أنارت عتمة قلبي

الحلقة الرابعة والثلاثون

#أنارت_عتمة_قلبي

الحلقة الرابعة والثلاثون الجزء الأول

------------------------------
----------------------------------------

قراءة ممتعه💜

‏"لا تدمن التفكير لأن الله وليُّ التدبير،
ولا تقلق من المجهول وكل شئ عند الله معلوم،
طمئن قلبك المؤمن فأنت في عين الله الحفيظ الذي عطاياه لا تمنعها السدود ولا يردها أي مخلوق

تفائل وأطمئن.. نصيبك حايصيبك💞 "

#وأبتسم_ماخلقك_الله_لتعبس😊

" أنتي شني إديري إهنايا!؟ وشني هذا اللي لابستيه؟ "

بتول قفزت في مكانها.. حطت الريموت لوطا وقامت تليفونها ووقفت بسرعة وهيا متوتره من خشته عليها في هالوقت..
ماكنتش متوقعه أنه قاعد نايض لتوا
متعوده عليه يرقد بكري وإلا ماكنتش قعمزت في الصالة باش تتفرج على إعادة الحلقات متاع الإسبوع كامل من المسلسل اللي إتبع فيه بلعت ريقها وقالت بإرتباك: كنت نتفرج أني ماجانيش نوم

ربيع عقد حواجبه وقال: وشني اللي لابستيه هذا أنتي كيف تقعدي هكي مش حاسبه حساب لحد معاك في الحوش ولا كيف؟

بتول مررت نظرها للبستها اللي مشت فيها للحفلة ونست تبدلها وقعمزت طول على التلفزيون بيها وقالت: خيرها لبستي قاعده مابدلتش

ربيع بغضب: وإن شاء الله مشيتي فيها للحفلة!؟ قصدك طلعتي هكي من الحوش أنتي!؟

بتول اللي كانت شابكه إيديها وضاغطه على التليفون قالت بتوتر: اه.. أي.. قصدي لا.. ماهو كنت..  ولما أستاقظت لروحها شني قاعده تقول وأنها مش مضطره تبررله خدت نفس وشافتله بنص عين وقالت: أنت شني دخلك فيا أصلا!؟

ربيع بعصبيه: كيف شني دخلي كيف!؟ مش بنت خالتي ومحسوبه على هالحوش واللي يضرك يضر خواتي مانبيش الناس اللي تشوفك تحكم على خواتي بأنهم زيك بما أنكم عايشين مع بعض في نفس الحوش

بتول أبتسمت بهزوة وقالت: هذا اللي هامك أنت خواتك؟ وكملت بتهكم: ماتخافش عليهم سمعتهم تتوسخ مني هيا من ربي الله الله

ربيع قدم كم خطوة وهو الغضب عامي عيونه وبعياط: أنتي شني تقول يا..... ، دماغك هذا شني فيه بالضبط!؟ يا أما تتكلمي كويس يا أما أضمي فمك وتحترمي نفسك

بتول بنظره حاده ونبره أحد: هالكلام هذا قوله لروحك أنت اللي مفروض تحترم نفسك وماتطاولش على بنت خالتك زي ماقلت والمفروض اللي ترضاه لخو..... وسكتت لما رن تليفونها مكالمة ماسنجر سكرت عيونها وهيا ضاغطه عليهم بقوة وعضت على شاربها وهيا في خاطرها تلعن في روحها كيف نساته عالي

ربيع اللي نسي كل شي وبعيونو يقدحو قال: من اللي يتصل بيك في هالوقت!؟

بتول فتحت عيونها وفصلت على المكالمة وحطت التليفون على الصامت وقامت رأسها وقالت وهيا متصنعه هدوء بارد: واحده صاحبتي