🥀لعنة🥀

🥀#لعنة🥀

واقفة مدرقة بيديها من الشمس وزيد كل شوية يسولها على زهور كيبغي يبكي وتعاود تسكتو بشي كلمة...

بان ليها بوبكر جاي بشوية عليه ...

خناتة(يديها فالنص): فين الدرية؟

بوبكر(كيمسح وجهو من لعرق):مالحقتش  عليها ..غيكون سيدي بناصر لقاها..

صغرات عينيها:فين تلاقيتي نتا مع ناصر؟

بوبكر:جبرتو فطريق جاي..مشا يقلب عليها..

خناتة:زيد قابل شغلك ماتخشيش راسك فلي بعيد عليك...

داز قدامها كيبركم..

خناتة(غوتات عليه):اش ساير تݣول؟

بوبكر:والو الالة غير كنحسبن..

خناتة:كتحسبن عليا؟غبر الله يلكيلك لبلا ...

زيد(شاف طموبيل ناصر جاية):اميي بابا رجع...

وقف قدامهم نزل كيقاد حوايجو تحرك جيهتها حل عليها الباب نزلات مكمشة فمها وعينيها كيدورو فجنابها ... شاف فيها بنص عين وهمس ليها ..

ناصر: طلعي لبيتك ...

خناتة(جراتها كتقلب فيها): اش وقع ليك (شافت خدها حمر)الله على الصكعة شوفي وجهك كي ولا مطبع .فين تلا بيك العود؟

قاطعها ناصر كيغوت على بوبكر...

بوبكر:نعام اسيدي بناصر..

ناصر:(بحدة):سير جيب الخيل مربوط عند الواد(خنزر فيه)هاد المرة دوزتها مرة جاية تغفل على خدمتك غيكون حسابي معااك طوييل...

تحرك بوبكر من تما كيجري ....

زيد:(لاصق فرجلين زهور):هزيني نقولك شي حاجة فودنيك(كيضحك)..

نزلات راسها ليه عز عليها مايبقاش يشوف ماماه ...هزاتو خاشياه فيها ..

زيد:(فودنيها)ندوشو بجوج؟

بتاسمات ليه وحركات راسها باه...

خناتة كتشوف فناصر حاضي زهور مخنزر ..قربات ليه بينما زهور دخلات هازة زيد .....

خناتة:مالك غامخنزر!تطلق شوية مع الدرية ..

شاف فيها وقال:وجدوها من دبا لعشية نبغيها  تكون حلالي ..صيفطي على فقيه الجامع وعلمي  الشيخ ...

خناتة(بفرحة):الله ياولدي فرحتيني الله يسر ليك ..غير هو خاصنا نديرو ليها فالها ..نحنيو ليها ونديرو ليها العادة..

ناصر(مسح على وجهو):ديري لي بغيتي ..نبغيها الليلة ففراشي....( لاح كلامو ومشى)..

خلاها كتبرقق عينيها ..عاد سرات معاها ممعاهش هند..تبعاتو كتعيط عليه..

خناتة:(وقفاتو):فين ديك الدايعة؟

ناصر(حنى براسو وورك على لحروف):خدات مني لفلوس وهربات ...منبغيش سميتها تذكر قدامي ....

زاد وخلاها ...

خناتة(حطات صبعها على حنكها):شوفليك  بنت جووع جاية على ود لفلوس(دفلات فالارض)الله يتبعك لبلا ....

دخلات كتشمر على دراعها و تعيط على رقية ومينة لي حضرو  دغيا...

خناتة:(كتوصي) عدكم ساعة ديرو فيها هادشي لي غنقول ليكم...

نتي (رقية) وجدي توجاد لعروسة بكلشي ديالو ...

ونتي(مينة) سيري لزريبة علمي رجال يوجدو ذبيحة (لعجل) وصيهم ينصبو الخيمة لكبيرة (خرجات عينيها  فيهم) طيروووو يالاه...

#يتبع