أنارت عتمة قلبي

الحلقة السادسة

#أنارت_عتمة_قلبي

الحلقة السادسة

------------------------------
----------------------------------------

قراءة ممتعه💜

" لا تحكُم على الإنسانِ من مظهرهِ فإن المظاهِر قد تخدع الأبصار ، تماماً كالبحر في جمالهِ و روعتهِ ، ولكنه بالحقيقة يُعرف بأنه غدار ولا تٌقيم أي إنسانٍ بأصله وفصله، فمن نسمة هواءٍ لطيفه يتكون الإعصار.
انظر لصدقِ الشخص وطيب أخلاقه
فبذلك يُقَيمُ الناسُ الأخيار.👌👍 "

في مكتب معتصم
إنضمت ليهم نور وهيا منزله رأسها ومتحشمه وماتردش إلا إذا كان توجهلها سؤال خصيصا وتكون إجابتها مختصره كلمه أو إثنين، هالشي كان مش غايب على معتصم اللي كان مركز على كل حركاتها وقرر أنه تكون ليه جلسة خاصه معاها على إنفراد باش تأخذ راحتها أكثر وتتكلم بأرياحيه ومن غير خوف

معتصم وقف ناهي لهالجلسه اللي أستمرت لساعه ونص تقريبا وكان الحديث فيها  عباره عن كم هائل من  الإستفسارات والإسئلة اللي تخص يوم الحادثه، حاول فيهم معتصم مايغفلش على ولا نقطه مهما كانت صغيره وعاديه وحتى اللي سامعه من قبل طلب يسمعه ثاني لعلا وعسى ينتبه لنقطه فاتاته المره الأولى،

معتصم، بإبتسامه: تمام لحد إهنايا كويس بكل، أني العصر عندي موعد مع أهل البنت اللي توفت ولو قدرت نقنعهم يقدمو شكوى حتى هما يكون ممتاز جدا، هكي راح تكون الأغلبيه لينا وفي إيدينا نقاط مهمه نقدرو نوجهو بيها الأنظار عليه في الجلسه الثانيه بإذن الله

وقفو الكل وأستأذنو بعد ماطمنهم معتصم بأنه الجاي أفضل والأمور راح تتغير لصالحهم مع التطورات الجديده اللي هيا وجود نور في صفهم، وقبل مايطلعو تلفتو وأولهم نور لما معتصم نادى بإسمها

معتصم: أنسه نور لو سمحتي خليك شويه حاب نسمع منك شخصيا زي ماسمعت من البنات
نور قامت رأسها بإستغراب وقعدت تشوف للبنات بتوتر،
هند نزلت عيونها وطلعت أما خوله أبتسمت وهيا تحاول إطمنها وطلعو الكل وخلوها في المكتب
معتصم قعمز في الكرسي اللي مقابل لمكتبه وأشرلها تقعمز مقابلاته
قدمت نور وهيا مرتبكه وتفرك في إيديها بتوتر، وقعمزت وهيا منزله رأسها
معتصم بجديه: تفضلي ياأنسه نور تقدري تتكلمي أني نسمع فيك
نور، بتوتر: شني بنقول!! قصدي على شني تبيني نتكلم
معتصم أبتسم بخفه على إرتباكها: نبيك تحكيلي أحداث اليوم اللي صارت فيه الحادثه بالتفصيل
نور، بخوف: شني بنحكيلك زي ماقالولك البنات نفسه كنا مع بعض أحني أصلا
معتصم تنهد: أي حكولي البنات صح بس حاب نسمع منك حتى أنتي مرات يكون فيه تفصيل أو شي هما إنسوه أنتي تذكريه ويفيدنا، وبعدين حسب ماعرفت أنه أنتي كانت ليك علاقة خاصه مع أمجد يعني أنتي أقرب واحده ليه وممكن تعرفي عليه معلومات مايعرفوهاش البنات
نور تنهدت بضيق
معتصم كان عارف أنه هالحادثه واقع ذكراها مش ساهل أبدا وهالشي اللي كان باين على نور من توترها وإرتباكها وخوفها ورجفة إيديها اللي من لما خشت وهيا تفرك فيهم بإستمرار وماحاولتش تقيم عيونها ولا لحظه فكر أنه يطمنها ويشجعها شويه باش ترتاح وتقدر تحكي، أبتسم وهوا يقول: عارف أنه هالموضوع مش ساهل بالنسبه لبنت في عمرك وبالأخص لو تعرضت للي أنتي تعرضتيله، بس مادامك جيتي لحد إهنايا معناها أنتي قويه وعندك إراده وحابه من داخلك أنك تأخذي حقك..
فلهذا سكوتك مش حل كلامك يفيدك ويفيد صاحباتك ولو أنتي خايفه أو فيه شي ثاني ضاغط عليك ومخليك ساكته فياريت تحكي وثقي وتأكدي أنه اللي ماتبيشي أنتي يطلع مش راح يطلع برا هالحيوط أني مش جابرك على شي وأنتي مخيره مش مسيره، ياأما تحكي وتكوني قويه زي البنات وإدافعي على حقك ياأما تسكتي وتكملي باقي حياتك وأنتي مظلومه وثقتك في نفسك مهزوزه..