الكاتبة:ليلى الرايس...
🥀#لـــــعنة🥀
قالو ناس زمان...
العودة عمرها تولد لبعير والحوت عمرو ياكل الشعير..والرخيس عمرو مايستعرف بالخير وخى تݣلسو على لحرير....
وكل باب لازمو مفتاح...والعبد الديوث مايكون ليه التدبير....
الملح يبنن الطعام والصح يبنن لكلام والرجلة ماشي بالوشام والرخيس مايجوز فيه السلام ...
زين النسا فالسترة ..والراجل يتقاس بالهضرة ...وماتحكمش على الناس بالنضرة ......
فأحد الدواوير ...
صوت لبكا ونواح غواتتهم واصل لجبل ...
تجمعو ناس لقبيلة قدام باب فقيه الجامع الحاج المعطي لي سميتو تخلي الصغير ولكبير يحتارم قدرو ويعطي قيمة لكلامو ...
واحد مناهل لقبيلة : سيادنا مول الأمانة دا امانتو والحاج المعطي الله يرحمو ويوسع عليه قبرو.خلا موراه امانة والامانة لازمنا نحافضو عليها ...
واحد من جماعة:نزوجها لولدي"قدم ولدو قدام جماعة"قاد بيها بخيرو وخميرو..
كثر لغا وكل واحد بغاها لولدو صدااع ولغوات تزااد كلها يقول ولدي حسن من ولدك ماسكتهم غير صوت لحديد فرانا حداهم ..غير شافوه تواخرو اللور كيبلزو بعينيهم تا تقطع حسهم ...
نزل من الطموبيل شيخ لقبيلة راجل طويل مكضر شعر راسو شايب كرشو سابقاه وجهو مخنزر دافع عليهم كبير ..وقف عليهم كي قباض رواح ولخديديم ديالو تابعو من اللور ...
الشيخ: علاااش مجمعين؟
نقز واحد من اهل دوار : سيد الشيخ الحاج المعطي خلا موراه امانة وحنا بغينا نديرو خير فيها ونستروها..
الشيخ:وضح كلامك وعطيني المفيد...
قفقف بالخلعة وكمل كلامو:الحاج المعطي عندو بنية وحدانية تجمعنا بغينا نستروها ونزوجوها لواحد من ولادنا...
زمجر الشيخ بغضب ولاح طرف السلهام فوق كتافو وقال: البنت حنا نستروها "حضرها قدامي".
لخديديم موحى:واخا اسيد الشيخ.
رجال لقبيلة صقرو حاضيين بعينيهم مايقدروش يدويو فحضور الشيخ معروف عليه راجل شراني يقتلل ويحرق اليابس والخضر...
خرجوها مغطية بحايك بيض كيبانو عينيها حمرين بلبكى ...
الشيخ:عري على وجهك..
نزلات الحايك وبان زين الفتان الشعر كحل مسبسب عينين كبار شفار مقلوبين حجبان مرسومين والفم شهد ملون بالحمر خدوود موردين سبحان لي صورها وعطاها القدة والزين...
رجال لقبيلة تحلو وعينيهم تمردو كلها يقول انا مولاها ولي جا يخطب لولدو صدق باغيها ليه ...الهضرة تعالات بيناتهم...والشيخ فمو تحل مابغى يتسد ...دااخ فيها حمقاتو وخرجات ليه لعقل .محيدش عينيه عليها غتاصبها بالشوفة وحلف بحلوفو منها مايتفك ...
الشيخ:يالله كل واحد يقصد خيمتو لبنت ترشمات .. يالله فرقو عليا الجقلة...
#يتبع
هذا كان تمهيد لاجزاء جايين انشاء الله يكون تفاعل ...فرحوني بنجمة 😘🥀
🥀🥀🥀🥀
