🥀لعنة🥀

🥀#لعنة♥️🥀

✍️بقلم :ليلى الرايس

التحضيرات على قدم وساق ...

الشيخ لي تكلف بعرس مينة رغم اعتراض مهدي..
تذ**بحو جوج بݣرات وحدة صدقوها على ناس دوار والثانية تسلخات وتقطعاات طروفة كبار العافية زندات وتحطو فوق منها طناجر كبار ديال اللحم ريحت المرقة فاحت فالدوار ..
اما لداخل دهاز مينة لي وصل الصباح مقاد على حقو وطريقو ...

فبيت من بيوت النعاس جلسو مينة من بعد ماحماوها تحميمة لعروسة ولبسوها قميص بيض والفوقي ديالو مطروز بالصم مع الشربيل بيض.

شعرها مضفور جوج ضفيرات ..زينو جبهتها بخيط الروح على شكل خميسة .تكحيلة فالعين وعكر حمر مزين شفايفها ...

عطروها وبخروها ونزلوها لتحت بالصلاة والسلام وزغاريد ...
جلسوها فصالون صغير مدرق مع بنات دوار وبنات العائلة منهم زهور لي كانت فرحانة لمينة ..لابسة تكشيطة مغربية فلون الذهبي مع لحزاام منبت بالحجر ...طالقة شعرها ومزيناه بتاج ديال الورد حمر ...مكحلة عينيها لكبار لي زادو بانو كثر...شفايفها ملونين بعكر فلون د*م الغزال   ...فتنة زينها طغى على الحاضرين..

البسمة على شفايفها تبنج لعقل وتخليك سارح فيها ...

استقبلو عاىلة مهدي بالترحيب وزغاريد مقدمين ليهم لحليب وتمر...

نصبو خيمة كبيرة برا وتفرشات بزرابي وطبالي مدورين بالكراسا...
خناتة غادا جايا تأمر دير هادي حط هادي المهم حلفات حتى توقف على عرس مينة على حقو وطريقو...مينة عزيزة عليها واخا تغوت عليها ومرة مرة تنزل عليها بخبطة كتبقا عزيزة عليها ....

وصل مهدي بطموبيل لابس كوسطار ابيض مع قميص اسود ريحت لعطر كتعطعط..
جاي مخنزر صور راسو هنا وهنا وهو يبان ليه بوبكر تمشى لعندو عاقد لحداش...

بوبكر كيحرك كتافو مع الغيطا والطبل وقف عليه مهدي ...

مهدي(غوت باش يسمعو):نااشط مع رااسك..
بوبكر:(شرع فمو بضحكة عالية ) مولاي سلطان مرحبا مرحبا (كيسفق بيديه وبدا يغني)هاهو مولاي السلطان هاهو(الغياطا وطبالة شادين معاه الميزان كيعاودو غناه)هاهو.
بوبكر:سيدي لمهيدي هاهو ليلة ليلتو هااه سخن عضيماتك هااه وجد العوود وحكم لجااامو هاهو (الطبالة):هاهو.
بوبكر: ديه وجيبو حتى يفيض حليبو (لصق كتفو مع كتف مهدي كيهزهز فيه)اهااه اييه اهااه اييه العزيز على ميمتو عمرو مايتخص(ضرب فدراع مهدي بالضحك) ...

مهدي لي كان واقف مصدوم فيه السيد تلف بيه طريق ..
مهدي(جرو من كول جلابة مبعدو من تما):مال حسك تخوطرتي فراسك؟شتك مصاحبني بزز على جد بويا . وكيفاش ديه وجيبو حتى يفيض حليبو؟ تاعت لي مرمقها معاك..

..(خرج عينيه) رويضة مفشة وقفات بيا فالطريق ..ياك وصيتك تشوفها قبل مانخرج بيها؟.

ناصر(مربع يديه):سير ابوبكر وقف على شغلك..
داز بوبكر كيجري ..