"မနက်ကလည်း ခေါင်းလျှော်သွားတာကို အခုထပ်လျှော်တာလား"
"စိတ်တွေနောက်နေလို့ အစ်ကို"
"ရေသုတ် အင်္ကျီဝတ်ပြီး ဒီကိုလာ"
Dryer ကိုပလပ်တပ်လိုက်ပြီး ကုတင်စွန်းမှာ ထိုင်ခိုင်းကာ ဆံပင်တိုတိုလေးတွေကို လေအေးအေးဖြင့် ခြောက်သွေ့စေလိုက်၏။ dryer ခလုတ်ပိတ်လိုက်တာနဲ့ ကျွန်တော့်ခါးပေါ်ရစ်သိုင်းထွေးဖက်လာသည့် လက်တွေ။
"အစ်ကို..."
ခေါ်သံကအားမပါ။
"ကိုယ့်ကောင်လေးဘာဖြစ်လာလဲ"
ဆံပင်တွေထဲ လက်ချောင်းတို့နဲ့ထိုးဖွပေးလိုက်တော့ ချက်ချင်းမော့ကြည့်လာသည်။
"ဒီဇင်ဘာ ၂၅ ခရစ်စမတ်နေ့ကျရင် ကုမ္ပဏီက staff party ရှိတယ်"
"အင်း... မသွားချင်လို့လား"
"မသွားချင်ပေမယ့် ဒီတစ်ခါတော့ငြင်းလို့မရဘူး။ ပြီးတော့ စုံတွဲလိုက်တက်ရမှာ"
အာရုံစိုက်ခံရတာတွေမကြိုက်တတ်သူက ပျော်ပွဲရွှင်ပွဲပါတီတွေရှောင်တတ်ပေမယ့် ဒါက လူမှုနယ်ပယ်ကိုတိုးချဲ့ထားရမယ့်အခွင့်အရေးအဖြစ်လည်း သူ့ကိုလက်မလွှတ်စေချင်။ စုံတွဲပွဲတက်ဆိုတဲ့အတိုင်း လူပျိုလူလွတ်ဖြစ်ပါက ချစ်သူရည်းစားခေါ်လာရမည်၊ အိမ်ထောင်ရှိရင်လည်း အိမ်ထောင်ဖက်မဖြစ်မနေလိုက်ရသည့်ပွဲမျိုးပင်။
"အဲဒါ အစ်ကို လိုက်ပေးဖို့ အဆင်ပြေရဲ့လား"
"ဟော စိတ်မကြည်နေတာ ကိုယ်လိုက်ရဖို့ဖြစ်နေလို့လား"
"ဟုတ်တယ်။ ဒီလောကက သိပ်ရှုပ်တာလေ။ ရှုပ်တာတော့ သူ့နယ်ပယ်နဲ့သူရှုပ်ကြတာချည်းဆိုပေမယ့် အခုက ကျွန်တော့်ကို ပွဲတက်စေချင်တာနည်းနည်း။ အစ်ကို့ကိုစပ်စုချင်တာများများ ကျွန်တော်မသိဘဲနေမလား"
ပြောနေရင်း မေးရိုးတွေတင်းပြီး မျက်ခုံးတန်းတွေပါတွန့်ချိုး၏။ အခုထိ ကျွန်တော့်ကိုဖက်တွယ်ထားသူရဲ့ပေါင်ပေါ်ဝင်ထိုင်လိုက်ပြီး အေးစက်တည်တင်းနေတဲ့နှုတ်ခမ်းတစ်စုံကို ဖိနမ်းပစ်လိုက်ရ၏။ တော်ရုံစိတ်ထဲမထားတတ်သူကို ဒီလောက်မှုန်ကုပ်သွားသည်အထိ ဘယ်လိုစကားလုံးတွေနဲ့ခြိမ်းခြောက်ပြီး ကျွန်တော့်ကိုအပါခေါ်လို့ ပွဲတက်ခိုင်းလိုက်သည်မသိပါ။
![](https://img.wattpad.com/cover/231329378-288-k948086.jpg)
Extra
Start from the beginning