أنارت عتمة قلبي

الحلقة الثانية عشر

درس مراد سيارته قدام الحوش ونزل وزاد إحساسه بالضيق أول ماشاف السياره اللي واقفه قدام حوشهم واللي منها قدر يعرف مهية الضيوف اللي عندهم

زفر بضيق وقدم فتح الباب الرئيسي وخش متوجه للمربوعه الخارجيه، بس قبل مايقدم ويخش، غير إتجاهه وهو حاس أنه مش في مزاج يسمحله يشوفهم ويتعامل مع الموقف اللي ممكن يصير وهو مش ضامن ردة فعله اللي ممكن تصدر منه وإضايق بوه وتزيده فوق ماهو مريض
كمل مشي للباب الرئيسي للحوش وفتح الباب

خش وقرن حواجبه وهو يسمع في صوت بتول العالي اللي واصل صداه لعنده بوضوح، قدم من الجناح وكله إستغراب ممزوج بنوع من الخوف أنه يكون صار شي ضايقها في غيابه

سرع خطواته لما سمع تداخل أصوات ثانيه مع صوت بتول الواضح الغضب في نبرة صوتها

وفجأة حل الصمت وأنظار كل الموجودين توجهتله برجاء بمجرد دخوله

مراد، بإستغراب: خيركم شني فيه!!

نهي، برجاء: بالله تعالا يامراد قول كلمه مع أم رأس يابس هذي، وهيا تأشر على بتول اللي ربعت إيديها وقعدت تشوفلها بنظرة تحدي وهيا وجهها أحمر من الغضب

مراد،بجديه: مني قصدك، بتول!!

ناديه، بضيق: البنات جدهم عبد السلام في المربوعه ويبي يشوفهم، وبتول مسكره رأسها لاتبي تطلع ولا خلت خواتها يطلعو

بتول، بغضب: أمي ليها إسبوع ميته هذا وين إذكر أنه عنده بنات ولد وجاي يشوفهم، وبعياط: أحني مش راح نطلعوله ومانبوش إنشوفوه وماحد يقدر يفرض عليا وعلى خواتي أي شي أحني مانبوشي فاهمين

مراد، بحده: بتول!! صوتك معاش يعلى تمام!!
وبعدين مني اللي فرض عليكم وأجبركم على شي أنتم ماتبوشي، ها!!

بتول نزلت رأسها وأشرت على نهي بصبعها، وبغيض: هذه قالت تطلعي أنتي وخواتك غصبآ عنك ومن غير تشريط ودلع بنوت، مش ناقصنا مشاكل وهم اللي عشناه سادنا

مراد إنصدم وشاف بلوم لنهي اللي كانت تشوف لبتول بغيض على كلامها اللي أعتبراته نوع من الوقاحه لما قالت هذه مش خالتي

نهي، بضيق: أني مش قصدي نغصبهم يامراد، بس تصرفهم بهالطريقه غلط، مهما كان هذا جدهم وراجل كبير ومريض قلب وكان مسافر وإمداير عمليه وجايهم من المطار طول باش يشوفهم ويأخذ بخاطرهم عيب مايطلعولاش، وحتى بوي راح يضايق ويزعل منهم لو دارو هكي

مراد، أستغرب لأنه ماكانش عنده علم بأنه مريض وإمداير عمليه، حتى غيابه في العزي برره على أساس أنه متحشم من عملة ولده اللي دارها وماعنداش وجه يقابل بيه قدام الناس

ناديه، برجاء: معليشي يابنيتي أطلعي هالمره بس، ماتكسريش بخاطره جاي على خاطركم ومتعني، ومرات يكون بوك ..... وقبل ماتكمل كلامها سكتت لما قطعت عليها بتول