اسكريبتات ل سلمى ياسر

اسكريبت 2

- اللي إحنا فيه ده مينفعش ، انا مش هفضل عمري كله كده
= اعمل ايه يعني !
- اتكلم ، انطق
= اقول إيه طيب ؟
فضلت بصاله ومش لاقيه حاجة اقولها على بروده ده ، بقالنا سنتين مع بعض شويه نبقى صحاب واخوات وشويه احس إننا مرتبطين ، اغلبيه صحابنا فاكرين إننا مرتبطين بس بنخبي من كتر ما إحنا قريبين من بعض وكل ما حد يسأل ننكر عشان إحنا فعلا مش مرتبطين .. !
سكوته طول ف قومت مشيت ، ليه ابقى مع واحد مش قادر يحدد مشاعره ايه بالظبط ، روحت البيت وقولت ل ماما إني مستنية العريس ، العريس اللي روحت اقول ل عبدالرحمن إنه متقدملي وهو فضل ساكت بردو متكلمش ..
< العريس جاي بعد يومين يا سلمى
- ماشي يا ماما
البيت كان عبارة عن تجهيزات ل العريس اللي جاي ، مش عارفه هو شافني فين وحبني اصلا وانا طول الوقت مع عبدالرحمن ، ازاي مشكش اني ممكن اكون بحبه ومقبلش بيه !
اليومين عدوا بسرعة غريبه وكل حاجة كانت متظبطة ، يعني ايه ماما مش هتزعق عشان حاجة صغيره نسيتها ، الواد ده شكله وشه حلو وهحبه
ضحكت على تفكيري المجنون وقومت اجهز عشان عريس الغفله اللي جاي
< تعالي يا سلمى
- حاضر يا ماما
خدت العصير و دخلت عشان اقعد مع العريس ، هو كان جاي لوحده تقريبا كان خايف يترفض ويحرج اهله !
قدمت العصير وقعدت وبابا قام وسابنا ، انا كنت سرحانة وبفكر في عبدالرحمن ، طب هيحصل إيه لو كان هو اللي مكان البيه اللي قاعد ده ! كان هيخس مثلا ! هو مهزء اصلا ، يلا مش مهم
فوقت من سرحاني على صوته ، صوته كان هادي و فيه حنيه غريبه ، حسيت إني اول مره اسمع اسمي ، او اسمي فجأه بقى حلوو !
• هتفضلي سيباني وسرحانة ، طب قوليلي بتفكري في إيه ونفكر سوا
قالها ك نوع من الهزار بس انا مضحكتش ، هو انا ينفع اقوله على عبدالرحمن وإني حبيت واحد وهو فضل محسسني إنه بيحبني وفي الاخر مشي .. !
• طب ردي عليا طيب
- نعم
• أحلى نعم في الدنيا
ابتسمت ومردتش ، هو شكله طيب وهادي و .. حلوو
• طب هبدأ انا ، انا اسمي احمد محمد ، عندي 24 سنه يعني اكبر منك ب 4 سنين .. كفايه صح ؟
ضحك وكمل ، عايش مع امي بعد ما والدي اتوفى من سنتين
- ربنا يرحمه ويغفرله
• ابتسم * آمين يارب ، مليش غير اخت واحده هي قدك كده اسمها آية ومخطوبة ل صاحبي ، يعني الحمدلله زيتنا في دقيقنا
استغربت الجمله ف ضحكت
• ايه ده قمر بيضحك ! انا اول مره اشوف قمر بيضحك
اتكسفت وبصيت في الارض ف هو ضحك وكمل
• كنت اب واخ ليهم في السنتين دول والحمدلله ربنا قدرني اكونلهم السند بعد ابويا ، انا متخرج السنه اللي فاتت وشغال في شركة الحج الله يرحمه ، انا كنت بشتغل فيها من وانا بدرس والحمدلله ربنا كرمني يعني
هو كان بيحكي ومركز معايا وعلى وشه ضحكة غريبة بس حلوة هو كله كان حلو بدقنه وعضلاته دي
• هتفضلي ساكتة ؟
- بسمعك
• طب انا عايز اسمعك
- اقول إيه !
• احكيلي عنك
- انت يعني مش عارف !
• عايز اسمعك
- امم ماشي ، طبعا عارف اسمي انت مش جاي بالحب * ضحكت وكملت * عندي 20 سنه يعني قد آية اختك كده ، مبقتش بحب الدراسة وعايزه ابقى دكتورة في الجامعه مش عارفه ازاي ، عندي صحاب كتير بس محدش قريب مني يعني ، مكانش في غير عبدالرحمن ، بيتهيألي تعرفه ، هو صاحبي من وإحنا صغيرين ، من ساعه ما اتولدت تقريبا وهو معايا رغم اختلاف السن بس هو كان اقرب حد ليا ، مليش اخوات زي ما انت شايف كده وعبدالرحمن كان اخويا
• اخوكي بس ؟
بصتله وسكت ، هو مكانش اخويا انا كنت بحبه ، من واحنا صغيرين وانا بحبه وبغير عليه من اي حد يقربله ، عبدالرحمن كان ليا انا وبس ومعايا انا بس
• انا عارف إنك بتحبيه بس إنك تقبلي تقابليني ده معناه إن الموضوع انتهى وإنك هتبدأي معايا من الاول
- ازاي تقبل ترتبط ب واحده بتحب واحد تاني
• ابتسم بثقه * عشان هخليها تحبني انا
بابا دخل ف استاذن إنه يمشي وهيستنى الرد مننا ، دخلت اوضتي وفضلت افكر في احمد ، انا مشوفتش حد كده ، حلو شكلا واخلاقيا وتعليميا لا ولابسلي قميص اسود عايز ياخد قلبي ، ولا هو اصلا خده خلاص !
مش عارفه ليه كنت مبسوطة وانا بسمعه بيتكلم ، الحنيه اللي صوته والطيبه اللي بيتعامل بيها خلت قلبي يميل ليه ، انا قلبي بيتشد بالحنيه وحنيه احمد خلت قلبي يميل عافيه
مكنتش عارفه ارد عليهم اقولهم إيه ، كنت خايفه بس مبسوطة ، خايفه اوافق على احمد واظلمه عشان بحب عبدالرحمن او ارفضه وابقى خسرته ، ازاي اتعلق بحد اول مره اشوفه كده !
بلغت بابا موافقتي عليه واتفقوا على معاد ييجي ل بابا فيه ويتفقوا على الخطوبة والعيلتين يتعرفوا على بعض
• وافقتي ليه ؟
- مش عارفه
• هتكملي معايا حياتك وانتي مش بتحبيني !
- بس انت بتحبني وهتخليني احبك
ابتسم وسكت ، هو ضحكته بتفرح قلبي وعيونه كانت بتطمني على طول ، انا مش خايفه من علاقتي ب احمد انا مرتاحة ومبسوطة كمان
حددوا معاد الخطوبه وجبت فستاني وجهزنا كل حاجة وعزمنا قرايبنا وصحابنا وخلاص الخطوبه بكره ، المفروض كنت ابقى زعلانه عشان مش هتخطب ل عبدالرحمن بس انا مبسوطة ، مبسوطة اووي !
* موبايلي بيرن *
• ست البنات لسه صاحية !
- مش جايلي نوم
• بتفكري في ايه ؟
- فيك
قولتلها من اغير ما افكر ، نفسي ابطل تلقائيه وعفوية بقا
ضحك وسكت شويه وبعدين اتكلم
• مرتاحة يا سلمى
- اوي ، اول مرة ابقى مبسوطة ومرتاحة إني هعمل حاجة
• دي اهم حاجة عندي ، يلا روحي ارتاحي عشان يومنا بكره طويل
- حاضر
• سلمى
- نعم
• بحبك
دي كانت اول مرة يقولي بحبك ، كنت بشوف حبه ليا في عينيه وحنيته في الكلام ، كنت بحب لمعة عينيه قدامي ، وقعني فيه ببساطة !
نمت مبسوطة اكتر من الاول ، ما اللي اسمهم أحمد مش وحشين اهو يا جماعه اومال في ايه !
صحيت على صوته و دي كانت احلى حاجة ممكن ابدأ بيها اليوم
• صباح الخير يا حبيبتي
- صباح الخير يا حبيبي
انا رديت وانا نايمه ف غالبا كنت لسه بحلم يعني ، ايه اللي انا بهببه دااا !!!
استوعبت اللي قولته
- قصدي يعني ..
• فاهم يا ماما يلا قومي الميك اب ارتيسيت في ابطريق ل ست البنات
- حاضر
• هتبقي احلى عروسة
- عشان هتخطب ل احلى واحد في الدنيا
ضحك بردو وخطف قلبي
‏#Salma_Yassser