عيناكِ منظومة تحتوي قصائدها

البارت ٥

فبيت ابو علي ...
ام علي : ولد اموله طالع صيته صاير يعرف يضرب ! والله والله لولا عيون اخوي ياسر كان الحين نايم بالسجون يا رائد
علي وهو ماسك راسه :يا يمه خلاص تكفين ! عورتي راسي زود !
ام علي : انت وين لسانك يوم انه يضربك ؟
علي: يمه قلت لك خلاص تهاوشنا ضربني وضربته وخلاص لا تكبرينها وهي صغيره الله يخليك !
جلست ام علي وهي معصبه مرهه من رائد وما تبي حتى تسمع اسمه، وعلي يفكر شنو رح يصير بعد ما عرف رائد انه كل الي قاله كذب وانه اديم بريئه من كل كلامه واتهامه : هين يا رائد والله ما تحلم فيها لو على موتي

عند اديم وهي تكلم ساره على الجوال : وهذا كل الي صار يساره! ومحتاره مو عارفه اتصرف
" ساره كانت كثير مقربه من اديم وكانو صحبه من قبل لا تشارك ساره بتدريب الاسطبل مع اديم وكانو يتكلمو مع بعض بكل شي يصيرعندهم "
ساره : موضوعك صعب صراحه ، من فتره وانتي بس تكلميني عنه وعن مواقفك معه بس ما تخيلت انه يحبك ابداً
اديم: انا من البدايه احاول ابعد عنه لاني اعرف قلبي خاين وكنت خايفه يخوني ويحب رائد
ساره : الله يعينك الصدق ، بس من كلامك والي صار بينكم اخر الايام واضح الرجال يبيك ويحبك بس انتي مقفلتها بوجهه .
اديم : يساره خايفه انكسر والله !
ساره : اديم يعيوني ما يصير كذا من اول مره نقفل كل شي بوجهنا ونفس ما قال لك رائد مو الكل نفس الشي ! يمكن رائد يصدق معك! يمكن انه صادق ويبيك لا تكسرين قلبه نفس ما علي كسر قلبك ، حرام ماله شغل!
اديم بحيره : مدري بفكر والله يعيين ، بقفل الحين بنام تصبحين على خير
ساره : وانتي من اهله يعيوني

قفلت الجوال وجلست تفكر بكلام رائد وساره من كل النواحي لين نامت...
الساعه 1:00 الليل ..
سعد عند ماجد : ماجد اسمع العيال كلهم متجمعين عند محمد ومن الصباح قالو لي نجي انا وانت ، قوم دام ابوي نام خلينا نروح نفلها شوي ونرجع
ماجد : مجنون انت ! الساعه وحده لو ابوي صحى علينا وحنا طالعين او وحنا جايين بيموتنا !
سعد : يخي تكفى ما بيصحى يلا قوم الكل موجود حتى احمد وعامر وعبود يلا شوي وبنرجع وعد
ماجد : قم اذلف لوحدك انا تبت من هالسوالف مابي مشاكل مع ابوي
سعد : يعني ما تبي تجي ؟
هز ماجد راسه : لا روح لوحدك ولا تتاخر

طلع سعد وتوجهه للعيال ، دخل عليهم وسلم وجلسو يسولفون مع بعض ، واخذهم الوقت من سوالف و طقطقه لين صارت الساعه 3:00
احمد : يوهه يعيال ! بياذن الفجر واهالينا رح يقومو
سعد بخرشه : فذمتك ؟!
احمد : وربي ، يلا يلا روحنا مو ناقصنا مشاكل
سعد : منجد انا امس حتى رضى علي ابوي والله لانجلد لو شافني الحين بهالوقت راجع للبيت !
قامو الكل لبيوتهم وميتين ضحك على سعد وخوفه من ابوه ، وصل سعد البيت ومن حسن حظه قدر يدخل البيت بدون ما يحس عليه ابو زيد ..
بس للاسف الحظ ما حالف احمد هالمره ..

فتح الباب بيدخل وحصل ابوه بوجهه : يييمممهه ! بسم الله الرحمن الرحيم !
ابو خالد : وجع قصر صوتك !
احمد : خرشتني يا يبه !
كمل مشي بيدخل لغرفته وسحبه ابو خالد من يده : وويييننن!
احمد بخوف : لغرفتي بنام
ابو خالد : وين كنت بهالوقت ؟!
احمد : عند محمد كانو كل العيال متجمعين ورحت معهم
ابو خالد : انت تدري كم الساعه ! من متى وانا عادي عندي اخليكم للفجر برا البيت ومع خوياكم !
احمد : بس يا يبه ما صار شي جلسنا وسولفنا وضحكنا شوي وروحنا لبيوتنا بس هذا الي صار
ابو خالد : والله حلو وترد بوجهي بعد ! مافي دخله على الغرفه ومافي نوم ! يلا روح عند خوياك الي كنت عندهم !
احمد : يبه كل من راح لبيته وين انام انا ! خلني انام بغرفتي وبكرا الصباح عاقبني !
سحبه ابو خالد من الجاكيت ووقفه على الجدار : بروح اصلي واقرا قران لو شفت انك جالس ولو لثانيه لا تلوم الا نفسك يا احمد !
احمد الي كان ماخذ الموضوع طقطقه : يبه شفيك هدي المزح!
ضربه ابو خالد على راسه : اصغر خوياك عشان نمزح مع بعض !
احمد حس انه ابوه جدي جداً ومافي مزح ورح يبقى واقف لين احد يرحمه ويقنع ابوه عشان يروح لغرفته : اسف يبه ، قلت لك هذي اول واخر مره والله
ابو خالد : خلك واقف لا اشوفك جالس !