البارت العاشر
محمد رجع من الشغل ولسه هيدخل العمارة سمع صوت حد بيناديه
عدنان : دكتور محمد دكتوور
محمد وهو بيلف : نعم
عدنان : ازاي حضرتك انا كنت مستنيك
محمد بدهشة : الحمد لله خير يا ابني أنت تعرفني
عدنان بابتسامة : ايو طبعا أنا عدنان زميل سلمى وعايز أتكلم معاك بعيد عن البيت بعد إذنك
محمد بصدمة : عدنان
عدنان بهدوء وحس أن محمد يعرفه : لو سمحت دقايق بس الموضوع مهم
محمد هز راسه وعدنان كمل : اتفضل معايا
ركب معاه عربيته و راحو لمطعم قريب .. وقعدو وجه جرسون وقف جنبهم
عدنان بهدوء : تشرب ايه يا دكتور
محمد : شاي سكر زيادة
عدنان للجرسون : وأنا قهوة
عدنان بتوتر : احم .. حضرتك عارف أن سلمى زميلتي
محمد بجدية قاطعه : من غير مقدمات يا حضرة الظابط
عدنان بارتباك : أنا عايز اتجوز سلمى بس هي رافضة
محمد بصدمة : تتجوزها ازاي وانت متجوز
عدنان الصدمة كانت من نصيبه المرة دي وصرخ : نعم م ايه مين الل متجوز4
محمد بدهشة وتفاجا من إنفعال عدنان : انت عدنان زميلها صح قالت أنك متجوز
عدنان ضرب ركبته بقبضة ايده بغضب وزفر أنفاسه بحرقة ومحمد لاحظ نظرة الوجع والخذلان الل فعنيه
محمد بهدوء : اهدى يا بني وفهمني ايه الل صح وايه ال غلط
عدنان وهو بيحاول يسيطر عل أعصابه : اعذرني يا دكتور آسف إنفعلت .. بس ماكنتش أتخيل أنها تقول لك كده
اخد نفس طويل وف الوقت ده جه الجرسون وبعد لحظات كمل : أنا حقيقي مش فاهمها أنا متأكد أنها بتحبني زي ما بحبها ومع ذلك بتبعد عني وبتتهرب مني .. تصور أني اتقدمت لها وقالت لي أنها مرتبطة لا وطلعت قايلالك اني متجوز وانا عمري ما فكرت فالجواز قبلها
سكت لحظات ومحمد مركز فكلامه وحاسس أنه صادق ده غير تعابير وشه الل اتضح عليها الثبات
عدنان : أنا بحب سلمى وعايز اتجوزها وأوعد حضرتك أني أحميها وأحافظ عليها بروحي وأسعدها ومانيمهاش زعلانة مني أبدا
انا معرفش بيتقال ايه فالمواقف دي لان دي أول مرة وكمان ما جبتش حد من أهلي علشان عايز أتكلم معاك كراجل خلف وربى مراتي وعارفها كويس ودخلت كلية الشرطة بتشجيعه وعايزك تكلمني على أني الراجل الل هتسلمه بنتك
محمد ابتسم : هي حكت لك
عدنان ابتسم لما شاف ارتياح محمد ليه : أيو حكتلي كل حاجة إلا حاجة وحدة
محمد بهدوء : ايه هي
عدنان بضيق : نظرة الخوف الوجع الل فعنيها والل بتبعدها عني كلما قربت
محمد بحزن : للأسف معرفش ايه سببها حاولت كتير وما قالتليش
عدنان : هعرفها أنا .. اطمن أنا مش هرتاح قبل ما أعرف ايه الل مخبياه عنا وخايفة منه بس فيه حاجة
محمد بقلق : خير
عدنان بارتباك : احم سلمى علشان تبعدني عنها هتأجر خطيب
محمد بغضب : نااااعم
عدنان بخوف ولهفة : اهدى بس يا دكتور هي مش قصدها حاجة متزعلش منها
محمد بابتسامة : خايف عليها مني
عدنان بحرج : بصراحة خايف عليها منك و مني ومن نفسها
محمد بابتسامة مكر : ماتقلقش هفهما غلطها
عدنان بسرعة : لا لا سيبهالي وانا هفهما .. سيب ليها حضن ترتاح فيه مش هنبقى عليها احنا لاتنين خليك أنت الطيب
محمد ضحك ومن جواه اتبسط لما شاف لهفة عدنان وعشقه لسلمى وكمل : طب انت ناوي على ايه
عدنان بغيظ: بصراحة ومن غير زعل ولا تحيز ناوي أنتقم لكرامتي وأخليها هي الل تتقدملي طالما عايزة خطيب أنا أولى
محمد بقلق : ازاي يعني مش فاهم
عدنان بهدوء : هكلمك وافهمك كل حاجة .. لازم اخليها تعترف أنها بتحبني وماتقدرش تعيش من غيري
محمد بتعب : مجانين وهتجننوني معاكم
عدنان بتوتر : دكتور
محمد مقاطعه : قولي يا عمي
عدنان ابتسم : أنا عايز كلمة منك أنك ماتجوزش سلمى لحد غيري ولا تتكلم مع حد فخصوصها لغاية ما أجيب عيلتي وأتقدم لها
محمد بحيرة : والله يا بني انا محتار
عدنان بتفهم : عارف ياعمي ومقدر بس كلها يومين وأقنعها وآجي أتقدم
محمد بهدوء : بص يا عدنان أنت ضابط يعني راجل مسؤول أنا هثق فيك وهديك كلمتي بس اوعى تفكر أني مش هقدر أحمي بنتي منك وأطلعك برا حياتها لو اضطريت
عدنان ابتسم : تأكد يا عمي أنك مش هتضطر لأني بعشق بنتك ومستحيل أضايقها ولا أأذيها
💗💗💗💗💗💗💗💗💗💗
عند سلمى راحت للمطعم الل اتفقت مع حبيبة وقعدت تستناها دقايق وحبيبة وصلت
سلمى : أنت جايه لوحدك
حبيبة وهي بتقعد : أيوه بس هو هيجي
سلمى : طيب تشربي ايه
حبيبة: أي حاجه
سلمى ندهت الجرسون وبعد دقايق حسام وصل وحبيبة شاورت له وهو تقدم ناحيتها وهو باصص لسلمى من تحت نظارته الشمسية وبين وبين نفسه ( دي بقى الل جننت عدنان )
حسام بابتسامه : ازايكم
حبيبة : أهلا يا مستر حسام اتفضل
حسام قعد وحبيبة ابتدت تعرفهم هلى بعض : المستر حسام زميلي فالشركه والآنسة سلمى بنت خالتي ضابط بوليس
حسام بلع ريقه بخوف وبين بين نفسه ( اه يا كلاب ماحدش قالي كده .. الله يخرب بيتكم كان يوم اسود يوم ماعرفتكم )
حبيبة : مستر حسام انت معانا
حسام بتوتر : احم ايوه
وبص لسلمى الل باصاله بقوة : تشرفنا يا فندم
سلمى هزت راسها وطلعت ورقة وقلم وحطتهم قدامه : بعد إذنك اكتبلي كل حاجه عنك .. اسمك الثلاثي .. اتولدت فين وامتى درست فين .. اتخرجت امتى .. اشتغلت امتى .. أفراد أسرتك كام .. ساكن فين .. نمرة موبايلك
حسام اتصدم و بص لحبيبة بخوف وحبيبة ابتسمت تشجعه وشاورت له أنه يكتب .. بص لسلمى تاني لقى ملامحها جامدة جدا
استعان بالله وشال النظارة وابتدى يجاوب
حبيبة بصت لسلمى بمعنى( ماكنش له لزوم ) وسلمى ردت عليها بعيونها ( أنا عارفة أنا بعمل ايه )
( كده هيخاف ) ردت ( بس هيعرف هو بيتعامل مع مين ) حبيبة بتنهيدة ( طيب اما نشوف آخرتها)
سلمى بهدوء : حضرتك تشرب ايه
حسام وهو بيكتب : قهوة على روحي4
سلمى ابتسمت وحبيبة كتمت ضحكتها بصعوبة
" وهناك كان قاعد على نار جوه عربيته هيموت ويعرف حسام بيكتب ايه وايه الل قالته سلمى وليه بيضحكو دلوقتي وقال : طب والله لأقول لعدنان أنك ضحكتها من أول دقيقة "
حسام خلص واتنهد براحه ومد الورقة لسلمى الل قرتها بسرعة وحطتها على جنب
سلمى بجدية : بص يا استاذ حسام أنا عندي شغل لحضرتك لمدة اسبوع أو عشرة أيام وبالمقابل هديك مبلغ كويس
حسام بتساؤل مصطنع : شغل ايه
سلمى بارتباك وهي بتبص لحبيبة الل بتشجعها بنظراتها وابتسامتها : هتمثل .. هتمثل أنك خطيبي
حسام سكت وعمل نفسه مصدوم : ي يعني ايه مش فاهم
حبيبة بهدوء : احنا مقدرين صدمتك بس احنا محتاجين حد ينفذ لنا الخدمة دي ويكون موثوق سلمى عندها مشكلة خاصة ومحتاجه حضرتك تساعدها
حسام : بس أنا مش فاهم مشكلة ايه وأساعدها ازاي
حبيبة بهدوء : حضرتك هتمثل قدام زمايلها أنك خطيبها هتوصلها مرتين تلاتة أو على الأقل تروح معاك وده لفترة قصيرة ومفيش حد حيعرف حاجه عن اتفاقنا يعني مش هنربطك بيه
حسام : لسه برضو مش فاهم هي ليه تلجأ للطريقة دي
سلمى : لو سمحت يا استاذ أنا محتفظة بالأسباب لنفسي .. وزي ما حبيبة قالت لك كل الل أنا محتاجاه أننا نتواجد فمكانين تلاته مع بعض على أننا مخطوبين وبعدما المهمة دي تخلص هتاخد مبلغ كويس
حسام سكت شوية وبعدين قال : طب ممكن أعرف المهمه هتنهي أمتى
سلمى : اسبوعين بالكتير
حسام : هفكر وأرد عليك
سلمى بتحذير : استاذ حسام أي كلمة هتخرج من كلامنا بر النتايج مش هتعجبك وده رقمي ( وكتبته له على ورقة )
حسام أخد الورقة وقام وقف : اطمني مش هقول لحد
وراح وحبيبة بصت لسلمى : مافتكرش أنه هيوافق
سلمى بتساؤل : ليه
حبيبة بهدوء : أكيد خاف منك
سلمى بحيرة : تفتكري
حبيبة : ماعلينا اطلبنا أكل
حسام طلع برا واتكلم فالموبايل : ها هتروح
عادل بتنهيدة تعب : لاء لما اطمن أنهم رجعو
حسام بتريقه : خايف على حضرة الضابط
عادل بهدوء : لا خايف على الل تخصني مش خايف على التانية
حسام : اتنين مجانين لاء اربعه كان مالي أنا ومالكم
عادل بزهق : اخرس دوشتني .. لحظة
حسام بتساؤل : ايه
عادل : ابعتلي جرسون علشان مش هينفع أخرج
حسام : طب ماتقولي عايز ايه واجبهولك
عادل بهزار : مش واثق فيك
حسام اتغاظ : طب شوف مين هيعبرك
عادل بابتسامة وتحايل : طب خلاص ماتتقمصش وهاتلي أي حاجه آكلها
حسام بسخرية : همك على بطنك أنت
عادل بملل : امال أموت من الجوع يلا تعال
وقفل السكه فوشه
حسام تف عليه : أبو شكلك واطي
💗💗💗💗💗💗💗💗
بالليل الرجاله اتجمعو فبيت عدنان
عادل : يعني ده كل الل حكتهولك
حسام : ايوه
عادل بص لعدنان الل ساكت وبيشرب قهوته بهدوء : أنت ناوي على ايه يا عدنان
عدنان بهدوء حط الفنجان على التربيزة وبصلهم : ناوي أخليها تصدق أني مصدق وأبعد عنها
عادل : ازاي انا مابقتش فاهمك
عدنان : هتفهم هتفهم كل حاجه بوقتها
حسام : طب اشمعنا اسبوعين ليه عايزة تمثل عليك الفترة دي
عدنان بابتسامة حزينة : علشان طالبة النقل ومحتاجه خطيب لحدما تتنقل
عادل : وأنت هتسيبها تتنقل
عدنان بإصرار : هتجوزها الأول وبعدين أشوف تتنقل ول لاء
💗💗💗💗💗💗💗💗💗
عند البنات رجعو البيت وسلمى طلبت من حبيبة تيجي معاها علشان مامتها عايزة تشوفها وحبيبة وافقت وطلعو لشقة محمد وضربو الجرس .. ثواني وزهرة فتحت
حبيبة بابتسامة : زهرتي عاملة ايه
زهرة حضنتها بلهفة : حبيبتي وحشتيني اوي اخس عليك يومين ما أشوفكيش
حبيبة : حقك علي يا زهرتي
زهرة وهي بتبعد عنها وبتشدها علشان تدخل : لاء زعلانة منك ومفيش مرواح الليلة هتقضيها معايا
حبيبة : حاضر يا زهرتي من عنيا الجوز
زهرة ضحكت ودخلو وسابو سلمى على الباب
سلمى بغيظ دخلت وقفلت الباب : طب مفيش ازايك يا سلمى انت جيتي يا سلمى خلاص نستيني
حبيبة : طبعا ده أنت جنبي هوا خيال
سلمى اتغاظت أكتر وسابتهم و دخلت لقت باباها قاعد قدام التلفزيون وسرحان على غير عادته قربت منه بهدوء وباست راسه وهو انتبه ليها
سلمى بغيظ : مساء الخير يا بابا
محمد بهدوء : مساء النور مالك
سلمى بغيظ بصت لزهرة وحبيبة الل داخلين عليهم وهما حاضنين بعض وردت عليه : هو فيه غيرهم
محمد : طبعا مااحنا اولاد البطه السودة1
حبيبة : ازايك يا ميدو
محمد ضرب كف بكف وقام راح لاوضته وهو بيتمتم : حسبي الله ونعم الوكيل
سلمى : خدني معاك
وراحت هي كمان اوضتها وحبيبة بصت لزهرة بضيق مصطنع : شايفه يا زهرتي مش طايقيني ازاي
زهرة بهزار : بيحسدونا علشان احنا الحلوين
حبيبة : معاكي حق تعالي اقعدي أنت واحشاني اوي
زهرة : وانت أكتر ياقلبي بس ادخلي غيري هدومك عبال ماجهز لك أكل
حبيبة قامت وباست جبينها : أنا أكلت اعملينا شاي وحشني طعم الشاي من تحت ايدك
زهرة قامت : بس كده من عنيا
حبيبة دخلت وابتدت تقلع الجاكت وتفك ازرار قميصها وفكت ربطة شعرها وقلعت الجزمة وفالوقت ده خرجت سلمى بتجفف شعرها بالمنشفة .. حبيبة حطت شنطتها وهدومها على السرير وقربت من الدولاب وابتدت تدور بين بجامات سلمى
سلمى بغيظ : دولاب أبوكي
حبيبة : يا ختي احمدي ربنا ان هدومك هتنال شرف لبسي ليها
سلمى قربت منها وقفلت الدولاب : طب شوفي هتلبسي ايه
حبيبة بضريخ : يااا زهر..
سلمى حطت ايدها على بوقها وزقتها على الدلاب تاتي : خدي خادك ربنا
حبيبة بابتسامة انتصار : خاد عدويني يا حقودة
سلمى زفرت بغيظ وطلعت وسابت لها الاوضة .. وحبيبة أخدت هدوم ودخلت الحمام وبعد نص ساعة خرجت وهي لافه شعرها بمنشفة .. أخدت موبايلها وطلعت لبرا لقت مامتها وباباها قاعدين مع محمد وزهرة وسلمى وزياد
فتحت الموبايل وعملت صورة سيلفي وبعتتها لاميرة .. وقربت من باباها وباست راسه : وحشتني يا عبدو
عبد الله بابتسامة : وانت كمان يا حبيبتي
وقربت من بسمة : عامله ايه يا بسمتي
بسمة بابتسامة : كويسة كنت مستنياكي فوق
حبيبة قعدت جنب زهرة وحضنتها : معلش يا بسمتي بس زهرتي واحشاني اوي
زهرة بحب : وأنا كمان حبيبتي واحشاني اوي وهخدها الليلادي منك
عبد الله بضحك : اوي اوي خديها اسبوع
حبيبة بصت له بغيظ والكل ضحك ماعدى محمد الل بص لعبد الله بغيظ وسلمى ضحكت لما شافت نظرته
عدا الوقت مابين الهزار والضحك والعشا وراح عبد الله ومراته شقتهم
💝💝💝💝💝💝💝
عند البنات حبيبة سلمى نايمين على السرير كل واحدة بتفكر فمستقبلها
حبيبة : سلمى
سلمى : ها
حبيبة : عندك صورة لعدنان
سلمى بصت لها وكشرت : عايزة ايه
حبيبة ضحكت : فضول عايزة اعرف شبه عادل ول لاء
سلمى بابتسامة خبيثة : عادل
حبيبة ضربتها بالمخدة وسلمى ضحكت وقعدو يضربو بعض لحد ما سمعو رنة موبايل حبيبة .. اخدته من الكومدينو ولقت رسالة من رقم مش مسجل فتحتها ( اتخمدي بقى عايز أنام )
قرتها وحطت الموبايل تاتي
سلمى بفضول : مين
حبيبة بزهق : النمرة غلط
سلمى بشك : وريني
اداتها الموبايل وسلمى ضحكت : طب والله معاه حق
حبيبة بغيظ : كسر حقك أنت وهو
سلمى ضحكت ورجعت لها الموبايل ونامت على السرير وحبيبة نامت جنبها تاني
سلمى : بيبه
حبيبة : ها
سلمى : مش ملاحظة أن بقالك فترة طويلة معاملتيش مقلب من بتوع زمان
حبيبة بابتسامة : وحشوكي
سلمى ضربتها على كتفها : لاء خالص
(سكتت لحظات وبصت لها وكملت ) : ايه الل اتغير
حبيبة بتنهيدة : بصراحة بصراحة متبقتش بفكر فالمقالب
سلمى بابتسامة : بقيت كافية خيرك شرك
حبيبة هزت راسهل بآه وسلمى كملت : ليه بقى
حبيبة بصدق : مش عارفة
سلمى بتفهم : علشان بقى فيه الل شاغل بالك2
حبيبة بتنهيدة : تفتكري كده
سلمى بتأكيد : وأبو كده كمان يا بنت عيب ده أنا الل عاجناك
حبيبة : طب ما كنت تستني أما استوي استعجلت علي ليه الله يحرقك
سلمى وهي بتاخد المخدة وتضربها بيها : الله يحرقك انت
حبيبة مسكت المخدة وضربتها هي كمان وابتدو يضربو بعض ويضحكو وسمعو رنة موبايل حبيبة وسلمى فطست من الضحك
حبيبة بغيظ : اوووف مش هنخلص بقى
فتحت الرسالة ( نامي يخرب بيتك عندي شغل بدري عايز أنام يانااااااس )
سلمى خطفت الموبايل من ايدها وقرت الرسالة بصعوبة وهي بتصحك لحدما ما عيونها دمعت
سلمى بضحك : هاخد النمرة لازم اعرف مين
حبيبة بغيظ : خدي الموبايل كله مش بس النمرة ( وردت :" ما تنام ولا تولع بجاز وسخ أنا مالي " ورمت الموبايل لسلمى )
سلمى: هههههههههههههه
حبيبة ضربتها : وبعدين بقى .. هنام أنا يكش تفرقعي ونرتاح منك
سلمى بعدت عنها وهي لسه بتضحك : بعد الشر علي
حبيبة قامت بتكشيرة : شكلي مش جايني نوم معاكي انا هقوم اروح لزهرتي
وطلعت برا وقفلت الباب بقوة وسلمى ميتة من الضحك .. حبيبة راحت لاوضة محمد وهي بنغني وبترقص : وأنا عاملة نفسي نايمة .. وانا عاملة نفسة نايمة .. وأنا عاملة نفسي نايمة
محمد كان نايم على السرير وسمع صوتها جايه : اه طبعا انام ازاي وهي ف البيت ده أنا اتجننت يازهرة ازاي اتخيل أني انام
وبص لزهرة الل انفجرت من الضحك بضيق وقام قرب من الباب بشويش واستنى لما حبيبة قربت منه وخبطت بايديها لاتنين وفتحه بقوة وسرعة وقعت حبيبة الل ما كانتش عامله حساب
حبيبة على الأرض : شوف قلة أدبه
وقامت ونفضت ايديها وابتدت ترقص وهي بتقرب من السرير وكملت : وانا عاملة نفسي نايمة .. وانا عاملة نفسي نايمة
محمد بصلها باشمئزاز وخرج وقفل الباب وراه بقوة و حبيبة التفت تشوف الباب وغنت : شوف قلة أدبه
زهرة قامت ترقص معاها : و أنا عاملة نفسي نايمة .. وانا عاملة نفسي نايمة
حبيبة وهي بتسقف وترقص : يا خرااااشي
يتبع .......
