الكاتبة ليلى الرايس....
جات مينة كتجري ملي سمعات صوت تهراس غير دخلات شافت الحاج مسرح فالارض شاد على صدرو طلقاتها بغوتة كتصمك ....جاية خناتة كتخلف عينيها خرجو تتشوف الشيخ وجهو صفر حنات عليه كتضرب فوجهو ..
خناتة:سيد الشيخ اش واقع ليك (بانت ليها زلافة مهرسة وديكشي لكحل سايح فالارض )مينة عاونيني نكعدوه .
ناضت خناتة جبدات طاسة عمراتها بالحليب خضر وشرباتو ليه بزز ..غير وصل لمعدة تقيا هووووش ..ناضت عمرات معلقة تاع لعسل الحر خشاتها ليه فمو ..عاد رتاحت ..
خناتة(غوتات على عيالات الشيخ):وااقفين عليا كي طلابة الله يغبر ليكم الشقف (عوجو فمهم وزادو خلفة ممسوقينش لشيخ يموت ولا يعيش المهم ميجريش عليهم) ....
مينة:لالة نعيط لبوبكر (خديديم الشيخ،)يهزو معانا؟
خناتة (عينيها فزهور مقنتة وساكتة):سيري دغيا قوليه يجيب معاه جوج رجال يهزوه لبيتو ....
غير خرجات مينة ناضت خناتة لزهور..
خناتة:اش سايرة ديري هنا؟
زهور(مغوبشة ):والو امي (شيرات لشيخ)شربلي حاجتي ...
خناتة(تتهضر بشوية باش ميسمعهاش الشيخ):اويلي المصيبة اش داك تهزي شي حاجة من بيت لخزين اش دخلك تم هاا؟
زهور(حنات راسها بخجل):منعاودش اميي سمحيلي...
خناتة:(جهدات صوتها باش يسمعها الشيخ)حسك منسمعوش يالله غبري عليا وجهك سيري طلي على حفيدي مخلياه ناعس حدى النافورة ونتي هنا باغة تشربي سم لفيران وتموتي(قاطعها الشيخ).
الشيخ:(خرج عينيه)سم الفيران؟؟
خناتة(ضارت لعندو):اييه سم لفيران كنت موصية عليه بوبكر جابو ليا على ود الفيران لكاينين فبيت لخزين...(حاضية بعينيها الشيخ واش دازت عليه الكذبة ولا لا. كون عرف داكشي لشربو عشوب مخلطين ومطحونين وزايدة عليهم شلا تخربيق تتحطهم لعيالاتو على حساب ميولدوش ليه ...هي تتحط شوية فماكلتهم ونهار كتحطو ليهم متيكونش ناصر حاضر وحتى حفيدها مكياكولش ممعاهم كتعمد تحط ليهم غير هما ....).....
زهور(حطات يدها على فمها):الله الله سم الغيران؟(خرجات عينيها لكبار )عدكم فيراااان؟
خناتة:غبري عليا منشوفش وجهك هاد النهار....
خرجات من الكوزينة ودازت لزيد لقاتو متكي ناعس فوق الربيع حدى النافورة هزاتو بيديها وطلعاتو لبيت ناصر حطاتو فوق الناموسية ونعسات حداه مغطيين ..عينيها كيدورو فكل جيهة خايفة يخرج ليها شي فار.....
#يتبع
