فأذاقني النَّجوىٰ (الجزء الثاني من همسات العشق)

الفصل الرابع عشر

فأذاقني النجوى
ــــــــــــــــــــــــــــ

كانا يسيران بأحد محلات تسوق للمنتجات الغذائية وهما يمسكان عربة تسوق صغيرة، اتجه كيرلس إلى أحد الأرفف ليقول وهو يلتقط علب صلصة الطعام: والله ما عارف أعمل معاه ايه، انا احترت ياض يا عصام، أحمد ده واقع بين مشكلتين كل واحدة أنيل من اختها.

وقف عصام بجواره ليقول بعد أن نفث دخان سيجارته: والله انا عايز اساعده بأي طريقة، يكش اتجوز واحدة من الاتنين عشان يرتاح هو.

كيرلس: وحياة أمك!
نظر له شرزًا ثم استأنف مغيرًا دفة الحديث: قلنالك احنا اننا قابلنا الواد يوسف؟ يوسف بتاع الثانوي، دلوقتي بقى يوسف عمران الممثل المشهور والزهر لعب معاه عالآخر.

عصام بتشدق: واحنا امتى الزهر يلعب معانا ونعوم على وش الفتة بقا، ناولني الشيبسي ده كده.

وعلى الصف الآخر..
سار قاسم يتأفف بضيق وهو يتمتم: والله حرام اللي بيحصل فيا ده.

أخرج هاتفه من جيبه حينما شعر به يهتز بالرنين ليجيب على والدته بسأم: ايوه يا ماما، آه خلاص جبت كل حاجة وجاي في السكة اهو، ايوه كيلو لحمة، كيلو بطاطس، اتنين كيلو بصل، وتلاتة كيلو طماطم، يا ماما مفعصة ايه بس كارفور مفيهوش طماطم مفعصة، طب خلاص هروح أحاسب أهو وجاي على طول، سلام.

استدار متوجهًا إلى المحاسب لدفع ثمن المشتريات ليصطدم بشابين كانا متجهين بنفس الطريق، هتف عصام بخشونة وهو يدفعه بخفة في كتفه: ايه يابا ما تحاسب يابااا !!

قاسم بضيق: ياعم انت اللي خابطني هو ايه اللي حاسب.

اقترب عصام بوجهه من وجه قاسم ليهتف بغضب: الله ده انت جميل وبتبولق معايا في الكلام، شكلك عايز يتعمل معاك السليمة.

قاسم بغضب وهو يدفعه: وريني هتعملها ازاي ياروح امك.

وقبل أن يلتحم الأثنان اندفع كيرلس بالمنتصف وهو يهتف: صلوا على النبي يا جدعان مش كده، لامؤاخذه يا هندسة هو بس عصبي شوية.

قاسم بغضب: عصبي على نفسه مش علينا.

دفع عصام كيرلس من ظهره وهو يهتف: اوعى يا كيرلس سيبني، وحيات امي ما هحلك.

كيرلس بغضب وهو يضرب عصام في كتفه: بس يا زفت الطين انت، هو انا كل اما اخدك معايا في حتة تعملي مشاكل.

استدار كيرلس ليعتذر من قاسم بأسف: أسفين والله يا باشا بس.. ايه يا باشا انت بتبصلي كده ليه؟!

عقد كيرلس حاجبيه وعاد للخلف خطوتين يقف بجانب عصام ليهمس له باستغراب: هو ماله مبحلق فينا كده!
نظر كيرلس لعصام ليجده هو الآخر ينظر لقاسم بقوة وحاجبين معقودين ليهتف: انت مبحلق ليه انت كمان!