالكلام ده دلوقتي ليه
- ضحك - مقدرش أعايرك، أنا بس افتكرت فجأة فـ قولته
= وفاكر إيه تاني؟
- ابتسم بحُب - فاكر إنك من أول مرة ضحكتي فيها وأنا قلبي مبقاش معايا، خطفتيه من غير ما تعملي أي مجهود
= وعلى كده بقى فاكر إنك كنت بتاع مشاكل؟
- ضحك بصوت عالي - دي كانت حجة عشان أقرب منك، أنتي بس اللي مكونتيش فهماني
= ما هو أصل أنت قريبي يعني عشان تهزر معايا ؟!

( ضحك وقرب مني باس راسي بحُب ومسك ايدي وخرجنا من البيت، كنا رايحين فرح بس في الحقيقة هو أحلى فرح ممكن نحضره في حياتنا بعد فرحنا .. فرح مَالِك .. ابننا ♥️ )

• كل ده تأخير يا بابا أنا مستنيكوا من بدري، ده الحلاق زهق مني
- معلش يابني حقك عليا، أمك فضلت واقفة قدام المرايا تظبط في نفسها، بقالي 25 سنة بقنعها أنها حلوة من غير ما تعمل أي حاجة بس هي مش مصدقاني، بقى بذمتك القمر دي محتاجة تحط ميك آب؟

( ضحكت وأنا بحضن مَالِك وبظبطله الكرافته )

= مش هتبطل تثبتني بقى
- وبقالي 25 سنة بردو بقنعها إني بقول الحقيقة مش بثبتها
= وأنا بقالي 25 سنة بحبَك وبحمِد ربنا إنه رزقني بيك

( مَالِك خبط على كتفه )

• أنا آسف لو بقطع عليكوا اللحظة الحلوة بس إحنا متأخرين و "روح" هتولع فيا
= متخافش يا واد مش هتعمل حاجه
• أنا عارف أنها بنت صاحبة عُمرك بس هتنكد عليا والله

( ابتسمت وأنا بفتكر ياسمين وأننا قدرنا نفضل صحاب أكتر من 30 سنة والنهارده إحنا بنجوز ولادنا لبعض زي ما اتفقنا بالظبط )

= فكرتني بالغالية، يلا بسرعة نروحلهم عشان أحضنها وأقولها إننا نفذنا كلامنا
• تفتكري يا ماما ممكن يحصل حاجة بعد الجواز تخليكي تزعلي من خالتو ياسمين؟
= حتى لو حصل إحنا باقيين على بعض وعارفين طِباع بعض هو إحنا لسه صحاب كام شهر! دول سنين كتير عدوا بحبنا لبعض وأننا كنا اخوات مش صحاب، أنا طول عمري بحمد ربنا إنه بعتلي ياسمين، محدش كان بيفهمني ويسمعني غيرها ومحدش استحمل طبعي بردو غيرها، ميغركش الهدوء اللي أنا فيه دلوقتي ده، خالتك ياسمين استحملت عصبية و زعيق محدش يستحمله - سرحت بعيني - طول عمرك أصيلة يا ياسمين و باقية عليا

( وصلنا الكوافير و دخلنا ناخد عروستنا الحلوة وبنتي اللي مخلفتهاش بس قبل ما أدخل لـ "روح" دورت على ياسمين لقيت عينيها بصالي مستنية أروحلها، كبرنا يا ياسمين بس لسه وجودِك بيطمني، روحت ناحيتها بخطوات سريعة وحضنتها، صاحبة عمري وأختي وأقرب واحده ليا و دلوقتي بقت حمات ابني .. لا دي أمه التانية )

^ هنجوزهم لبعض يا سلمى، ربنا كرمنا وابنك جيه قبل بنتي عشان لينا نصيب نبقى نسايب
= "روح" بنتي زي ما "مالِك" ابنك بالظبط، إحنا ربيناهم سوا والحمدلله اختاروا بعض قبل ما إحنا نقترح أصلًا
^ كلها ترتيبات ربنا، من أول ما قعدت جنبك في الدرس في ثانوي لحد اللحظة دي وإحنا في فرح ولادنا
= السنين عدت زي الثواني والله
^ وارتحنا من العيال خلينا نرجع نقعد في بلكونتنا تاني ونشرب القهوة على رواقة وإحنا بنسمع نفس الأغنية اللي بقالِك سنين بتحبيها عشان أحمد

( حسيت بـ ايديه بتلف حوالين كتفي )

- وقابلتك أنت لقيتك بتغير كل حياتي يا أبيض يا حلو أنت

( ضحكت وسندت راسي على كتفه وإحنا شايفين مَالِك و روح خارجين سوا، ايديهم في أيد بعض وحبهم وفرحتهم ببعض باينه على وشهم، نفس فرحتي وأنا ماسكة أيد أحمد ومطمنة معاه، شوفت نفسي في روح وشوفت أحمد في مَالِك، مسكت ايد أحمد زي يوم فرحنا بالظبط وخرجنا كلنا ركبنا العربيات عشان نروح القاعة )

= أنا مش مصدقة نفسي يا أحمد، الولاد كبروا وبنجوزهم لبعض خلاص، إحنا كبرنا كده امتى
- لا متقوليش كده، أنتي لسه زي ما أنتي ولا كإن السنين بتعدي عليكي، حلوة نفس حلاوتِك من 20 سنة وبتزيدي جمال كل شويه، أنا اللي ممكن أكون كبرت عشان شعري الأبيض ده إنما أنتي؟ أنتي لسه زي ما أنتي قمر في عيني

( ضحكت وبصيت من شباك العربية لقيت ياسمين كمان بصالي، ضحكنا لبعض وبعتلها بوسة في الهوا كالعادة قبل ما أحمد يزود السرعة وندخل قبلهم من البوابة وندخل القاعة، سلمنا على قرايبنا و وقفنا نتفرج على ولادنا وهو بيرقصوا سلو على نفس الأغنية اللي رقصنا عليها "كل حياتي لـ عمرو دياب" لقيت أحمد بيمسك ايدي وبيشدني عشان نروح نرقص )

= لا يا أحمد متهزرش إحنا كبرنا على الحاجات دي
- قولتلك متقوليش كده، أنتي زي ما أنتي ومهما عدت عليكي سنين هتفضلي حلوة في عيني عشان بحبِك و عشان انتي أصلا حلوة يا سلمى، أنا كل يوم بقول الحمدلله إني مضيعتكيش من أيدي وإني عرفت أقرب منك وأخليكي تحبيني، ده أعظم إنجاز عملته في حياتي
= أنا بحبَك على فكره
- مهما عدت سنين هفضل أحبِك وهتفضلي بنتي الحلوة اللي مبتكبرش أبدًا.♥️

لولا وجودك ما حييت ♥️🌏
#سلمى_ياسر