أنارت عتمة قلبي

الحلقة الثانية عشر

#أنارت_عتمة_قلبي

الحلقة الثانية عشر

معليش أعذروني خذاني النوم ونسيت الحلقه بكل
لين نضت بنصلي الفجر إذكرتكم😅

عليك عمله سامحوني بالله 😞

------------------------------
----------------------------------------

قراءة ممتعه💜

" ثِقوا بأن الأيام الجميله قريبة جدا ولايفصلكم عنها إلا طريق واحد وهو الصبر🤍 "

#أبتسمُ_ماخلقتُ_لتعبسُ😊

.
.
.
.
.
.

ملاك قعدت واقفه في مكاني ونشوفله بحده وإستغراب لين طلع، ماقدرتش نستوعب اللي قاله ولا حتى قدرت نفهم أصلا كيف قدر يتجرأ ويحكي معاي هكي!!، كيف يدخل فيا وبأي حق!!
وبعدين أي حقوق اللي قاعد يتكلم عليهم، هالموقف كان كفيل بأنه يخليني نوصل لأقصى درجات الغضب،

هنادي خشت بسرعه، وبفضول: خيره المغرور هذا شني قالك؟

ملاك قعدت ساكته وأني نحاول نتحكم في ردة فعلي ونكتم غضبي داخلي وأني نردد في خاطري أستغفر الله العظيم من كل ذنب عظيم وأتوب إليه، لا حول ولاقوة الابالله العلي العظيم، لين حسيت روحي هديت شويه

هنادي، بنفاذ صبر: تي تكلمي شني صار بينكم شني قالك، والأهم شني قلتيلا أنتي باش طلع وهو إبتسامته شاقه وجهه!!

ملاك شفتلها بنص عين، وأني مغتاضه ونقول في خاطري طلع مبتسم صار!! فرحان باللي داره هالمغرور، شني يبي مني!! هذا اللي كان ناقصني غير أني نتعامل مع مريض عقلي،
أي مريض مستحيل يكون طبيعي مستحيل، هزت رأسها يمين ويسار وطلعت من غير ماتقول ولا كلمه،

وهنادي طلعت تجري وراها وعلى قد ماحاولت معاها تبي تعرف اللي صار

إلا أنه ملاك مانطقتش بي ولا حرف وقعدت تشوفلها بنظرات غضب حاده مابين الدقيقه والثانيه، لين جي جمال وطلعو بيروحو

أما مراد بمجرد ما طلع من الجامعه تلاشت إبتسامته وإنزاح إحساسه بالنصر باللي داره، وحلت بدله الحيره والضيق من نفسه كيف دار هكي

قعد طول الطريق وهو تفكيره مشغول ويحاول يلاقي مبرر لتصرفه الغير منطقي بكل،

بس للأسف عجز يفهم الطريقه الغير عقلانيه اللي بين بيها ردة فعله إتجاه تجاهلها ليه،
وماقدرش يلاقي تفسير مقنع يقدر يقلل بيه من لومه وتأنيبه لنفسه على تهوره وعدم مقدرة على التحكم وتسرعه في إفصاح رغبته الشديده للإرتباط بيها بالشكل الواضح هذا

قعد يفكر كيف راح يكون حكمها على تصرفه، وشني ممكن يكون إنطباعها على شخصيته، وهل راح يولد حاجز بينه وبينها في المستقبل

إلا أنه ملاك كان تفكيرها غير أبدا وفكرة الإرتباط اللي قصدها بكلامه ماخطرتش على بالها نهائي، كل اللي قدرت تفهمه أنه قاعد حاقد عليها ويحاول يهينها بأي طريقه يقدر عليها