🥀#لعنة🥀
ريحة المرقة فاااحت فالدوار لخبار شاعت ولد الشيخ معرس ...الخيمة وقفات والناس بدات كتجي معارضين على راسهم ههه. نهار تكون شي حاجة فدار الشيخ كيحضر كلشي ....
فبيت زهور....
رقية:ونوضي خلينا نلبسوك!..
لاحت ليهم داك القفطان فالارض:مابغيتش نتزوج مابغيتش...
رقية(هزاتو من الارض):شكون بحالك زهرك بيض غتدي زين رجال على مزيناتو (وقفاتها) هو بغاك ليه تسخني ليه فراشو (بضحكة) بغى يزيدك على مرتو...مكافياهش وحدة بحالو بحال بوه ههه..
مينة(جرات منها القفطان):خليني انا نتكلف بيها غي سيري نتي شوفي لالة بغاتك...
خرجات رقية وبقات مينة شادة معاها الخاطر .. لبساتها قفطان بيض مطرز بالصم وشربي بيض وكحلات ليها عينيها وشمات ليها ذقنها دايرة ليها العادة ديالهم.. ربطات ليها خيط الروح فوق جبهتها ... وقفاتها قدام لمرايا تتشوف فيها..
مينة: تبارك الله زينك مسرار بشوفة طيحي رجال شلاغمية هههه..(نغزاتها)خاصك تفرحي غتزوجي براجل كامل مكمول الزين والحروشية ااااح(شدات على قلبها) سعداااتك بيه (غمضات عينيها ) مشهية نعس فوق داك الصدر الا جات الموت مرحبا بيها(محساتش بالباب لي تحل).
خناتة:(نزلات عليها بخبطة لضهرها)الله يقلل حياك ياجحمومة.. ينعسوك فالروضة المنسية مانشوفش خنشوشك يالاه تهزي لشغالك....
خرجات كتحك فالضربة.....
خناتة(ابتسامة):الله على زينة لبنات يافرحي بيك وياسعدي ...(كتبوس فيها وتعنق) ..
جبدات زيف من صدرها وسط منو دمليج ذهب لبساتو ليها..
خناتة:هذا عزيز عليا ديال اميي الله يرحمها عطاتو ليا وانا عطيتو ليك ...
زهور(عنقاتها ):اميي مابغيتوش هءهءه ..
خناتة(شافت فيها):ماتخافيش منو ولدي حنين غاكيبان ليك مخنزر ..(ببتسامة)دبا تعاشريه وتعرفيه مزيان...خليك هنا حتى يجيو لبنات ينزلوك....
خرجات وبقات زهور كالسةكتنهد ..
فالخيمة. واقف الشيخ بسلهامو رحب بالمقدم والقايد والفقيه وشي مخازنية ..
الخمسة دلعشية لعشا طاب ريحتو عطات وخبز الفورنو وجدوه ..موقفاهم خناتة ديرو هادي وجدو هادي صايبو لحلاوي وريحة الرفيسة بدجاج البلدي عطات ....
بداو يسمعو فاللغيطة والطبالة والكمانجا مكاين غالحيوح الدعوة تخلطات الشراب كيتسربا مع طروفا ديال الحشيش كلشي ناشط زاهي ...الشيخ موفر ليهم كلشي...
لداخل ....
لعيالات ناضو كيشطحو مع طقطوقة الجبلية ماكاين غالله يعطيك صحيحتك ...
مينة(طالعة فدروج كتشطح دخلات عليها):نوضي هودي معايا لالة بغاتك تكلسي مع لعيالات نحنيو ليك ...
ناضت معاها كضور فعينيها ..نزل عليها واحد السر مع دوك لعنين لي كيسلبو العقل والفورمة جاها القفطان مع لحزاام خطير....
شافوها بنات دوار حلو عينيهم فيها ..جاتهم الغيرة منها على زينها والفورمةوالسالف مطلوق وكثر شي على الراجل لي غتدي .....
ناضو كيشطحو وهي غير ساكتة متبعة بعينيها ....
جابت خناتة ايزار بيض مشبك حطاتو فوق راسها غطاتها كاملة عرات ليها غير يديها ورجليها ..
حطات ليها وراق نعناع وخميسة ديال ذهب فيديها وعيطات على النقاشة ديال دوار .....
خرجات رقية كتوصي بوبكر. على غنية يغنيها الجووق....
شوية تسمعات مجهدة فالبيفان...
🎶الالة يما غريبة وماعندي حباب ......
🎶ناس تعيط اياما وانا قلبي مغير...
🎶الالة يما غريبة ومعاندي حباب....
🎶علي علي يالحمام وعلي فوق الغابة....
🎶ناس كلها بحبابا وانا لايما لابابا.....
🎶لالة بلادي لالة فيها حجر فيها طوب .....
🎶 اش خرجني من بلادي غير الوعد والمكتوب......
🎶الالة يما غريبة وماعندي حباب........
............
كتشهق وجها حمر دموع كيسيلو بلا حباسات .....
#يتبع
