اسكريبتات ل سلمى ياسر

اسكريبت 46

- أنت هتصاحبني؟!
= أنا كلمتِك!
- اومال إيدك اللي على كتفي دي إيه ديكور
= بنعدي الشارع يا بنتي
- وأنا نُنه! ما أنا بعرف أعدي
= أنا غلطان اتخبطي
- خبطة تخبطك

اتعصبت وعديت الناحية التانية لوحدي ومخدتش بالي من العربية اللي جايه ناحيتي فـ شدني جامد لقيتني في حضنه!

- خير يخويا؟
= مخدتيش بالِك من العربية اللي هتخبطك وهتصدعيني بردو
- ما أصل أنا مش فاهمة مين اللي قالك إنك تحط إيدك على كتفي يعني العشم ده جايبه منين!
= جوزك المستقبلي وكده
- أهو أنت قولت بنفسك "المستقبلي" دلوقتي ملكش إنك تعمل كده
= أقولك على حاجه؟
- إيه!
= اتخبطي

بصتله بقرف ولفيت وشي، كلكوا غدارين ومتقلبين، هقولك إيه ما أنت من أشبال مصطفى أبو حجر

= مصطفى أبو تورته أجمد
- احم .. هو أنا صوتي كان عالي؟
= لدرجة إن الناس سمعت وبتبصلك أهي
- منك لله يا أحمد
= أنا مالي يستي لا إله إلا الله
- محمد رسول الله يخويا
= بطلي أخويا اللي عماله تقوليها دي عشان عيب على الدبلة اللي في إيدك
- أنت هتذلني بالدبلة يعني ولا إيه!
= أنا قولت كده؟
- لا
= يبقى نعمل إيه؟ نركن الجوزاء على جنب عشان نكمل الخروجة وأحنا مبسوطين
- قصدك إني منكدة عليك ؟

نظرات الاندهاش في عينيه والصدمة باينة على وشه إني قادرة أطلعه غلطان في أي حالة، هو أنا كده وأنت اللي اخترت أنا مالي 🚶🏻‍♀️

= هتاكلي إيه؟
- أنت هتاكل إيه؟
= اللي هتاكليه
- وأنا هاكل اللي هتاكله
= مش طافح خالص
- أحسن عشان تخس
= غيرانة مني عشان عندي خدود وأنتي لا
- بس يالاا بدل ما أنكد عليك
= هو في نكد أكتر من كده؟ أنا خوفت ..

ضحكت وسبقته بكام خطوة

= يست الفنانة أنا ماشي معاكي
- إيه ماشي معاكي دي ما تحسن ملافظك يا بغل أنت
= هبلعك يا سلمى والله
- ما أنت ضخم وبتاكل أي حاجة هتيجي عليا 🥲

سابني ومشي، هو أنا رخمت عليه أوي؟

- ميدو
= دلوقتي بقيت ميدو
- ميدو ومودي وكل أسامي الدلع
= الاه! مش كنتي مش طيقاني؟
- أنا يابني؟

سكت وكمل طريقُه فـ مشيت جمبه وكلبشت في دراعه كـالعادة، أنا بحب أرخم عليه وأعصبُه وبعدين أصالحُه عشان هو حبيبي أصلًا، و رغم إنه ساعات بيبقى فاكرني بتكلم بجد أول ما أهزر يتعامل عادي واللي هو أنا اللي حبيت هبلة

- تعالى ندخل الملاهي
= أنتي كبرتي يا حبيبتي
- أنا؟ طب واااء
= ضحك - حاضر يلا

دخلنا وفضلت أبُص على الألعاب كلها لحد ما وقفت عند العربيات

- تعالى نلعب عربيات عشان أقلبَك من العربية اللي هتبقى فيها
= طب مش لاعب
- عشان خاطري يا ميدو
= تعالي أقلبيني يا قلب ميدو براحتك

ضحكنا وروحنا قعدنا كل واحد في عربية، من أول ما قعدت وبصتله وهو في العربية اللي جمبي وأنا بضحك، رغم إنه شكله غريب وهو ضخم كده وقاعد في العربية مستنيها تشتغل عشان يستقبل خبطات مني توجعله ضهره بس على وشه ضحكة حنينة عشان أنا مبسوطة بـ ده .. الوقت بدأ وبقيت كل شويه أجري وراه أخبطه وأضحك عليه وأمشي تاني فـ ييجي هو عشان يخبطني ويلف بعيد في آخر لحظة عشان الخبطة متبقاش شديدة وتتعبني، هي لعبة وعادي فيها بس هو حنيتُه بتغلبه حتى وقت اللعب والهزار، فضلت أخبطه لحد ما تِعب

= خلاص بقى ضهري وجعني
- ضحكت - فدايا
= كُله فِدا عيونِك يستي
- حبيبي أوي

خلصنا وركبنا لعبة الفنجان، هو تقريبًا نازل معايا عشان يتبهدل 😂 بعد ما خلصت ضحك علينا في اللعبة روحنا نتمشى عشان نلاقي مكان ناكُل فيه، أنا خلاص قررت الأكل وأتمنى أكون مبسوطة

= شاورما تاني؟
- وتالت وعاشر أنا بحبها
= وأنا بحبِك أنتي
- ايتاا ايتاا ايتاا
= إيه! حاجة جديدة عليكي؟
- لا حاجة حلوة، لدرجة أني كل مرة بسمعها بفرح كإنك أول مرة تعترفلي
= طب عارفه بقى إني كل مرة بشوفِك بحبِك تاني من الأول!
- ضحكت - أنا واقعة في حُب حُبَك ليا وعيونَك وضحكتك وغمازتك، بص أنت كُلك قمر وأنا بحبَك
= يعجبني كُلك يولاا
- ضحكت - كُلك عاجبني
= أنتي أحسن وأحلى حاجة حصلت في حياتي، مكونتش متخيل إني ممكن أحِب حد بالشكل ده، أنا أصلًا مكونتش ناوي أحِب .. كنت هختار حد مناسب وخلاص، أم لولادي قادرة تطلعهم كويسين فـ لقيتني بحب وطلعتي مناسبة وأحسن واحدة في الدنيا وأعظم أم لولادي، لما شوفتِك أطمنت و ده شعور كنت مفتقِدُة من زمان، شكرًا إنِك معايا ")
- ابتسمت بحُب - شكرًا ليك أنت، أنت غيرت حياتي وخلتها حلوة أوي، حتى أنا احلويت في قُربَك
= أنتي أصلًا حلوة
- أنا أصلًا بحبَك
= ضحك وغمازته ظهرت - أنا بموت فيكي ومش عايز من الدنيا حاجة تاني خلاص، جاتلي اللي بيهم كلهم.♥️

لولا وجودك ما حييت ♥️🌏
#سلمى_ياسر