أنارت عتمة قلبي

الحلقة التاسعة عشر

سكتت شويه وقالت: أصلا إحتمال كبير ناخذها عندي، لأني مش راضيه على قعدتها مع الحربه مرت خوك بكل غير الله غالب مضطرين نسايروك أنتي ورأسك اليابس

ناضت وقفت وطلعت من الدار وهيا تلف في وشاحها، وبحقد: هذا كله والحربه عند أختها نقطع إيدي من إهنايا، وهيا تأشر على كتفها: كان مش بلعاني هاربه مننا وتستني فينا لين نروحو، شافت للممر اللي يدخل لزوز ديار وبينهم حمام وبلوية شارب: مسكرتهم الهانم خايفه مننا طيح والله سعدها وسعد خوك معاها، أخ يالقهر أخ

ملاك اللي كانت طول الوقت ساكته وتبلع وتساير فيها وقليل ماترد بكلمه أو أثنين، هزت رأسها بأسف وقالت: تسكر ولا تفتح أنتي شني دخلك فيها حاجه ماتخصكش بكل، ياسرك يامروه لقطتي ذنوب بما فيه الكفاية اليوم من الصبح وأنتي شادتيها نواح ودعي

مروه رفعت سبابتها في وجهها وقالت بغيض: أنتي أخر واحده تتكلمي فاهمه مش عارفه كيف مبرده روحك هكي قسمآ بأيات الله حاسه روحي كلي نغلي غلي من صبعي الصغير لقبوعة رأسي من فوق، جبتيلي الضغط من وراء عمايلك، شافتلها بتفنيصه وفتحت الباب وطلعت وهيا تنفض بتستني راجلها في الجنان

ملاك تنهدت بضيق وقالت: معليش ياملاك تحمليها معاها حق، معذوره ياأختي معذوره، وخذت شنطتها وطلعت وسكرت الباب، قدمت وهيا تشوف فيها مقعمزه على الدرجتين اللي قدام الباب

قعمزت جنبها وتحاول تغير الجو المشحون اللي بينهم، وقالت بإبتسامه: واسع الجنان ماشاءالله إنديرو فيه سهرية يوم الثلاثاء شني رأيك توا نقول لعامر يغطيهولنا من فوق بقيطون ويتقيه كويس من الصقع، شافتلها وبغمزه، فكره صح!؟

مروه اللي كانت مغتاضه منها وقعدت تشوفلها على جنب من لما تكلمت، وجعتها أختها اللي واضح أنها مضايقه وبروحها مش عاجبها اللي قاعد يصير بس مضطره تكمل اللي بدت فيه غصبآ عنها من العيشه اللي عايشتها ماتبيش تقعد عاله وهم على حد، وقاعده تحاول ترضيها وتغيرلها جوها، ماحبتش تزيدها أكثر وتعكر عليها أجواء فرحة أحلى أيام في حياتها حتى ولو كانت بسيطه أبتسمت بغيض وقالت: باهي اللي بديري حتى سهرية ماقلتيش يوم واحد حفلة وبالك

ملاك ضحكت وقالت: سهريه وحفلة باهي هكي
مروه، بغيض وإصرار: وقفه!؟
ملاك، بإبتسامه: حاضر سهريه وقفه وحفلة غير أنت روق ياجميل بس
مروه شافتلها بنص عين وأبتسمت وقالت: والله أني هذا كله على خاطرك مانبيكش ينقصك شي وتكوني جاهزه من مجاميعو، ولا نبي فرحتك تنطمس ونديرولك عرس كامل مكمل ويليق بقدرك

ملاك هزت رأسها وقالت: وحتى أني عارفاتك شني نيتك وهذا باش نقعد ساكته ومانردش عليك، صدقيني يامروه كله يفوت ومش مهم لا العرس ولا اللي بنديروه أهم شي راحة البال والهني وتنهدت بضيق

مروه قربت وحضنتها، وهي تقول: صح عندك حق الراحه أهم شي، إن شاءالله ربي يهنيك ويسعدك يارب، وطلقتها ورجعت طرمت شواربها وبغيض: لكن ياوخيتي كله يبي ياحليلي شني بيفوته