أنارت عتمة قلبي

الحلقة السابعة والعشرون

مراد أبتسم وهز رأسه وقعد مركز عليها بعيونه لين تخطاته وفاتت ماشيه للمطبخ، قال بصوت واطي بس مسموع: متأكده لون شعرك الطبيعي هذا؟

ملاك لفت وهيا رافعه حاجبها وبشبه إبتسامة: ماتقوليش شني قصتك أنت مع شعري اليوم؟

مراد مسح بإيده على شعره وقال: لا قصة ولاشي بس فرحان بشوفته، وعجبني أول مره نركز على لونه المميز اليوم في الأربعه مرات اللي شفته فيهم

ملاك ضحكت بخفه وهي تهز في رأسها بقله حيله وقالت: كويس فرحتني أنه عجبك وفرت عليا وعلى نفسك، ولفت وتوجهت للمطبخ

مراد بهمس: أني اللي فرحان بأنه ربي رزقني بيك، ولف متوجه لدار ملاك اللي راقدين فيها البنات

🌸🌸🌸🌸🌸🌸🌸🌸

أستاقظ من نومه على صوت المنبه اللي معيره على وقت أذان الفجر

طلع من داره وتوجه للحمام ( أكرمكم الله ) توضأ،

ومشي لدار أخته بينوضها
خش للدار وضحك بخفه لما شافها كيف غامه روحها في الورغان ومتكمكمه فيه، أنتبه لتليفونها اللي كان يأذن فيه الأذان وهيا منقصتله الصوت، مما يعني أنها نايضه وسمعاته ونقصاته ورجعت رقدت، قدم خذاه وعلاه وحطه على وذنها

جنى نفضت الورغان وقعمزت وهيا تنفض بتذمر: ياربي، اف يا إبراهيم اف أعتقني يا أخي

إبراهيم ضربها بخفه على رأسها، وبغيض: كم مره قتلك اف هذه معاش تقوليها

جنى،بضيق: حاضر معاش نقولها بس خليني نرقد،

إبراهيم بحده: ماكش صغيره ياجنى باش كل ليلة أتعبيني هكي لو كأنك فالحة راك أنتي اللي تنوضي فيا مش أني!؟

جنى، بإستهبال: أولا أني قاعدة صغيره كيف خاشه العشرين مايعتبرش رقم كبير، وثانيا غذوة أو بعد غذوة ماتنوضش توا إنوضك أني، كويس هكي!؟
إبراهيم قاعد يشوفلها بحده
وجنى أبتسمت بعبط وقالت: تفاهمنا خلاص خليني نرقد، ولفت بترجع بتتكى وهيا شاده الورغان وجابداته معاها

قرب إبراهيم وجبده منها لوحه لوطا وهو يقول بغيض: فزي تحركي صلي وبعدين ولي أنخمدي

جنى رجعت عدلت تقعميزتها وهي تتأفف بغيض، شافتله بحده وقالت: عليا عذر ياإبراهيم تريحت توا!؟

إبراهيم لف رأسه للجهة الثانية ونزله بخجل وقال بلوم: ماك قلتي هكي من الأول ليش أطولي فيها وهيا قصيره،

جنى بنص عين: زعميتني متحشمه منك لكن أنت غبي ماتبيش تفهم شني بنديرلك

إبراهيم بسخريه: خليته الذكاء ليك أنتي يافهيمه، أرجعي أندفسي،

وتوجه للباب بيطلع فتحه ومن غير مايشوفلها قال بنبرة واضح فيها الوعيد: قصة الأف هذه مش راح نعديلك هالمره لين تتأدبي عليها